Ná ka̱ʼa̱nyó xíʼinna ku̱ʼu̱nna asamblea regional xíʼinyó

Ndiʼi ku̱i̱ya̱ kúsi̱íní-iniyó xa̱ʼa ña̱ xáʼa̱nyó asamblea regional. Ta kúni̱tuyó ndiʼi na̱ yiví ná kunda̱a̱-inina xa̱ʼa Jehová ña̱ va̱ʼaní inira xa̱ʼa ndiʼi ña̱ táxira ndaʼa̱yó. Ña̱kán chika̱a̱níyó ndée ña̱ ka̱ʼa̱nyó xíʼin ndiʼina ña̱ ku̱ʼu̱nna xíʼinyó (Sl 34:8). Na̱ anciano ña̱ iin iin congregación kúú na̱ ka̱ʼa̱n xíʼinyó ndáa ki̱ʼva xaxáyó invitación.

ÑA̱ KIʼINYÓ KUENTA XÍʼIN

• ¿Ama koo asambleai̱?

• ¿Ama kixaʼána xaxána invitación ña̱ congregación nu̱ú ndíka̱i̱?

• ¿Ama koo reunión ña̱ ku̱ʼu̱nyó servicio?

• ¿Ndáaña ndákanixi̱níi̱ keʼíi̱ tá ná kixaʼá xaxándi̱ invitación?

• ¿Ndáana ka̱ʼi̱n xíʼin ña̱ ku̱ʼu̱nna xíʼinndi̱?

NÁ TAXIYÓ INVITACIÓN NDAʼA̱NA

Tándi̱ʼi chi̱ndeúnna, kivi ka̱ʼún:

“Iníísaá ñuyǐví xíkandi̱ káʼa̱nndi̱ xíʼin ndiʼina ña̱ ná ku̱ʼu̱nna xíʼinndi̱ iin asamblea. Fecha xíʼin hora ña̱ kooña nu̱ú tutu yóʼo va̱xiña. Kusi̱íní-inindi̱ ná ku̱ʼu̱n xíʼinndi̱”.

NÁ KUNDI̱ʼI̱-INIYÓ XA̱ʼANA

Ni kúni̱yó ku̱a̱ʼánína ná ku̱ʼu̱n xíʼinyó asamblea, soo xíniñúʼu kiʼinyó kuenta ndáana kúú na̱ ndixa kútóo sakuaʼa xa̱ʼa Ndióxi̱, ña̱ va̱ʼa ndikóyó nu̱úna.

Tá sábado á domingo va̱ʼa taxituyó revista ndaʼa̱na xíʼin invitación.