¿Nda̱saa kuniñúʼuyó ña̱ libro Ña̱ sánáʼa̱ Biblia ña̱ tu̱ʼun ña̱ va̱ása yo̱ʼvi̱?

Ña̱ libro What Can the Bible Teach Us? xíʼin ña̱ libro Ña̱ sánáʼa̱ Biblia, u̱vi̱ saáña ku̱a̱ʼání nu̱ú tu̱ʼun kanaña. Inkáchi ña̱ káʼa̱n u̱vi̱ saá libro yóʼo xa̱ʼa ta inkáchi ña̱ va̱xi nu̱úña. Soo ña̱ libro xa̱á yóʼo káxika káʼa̱nña ta va̱ása yo̱ʼvi̱ ña̱ va̱xi nu̱úña. Ña̱yóʼo na̱kuva̱ʼaña ña̱ va̱ʼa kunda̱a̱-ini ndiʼina xíʼinña. Nu̱ú ndíʼi ña̱ libro, va̱ása va̱xika ña̱ apéndice, ndáa nota ña̱ káʼa̱n xa̱ʼa tu̱ʼun ña̱ yo̱ʼvi̱ va̱xi nu̱úña. Nu̱ú kíxaʼá ña̱ capítulo kǒoka pregunta va̱xi, ni recuadro ña̱ repaso. Ndáa resumen ña̱ párrafo va̱xi. Nda̱a̱ táki̱ʼva íxaayó xíʼin libro Ña̱ sánáʼa̱ Biblia táxiyóña ndaʼa̱ na̱ yiví, saátu keʼéyó xíʼin libro ña̱ xa̱á, nda̱a̱ ndáaka yo̱o̱ kúúña taxivayóña ndaʼa̱na. ¿Nda̱saa va̱ʼa kuniñúʼuyó libro yóʼo ña̱ sanáʼa̱yó na̱ yiví?

RESUMEN. Kaʼvi tá kaʼvikavayó ña̱ libro Ña̱ sánáʼa̱ Biblia xíʼin ndiʼi na̱ yiví, kaʼviyó párrafo ta keʼéyó ña̱ pregunta ña̱ va̱xi nu̱úña. Soo ta iinna íxayo̱ʼvi̱ña xíʼinna ña̱ kunda̱a̱-inina xíʼin libro yóʼo. Saá kúú ña̱ kuniñúʼuyó libro ña̱ va̱xi tu̱ʼun ña̱ va̱ása yo̱ʼvi̱ xíʼinna. Kivi kuniñúʼuyó resumen iin iin capítulo ña̱ va̱ʼa kaʼviyó xíʼinna ta ná ka̱ʼa̱nyó xíʼinna ña̱ ná kaʼvi miína párrafo ña̱ capítulo. Ña̱ tema ña̱ kúni̱yó natúʼunyó xa̱ʼa xíʼinna kivi natúʼunyóña xíʼinna ti̱xin ña̱ xa̱ʼu̱n minuto. Ña̱ resumen va̱ása va̱xi ku̱a̱ʼá párrafo nu̱úña nda̱a̱ táki̱ʼva íyo iin iin capítulo. Xa̱ʼa ña̱yóʼo iin iin publicador xíniñúʼu chika̱a̱na ndée ña̱ siʼnaka kaʼvinaña ta ndakanixi̱nína xa̱ʼa na̱ káʼvina xíʼin ndáaña xíniñúʼu na̱yóʼo. Tá káʼvina párrafo ña̱ capítulo, na̱ publicador kivi kuniñúʼuna ña̱ resumen ña̱ va̱ʼa natúʼunna xa̱ʼa ña̱ xa̱a̱ ka̱ʼvina.

NOTA ÑA̱ NÁTÚʼUN XA̱ʼAÑA. Tu̱ʼun ña̱ va̱xi nu̱úña xíʼin nota ña̱ va̱xi nu̱úña inkáchi va̱xiña táki̱ʼva va̱xiña nu̱ú iin iin capítulo. Mií na̱ publicador kachi á kaʼvina nota yóʼo tá sa̱kán káʼvina á tá xa̱a̱ ndi̱ʼi ka̱ʼvina.