Ta̱ Juan xi̱nira iin visión

Tá ndíka̱a̱ ta̱ apóstol Juan veʼeka̱a ñuu Patmos, ta̱ Jesús ta̱xira xi̱nira 16 xa̱ni nda̱saa koo chí nu̱únínu. Ta̱ Juan xi̱nira nda̱saa ndasakáʼnuna ki̱vi̱ Ndióxi̱, nda̱saa kixa̱a̱ Reino Ndióxi̱ ta nda̱saa keʼé na̱ yiví ña̱ kúni̱ra nu̱ú ñuʼú yóʼo táki̱ʼva íyo chí ndiví.

Xíʼin iin xa̱ni, ta̱ Juan xi̱nira xáʼndachíñu Jehová chí ndiví. Íyotu 24 na̱ xi̱ku̱aʼa xíʼinra. Ndíxina ti̱ko̱to̱ yaa xíʼin iin corona ña̱ oro ndíka̱a̱ xi̱nína. Mií nu̱ú íyo Jehová kée ñuʼu̱ táki̱ʼva íyo taxa ta saá íyoña. Na̱ 24 xi̱ku̱aʼa xi̱kuxítína nu̱ú Jehová ta ndásakáʼnunara. Nu̱ú inka xa̱ni, ta̱ Juan xi̱nira ku̱a̱ʼání na̱ yiví, na̱ ke̱e iníísaá nu̱ú ñuʼú ta xa̱a̱ síín tu̱ʼun káʼa̱n iin iinna, ta ndásakáʼnuna Jehová. Tí ndikachi xi̱nira, kúú ta̱ Jesús, ta̱yóʼo kúú pastor na̱ yiví ta ku̱a̱ʼa̱nra xíʼinna nu̱ú íyo ti̱kui̱í tá taxi ña̱ kutakuna. Tándi̱ʼi inka xa̱ni, ta̱ Jesús xáʼndachíñura chí ndiví xíʼin na̱ 24 xi̱ku̱aʼa. Inka xa̱ni, ta̱ Juan xi̱nira ta̱ Jesús kánitáʼanra xíʼin iin Dragón tíyóʼo kúú ta̱ Ndi̱va̱ʼa, xíʼin na̱ kítáʼan xíʼinra. Ta̱ Jesús ta̱várana chí ndiví ta chi̱ndaʼárana nu̱ú ñuʼú yóʼo.

Tándi̱ʼi, ta̱ Juan xi̱nira iin xa̱ni ña̱ liviní, xi̱nira ta̱ Jesús xíʼin 144,000 na̱ yiví nu̱ú yukú Sión. Xi̱nira iin ángel ndáchí nu̱ú iníísaá ñuyǐví ta káchira: “Taxindó ña̱ to̱ʼó ndaʼa̱ Ndióxi̱ ta ndasakáʼnundóra”.

Nu̱ú inka xa̱ni, xi̱nira ña̱ naní Armagedón. Ta xi̱nira ta̱ Jesús xíʼin na̱ kítáʼan xíʼinra sa̱ndiʼi-xa̱ʼana ñuyǐví ta̱ Ndi̱va̱ʼa. Tándi̱ʼi ta̱ Juan xi̱nira va̱ʼaní íyo chí ndiví xíʼin nu̱ú ñuʼú, va̱ʼaní ndóo ndiʼi na̱ yiví ta ni kǒo tu̱ndóʼo íyo. Jehová sa̱ndiʼi-xa̱ʼara ta̱ Ndi̱va̱ʼa xíʼin na̱ kítáʼan xíʼinra. Chí ndiví xíʼin nu̱ú ñuʼú, ndiʼina ndásakáʼnu ki̱vi̱ Jehová ta iinlá miíra íxato̱ʼóna.