“Su̱ví ndiʼi na̱ yiví kándíxa Ndióxi̱”

Iin ña̱ kivi keʼéyó ña̱ va̱ʼa sakúsi̱íyó-ini Jehová kúú ña̱ kandíxayóra. Soo ña̱ Biblia káʼa̱nña ña̱ “su̱ví ndiʼi na̱ yiví kándíxa Ndióxi̱” (2 Tes. 3:2). Xa̱ʼa̱ na̱ yiví na̱ ndi̱va̱ʼaní-ini ni̱ka̱ʼa̱n ta̱ Pablo tá ka̱ʼyíra tu̱ʼun yóʼo chi kǒo níxi̱kuni̱ra ña̱ ixandi̱va̱ʼakana xíʼinra. Soo sanatu ni̱ka̱ʼa̱nra xa̱ʼa̱ na̱ yiví na̱ kǒo kándíxa ña̱ íyo iin Ndióxi̱ ta̱ i̱xava̱ʼa ndiʼi ña̱ʼa (Rom. 1:20). Savana ni ndákunivana ña̱ íyo iin ndióxi̱ ta̱ kúúmií ndee̱, soo kǒo ndáyáʼviví ña̱ káʼa̱nna nu̱ú Jehová.

Ña̱ va̱ʼa sakúsi̱íyó-ini Jehová xíniñúʼu kandíxayó ña̱ íyora ta saátu táxira ku̱a̱ʼání ña̱ va̱ʼa ndaʼa̱ na̱ kándíxa-ñaʼá (Heb. 11:6). Ta espíritu santo kúú ña̱ chindeétáʼan xíʼinyó ña̱ kandíxakayó Jehová. Tá kúni̱yó kuumiíyó espíritura xíniñúʼu ndukúyóña nu̱úra (Luc. 11:​9, 10, 13). Jehová xi̱niñúʼura espíritu santora ña̱ va̱ʼa ka̱ʼyi̱ ña̱ va̱xi nu̱ú Biblia, ña̱kán xíniñúʼu kaʼviyóña ta ndakanixi̱níyó xa̱ʼa̱ña ta keʼéyó ña̱ sákuaʼayó. Tá kéʼéyó ña̱yóʼo saá kúú ña̱ chindeétáʼan espíritu santo xíʼinyó ña̱ kandíxakayó Jehová ta keʼéyó ña̱ kútóora.