LECCIÓN 53

Ña̱ xítonde̱ʼún á ña̱ sísikíún ná sakusi̱íña-ini Jehová

Siaʼa ka̱naña nu̱ú tutu

Jehová kúúra “Ndióxi̱ ta̱ si̱í-ini” (1 Timoteo 1:11). Ta kúni̱ra ña̱ ná kusi̱í-iniyó xíʼin ndiʼi ña̱ kéʼéyó. Ta kúni̱ra ña̱ ná taváyó tiempo ña̱ ndakindee̱yó tasaá keʼéyó ña̱ kútóoyó. Nu̱ú lección yóʼo kotoyó ndáa ki̱ʼva vií kuniñúʼuyó tiempoyó ña̱ keʼéyó ña̱ sakusi̱í-iniyó ta saátu ná kusi̱í-ini Jehová xíʼin ña̱yóʼo.

1. ¿Ndáaña xíniñúʼu kiʼinyó kuenta xíʼin tá ndáka̱xinyó ña̱ kusíkíyó á kotonde̱ʼéyó?

Savana kútóona kindo̱ona veʼena ta kaʼvina iin libro, kuniso̱ʼona yaa, kotonde̱ʼéna iin película, á kotona ña̱ va̱xi nu̱ú internet. Soo inkana kútóona ku̱ʼu̱n si̱ína á ña̱ kotonde̱ʼéna iin ña̱ʼa xíʼin na̱ migona, ña̱ ku̱ʼu̱nna kuchina, á ña̱ kusíkína. Nda̱a̱ ndáaka ña̱ ndáka̱xinyó keʼéyó ná kooña “ña̱ kútóo Ndióxi̱” (Efesios 5:10). Ndáyáʼviní kunda̱a̱ va̱ʼa iniyó xa̱ʼa̱ ña̱yóʼo. ¿Nda̱chun? Saáchi ku̱a̱ʼání ña̱ kútóo na̱ yiví keʼéna, va̱ása kútóo Jehová ña̱yóʼo. Ta kúú nu̱ú kánitáʼanna, nu̱ú kísi̱ xíʼin táʼanna, á ña̱ kúú kuenta na̱ ta̱chí ndi̱va̱ʼa (kaʼvi Salmo 11:5). ¿Ndáaña chindeétáʼan xíʼinyó ña̱ vií ndaka̱xinyó ña̱ keʼéyó?

Tá na̱ kúʼvi̱-ini xíni Jehová ná ndaka̱xinyó koo migoyó va̱ʼaní chindeétáʼanna xíʼinyó ña̱ vií ndaka̱xinyó ña̱ kusíkíyó á ña̱ kotonde̱ʼéyó. Nda̱a̱ táki̱ʼva sa̱kuaʼayó nu̱ú lección 48, “na̱ xíka xíʼin na̱ ndíchi, ndíchi xa̱a̱na koona”. Soo na̱ ku̱a̱ʼá tiempo kítáʼan xíʼin na̱ va̱ása íxato̱ʼó ña̱ káʼa̱n Jehová “kǒo ña̱ va̱ʼa ndakiʼinna” (Proverbios 13:20).

2. ¿Nda̱chun ndáyáʼvi kiʼinyó kuenta nda̱saa tiempo xíniñúʼuyó ña̱ keʼéyó ña̱ sákusi̱í-iniyó?

Ni kútóova Jehová ña̱ xítonde̱ʼéyó á ña̱ sísikíyó, soo xíniñúʼu kiʼinyó kuenta ña̱ va̱ása ku̱a̱ʼání tiempo keʼéyó ña̱yóʼo, saáchi ta ná keʼéyó saá, va̱ása kǒoka tiempo nu̱úyó ña̱ keʼéyó ña̱ʼa ña̱ ndáyáʼvika. Biblia káchiña “viíní kuniñúʼundó tiempo ña̱ kúúmiíndó” (kaʼvi Efesios 5:15, 16).

NÁ SAKUAʼAKAYÓ XA̱ʼA̱ÑA

Koto ndáaña keʼún ña̱ vií koo ña̱ ndaka̱xiún kotonde̱ʼún á kusíkíún.

