Nda̱saa xa̱a̱yó níma̱ na̱ nátúʼunyó xíʼin
1. ¿Ndáaña ndo̱ʼo na̱ discípulo ta̱ Jesús tá na̱túʼunra xíʼinna?
1 Ta̱ Jesús ni̱xa̱a̱ra níma̱ na̱ xi̱natúʼunra xíʼin, ña̱ Biblia káʼa̱nña iin yichi̱ na̱ discípulora ‘nda̱a̱ níma̱na ni̱xa̱a̱ ña̱ nda̱kanira nu̱únaʼ (Luc. 24:32). Ña̱ va̱ʼa kuniso̱ʼoyó ña̱ káʼa̱n Ndióxi̱, níma̱yó xíniñúʼu kana ña̱yóʼo. Ña̱kán, ¿nda̱saa xíniñúʼu ka̱ʼa̱nyó xíʼin na̱ káʼviyó xíʼin ña̱ va̱ʼa nasamana miína? (Rom. 6:17.)
2. Tá kíʼinyó kuenta xíʼin ña̱ káʼa̱nyó, ¿nda̱saa chindeéña miíyó ña̱ xa̱a̱yó níma̱ na̱ yiví?
2 Ná kiʼinyó kuenta xíʼin ña̱ ka̱ʼa̱nyó xíʼinna. Va̱ása nasa̱ma na̱ yiví ña̱ ka̱ʼa̱n kuitíyó xíʼinna ndáaña kútóo Jehová ta ndáaña va̱ása kútóora. Chi tá ku̱a̱ʼá texto ña̱ káʼa̱n xa̱ʼa ña̱ kéʼéna ná kaʼviyó nu̱úna sana sa̱a̱vana ta kǒo kuni̱kana kuniso̱ʼona. Ña̱ va̱ʼa kuniso̱ʼona ña̱ káʼa̱nyó xíʼinna, siʼna xíniñúʼu kunda̱a̱-iniyó nda̱chun kúú ña̱ kéʼéna saá. Tá ná ndakani vií xi̱níyó xa̱ʼa pregunta ña̱ ka̱ʼa̱nyó xíʼinna sana ka̱ʼa̱nvana xíʼinyó xa̱ʼa ña̱ ndákanixi̱nína (Prov. 20:5). Tasaá kúú ña̱ kivi ndaka̱xinyó texto ña̱ va̱xi nu̱ú Biblia ña̱ kivi xa̱a̱ níma̱na. Xa̱ʼa ña̱yóʼo kúú ña̱ xíniñúʼu kundi̱ʼi̱-iniyó xa̱ʼana ta kuée koo iniyó xíʼinna (Prov. 25:15). Ta ndakaʼún su̱ví ndiʼina inkáchi sakuaʼa. Kuée kuéeva ndakiʼinna ña̱ espíritu yi̱i̱ Jehová ta nasamana ña̱ ndákanixi̱nína xíʼin ña̱ kéʼéna (Mar. 4:26-29).
3. ¿Nda̱saa chindeéyó na̱ káʼviyó xíʼin ña̱ keʼéna ña̱ kúni̱ Ndióxi̱?
3 Ná chindeéyóna keʼéna ña̱ kúni̱ Ndióxi̱. Tá ná kaʼviyó sava texto xíʼinna ña̱ káʼa̱n xa̱ʼa ña̱ va̱ʼaní ini Jehová ta kúʼvi̱-inira xínira miíyó, ña̱yóʼo chindeé miína ña̱ xa̱a̱na keʼéna ña̱ kúni̱ra. Ña̱ va̱ʼa kunina ña̱ ndáyáʼvinína nu̱ú Jehová, va̱ʼa kaʼviyó Salmos 139:1-4 xíʼin Lucas 12:6, 7. Tá xáa̱ iinna kúnda̱a̱-inina ña̱ va̱ʼaní-ini Jehová xíʼinna, saá kúú ña̱ kíxaʼána kúʼvi̱ka-inina xíninara (Rom. 5:6-8; 1 Juan 4:19). Tá sákuaʼana ku̱a̱ʼa̱nna xáa̱na kúnda̱a̱-inina ndáaña kútóo Jehová ta ndáaña sákusuchí-inira, ta násamana miína ña̱ keʼéna ña̱ kúni̱ra (Sal. 78:40, 41; Prov. 23:15).
4. ¿Nda̱saa va̱ʼa kundiku̱nyó yichi̱ Jehová tá sánáʼa̱yó inkana?
4 Jehová va̱ása íxandúxara xíʼinyó ña̱ keʼéyó ña̱ kúni̱ra. Ta káʼa̱nra xíʼinyó tá ná kuniso̱ʼoyó consejora ña̱ va̱ʼa miíyó kúúña (Is. 48:17, 18). Ndíku̱nyó yichi̱ Jehová tá va̱ása íxandúxayó xíʼin na̱ káʼviyó xíʼin ña̱ keʼéna ña̱ kúni̱ miíyó, chi níma̱ miína kanaña ña̱ nasa̱mana (Rom. 12:2). Tasaá kúú ña̱ kuyatinkana nu̱ú Jehová ki̱vi̱ tá ki̱vi̱, chi ta̱yóʼo kúú ta̱ xíto níma̱yó (Prov. 17:3).