Chindeé na̱ va̱ása túvi nu̱ú ná sakuaʼana xa̱ʼa Jehová
1. ¿Nda̱saa ni̱na̱ʼa̱ ta̱ Jesús ña̱ kúndáʼvi-inira xínira na̱ va̱ása túvi nu̱ú?
1 Xa̱kunumí kita ta̱ Jesús ña̱ ñuu Jericó. Tasaá ki̱xaʼá u̱vi̱ na̱ va̱ása túvi nu̱ú kánanara: “Táta chindeé ndi̱ʼi̱ ndáʼvindi̱”. Sana ndíʼi̱ní-ini ta̱ Jesús saáchi xa̱xíni̱ra si̱lóʼoní ki̱vi̱ kíndoo ña̱ kuvira. Soo ta̱yóʼo xi̱kundichira, ka̱narana ta sa̱ndáʼarana (Mat. 20:29-34). ¿Nda̱saa va̱ʼa kundiku̱nyó yichi̱ ta̱ Jesús xa̱ʼa ña̱ na̱kundáʼvi-inira xi̱nira na̱ yiví?
2. ¿Ndáaña keʼéyó ña̱ va̱ʼa natúʼunyó xa̱ʼa Jehová xíʼin na̱ yiví na̱ va̱ása túvi nu̱ú na̱ ndáni̱ʼíyó calle?
2 Ná chindeé táʼanyó xíʼinna. Tá ndáni̱ʼíyó iin na̱ va̱ása túvi nu̱ú tá ku̱a̱ʼa̱nyó calle ná chindeé táʼanyó xíʼinna. Sana kaka-inina kunina miíyó saáchi sava na̱ yiví sándáʼvinana xa̱ʼa ña̱ va̱ása túvi nu̱úna. Soo tá vií-iniyó ta náʼa̱yó ña̱ ndíʼi̱-iniyó xa̱ʼana saá kúúña va̱ása kakaka-inina kunina miíyó. Ná kiʼinyó kuenta á nda̱si va̱ʼa nu̱úna á túvi loʼo nu̱úna tasaá kotoyó ndáa ki̱ʼva chindeé táʼanyó xíʼinna. Tá xa̱chindeé táʼanyó xíʼinna, kivi ka̱ʼa̱nyó xíʼinna ña̱ xíkayó nátúʼunyó xa̱ʼa Ndióxi̱. Ná kaʼviyó texto ña̱ Biblia nu̱úna tá kúú Salmo 146:8 á Isaías 35:5, 6. Kivitu sanáʼa̱yóna nda̱saa va̱ʼa tavána ña̱ grabación kuniso̱ʼona nu̱ú ña̱ Internet jw.org. Tá xíni̱na kaʼvina letra braille, ná nda̱ka̱tu̱ʼunyóna á kúni̱na tutu tu̱ʼun Ndióxi̱ xíʼin letra yóʼo. Tá kúúmiína iin computadora tú va̱ʼa káʼvi mií, sana kivi chindeé táʼan ña̱ va̱xi nu̱ú jw.org xíʼinna, tasaátu va̱ʼa tavána ndiʼi ña̱ va̱xi nu̱ú (RTF). U̱vi̱ saá ña̱ formato yóʼo íyoña tu̱ʼun sáʼán xíʼin tu̱ʼun náʼnu ña̱ íyo iníísaá ñuyǐví. (Koto cuadro “Tá chíndeé táʼanyó xíʼin na̱ va̱ása túvi nu̱ú...”.)
3. ¿Ndáaña keʼéyó ña̱ va̱ʼa ndani̱ʼíyó na̱ yiví na̱ va̱ása túvi nu̱ú?
3 Ná nandukúyó na̱ va̱ása túvi nu̱ú. Tá ku̱a̱ʼa̱nyó veʼe tá veʼe sana kǒo na̱ yiví na̱ va̱ása túvi nu̱ú ndáni̱ʼíyó chi na̱yóʼo kǒo kítana natúʼunna xíʼin na̱ yiví na̱ va̱ása xíni̱na. Xa̱ʼa ña̱yóʼo kúú ña̱ xíniñúʼu chika̱a̱yó ndée ña̱ nandukúyóna ta natúʼunyó xíʼinna (Mat. 10:11). ¿Á íyo iin na̱ va̱ása túvi nu̱ú káchíñu xíʼinyó á káʼvi xíʼinyó escuela? Ná natúʼunyó xíʼinna xa̱ʼa Ndióxi̱. Tá territorio nu̱ú xíkayó íyo iin escuela nu̱ú káʼvi na̱ va̱ása túvi nu̱ú, ná nda̱ka̱tu̱ʼunyó ta̱ director tá kúni̱ra taxiyó tutu letra braille ndaʼa̱ra ña̱ kooña bibliotecana. ¿Á xíni̱yó na̱ íyo iin táʼan na̱ va̱ása túvi nu̱ú? ¿Á íyo iin veʼe nu̱ú chíndeé táʼanna xíʼin na̱ kǒo kívi kaka ta íyotu na̱ va̱ása túvi nu̱ú? Ná natúʼunyó xíʼin táʼanna, á xíʼin na̱ ndáa veʼe yóʼo á xíʼin ta̱ director ña̱ kúúyó na̱ testigo Jehová ta kúni̱yó chindeé táʼanyó xíʼin na̱ va̱ása túvi nu̱ú, tá kúúmiíyó tutu ña̱ letra braille xíʼin grabación ña̱ kivi kuniso̱ʼona. Ná kaʼviyó Biblia nu̱úna nu̱ú káʼa̱nña Ndióxi̱ sandáʼara nu̱úna. Ná na̱ʼa̱tuyó película ña̱ naní “No sé qué haría sin ella”, ña̱ va̱xi nu̱ú jw.org nu̱úna. Película yóʼo káʼa̱nña xa̱ʼa iin ta̱ hermano ta̱ va̱ása túvi nu̱ú tá va̱ʼaní chíndeéñara ña̱ káʼvira Biblia letra braille. Tá ná ka̱ʼa̱n káxiyó xíʼinna ndáa xa̱ʼa kúú ña̱ ku̱a̱ʼa̱nyó sana taxivana natúʼunyó xíʼin na̱ va̱ása túvi nu̱ú.