3. Kǒo kusíkíún á kotonde̱ʼún ña̱ʼa ña̱ va̱ása va̱ʼa

¿Nda̱chun xíniñúʼu vií ndaka̱xinyó ña̱ kusíkíyó á kotonde̱ʼéyó? Kotondó VIDEO tándi̱ʼi ka̱ʼa̱nndó xa̱ʼa̱ ña̱yóʼo:

VIDEO: ¿Ndáa ña̱ʼa kúúña kivi kotonde̱ʼéyó á kusíkíyó? (4:39)

¿Ndáa ki̱ʼva kítáʼan ña̱ xi̱kanitáʼan na̱ yiví ñuu Roma xíʼin ña̱ xítonde̱ʼé á sísikí na̱ yiví tiempo vitin?
Nda̱a̱ táki̱ʼva xi̱niyó nu̱ú video, ¿ndáaña sa̱kuaʼa ta̱ Danny xa̱ʼa̱ ña̱ sísikíra?

Kaʼvindó Romanos 12:9 ta ka̱ʼa̱nndó xa̱ʼa̱ ña̱yóʼo:

¿Ndáa ki̱ʼva chíndeétáʼan versículo yóʼo xíʼinyó ña̱ vií ndaka̱xinyó ña̱ sakusi̱í-iniyó?

¿Ndáaña kúú sava ña̱ʼa ña̱ va̱ása kútóo Jehová? Kaʼvindó Proverbios 6:16, 17 xíʼin Gálatas 5:19-21. Tándi̱ʼi ka̱ʼvindó iin ta iin texto yóʼo ka̱ʼa̱nndó xa̱ʼa̱ ña̱yóʼo:

Ndiʼika ña̱ káʼa̱n texto yóʼo xa̱ʼa̱, ¿ndáaña kúú ña̱ xíniún kéʼéka na̱ yiví tiempo vitin?

¿Ndáa ki̱ʼva vií ndaka̱xinyó ña̱ kusíkíyó á ña̱ kotonde̱ʼéyó?

Ndakanixi̱ní xa̱ʼa̱ ña̱yóʼo:

¿Ndáaña káʼa̱nña xa̱ʼa̱? ¿Á kúúmiíña ña̱ʼa ña̱ kúndasí Jehová xínira?
¿Ama keʼúnña? ¿Á kíndaaña tiempo ña̱ keʼún ña̱ʼa ña̱ ndáyáʼvika?
¿Ndáana keʼúnña xíʼin? ¿Á ku̱a̱ʼá tiempo kutáʼún xíʼin na̱ kǒo kúʼvi̱-ini xíni Jehová?

Ña̱ kǒo ña̱ kundoʼoyó xíniñúʼu kuxíkáyó nu̱ú ña̱ i̱yo. Tá xa̱a̱ kúnda̱a̱-iniyó xa̱ʼa̱ ña̱ʼa ña̱ kivi chika̱a̱ miíyó nu̱ú tu̱ndóʼo ná kuxíkáyó nu̱úña.

Iin carro ku̱a̱ʼa̱nnú chi yuʼú iin kavá. Ta iin táʼví carro yóʼo va̱ása ku̱a̱ʼa̱nkaña nu̱ú carretera.

4. Viíní kuniñúʼún tiempoún

Kotondó VIDEO ta ka̱ʼa̱nndó xa̱ʼa̱ ña̱yóʼo:

VIDEO: ¿Ndáaña kíndaa tiempo ndaʼún? (2:45)

Ni su̱ví ña̱ va̱ása va̱ʼaví kúú ña̱ xíto ta̱ hermano yóʼo. Soo, ¿ndáa ki̱ʼva ki̱xáʼaña kíndaaña tiempora?

Kaʼvindó Filipenses 1:10 ta ka̱ʼa̱nndó xa̱ʼa̱ ña̱yóʼo:

¿Ndáa ki̱ʼva chindeétáʼan versículo yóʼo xíʼinyó ña̱ kunda̱a̱-iniyó nda̱saa tiempo keʼéyó ña̱ sakusi̱í-iniyó?

5. Ndaka̱xin ña̱ kusíkíún á kotonde̱ʼún ña̱ʼa ña̱ chindeétáʼan xíʼún

Va̱ása kútóo Jehová sava ña̱ sísikí na̱ yiví á ña̱ xítonde̱ʼéna, soo íyo ku̱a̱ʼáníva ña̱ kivi keʼéyó. Kaʼvindó Eclesiastés 8:15 xíʼin Filipenses 4:8, ta ka̱ʼa̱nndó xa̱ʼa̱ ña̱yóʼo:

¿Ndáaña kútóo Ndióxi̱ kúú ña̱ kútóún keʼún?

