Carta na̱ Cuerpo Gobernante
Ñaniyó xíʼin kuʼvayó:
“Ndiʼi yichi̱ táxindi̱ tixaʼvi ndaʼa̱ Ndióxi̱ tá káʼa̱nndi̱ xíʼinra xa̱ʼanndó. Chi xíni̱ndi̱ va̱ʼaní chiñu kéʼéndó, ni íyo tu̱ndóʼo nu̱úndó íyo ndakú-inindó chi kándíxaníndó Tátayó Jesucristo.” (1 Tes. 1:2, 3.) Nda̱a̱ tá káchi tu̱ʼun yóʼo saá íyo ña̱ ndákanixi̱níndi̱ xa̱ʼandó. Táxiníndi̱ tixaʼvi ndaʼa̱ Jehová xa̱ʼa ña̱ chíndeé táʼanndó xíʼinndi̱, va̱ʼaní chiñu kéʼéndó.
Ku̱i̱ya̱ ni̱ya̱ʼa ndeéní ni̱xi̱kandó na̱túʼunndó xa̱ʼa Ndióxi̱, ka̱chíñuníndó nu̱úra. Savandó ke̱endó ni̱xa̱ʼa̱nndó inka país nu̱ú loʼoní publicador íyo, savatundó míí país nu̱ú ndóondó ni̱xa̱ʼa̱nndo soo ña̱ kúni̱ndó kúúña keʼé ku̱a̱ʼákandó chiñu Ndióxi̱. Savatundó ni̱xi̱kandó na̱túʼunndó xa̱ʼa Ndióxi̱ nu̱ú xíka ku̱a̱ʼá na̱ yiví. Savandó xi̱kuundó precursor auxiliar yo̱o̱ ña̱ ni̱xi̱yo Conmemoración, á tá ki̱xi ta̱ superintendente ña̱ circuito á tá ni̱xi̱yo ña̱ campaña ña̱ yo̱o̱ agosto ña̱ 2014. Kúsi̱íní-inindi̱ xíʼin chiñu kéʼéndó chi xíni̱ndi̱ xíʼin ndinuʼu-inindó kéʼéndóña (Col. 3:23, 24). Ta táxiníndi̱ tixaʼvi ndaʼa̱ Jehová xa̱ʼa ndiʼi ña̱yóʼo.
Saátu kúsi̱íní-inindi̱ xa̱ʼa ña̱ káchíñuníndó ña̱ kuva̱ʼa veʼe nu̱ú ndásakáʼnuyó Jehová. Xa̱ʼa ña̱ ku̱a̱ʼáka na̱ yiví ku̱a̱ʼa̱n sákuaʼa xa̱ʼa Ndióxi̱ xíniñúʼuníyó veʼe yóʼo (Is. 60:22). Tá kúú ku̱i̱ya̱ ni̱ya̱ʼa ki̱ʼva 8,201,545 xi̱kuu na̱ publicador ta ki̱ʼva 9,499,933 kúú na̱ yiví na̱ ka̱ʼvina xíʼin. Xa̱ʼa ña̱yóʼo xíniñúʼu ndukáʼnuka veʼe Betel á xíniñúʼu kuva̱ʼaka inkaña. Ta saátu xíniñúʼu kuva̱ʼaka Salón ña̱ Reino. Savatu país xíniñúʼu kuva̱ʼa veʼe ña̱ traducción nu̱ú koo na̱ traductor na̱ sáyáʼa tutu tu̱ʼun Ndióxi̱ tu̱ʼun miína. Chi xíniñúʼu koona ñuu nu̱ú káʼa̱nna tu̱ʼun miína.
