Ña̱ ndáka̱tu̱ʼunna

◼ ¿Á va̱ʼa kuniñúʼuyó Internet ña̱ natúʼunyó xa̱ʼa Ndióxi̱ xíʼin na̱ inka país na̱ va̱ása xíni̱yó?

Sava na̱ publicador xíniñúʼuna Internet ña̱ sánáʼa̱na xa̱ʼa Biblia na̱ íyo inka país nu̱ú kǒo xíínna natúʼunyó xa̱ʼa Ndióxi̱ á nu̱ú kǒo íyo ku̱a̱ʼá na̱ Testigo. Sava va̱ʼaní kána chiñu tá íxaana saá. Soo xíniñúʼu kiʼinyó kuenta ña̱ va̱ása taxiyó correo electrónico, á ña̱ natúʼunyó xíʼin na̱ kǒo xíni̱yó (koto Nuestro Ministerio del Reino ña̱ julio 2007, página 3). Ni ña̱ va̱ʼa kúúña túviyó ña̱ kúni̱yó natúʼunyó xíʼin inka na̱ yiví na̱ ndixa kúni̱ sakuaʼa xa̱ʼa Ndióxi̱, soo va̱ása xíni̱yó ndáana kúú na̱ nátúʼunyó xíʼin. Savana kúú na̱ yiví apóstata na̱ kǒo kúni̱ka xíni Jehová (1 Cor. 1:19-25; Col. 2:8). Sava ñuu nu̱ú kǒo xíínna natúʼunyó xa̱ʼa Ndióxi̱ xíniñúʼu kiʼinyó kuenta chi sava na̱ chíñu xíto ndiʼina ña̱ kéʼéyó. Ta nda̱a̱ na̱ Testigo na̱ ndóo país kán kivi chika̱a̱yóna tu̱ndóʼo. Ña̱kán va̱ása va̱ʼa ndukúyó na̱ inka país nu̱ú Internet ña̱ natúʼunyó xíʼinna xa̱ʼa Ndióxi̱.

Tá nátúʼunyó xa̱ʼa Ndióxi̱ xíʼin na̱ inka país na̱ va̱xi kotondeʼé país nu̱ú ndóoyó va̱ása va̱ʼa nandukúkayóna ña̱ natúʼunyó xíʼinna tá xa̱ndikóna chí ñuuna. Va̱ʼava natúʼunyó xíʼinna tá na̱ Betel na̱ íyo ñuu nu̱ú ndóoyó káʼa̱n xíʼinyó ña̱ va̱ʼa keʼéyó saá. Soo ña̱ va̱ʼa keʼéyó kúú ña̱ sanáʼa̱yóna kuniñúʼuna jw.org ña̱ va̱ʼa kunda̱a̱ka-inina xa̱ʼa Ndióxi̱ á ña̱ va̱ʼa ndani̱ʼína Betel ña̱ íyo ñuuna. Tá íyo Salón ña̱ Reino ñuuña, va̱ʼa ka̱ʼa̱nyó xíʼinna ná ku̱ʼu̱nna kán. Tá kúni̱na kunda̱a̱ka-inina xa̱ʼa Ndióxi̱ ka̱ʼa̱n xíʼinna ná taxina direcciónna ndaʼún ta taxiña ndaʼa̱ ta̱ Secretario, ta̱yóʼo ki̱ʼvira Internet jw.org ña̱ chindaʼáraña ku̱ʼu̱nña Betel. Ta na̱ ndóo Betel ña̱ íyo ñuuna kúú na̱ kivi ku̱ʼu̱n kotoñaʼá ña̱ chindeénana chi na̱yóʼo kúú na̱ xíni ndáa ki̱ʼva káa ñuu nu̱ú ndóona, (koto Nuestro Ministerio del Reino ña̱ junio 2014, página 7, xíʼin Nuestro Ministerio del Reino ña̱ noviembre 2011, página 2).

Tá iin na̱ xa̱káʼviyó xíʼin ku̱a̱ʼa̱nna koona inka país á tá káʼvituyó xíʼin savana xíʼin Internet soo va̱ása xíni̱yóna chi na̱ inka país kúúna xíniñúʼu keʼéyó ña̱ xa̱ni̱ka̱ʼa̱nyó xa̱ʼa nu̱ú inka párrafo. Soo va̱ʼava natúʼun loʼokayó xíʼinna xa̱ʼa Ndióxi̱ nda̱a̱ ná ndani̱ʼíyó iin na̱ publicador na̱ íyo ñuu nu̱ú íyona ña̱ ku̱ʼu̱nna kotonana. Soo tá íyona país nu̱ú va̱ása xíín na̱ chíñu natúʼunyó xa̱ʼa Ndióxi̱, xíniñúʼu kiʼinníyó kuenta tá káʼyiyó carta ku̱a̱ʼa̱n nu̱úna ña̱ káʼa̱n xa̱ʼa Biblia á tá chíndaʼáyó mensaje á tá káʼa̱nyó xíʼin teléfono (Mat. 10:16).