Sakuaʼaka ña̱ va̱ʼa sanáʼa̱kaún: Va̱ása kaʼvikaún xíʼinna tá kǒo chíka̱a̱na ndee̱

¿NDA̱CHUN XÍNIÑÚʼU KEʼÉYÓÑA? Na̱ yiví xíniñúʼu ka̱ʼa̱nna ki̱vi̱ Jehová saá kúú ña̱ kuchiñu ka̱kuna (Ro 10:13, 14). Su̱ví ndiʼi na̱ yiví na̱ káʼviyó Biblia xíʼin xíniso̱ʼo ña̱ káʼa̱n Jehová. Xa̱ʼa̱ ña̱yóʼo viíní ná kuniñúʼuyó tiempo ña̱ kúúmiíyó ña̱ sanáʼa̱yó na̱ yiví mií na̱ ndixa kúni̱ sákuaʼa xa̱ʼa̱ Jehová ta kúni̱na keʼéna ña̱ kúni̱ra. Xa̱ʼa̱ ña̱yóʼo tá xa̱a̱ ku̱a̱ʼání tiempo káʼviún xíʼin iin na̱ yiví ta ta̱ʼán chika̱a̱na ndee̱ ña̱ kachíñuna nu̱ú Jehová, va̱ʼaka ná ndukúyó inka na̱ yiví na̱ ndixa kúni̱ sákuaʼa xa̱ʼa̱ Jehová (Jn 6:44). Soo tá so̱ndíʼi na̱samana ña̱ ndákanixi̱nína, ta kúni̱ tukuna sákuaʼana xa̱ʼa̱ Jehová ta saátu kúni̱na kutakuna ndiʼi tiempo, kivi kaʼvi tukuyó xíʼinna (Hch 13:48).

¿NDÁA KI̱ʼVA KEʼÉYÓÑA?

• Ka̱ʼa̱n xíʼin na̱ káʼviún xíʼin ña̱ va̱ʼaní keʼéna ña̱ sákuaʼana ña̱ va̱xi nu̱ú Biblia (1Ti 2:4).

• Sándakaʼánna ña̱ ndáyáʼviní keʼéna ña̱ sákuaʼana nu̱ú Biblia (Lu 6:46-49).

• Xíʼin ña̱ to̱ʼó ná káʼviyó ña̱ parábola ña̱ káʼa̱n xa̱ʼa̱ ta̱ chíʼi ña̱ va̱xi nu̱ú Biblia xíʼinna, ta nda̱ka̱tu̱ʼunyóna ndáa ña̱ʼa kúú ña̱ sási nu̱úna ña̱ keʼéna chiñu nu̱ú Ndióxi̱ (Mt 13:18-23).

• Viíní ka̱ʼún xíʼinna ndáa xa̱ʼa̱ kúú ña̱ kúni̱ún ndakoún ña̱ káʼviún xíʼinna.

• Ka̱ʼa̱n xíʼinna ña̱ ka̱ʼa̱nvaún xíʼin teléfono xíʼinna ta saátu ku̱ʼún kotoúnna kivitu ka̱ʼún xíʼinna ña̱ kixáʼa tukún kaʼviún xíʼinna tá xa̱a̱ na̱samana ña̱ ndákanixi̱nína.

TÁNDI̱ʼI XI̱TONDÓ VIDEO NDAKUIINNDÓ PREGUNTA YÓʼO:

• ¿Ndáaña xi̱niyó nu̱ú video yóʼo ña̱ kǒo chíka̱a̱na ndee̱ xíʼin ña̱ káʼvina?

• ¿Nda̱saa chi̱ndeétáʼan ta̱ publicador xíʼin ta̱ sánáʼa̱ra ña̱ ndáyáʼviní nasamara ña̱ va̱ása va̱ʼa kéʼéra?

• ¿Ndáa ki̱ʼva ni̱ka̱ʼa̱n ta̱ publicador xíʼin ta̱ káʼvira xíʼin ña̱ kivi tuku kaʼvira xíʼinra chí nu̱únínu?