Sakuaʼaka ña̱ va̱ʼa sanáʼa̱kaún: keʼé revisita

¿NDA̱CHUN XÍNIÑÚʼU KEʼÉYÓÑA? Ku̱a̱ʼání na̱ yiví kúni̱na kunda̱a̱-inina míí ña̱ nda̱a̱ xa̱ʼa Ndióxi̱ (Isa 55:6). Ña̱ va̱ʼa sanáʼa̱yóna xíniñúʼu tuku ta tuku ndikóyó nu̱úna. Xa̱a̱ síín síín tu̱ndóʼo yáʼa iin iinna nu̱ú, ña̱kán ná kotoyó ndáa ki̱ʼva natúʼunyó xíʼin iin iinna. Ña̱ va̱ʼa sanáʼa̱ viíyóna xíniñúʼu xa̱a̱ kaʼvi kúeeyó tá xíniñúʼutu ndakanixi̱níyó xa̱ʼa ña̱ kúni̱yó sanáʼa̱yóna iin iin yichi̱ tá xáʼa̱nyó, ta ná kǒo nandósóyó chi ña̱ kúni̱yó kúúña kixaʼáyó kaʼvi ni̱ʼiyó xíʼinna.

¿NDÁA KI̱ʼVA KEʼÉYÓÑA?

• Chika̱a̱ ndeé ña̱ kama ndikóún nu̱úna (Mt 13:19).

• Vií vií ka̱ʼún xíʼinna, to̱ʼó ka̱ʼún xíʼinna.

• To̱ʼó to̱ʼó chindeúnna. Kuniñúʼu ki̱vi̱na ña̱ ka̱ʼún xíʼinna. Ka̱ʼa̱n xíʼinna ña̱ ndi̱kóún nu̱úna: ña̱ va̱ʼa ndakuiún ña̱ ni̱nda̱ka̱tu̱ʼunna yóʼó, ña̱ va̱ʼa taxiún iin revista ndaʼa̱na, ña̱ ka̱ʼún xíʼinna xa̱ʼa ña̱ va̱xi nu̱ú Internet, ña̱ va̱ʼa na̱ʼún video nu̱úna á ña̱ ka̱ʼún xíʼinna ndáa ki̱ʼva káʼviyó xíʼin iinna. Tá inkava ña̱ ndóʼona kíxaʼána nátúʼunna xíʼún xa̱ʼa, va̱ʼatu natúʼún xíʼinna xa̱ʼa ña̱yóʼova (Flp 2:4).

• Chindeé táʼan xíʼinna ña̱ va̱ʼa ná xa̱a̱ña níma̱na, kaʼvi iin texto nu̱úna á taxi iin tutu ndaʼa̱na (1Co 3:6). Chika̱a̱ ndeé ña̱ va̱ʼa kitáʼún xíʼinna.

• Kindo̱o xíʼinna ña̱ ndikóún nu̱úna.