U̱ni̱ ki̱ʼva ña̱ na̱ʼa̱yó ña̱ kándíxaníyó Jehová

Xa̱ʼa̱ ña̱ xi̱ndaaní-ini ta̱ David Jehová, ku̱chiñura ka̱nitáʼanra xíʼin ta̱ Goliat (1Sa 17:45). Jehová kúni̱ra chindeétáʼanra xíʼin na̱ va̱ʼaní kítáʼan xíʼinra (2Cr 16:9). ¿Ndáaña xíniñúʼu keʼéyó ña̱ va̱ʼa kundaa-iniyó Jehová ta va̱ása kundaa-iniyó miíyó? Ná kotoyó u̱ni̱ ña̱ chindeétáʼan xíʼinyó.

• Ndiʼi ki̱vi̱ ka̱ʼún xíʼin Jehová. Tá káʼún xíʼinra su̱ví nda̱saa ku̱a̱chi ña̱ ni̱ki̱ʼviún ka̱ʼún xa̱ʼa̱ xíʼinra, chi saátu xíniñúʼu ka̱ʼún xíʼinra ña̱ ná taxira ndee̱ ndaʼún ña̱ va̱ʼa kǒo keʼún ña̱ va̱ása va̱ʼa (Mt 6:12, 13). Va̱ása xíniñúʼu ka̱ʼa̱n kuitíún xíʼin Jehová ña̱ chindeétáʼanra xíʼún ña̱ vií kana ña̱ nda̱kaxiún keʼún, chi saátu xíniñúʼu ka̱ʼún xíʼinra ña̱ ná chindeétáʼanra xíʼún tá kúma̱níka ndaka̱xiún keʼún iin ña̱ʼa (Snt 1:5).

• Ndiʼi ki̱vi̱ kaʼviún tu̱ʼun Ndióxi̱ (Sl 1:2). Ndakanixi̱ní xa̱ʼa̱ na̱ ta̱a xíʼin ná ñaʼá na̱ káʼa̱nña xa̱ʼa̱, ta saátu ndakanixi̱ní ndáaña sákuaʼún xíʼin ña̱ ke̱ʼé na̱yóʼo, tándi̱ʼi keʼé ña̱ sa̱kuaʼún (Snt 1:23-25). Ta ni xa̱a̱ xíni̱ún natúʼun xíʼin na̱ yiví xa̱ʼa̱ Ndióxi̱, ndáyáʼviní kaʼvi kúeún tá kúma̱ní ku̱ʼún natúʼún xíʼinna. Ta saátu xa̱a̱ ya̱chi̱ka kaʼvi kúeún ña̱ ka̱ʼa̱nna xa̱ʼa̱ ti̱xin reunión chi saá kúú ña̱ va̱ʼaníka kunda̱a̱-iniún xíʼinña.

• Kundiku̱n ña̱ káʼa̱n na̱ ñuu Ndióxi̱. Kiʼinníún kuenta ndáaña xa̱á kúú ña̱ ndáka̱xinna keʼéna ta kundiku̱únña (Nú 9:17). Ta saátu xíniñúʼu kundiku̱ún ña̱ ndáka̱xin na̱ anciano keʼéna, ta kundiku̱ún consejo ña̱ táxina (Heb 13:17).

TÁNDI̱ʼI XI̱TONDÓ VIDEO ÑA̱ NANÍ VA̱ÁSA YI̱ʼVÍNDÓ TÁ ÍXANDI̱VA̱ʼANA XÍʼINNDÓ, NDAKUIINDÓ PREGUNTA YÓʼO:

• ¿Ndáaña sa̱yíʼvi na̱ hermano na̱ ni̱ya̱ʼa nu̱ú video yóʼo?

• ¿Ndáaña chi̱ndeétáʼan xíʼinna ña̱ va̱ása níyi̱ʼvíkana?