Iin tí burro tí káʼa̱n

Xa̱a̱ 40 ku̱i̱ya̱ íyo na̱ ñuu Israel nu̱ú ñuʼú yi̱chí. Xa̱a̱ ku̱a̱ʼání ñuu náʼnu ndákiʼinna. Vitin ndóona ñuu Moab, yatin nu̱ú íyo yu̱ta naní Jordán, si̱lóʼo kúni̱ ndi̱ʼvina ñuʼú ña̱ ni̱ka̱ʼa̱n Jehová taxira ndaʼa̱na. Ta̱ Balac, ta̱ rey ñuu Moab, yíʼvira ki̱ʼvi na̱ ñuu Israel ñuura. Ña̱kán ni̱ka̱ʼa̱nra xíʼin ta̱ Balaam ña̱ ná ku̱ʼu̱nra ñuu Moab chika̱a̱ra chiʼña sa̱tá na̱ ñuu Israel.

Jehová ni̱ka̱ʼa̱nra xíʼin ta̱ Balaam: “Kǒo chika̱ún chiʼña na̱ ñuu Israel”. Xa̱ʼa ña̱yóʼo kǒo níxa̱ʼa̱n ta̱ Balaam ñuu Moab. Ta̱ Balac rey ñuu Moab tuku ni̱ka̱ʼa̱nra xíʼinra ña̱ ku̱ʼu̱nra tasaá taxira ku̱a̱ʼání ña̱ʼa ndaʼa̱ra, soo ta̱ Balaam kǒo níxiinra ku̱ʼu̱nra. Tasaá ni̱ka̱ʼa̱n Ndióxi̱ xíʼinra: “Va̱ʼa ku̱ʼún. Soo ña̱ ka̱ʼi̱n xíʼún kúú ña̱ ka̱ʼún”.

Ta̱ Balaam nda̱ara sa̱tá iin burro ta ku̱a̱ʼa̱nra ñuu Moab, chí sur. Kúni̱ra chika̱a̱ra chiʼña sa̱tá na̱ ñuu Israel, ni ni̱ka̱ʼa̱n Jehová xíʼinra ña̱ va̱ása keʼéraña. Tasaá iin ángel ki̱tara u̱ni̱ yichi̱ nu̱úra. Ta̱ Balaam kǒo níxinira ta̱ ángel, soo tí burro sa̱na̱ra xi̱nivarí ta̱ ángel. Siʼna, tí burro ki̱tarí nu̱ú yichi̱ ta ni̱ki̱ʼvirí nu̱ú yuku̱. Tándi̱ʼi tí burro ku̱yatinrí nu̱ú nama̱ ña̱ yu̱u̱ ta ni̱choʼma xa̱ʼa ta̱ Balaam i̱xaarí. Ta ndu̱varí ma̱ʼñú yichi̱. Ta nina ka̱nirarí xíʼin iin yitu̱n.

Tándi̱ʼi, Jehová ta̱xira ña̱ káʼa̱n tí burro yóʼo. Ta ni̱nda̱ka̱tu̱ʼunrí ta̱ Balaam: “¿Nda̱chun kániún yi̱ʼi̱?”. Ta̱ Balaam nda̱kuiinra: “Tá káa iin ta̱ sána saá kái̱ nu̱ún. Tá níkixi yuchu̱ xíʼi̱n xa̱a̱ xa̱ʼnívai yóʼó”. Tí burro káchirí: “Xa̱a̱ ku̱a̱ʼání ku̱i̱ya̱ xíkai̱ xíʼún. ¿Á xa̱a̱ kéʼíi̱ ña̱yóʼo xíʼún tá ya̱chi̱?”.

Tasaá xi̱ni ta̱ Balaam iin ángel i̱xaa Jehová. Ta̱ ángel káchira: “Jehová ni̱ka̱ʼa̱n xíʼún ña̱ kǒo ku̱ʼún chika̱ún chiʼña sa̱tá na̱ ñuu Israel”. Ta̱ Balaam ni̱ka̱ʼa̱nra: “Su̱ví ña̱ va̱ʼa kúú ña̱ ke̱ʼíi̱. Ndikóvai̱ chí veʼi̱”. Soo ta̱ ángel ni̱ka̱ʼa̱nra: “Kiviva ku̱ʼún ñuu Moab, soo ña̱ káʼa̱n Ndióxi̱ xíʼún kúú ña̱ ka̱ʼún”.

¿Á sa̱kuaʼa ta̱ Balaam xa̱ʼa ña̱ ndo̱ʼora? Va̱ása, chi ni̱xa̱ʼa̱nra chi̱ka̱a̱ra chiʼña na̱ ñuu Israel ki̱ʼva u̱ni̱ yichi̱. Soo Jehová u̱ni̱ yichi̱ saá chi̱ka̱a̱ra bendición na̱ ñuura. Tándi̱ʼi na̱ ñuu Israel ka̱nitáʼanna xíʼin na̱ ñuu Moab, ta ni̱xi̱ʼi̱ ta̱ Balaam. Va̱ʼaníka tá níxiniso̱ʼo ta̱ Balaam ña̱ yichi̱ nu̱ú tá ni̱ka̱ʼa̱n Jehová xíʼinra ¿su̱ví saá túviún?