¿Á xa̱a̱ xíni̱ún xa̱ʼa̱ ña̱yóʼo?

¿Nda̱chun íyo sava tu̱ʼun ña̱ ndíkó tukuna káʼa̱nna nu̱ú Biblia?

SAVA yichi̱ na̱ ka̱ʼyí Biblia xi̱ndikó tukuna xi̱kaʼyína ña̱ xa̱a̱ ni̱ka̱ʼyi̱. Ta sava yichi̱ nda̱a̱ táki̱ʼva xa̱a̱ ni̱ka̱ʼyi̱ña saá xi̱kaʼyí tukunaña. ¿Nda̱chun xi̱keʼéna ña̱yóʼo? Ná ka̱ʼa̱nyó xa̱ʼa̱ u̱ni̱ ña̱ʼa:

Ama ni̱ka̱ʼyi̱ña. Ku̱a̱ʼání na̱ xi̱ndoo ñuu Israel kǒo níxi̱kuumiína iin copia ña̱ ley, xa̱ʼa̱ ña̱kán xi̱ndakutáʼan ndiʼina ña̱ xi̱xiniso̱ʼona ña̱yóʼo ini tabernáculo á templo (Deut. 31:​10-12). Xa̱ʼa̱ ña̱ ku̱a̱ʼání na̱ yiví xi̱xaʼa̱n kán ta ku̱a̱ʼání hora xi̱nditana, sana kǒo níxi̱kivi kuniso̱ʼovína ndiʼi ña̱ xi̱kaʼa̱nna (Neh. 8:​2, 3, 7). Xa̱ʼa̱ ña̱kán tá ku̱a̱ʼá yichi̱ xi̱ndikóna xi̱kaʼa̱nna xa̱ʼa̱ iin tu̱ʼun, saá kivi ndakaʼánna xa̱ʼa̱ña ta kivi keʼéna ña̱ sa̱kúaʼana. Ta xi̱xiniñúʼu ndikó tukuna ka̱ʼa̱nna xíʼinna tá iin ña̱ ndáyáʼviní xi̱kuuña, tá kúú tá xi̱kaʼa̱nna xa̱ʼa̱ ley ña̱ xi̱taxi Jehová ndaʼa̱na á tá xi̱kaʼa̱nna xíʼinna ndáa ki̱ʼva ndasaviína iin ku̱a̱chi (Lev. 18:​4-22; Deut. 5:1).

Ndáa ki̱ʼva ni̱ka̱ʼyi̱ña. Sava tutu ña̱ va̱xi nu̱ú Biblia yaa va̱xi nu̱úña tá kúú Salmos, El Cantar de los Cantares xíʼin Lamentaciones. Ta sava ña̱yóʼo kúúmiíña ña̱ naní estribillo, ña̱kán iin tu̱ʼun ña̱ xa̱a̱ ni̱ka̱ʼa̱nna xi̱ndikó tukuna xi̱kaʼa̱nnaña ña̱ va̱ʼa sakúaʼa xi̱nínaña tasaá kǒo ixayo̱ʼvi̱ña xíʼinna ndakaʼánnaña. Ña̱ va̱ʼa kunda̱a̱-iniyó xíʼin ña̱yóʼo, ná kotoyó ña̱ káʼa̱n Salmo 115:​9-11: yóʼo káʼa̱nña: “Na̱ ñuu Israel, kundaa-inindó Jehová. (Ta̱kán kúú ta̱ chindeétáʼan xíʼinndó ta̱kán kúú escudondó). Ndóʼó na̱ veʼe ta̱ Aarón kundaa-inindó Jehová. (Ta̱kán kúú ta̱ chindeétáʼan xíʼinndó ta̱kán kúú escudondó). Ndóʼó na̱ yíʼví xíni Jehová kundaa-inindó Jehová. (Ta̱kán kúú ta̱ chindeétáʼan xíʼinndó ta̱kán kúú escudondó)”. Tá iin na̱ yiví xi̱xitana yaa yóʼo, sana xi̱ndakaʼánvana xa̱ʼa̱ tu̱ʼun ña̱ liviní ña̱ káʼa̱nña.

Nda̱chun ni̱ka̱ʼyi̱ña. Sava na̱ ka̱ʼyí Biblia xi̱ndikóna xi̱kaʼa̱nna xa̱ʼa̱ iin ña̱ʼa ña̱ xi̱ndayáʼviní tá xi̱kuni̱na ña̱ ná kindo̱o káxiña. Tá kúú, tá ni̱ka̱ʼa̱n Jehová xíʼin na̱ ñuu Israel ña̱ kǒo kuxuna ni̱i̱, ni̱ka̱ʼa̱nra xíʼin ta̱ Moisés ña̱ tuku ta tuku ndikóra ka̱ʼa̱nra xíʼinna xa̱ʼa̱ ña̱yóʼo. Ña̱ xi̱kuni̱ Ndióxi̱ kúú ña̱ kunda̱a̱-inina ña̱ ni̱i̱ kúú ña̱ tákuyó (Lev. 17:​11, 14). Tá ni̱ya̱ʼa ku̱a̱ʼání tiempo na̱ apóstol xíʼin na̱ anciano na̱ ñuu Jerusalén ni̱ka̱ʼa̱nna xa̱ʼa̱ ña̱ʼa ña̱ kǒo xíniñúʼu keʼéyó tá kúni̱yó sakúsi̱íyó-ini Ndióxi̱, tasaá ni̱ka̱ʼa̱n tukuna ña̱ kǒo xíniñúʼu kuniñúʼuyó ni̱i̱ (Hech. 15:​20, 29).

Tuku ta tuku káʼa̱n Biblia xa̱ʼa̱ iin ña̱ʼa sava yichi̱, soo ña̱yóʼo kǒo kúni̱ kachiña ña̱ kúni̱ Jehová ña̱ ndikóyó ka̱ʼa̱nyó xa̱ʼa̱ iin ña̱ʼa ku̱a̱ʼání yichi̱ nda̱a̱ táki̱ʼva kéʼé sava na̱ veʼe-ñu̱ʼu. Ta̱ Jesús ni̱ka̱ʼa̱nra: “kǒo ndikóún ka̱ʼún tu̱ʼun ña̱ xa̱a̱ ni̱ka̱ʼún” (Mat. 6:7). Tasaá ni̱ka̱ʼa̱nra xa̱ʼa̱ sava ña̱ʼa ña̱ kivi ka̱ʼa̱nyó xíʼin Ndióxi̱ ña̱ kítáʼan xíʼin ña̱ kúni̱ra (Mat. 6:​9-13). Tá kéʼéyó oración nu̱ú Jehová su̱ví tuku ta tuku xíniñúʼuyó tu̱ʼun ña̱ xa̱a̱ ni̱ka̱ʼa̱nyó xíʼinra. Soo, kiviva ku̱a̱ʼá yichi̱ ka̱ʼa̱nyó xíʼinra xa̱ʼa̱ ña̱ sándi̱ʼi̱-iniyó (Mat. 7:​7-11).

Va̱ʼaníva ña̱ ku̱a̱ʼá yichi̱ káʼa̱n Biblia xa̱ʼa̱ iin ña̱ʼa saáchi mií Jehová kúú ta̱ xíniñúʼu ña̱yóʼo ña̱ va̱ʼa sanáʼa̱ra miíyó (Is. 48:​17, 18).