¿Á xa̱a̱ xíni̱ún xa̱ʼa̱ ña̱yóʼo?

¿Nda̱chun xi̱taxina ña̱ʼa xa̱ʼa̱ ñá tindaʼa̱ xíʼinna?

TÁ XI̱TINDAʼA̱NA ti̱xin ñuu Israel, ta̱ ta̱a xi̱xiniñúʼu taxira ña̱ʼa xa̱ʼa̱ ñá tindaʼa̱ xíʼinra. Tá kúú, sava yichi̱ xi̱taxina ña̱ʼa ña̱ ndáyáʼvi, kití á xu̱ʼún á sava yichi̱ xi̱kachíñutuna xa̱ʼa̱ñá, nda̱a̱ táki̱ʼva ke̱ʼé ta̱ Jacob tá xi̱kuni̱ra tindaʼa̱ra xíʼin ñá Raquel. Ta̱yóʼo ki̱ndoora kachíñura u̱xa̱ ku̱i̱ya̱ xa̱ʼa̱ñá (Gén. 29:17, 18, 20). ¿Nda̱chun xi̱taxina ña̱ʼa xa̱ʼa̱ ñá tindaʼa̱ xíʼinna?

Iin ñá xíni̱ va̱ʼa xa̱ʼa̱ Biblia ñá naní Carol Meyers káchiñá: “Xi̱taxira ña̱ʼa yóʼo xa̱ʼa̱ ñá tindaʼa̱ xíʼinra, saáchi xi̱kuni̱ra chaʼvira na̱ veʼeñá xa̱ʼa̱ chiñu ña̱ va̱ása keʼékañá xíʼinna. Ta tá na̱ xi̱chiʼi kúú na̱ veʼeñá va̱ʼaníva xi̱chindeétáʼan ña̱yóʼo xíʼinna”. Ta saátu ña̱ʼa ña̱ xi̱taxira xa̱ʼa̱ñá xi̱naʼa̱ña ña̱ viíní xa̱a̱ na̱ veʼeñá kutáʼanna xíʼin na̱ veʼera. Tasaá, tá ná ya̱ʼana nu̱ú tu̱ndóʼo kivi chindeétáʼanna xíʼin táʼanna. Ta saátu tá xi̱taxira ña̱ʼa xa̱ʼa̱ñá saá xi̱kunda̱a̱-ini inkana ña̱ xa̱a̱ ku̱nu̱mí tindaʼa̱ñá, ta miíra kúú ta̱ kiʼin kuenta xíʼinñá vitin ta su̱víka yiváñá.

Tá xi̱taxina ña̱ʼa xa̱ʼa̱ iin ñá ñaʼá va̱ása kúni̱ kachiña ña̱ táki̱ʼva íyo ñá sátána á ñá íxi̱kóna saá íyoñá. Iin libro ña̱ naní Instituciones del Antiguo Testamento káchiña: “Tá xi̱taxina xu̱ʼún á tá xi̱taxina ña̱ʼa ndaʼa̱ na̱ veʼe ñáyóʼo, tá náʼa̱ ñá xi̱satána saá xi̱na̱ʼa̱ña. Soo ña̱ʼa ña̱ xi̱taxina xa̱ʼa̱ñá su̱ví ya̱ʼviñá níxi̱kuuña, saáchi ña̱ xi̱sokóna nu̱ú na̱ veʼeñá xi̱kuuña”.a

Tiempo vitin, ti̱xin sava país táʼan kúúmiíkana costumbre yóʼo. Na̱ ndásakáʼnu Ndióxi̱ náʼa̱na ña̱ viíní ndákanixi̱nína tá loʼo ña̱ʼa ndúkúna xa̱ʼa̱ se̱ʼena (Filip. 4:5; 1 Cor. 10:32, 33). Tasaá náʼa̱na ña̱ va̱ása kútóonína “kuumiína xu̱ʼún” (2 Tim. 3:2). Ta saátu tá ku̱a̱ʼání ña̱ʼa ná ndukúna nu̱ú ta̱ tindaʼa̱ xíʼin se̱ʼena, sana va̱ása kuchiñura ni̱ʼí kamara ña̱ taxira ndaʼa̱na ta xa̱ʼa̱ ña̱yóʼo va̱ása kuchiñu kama tindaʼa̱na. Ta tá precursor kúúra sana xíniñúʼu sandákoora ña̱ koora precursor, ña̱ va̱ʼa kachíñura ku̱a̱ʼáka tiempo tasaá ni̱ʼíra ña̱ taxira xa̱ʼa̱ñá. Ña̱kán, va̱ʼaka tá loʼo ña̱ʼa ná ndukúna nu̱úra.

Ti̱xin sava ñuu íyo ley ña̱ káʼa̱n nda̱saa ña̱ʼa á nda̱saa xu̱ʼún kivi ndukúna xa̱ʼa̱ iin ñaʼá. Ta na̱ ndásakáʼnu Ndióxi̱ ndíku̱nna ley yóʼo. Saáchi Ndióxi̱ kúni̱ra ña̱ ná kuniso̱ʼona ndiʼi ña̱ káʼa̱n na̱ chíñu xíʼinna, ta ná kundiku̱nna ley yóʼo nani tá va̱ása yáʼandosóña ña̱ káʼa̱n tu̱ʼunra (Rom. 13:1; Hech. 5:29).