ÑA̱ KÉʼÉYÓ NA̱ TESTIGO

Iin ña̱ xa̱á ña̱ kixaʼáyó kuniñúʼuyó ti̱xin reunión yóʼo

Yo̱o̱ enero ña̱ ku̱i̱ya̱ 2018 kixaʼáyó kuniñúʼuyó sava nota, na̱ʼná xíʼin video, ña̱yóʼo ka̱naña nu̱ú Traducción del Nuevo Mundo de las Santas Escrituras (nwtsty) ña̱ va̱xi nu̱ú Internet, soo ña̱yóʼo kúma̱ní kanaña tu̱ʼun miíyó. Ña̱yóʼo chindeéña miíyó ña̱ kunda̱a̱ va̱ʼaka iniyó xíʼin ña̱ kaʼviyó, tasaá va̱ʼaníka kutáʼanyó xíʼin Jehová.

NOTA ÑA̱ KÁʼA̱N XA̱ʼA ÑA̱ KAʼVIYÓ

Nota ña̱ káʼa̱n xa̱ʼa ña̱ kaʼviyó chindeé táʼanña xíʼinyó ña̱ kunda̱a̱-iniyó ndáa ki̱ʼva ni̱xi̱yo ñuu kán, míí xi̱ndika̱a̱ña ta ndáa tu̱ʼun xi̱ka̱ʼa̱nna.

Mateo 12:20

Yo̱ʼo̱ ña̱ lino ña̱ kána yi̱ʼma̱: Lámpara ña̱ xi̱xiniñúʼuna tiempo xi̱naʼá xi̱kuuña iin ki̱si loʼo ña̱ ndíka̱a̱ aceite ini. Tá xi̱ndaxi yo̱ʼo̱ kán saá kúú ña̱ xi̱xixi̱ña. Tu̱ʼun griego ña̱ xi̱niñúʼuna xíʼin tu̱ʼun “yo̱ʼo̱ ña̱ lino ña̱ kána yi̱ʼma̱” káʼa̱nña xa̱ʼa iin yo̱ʼo̱ loʼo ña̱ va̱ásaka xíxi̱ soo kánaka yi̱ʼma̱ nu̱úña. Saá kúú ña̱ koo ta̱ Jesús ka̱chi profecía ña̱ va̱xi nu̱ú Isaías 42:3, chi vitá koo inira ta va̱ása saxóʼvi̱ra na̱ yiví na̱ vitá-ini á na̱ xa̱a̱ ku̱a̱ʼání tu̱ndóʼo ndo̱ʼo.

Mateo 26:13

Ña̱ ndixa; ndixaní: Tu̱ʼun Amén ña̱ xi̱xiniñúʼu na̱ griego inkáchi xi̱kuuña xíʼin tu̱ʼun hebreo, ta kúni̱ kachiña “saá koo” á “ndixa”. Ta̱ Jesús xi̱xiniñúʼuníra tu̱ʼun yóʼo tá xi̱ka̱ʼa̱nra xa̱ʼa iin profecía. Saá ni̱na̱ʼa̱ra ña̱ ndixa kúú ña̱ káʼa̱nra. Íyo sava na̱ káʼa̱n ña̱ va̱ʼaní xi̱niñúʼura tu̱ʼun yóʼo. Tá u̱vi̱ yichi̱ kítáʼan ña̱yóʼo va̱xiña nu̱ú tutu ña̱ Juan (amén amén), ña̱ ni̱ka̱ʼa̱n ta̱ Jesús kúni̱ kachiña “mií ña̱ ndixa kúúña” (Jn 1:51).

VIDEO XÍʼIN NA̱ʼNÁ

Yóʼo kuniyó na̱ʼná xíʼin video ña̱ káʼa̱n Biblia xa̱ʼa ña̱ va̱ʼaka kunda̱a̱-iniyó xíʼinña.

Ñuu Betfagué, yuku̱ ña̱ Olivo xíʼin ñuu Jerusalén

Ña̱ video yóʼo náʼa̱ña nu̱úyó ndáa ki̱ʼva xa̱a̱yó ñuu Jerusalén nda̱a̱ Betfagué (tiempo vitin et-Tur) nda̱a̱ nu̱ú súkun va̱ʼa ña̱ xi̱kí ña̱ Olivo. Ñuu Betania yatin kíndooña xíʼin ña Betfagué saátu xíʼin ña̱ xi̱kí ña̱ Olivo. Ñuu Betania yóʼo xi̱ndakiʼinndée ta̱ Jesús. Tiempo vitin ñuu ña̱ íyo kán ña̱ naní el-Ázariyeh (El Éizariya), tu̱ʼun árabe kúú ki̱vi̱ña ta̱ kúni̱ kachiña: “Nu̱ú ni̱xi̱yo ta̱ Lázaro”. Kúnda̱a̱-iniyó ña̱ veʼe ñá Marta, ñá Maria xíʼin ta̱ Lázaro xi̱kindo̱o ta̱ Jesús tiempo saá (Mt 21:17; Mr 11:11; Lu 21:37; Jn 11:1). Ña̱ va̱ʼa ku̱ʼu̱nra ñuu Jerusalén, xi̱niñúʼu ku̱ʼu̱nra chí yichi̱ ña̱ va̱xi nu̱ú video ña̱ xi̱toyó yóʼo. Tá 9 tí nisán ña̱ ku̱i̱ya̱ 33, tá yósó ta̱ Jesús tí burro loʼo tá ni̱ya̱ʼa̱ra chí xi̱kí ña̱ Olivo, sana chí yichi̱ ña̱ kée ñuu Betfagué yóʼo ni̱xa̱ʼa̱nra.

Yichi̱ ña ku̱a̱ʼa̱n ñuu Betania nda̱a̱ ñuu Betfagué
Ñuu Betfagué
Xi̱kí ña̱ Olivo
Yoso̱ ña̱ Cedrón
Yuku̱ ña̱ templo

Leke xa̱ʼa iin na̱ yiví ña̱ ka̱nina clavo

Nu̱ú na̱ʼná yóʼo kivi kuniyó iin leke xa̱ʼa iin na̱ yiví ta ka̱nina iin clavo xa̱ʼana ña̱ 11,5 centímetro (4,5 pulgada). Sava ña̱yóʼo nda̱niʼínaña ku̱i̱ya̱ 1968 yatin chí ñuu Jerusalén ta xíʼin ña̱yóʼo kivi kunda̱a̱-iniyó ña̱ tá xi̱xaʼnína na̱ yiví tiempo saá, xi̱xiniñúʼuna clavo ña̱ katikaanana ndaʼa̱ yitu̱n. Sana ki̱ʼva saá íyo clavo ña̱ xi̱niñúʼu na̱ soldado ñuu Roma tá xa̱ʼnína ta̱ Jesús. Leke yóʼo nda̱niʼínaña ini iin ki̱si ña̱ yu̱u̱ nu̱ú chi̱ka̱a̱na leke na̱ yiví na̱ ni̱xi̱ʼi̱. Ña̱yóʼo kúni̱ kachiña xi̱nduxunvana iin na̱ yiví na̱ xi̱katikaana ndaʼa̱ yitu̱n (Mt 27:35).