ÑA̱ KÉʼÉYÓ NA̱ TESTIGO
Chika̱a̱ ndee̱ ña̱ kǒo keʼún ña̱ va̱ása va̱ʼa
Xa̱ʼa̱ ña̱ kúúyó na̱ yiví ku̱a̱chi, ndiʼi tiempo xíniñúʼu chika̱a̱yó ndee̱ ña̱ kǒo keʼéyó ña̱ʼa ña̱ va̱ása va̱ʼa. Chi tá ná keʼéyó ña̱ kúni̱ miíyó, nda̱a̱ kivi xa̱a̱yó sandákooyó ña̱ kutáʼanyó xíʼin Jehová. Savana kíxáʼa ndíʼi̱ka-inina xa̱ʼa̱ ña̱ kuumiína veʼena, ña̱ kuxuna á ti̱ko̱to̱ kundixina nu̱úka ña̱ ndasakáʼnuna Ndióxi̱. Ta savana kútóoníkana keʼéna ña̱ kini nu̱úka ña̱ keʼéna ña̱ káʼa̱n Jehová (Ro 1:26, 27). Ta saátu, savana kéʼéna ña̱ káʼa̱n inkana xíʼinna saáchi kúni̱na kindo̱o va̱ʼana xíʼinna ta sákusi̱ína-inina (Éx 23:2).
¿Ndáaña kivi keʼéyó ña̱ kǒo keʼéyó ña̱ va̱ása va̱ʼa? Xíniñúʼu chika̱a̱níyó ndee̱ ña̱ kundi̱ʼi̱-iniyó xa̱ʼa̱ chiñu Ndióxi̱ (Mt 4:4). Ta saátu ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ kǒo kuni̱yó keʼéyó ña̱ va̱ása va̱ʼa. ¿Nda̱chun? Saáchi xíni̱ra ndáaña xíniñúʼuyó ta ndáaña kivi sakúsi̱í-iniyó (Sl 145:16).
TÁNDI̱ʼI XI̱TONDÓ VIDEO ÑA̱ NANÍ VA̱ÁSA TAXIÚN SANDÍʼI-XA̱ʼA̱ CIGARRO YÓʼÓ, NDAKUIINNDÓ PREGUNTA YÓʼO:
¿Nda̱chun xáʼmi sava na̱ yiví?
¿Ndáaña kivi kundoʼoyó tá ná kaʼmiyó?
¿Nda̱chun va̱ása va̱ʼa kaʼmiyó ndiʼi nu̱ú cigarro? (2Co 7:1).
Kuchiñuvaún sandákoún ña̱ kaʼmiún.
¿Ndáaña chindeétáʼan xíʼún ña̱ va̱ása kuni̱ún kaʼmiún á ña̱ va̱ása kaʼmikaún?