ÑA̱ KÉʼÉYÓ NA̱ TESTIGO
Ka̱ʼa̱n xíʼin Jehová ña̱ chindeétáʼanra xíʼún tá kúsi̱kindaana yóʼó
Tá kúsi̱kindaa na̱ yiví miíyó, kivi ndakava-iniyó á kusuchí-iniyó. Ta saátu nda̱a̱ kivi sandákooyó ña̱ ndasakáʼnuyó Jehová tá yíʼviyó nu̱ú na̱ kúsi̱kindaa miíyó. Ña̱kán, ¿ndáaña kivi chindeétáʼan xíʼún tá kúsi̱kindaana yóʼó?
Ku̱a̱ʼání na̱ hermano kúndeé-inina tá kúsi̱kindaa na̱ yiví miína, saáchi mií Jehová kúú ta̱ chíndeétáʼan xíʼinna (Sl 18:17). Tá kúú, ñá Ester ndakúní ni̱xi̱yo iniñá ta ni̱ka̱ʼa̱nñá xíʼin ta̱ rey xa̱ʼa̱ ña̱ xi̱kuni̱ ta̱ Hamán keʼéra, ta̱yóʼo ndi̱va̱ʼaní ni̱xi̱yo-inira saáchi xi̱kuni̱ra ixandi̱va̱ʼara xíʼin na̱ ñuu Ndióxi̱ (Est 7:1-6). Soo tá kúma̱níka ka̱ʼa̱n ñá Ester xíʼin ta̱ rey, ñáyóʼo kǒo níxixiñá ta xíʼin ña̱yóʼo ni̱na̱ʼa̱ñá ña̱ xi̱ndaaní-iniñá Jehová ña̱ miíra chindeétáʼan xíʼinñá (Est 4:14-16). Ku̱a̱ʼání ña̱ va̱ʼa ta̱xi Jehová ndaʼa̱ñá xa̱ʼa̱ ña̱ ke̱ʼéñá, xa̱ʼa̱ ña̱kán xi̱ndaarañá ta saátu xi̱ndaara na̱ ñuu.
Tá kúsi̱kindaana yóʼó, ka̱ʼa̱n xíʼin Jehová ña̱ ná chindeétáʼanra xíʼún, ta saátu kivi natúʼún xíʼin inkana xa̱ʼa̱ ña̱ ndóʼún, tá kúú kivi ka̱ʼún xíʼin siʼún á yiváún xa̱ʼa̱ ña̱yóʼo. Mií Jehová chindeétáʼan xíʼún nda̱a̱ táki̱ʼva chi̱ndeétáʼanra xíʼin ñá Ester. ¿Ndáaña kivika keʼún tá kúsi̱kindaana yóʼó?
TÁNDI̱ʼI XI̱TONDÓ VIDEO ÑA̱ NANÍ TÁ LOʼÚN: ¿NDÁAÑA KEʼÍI̱ TÁ KÉʼÉNA BULLYING XÍʼI̱N? NDAKUIINNDÓ PREGUNTA YÓʼO:
¿Ndáa ki̱ʼva kundiku̱n na̱ va̱lí yichi̱ ta̱ Charlie xíʼin ñá Ferin tá kúsi̱kindaanana?
¿Ndáaña kivi sákuaʼa na̱ íyo se̱ʼe xíʼin video yóʼo?