Va̱ása yi̱ʼvíún tá ná kixaa̱ ña̱ ndiʼi-xa̱ʼa̱ ñuyǐví yóʼo

Si̱lóʼoní kúma̱ní ta va̱ása kundatuka Jehová xíʼin na̱ ñuyǐví yóʼo. Tá ná kixaa̱ ki̱vi̱ yóʼo ndiʼi-xa̱ʼa̱ ndiʼi veʼe-ñu̱ʼu vatá. Ta iin grupo na̱ yiví kuni̱na sandiʼi-xa̱ʼa̱na na̱ ñuu Jehová, soo ta̱yóʼo sandíʼi-xa̱ʼa̱ra ndiʼi na̱ yiví na̱ kéʼé ña̱ va̱ása vaʼa ti̱xin Armagedón. Ta ndiʼi miíyó kúni̱níyó ná kixaa̱ ki̱vi̱ yóʼo.

Íyo ku̱a̱ʼání ña̱ va̱ása kúnda̱a̱-iniyó xa̱ʼa̱ ña̱ gran tribulación. Tá kúú, va̱ása xíni̱yó ama kúú ña̱ kixáʼaña. Ta ni va̱ása kúnda̱a̱-iniyó ndáa xa̱ʼa̱ kúú ña̱ kuni̱ na̱ chíñu sandíʼi-xa̱ʼa̱na ndiʼi veʼe-ñu̱ʼu vatá. ¿Nda̱saa tiempo ixandi̱va̱ʼana xíʼin na̱ ñuu Ndióxi̱, ta ndáaña keʼéna xíʼinna? Ta, ¿ndáaña keʼé Jehová ña̱ sandíʼi-xa̱ʼa̱ra ndiʼi na̱ kéʼé ña̱ va̱ása va̱ʼa ti̱xin Armagedón? Va̱ása xíni̱yó.

Tu̱ʼun Ndióxi̱ káʼa̱nña xíʼinyó xa̱ʼa̱ ndiʼi ña̱ koo chí nu̱únínu, xa̱ʼa̱ ña̱kán va̱ása xíniñúʼu kundi̱ʼi̱ní-iniyó ta ni va̱ása yi̱ʼvíyó. Tá kúú, xa̱a̱ xíni̱yó ña̱ ndóoyó ki̱vi̱ nu̱ú ndíʼi (2Ti 3:1). Ta saátu kúnda̱a̱-iniyó ña̱ tá ná kixaa̱ ña̱ ndiʼi-xa̱ʼa̱ ndiʼi na̱ veʼe-ñu̱ʼu vatá, loʼova tiempo koo ña̱yóʼo, ña̱kán va̱ʼa ka̱ku na̱ ñuu Ndióxi̱ (Mt 24:22). Ta saátu kúnda̱a̱-iniyó ña̱ mií Jehová sakákura na̱ ñuura (2Pe 2:9). Ta nda̱kaxinra iin ta̱ nda̱kúní-ini ta̱ íyoní ndee̱ ña̱ sandíʼi-xa̱ʼa̱ra na̱ ndi̱va̱ʼa-ini ti̱xin ña̱ Armagedón ta sakákura ndiʼi na̱ ndásakáʼnu Ndióxi̱ (Ap 19:11, 15, 16).

Tá ná kuu ña̱yóʼo “na̱ yiví nda̱a̱ kuvi tóona” á kivi yi̱ʼína (Lu 21:26). Soo miíyó va̱ása kundoʼoyó ña̱yóʼo. Tá ná kaʼviyó ta ndakanixi̱níyó ndáa ki̱ʼva sa̱kǎku Jehová na̱ ñuura tiempo xi̱naʼá ta saátu tá ná ndakanixi̱níyó xa̱ʼa̱ ña̱ káʼa̱nra keʼéra chí nu̱únínu, saá kúú ña̱ kandíxaníyó ña̱ káʼa̱n Lucas 21:28: “Ndakunditandó ta ndaniʼindó xi̱níndó, saáchi xa̱a̱ ku̱yatin ka̱kundó”.