Xa̱ʼa ña̱ ndeéní íyo chiñu, ¿ndáaña keʼéyó ña̱ va̱ʼa chindeé táʼanyó xíʼinna? Savayó va̱ʼa ka̱ʼa̱nyó xíʼinna ña̱ kúni̱yó kachíñuyó nu̱ú kúva̱ʼa veʼe yóʼo. Ni xíni̱yó keʼéyó veʼe ni kǒo xíni̱yó va̱ʼava chindeé táʼanyó xíʼinna ña̱ taxiyó ña̱ʼa ña̱ kúúmiíyó ndaʼa̱na (Prov 3:9, 10). Tá kúma̱níka kuva̱ʼa tabernáculo, na̱ ñuu Israel ku̱a̱ʼání ña̱ʼa ña̱ xi̱kuumiína ta̱xina. Nda̱a̱ ni̱ka̱ʼa̱nna xíʼinna ña̱ ná kǒo taxikanaña (Éx. 36:5-7). Tá káʼviyó nu̱ú Biblia xa̱ʼa ña̱yóʼo nda̱a̱ níma̱yó xáa̱ña, va̱ʼaní yichi̱ chi̱núuna nu̱úyó. Ñaniyó, ku̱ʼvayó xa̱ʼa ndiʼi ña̱ kéʼéndó táxiníndi̱ tixaʼvi ndaʼa̱ Jehová.
Inka xa̱ʼa ña̱ kúsi̱íní-inindi̱ kúúña ku̱a̱ʼá na̱ ñaniyó á ku̱ʼvayó ni íyo tu̱ndóʼo nu̱úna íyo ndakú-inina. Tá kúú sava na̱ va̱lí na̱ testigo Jehová na̱ Corea del Sur nani tá ku̱i̱ya̱ 1950 chíka̱a̱nana veʼeka̱a xa̱ʼa ña̱ kǒo xíínna ki̱ʼvina xíʼin ña̱ política ni ña̱ ku̱ʼu̱nna ku̱a̱chi. Xa̱ku̱a̱ʼá ku̱i̱ya̱ ku̱a̱ʼá na̱ hermano yáʼa nu̱ú tu̱ndóʼo yóʼo ta va̱ása ndíkó-inina. Va̱ʼaní yichi̱ ndákoona nu̱úyó ña̱ koo ndakúka-iniyó xíʼin Ndióxi̱.
Ñuu Eritrea, u̱ni̱ na̱ ñaniyó xa̱yáʼa o̱ko̱ ku̱i̱ya̱ ñúʼuna veʼeka̱a. Ta savatu ná ku̱ʼvayó ni loʼo tiempo kúúña soo táannaná veʼeka̱a xíʼin se̱ʼená. Ni ndeéní xíkana xa̱ʼana ña̱ ná kǒo taankanana veʼeka̱a soo tá káa káava. Ta ni saáví na̱ ñaniyó íyo ndakúní-inina xíʼin Jehová. Ñúʼuní-inindi̱ xa̱ʼana, káʼa̱nníndi̱ xa̱ʼana xíʼin Ndióxi̱ (Rom. 1:8, 9).
Ku̱a̱ʼání ndóʼó kǒo veʼeka̱a ñúʼundó xa̱ʼa ña̱ kándíxandó Ndióxi̱. Soo savandó xa̱ku̱a̱ʼa̱n kúchée, na̱ kúúmií kue̱ʼe̱, savandó kǒo xíín na̱ veʼendó sakuaʼandó xa̱ʼa Ndióxi̱, á íyokatu inka ña̱ ndóʼovandó, iinlá miíndó xíni̱va. Ta ni saáví ndásakáʼnu tá ndásakáʼnuvandó Ndióxi̱ (Sant. 1:12). Xa̱ʼa ña̱yóʼo táxiníndi̱ tixaʼvi ndaʼa̱ Jehová.
Ni ku̱a̱ʼá ña̱ ndóʼondó, íyo ndakú-inindó, xa̱ʼa ña̱yóʼo táxiníndí “tixaʼvi ndaʼa̱ Jehová chi va̱ʼaní inira” (Sal. 106:1). Kúʼvi̱ní-inindi̱ xínindi̱ ndóʼó ta káʼa̱nníndi̱ xíʼin Jehová ña̱ ná taxikara ndée ndaʼa̱ndó ña̱ va̱ʼa ndasakáʼnundóra ndiʼi tiempo.
Ñanindó,
Na̱ Cuerpo Gobernante na̱ testigo Jehová