4. ¿Ndáaña sákuaʼayó xíʼin ña̱ ke̱ʼé ñá Janet?
4 Iin ñá hermana ñá va̱ása túvi nu̱ú Janet naníñá ta ni̱xa̱ʼa̱nñá veʼe nu̱ú íyo ku̱a̱ʼá na̱ va̱ása túvi nu̱ú ta ki̱xaʼáñá nátúʼunñá xíʼin iin ñá loʼo. Ñá Janet ni̱ka̱ʼa̱nñá xíʼinñá: “Tá ni̱xi̱yo ta̱ Jesús nu̱ú Ñuʼú yóʼo sa̱ndáʼara nu̱ú na̱ va̱ása túvi nu̱ú, tasaá ni̱na̱ʼa̱ra ña̱ keʼéra chí nu̱únínu”. Tasaá ni̱ka̱ʼa̱nñá xa̱ʼa ña̱ va̱xi nu̱ú Revelación 21:3, 4, ta na̱túʼunñá xíʼin ñá loʼo yóʼo ña̱ kunduvi ña̱yóʼo ti̱xin ña̱ reino Ndióxi̱. Ñá loʼo yóʼo ni̱ka̱ʼa̱nñá: “Sa̱kán ña̱ nu̱ú kúú ña̱ káʼa̱n iin na̱ va̱ása túvi nu̱ú xíʼi̱n xa̱ʼa ña̱yóʼo. Chi ku̱a̱ʼání na̱ yiví káchina tá va̱ása túvi nu̱úyó castigo Ndióxi̱va kúúña, sana ku̱a̱chi na̱ veʼeyó na̱ xi̱ndoo xi̱naʼáva kúúña”. Ñá Janet chi̱ndaʼáñá iin correo ku̱a̱ʼa̱n ndaʼa̱ ñá loʼo yóʼo nu̱ú va̱xi libro Enseña, ta vitin káʼvi ñá Janet xíʼinñá u̱vi̱ yichi̱ nu̱ú semana.
5. Ña̱ nda̱a̱ kúúña kǒo kívi sandáʼayó na̱ va̱ása túvi nu̱ú, soo ¿ndáaña va̱ʼa ni̱ʼína tá ná chindeé táʼanyó xíʼinna?
5 Ña̱ nda̱a̱ kúúña miíyó va̱ása kívi sandáʼayó nu̱ú na̱ va̱ása túvi nu̱ú nda̱a̱ táki̱ʼva i̱xaa ta̱ Jesús. Soo kiviva chindeé táʼanyó xíʼinna. Ta̱ Ndi̱va̱ʼa va̱ása táxira sakuaʼa na̱ yiví xa̱ʼa Ndióxi̱ nda̱a̱ na̱ va̱ása túvi nu̱ú kǒo táxira sakuaʼa xa̱ʼa Ndióxi̱. Soo miíyó kiviva chindeé táʼanyó xíʼin ndiʼina ña̱ sakuaʼana ña̱ nda̱a̱ xa̱ʼa Ndióxi̱ (2 Cor. 4:4). Ta̱ Jesús sa̱ndáʼara nu̱ú u̱vi̱ na̱ va̱ása túvi nu̱ú yatin chí ñuu Jericó saáchi na̱kundáʼvi-inira xi̱nirana (Mat. 20:34). Saátu miíyó tá ndixa kúndáʼvi-iniyó xíniyó na̱ va̱ása túvi nu̱ú kiviva chindeé táʼanyó xíʼinna ña̱ sakuaʼana xa̱ʼa Jehová, chi ta̱yóʼo kúú ta̱ sandáʼa nu̱úna ta taxira kutakuna ndiʼi tiempo.