Na̱ʼná na̱ yiví na̱ xa̱a̱ síín síín ku̱i̱ya̱ kúsi̱í-inina kéʼéna ña̱ kútóona: 1. Iin ñá loʼo xíniso̱ʼoñá yaa ta ndákaʼyiñá. 2. U̱ni̱ ta̱ va̱lí sísikíra básquetbol. 3. U̱vi̱ ta̱ va̱lí kávara bicicleta. 4. Iin ta̱ loʼo sísikíra xíʼin iin carro loʼo. 5. Iin ta̱a sákaʼara iin tambor. 6. Iin ta̱ loʼo xíʼin yivára sísikína videojuego. 7. Iin ñaʼá távañá na̱ʼná. — Kiviva kusi̱í-iniún ta saátu ndakindeún xíʼin ña̱ʼa ña̱ va̱ʼa.

ÑA̱ KÁʼA̱N SAVA NA̱ YIVÍ: “Va̱ʼava kusíkíyó ña̱ kítáʼan xíʼin na̱ ta̱chí ndi̱va̱ʼa, nu̱ú kánitáʼanna, nu̱ú kísi̱ xíʼin táʼanna, soo nani ná kǒo keʼéyó ña̱yóʼo”.

¿Ndáaña túviún?

ÑA̱ XA̱A̱ SA̱KUAʼAYÓ

Jehová kúni̱ra ña̱ vií ná ndaka̱xinyó ña̱ kotonde̱ʼéyó á kusíkíyó ta ná sakusi̱íña-iniyó.

Ná ndakaʼányó xa̱ʼa̱ ña̱yóʼo

Miíyó na̱ ndásakáʼnu Ndióxi̱, ¿ndáaña va̱ása xítoyó ta ni va̱ása sísikíyó?
¿Nda̱chun xíniñúʼu kiʼinyó kuenta nda̱saa tiempo xíniñúʼuyó ña̱ keʼéyó ña̱ sákusi̱í-iniyó?
¿Á kúni̱ún ndaka̱xiún kotonde̱ʼún á kusíkíún ña̱ sákusi̱í-ini Jehová? ¿Nda̱chun?

Ki̱vi̱ ña̱ sa̱ndíʼún ka̱ʼviún lección yóʼo:

Kivi keʼún ña̱yóʼo

Koto recuadro “¿Ndáa ki̱ʼva vií ndaka̱xinyó ña̱ kusíkíyó á ña̱ kotonde̱ʼéyó?”, ña̱ va̱ʼa kotoún ndáa ki̱ʼva xíniñúʼún tiempoún.

Inkaka ña̱ kivi keʼún:

Inkaka ña̱ kivi keʼé miíún

NANDUKÚKA XA̱ʼA̱ÑA

Koto ndáana xíniñúʼu ndaka̱xin ña̱ kotonde̱ʼún á ña̱ kusíkíún.

“¿Á kúúmií na̱ testigo Jehová iin lista película, yaa xíʼin libro ña̱ va̱ása xíniñúʼu keʼéna?” (Artículo ña̱ va̱xi nu̱ú jw.org)

Kaʼvi ndáa ki̱ʼva vií ndaka̱xiún ña̱ sakusi̱í-iniún.

“¿Á vií íyo ña̱ sákusi̱í-iniyó?” (La Atalaya, 15 tí octubre ku̱i̱ya̱ 2011)

Koto nda̱chun iin ta̱a sa̱ndákoora ña̱ sákusi̱í-inira nu̱ú ña̱ káʼa̱n xa̱ʼa̱ra “Sa̱ndákoi̱ ña̱ kundasíi̱ kunii̱ inkana”.

“Biblia chi̱ndeétáʼan xíʼinna ña̱ na̱samana” (La Atalaya, 1 tí febrero ku̱i̱ya̱ 2010)

Koto ña̱ nda̱kaxin iin ñá ñaʼá keʼéñá ña̱ va̱ása kotoñá ña̱ kítáʼan xíʼin na̱ ta̱chí ndi̱va̱ʼa.

Kǒo kotoún ña̱ kítáʼan xíʼin na̱ ta̱chí ndi̱va̱ʼa (2:02)