Pregunta ña̱ kéʼé na̱ káʼvi tutu yóʼo

Ña̱ káʼa̱n Eclesiastés 5:8, ¿á iinlá xa̱ʼa̱ na̱ chíñu na̱ íyo ñuyǐví yóʼo káʼa̱nña á káʼa̱ntuña xa̱ʼa̱ Jehová?

Tá káʼviyó Eclesiastés 5:8 ku̱a̱ʼá ña̱ʼa ndákanixi̱níyó xa̱ʼa̱, saáchi ña̱ versículo yóʼo káchiña: “Tá xítoún ña̱ ñuu nu̱ú íyoún kéʼéna ña̱ va̱ása va̱ʼa xíʼin na̱ ndáʼvi, ta va̱ása nda̱kú ndátiinna ku̱a̱chi ta ni va̱ása íxato̱ʼóna derecho na̱ yiví, va̱ása ndakanda̱-iniún xíʼin ña̱yóʼo. Saáchi íyo inka ta̱ káʼnuka nu̱ú ta̱ chíñu káʼnu kán ta xítora ña̱ kéʼéra, ta nu̱ú ndiʼi na̱yóʼo íyo inkaka na̱ káʼnuníka nu̱úna”.

Tá káʼviyó ña̱yóʼo kivi xa̱a̱yó ndakanixi̱níyó ña̱ iinlá xa̱ʼa̱ na̱ chíñu na̱ íyo ñuyǐví yóʼo káʼa̱nña. Soo tá viíka ná ndakanixi̱níyó xa̱ʼa̱ña, kunda̱a̱-iniyó ña̱ káʼa̱ntuña xa̱ʼa̱ Jehová ta ña̱yóʼo sándi̱koña-iniyó.

Eclesiastés 5:8 káʼa̱nña xa̱ʼa̱ iin ta̱ chíñu ta̱ kéʼé ña̱ va̱ása va̱ʼa xíʼin na̱ ndáʼvi ta va̱ása nda̱kú ndátiinra ku̱a̱chi xíʼinna. Soo xíniñúʼu ndakaʼánra ña̱ sana íyo iin na̱ kíʼin kuenta xíʼin ña̱ kéʼéra, ta káʼnuníka chiñu ña̱ kúúmiína nu̱ú ña̱ kúúmiíra. Ta nu̱ú na̱yóʼo sana íyo inkaka na̱ kúúmií iin chiñu ña̱ káʼnuníka. Soo, sana ndiʼi na̱ chíñu yóʼo kéʼéna ña̱ va̱ása va̱ʼa, ta xa̱ʼa̱ ña̱yóʼo na̱ yiví na̱ xáʼndachíñuna nu̱ú xóʼvi̱na.

Iin ña̱ suchí-ini kúú ña̱yóʼo, soo va̱ʼaní kúniyó tá kúnda̱a̱-iniyó ña̱ kíʼin Jehová kuenta xíʼin ña̱ kéʼé na̱ chíñu náʼnu na̱ íyo nu̱ú ñuyǐví yóʼo. Ña̱kán ná ka̱ʼa̱n ndáʼviyó xíʼinra ña̱ chindeétáʼanra xíʼinyó ta ná sandákooyó tu̱ndóʼo ña̱ yáʼayó nu̱ú ndaʼa̱ra (Sal. 55:22; Filip. 4:6, 7). Kúnda̱a̱-iniyó ña̱ “xíto Jehová ndiʼi ña̱ kúu nu̱ú ñuʼú yóʼo, ña̱ va̱ʼa taxira ndee̱ra ndaʼa̱ na̱ káchíñu nu̱úra xíʼin ndiʼi níma̱na” (2 Crón. 16:9).

Ña̱kán, Eclesiastés 5:8 sándakaʼánña miíyó xa̱ʼa̱ ki̱ʼva ña̱ xáʼndachíñu na̱ ñuyǐví yóʼo, ña̱ íyo inka na̱ káʼnuka nu̱úna. Ta saátu sándakaʼánña miíyó xa̱ʼa̱ inka ña̱ ndáyáʼviníka, ña̱ iinlá Jehová kúú ta̱ kúúmií chiñu ña̱ káʼnuníka nu̱ú iníísaá ñuyǐví. Tiempo vitin xáʼndachíñura saáchi xíniñúʼura se̱ʼera ña̱ koora Rey ti̱xin Reinora. Jehová íyoní ndee̱ra, xítora ndiʼi ña̱ kúu nu̱ú ñuʼú yóʼo, ta nda̱kúní ndátiinra ku̱a̱chi ta saátu íyo ña̱ kéʼé se̱ʼera.