Ñu̱ʼu á ña̱ ka̱ndii xi̱kundichiña

KOTO ta̱ Josué. Ta̱yóʼo káchira: ʼÑu̱ʼu, kundichiʼ. Ta ña̱yóʼo xi̱kundichivaña. Iin ki̱vi̱ níí xi̱kundichiña. Mií Jehová kúú ta̱ ka̱ndichiña. Soo ná kotoyó ndachun kǒo kúni̱ ta̱ Josué sa̱ʼviña.

Tá ki̱xaʼá u̱ʼu̱n saá na̱ rey na̱ ñuu Canaán kánitáʼanna xíʼin na̱ ñuu Gabaón, na̱yóʼo chi̱ndaʼána iin ta̱a ku̱a̱ʼa̱nra ka̱ʼa̱nra xíʼin ta̱ Josué. ʼKama va̱ʼa kixindó chindeéndó ndi̱ʼi̱. Saka̱kundó ndi̱ʼi̱, chi ku̱a̱ʼání na̱ rey ki̱xaʼána kánitáʼanna xíʼinndi̱ʼ, káchira.

Ndi̱ku̱n saá, ta̱ Josué xíʼin na̱ xíka nu̱ú ku̱a̱chi xíʼinra ke̱ena ku̱a̱ʼa̱nna, ta iin níí ñu̱ú ni̱xi̱kana. Tá ni̱xa̱a̱ na̱ ñuu Israel ñuu Gabaón, na̱ soldado na̱ u̱ʼu̱n saá rey na̱ ke̱e chí ñuu Canaán ni̱yi̱ʼvívana, tasaá xi̱nuna ku̱a̱ʼa̱nna. Jehová sa̱kóoyora yu̱u̱ ña̱ ñíʼin náʼnu chí ndiví sa̱tána. Ta ku̱a̱ʼáka soldado xa̱ʼní ñíʼin yóʼo, ta loʼo kúú na̱ ni̱xi̱ʼi̱ i̱xaa na̱ soldado ta̱ Josué.

Ta̱ Josué xi̱tora nu̱ú Ñu̱ʼu si̱loʼova ndi̱ʼviña. Ta kama kuu ñu̱ú, ta ku̱a̱ʼání na̱ soldado na̱ u̱ʼu̱n saá rey yóʼo kununa ku̱ʼu̱nna. Xa̱ʼa ña̱yóʼo ni̱ka̱ʼa̱n ta̱ Josué xíʼin Jehová tándi̱ʼi ni̱ka̱ʼa̱nra xíʼin Ñu̱ʼu: ʼKundichiʼ, ta xi̱kundichivaña. Ta na̱ ñuu Israel na̱kuchiñuvana ka̱nitáʼanna xíʼinna.

Íyo ku̱a̱ʼáka na̱ rey na̱ ndóo ñuu Canaán na̱ kǒo kúni̱ xíni na̱ ñuu Ndióxi̱. Ta̱ Josué xíʼin na̱ xíka nu̱ú ku̱a̱chi xíʼinra, i̱ñu̱ ku̱i̱ya̱ ni̱xi̱kana ka̱nitáʼanna xíʼin 31 ñuu, ta saáví na̱kuchiñuna sa̱ndíʼi-xa̱ʼana ndiʼi na̱yóʼo. Tándi̱ʼi ka̱nitáʼanna xíʼin na̱yóʼo saáví nda̱taʼví ta̱ Josué ñuʼú ta̱xira ndaʼa̱ na̱ ñuu Israel.

Ku̱a̱ʼá ku̱i̱ya̱ ni̱ya̱ʼa, saá ni̱xi̱ʼi̱ ta̱ Josué tá ndíka̱a̱ra 110 ku̱i̱ya̱ra. Na̱ ñuu Israel ka̱ndíxana Jehová tá xi̱taku ta̱ Josué xíʼin na̱ xi̱táʼan xíʼinra. Soo tá ni̱xi̱ʼi̱ na̱yóʼo, na̱ ñuu Israel ki̱xaʼána kéʼéna ña̱ kini ta íyoní tu̱ndóʼo nu̱úna. Ta vitin kúni̱na ná chindeé Ndióxi̱ miína.