ÑA̱ KÉʼÉYÓ NA̱ TESTIGO
Si̱í koo iniún natúʼún xa̱ʼa Ndióxi̱
¿Á íxayo̱ʼvi̱ña xíʼún ku̱ʼún servicio sava yichi̱? Su̱ví iin yóʼó ndóʼo saá, ndiʼivayó ndóʼo ña̱yóʼo. Sana xa̱ʼa ña̱ kéʼé na̱ yiví xíʼinyó kúúña, á sana xa̱ʼa ña̱ kǒo xíínyó ka̱ʼa̱nyó xíʼin na̱ kǒo xíni̱yó kúúña. Tá ndóʼoyó ña̱yóʼo, sana kǒo kúsi̱íka-iniyó natúʼunyó. Soo iin Ndióxi̱ ta̱ si̱í-ini ndásakáʼnuyó, ta kúni̱ra xíʼin ña̱ si̱í-ini ná kachíñuyó nu̱úra (Sl 100:2; 1Ti 1:11). Ña̱kán, ¿ndáa xa̱ʼa kúú ña̱ xíniñúʼu kusi̱í-iniyó tá ku̱a̱ʼa̱nyó servicio?
Ña̱ nu̱ú, saáchi nátúʼunyó xa̱ʼa ña̱ koo chí nu̱únínu. Na̱ yiví kǒo ña̱ ndátuna koo chí nu̱únínu, ña̱kán miíyó kivi sakusi̱íyó-inina xíʼin tu̱ʼun va̱ʼa (Isa 52:7). Ña̱ kúnda̱a̱-iniyó xa̱ʼa ña̱ koo ti̱xin Reino Ndióxi̱ sákusi̱íña-iniyó. Tá kúma̱níka kitaún ku̱ʼún servicio ndakanixi̱níún ndáaña va̱ʼa ndakiʼinyó tá ná kixa̱a̱ reino Ndióxi̱ nu̱ú ñuʼú.
Ña̱ u̱vi̱, saáchi ña̱ nátúʼunyó xíʼinna xa̱ʼa Ndióxi̱ chíndeéña miína ña̱ koo va̱ʼana xíʼin na̱ veʼena xíʼin ña̱ koo va̱ʼana xíʼin Ndióxi̱. Va̱ʼa sandákoona ña̱ kini kéʼéna ta xa̱a̱na koona ndiʼi tiempo (Isa 48:17, 18; Ro 1:16). Ná ndakanixi̱níyó ña̱ ku̱a̱ʼa̱nyó sáka̱kuyó na̱ yiví, soo savana kǒo xíínna sáka̱kuyóna. Xa̱ʼa ña̱yóʼo, ¿á xíniñúʼu sandákooyó ña̱ ku̱ʼu̱nyó nandukúyó na̱ ndixa kúni̱ ka̱ku? (Mt 10:11-14).
Ña̱ u̱ni̱ kúú mií ña̱ ndáyáʼvi va̱ʼaka: tá nátúʼunyó xa̱ʼa Jehová ndásakáʼnuyóra. Ta̱kán kúsi̱íní-inira xíʼinyó tá saá kéʼéyó (Isa 43:10; Heb 6:10). Ta xíʼin ña̱ si̱í-ini táxira espíritu santo ndaʼa̱yó ña̱ va̱ʼa kachíñuyó nu̱úra. Ña̱kán ná ka̱ʼa̱nyó xíʼinra ña̱ taxira espíritu santo ndaʼa̱yó tasaá si̱í koo iniyó (Gál 5:22). Tá ná koo Jehová xíʼinyó saá kúú ña̱ kǒo yi̱ʼvíyó natúʼunyó xa̱ʼara (Hch 4:31). Ña̱kán, nda̱a̱ ndáaka ña̱ ná ka̱ʼa̱n na̱ yiví xíʼinyó nu̱ú xíkayó nátúʼunyó, ná kusi̱í-iniyó keʼéyó chiñu ña̱ ta̱xi Ndióxi̱ ndaʼa̱yó (Eze 3:3).
¿Ndáa ki̱ʼva kúni̱ún koo iniún tá ku̱a̱ʼún servicio? ¿Ndáa ki̱ʼva na̱ʼún ña̱ kúsi̱í-iniún nátúʼun xa̱ʼa Ndióxi̱?
TÁNDI̱ʼI XI̱TONDÓ ÑA̱ VIDEO NDÁAÑA KE̱ʼÍI̱ ÑA̱ TUKU NA̱KUSI̱Í-INII̱ ÑA̱ NDASAKÁʼNUI̱ JEHOVÁ, NDAKUIINDÓ ÑA̱ PREGUNTA VA̱XI YÓʼO:
Ni ku̱a̱ʼání hora kéeyó nátúʼunyó xa̱ʼa Ndióxi̱ yo̱o̱ tá yo̱o̱, ¿nda̱chun xíniñúʼu chika̱a̱níyó ndée ña̱ kaʼviyó tu̱ʼunra?
¿Ndáa ki̱ʼva keʼéyó táʼan ña̱ ke̱ʼé ñá María?
¿Ama kúú ña̱ táváún tiempo ña̱ ndákanixi̱níún xa̱ʼa tu̱ʼun Ndióxi̱?
¿Ndáaña kúú ña̱ kútóún tá nátúʼún xa̱ʼa Ndióxi̱?