Na̱ ángel káʼa̱nna xa̱ʼa ña̱ kaku ta̱ Jesús

Ta̱ chíñu César Augusto ñuu Roma, ni̱ka̱ʼa̱nra ña̱ ná ku̱ʼu̱n ndiʼi na̱ ñuu judío ñuu nu̱ú ka̱kuna ña̱ kaʼyína tutuna. Xa̱ʼa ña̱yóʼo ta̱ José xíʼin ñá María ku̱a̱ʼa̱nna chí ñuu Belén, chi kán kúú ñuu ta̱ José. Ta xa̱a̱ ni̱nu̱mí kaku se̱ʼe ñá María.

Tá ni̱xa̱a̱na ñuu Belén kǒo nu̱ú ku̱su̱nna, ndáa iin veʼe nu̱ú ñúʼu kití ni̱xa̱a̱na xi̱kundoona, ta kán ka̱ku ta̱ Jesús. Tasaá ñá María nda̱kasiñá sa̱tára xíʼin ti̱ko̱to̱, ta chi̱ka̱a̱ñára nu̱ú xíxáʼan tí kití.

Yatin ñuu Belén, ndóo na̱ ndáa ndikachi tá ñu̱ú. Tasaá iin kama ki̱ta iin ángel, ta ndeéní nda̱ye̱ʼe̱ nda̱a̱ táki̱ʼva káa nu̱ú íyo Ndióxi̱. Tá xi̱ni na̱ ndáa ndikachi ña̱yóʼo ni̱yi̱ʼvínína, soo ta̱ ángel ni̱ka̱ʼa̱nra xíʼinna: “Va̱ása yi̱ʼvíndó, chi íyo iin tu̱ʼun va̱ʼa va̱xii̱ ka̱ʼi̱n xíʼinndó, ña̱ ka̱ku ta̱ Mesías chí ñuu Belén”. Tasaá ke̱e ku̱a̱ʼá na̱ ángel chí ndiví ta ni̱ka̱ʼa̱nna: “Ná ndasakáʼnuyó Ndióxi̱ ta̱ íyo chí ndiví, ta va̱ʼa ná ku̱si̱í-ini na̱ yiví na̱ ndóo nu̱ú ñuʼú”. Tasaá nda̱ñúʼu na̱ ángel nu̱úna. ¿Ndáaña ke̱ʼé na̱ ndáa kití?

Na̱yóʼo ki̱xaʼána káʼa̱nna xíʼin táʼanna: “Kama koondó ná ku̱ʼu̱nyó ñuu Belén”. Tasaá ku̱a̱ʼa̱nna, kán nda̱ni̱ʼína ta̱ José xíʼin ñá María nu̱ú xíxáʼan kití ta kán níʼina ta̱ lée loʼo.

Ndiʼi na̱ xi̱niso̱ʼo ña̱ ni̱ka̱ʼa̱n ta̱ ángel xíʼin na̱ ndáa tí kití nda̱kanda̱ní-inina. Ñá María ndiʼi tiempo xi̱ndakanixi̱níñá xa̱ʼa ña̱ ni̱ka̱ʼa̱n ta̱ ángel xíʼinñá. Na̱ ndáa ndikachi ndi̱kó tukuna chí yuku̱ ta ndeéní ta̱xina tixaʼvi ndaʼa̱ Jehová xa̱ʼa ndiʼi ña̱ xi̱niso̱ʼona xíʼin ña̱ xi̱nina.