Chiñu ña̱ chindeétáʼanyó xíʼin inkana

8:1-4; 9:7

Miíyó na̱ ndásakáʼnu Ndióxi̱ u̱vi̱ chiñu kéʼéyó: 1) “iinña kúú ña̱ chindeétáʼanyó xíʼin na̱ yiví ña̱ xa̱a̱na kutáʼan va̱ʼana xíʼin Ndióxi̱”, á ña̱ ku̱ʼu̱nyó natúʼunyó ta sanáʼa̱yó na̱ yiví xa̱ʼa̱ra, 2) “ta ña̱ inka kúú ña̱ chindeétáʼanyó xíʼin na̱ santo”, á ña̱ chindeétáʼanyó xíʼin na̱ hermano (2Co 5:18-20; 8:4). Ña̱ chindeéyó inka na̱ hermano na̱ xíniñúʼu ña̱ʼa nu̱ú, iin ña̱ ndásakáʼnuyó Jehová kúútu ña̱yóʼova ta iin ña̱ va̱ʼaní kúú ña̱yóʼo chi saá:

• Chíndeéyó na̱ hermano ta sándi̱koyó-inina xa̱ʼa̱ ña̱ xóʼvi̱na (2Co 9:12a).

• Chíndeéyó na̱ xóʼvi̱ ña̱ va̱ʼa tuku kachíñuna nu̱ú Ndióxi̱, ña̱ ku̱ʼu̱n tukuna predicación, tasaá na̱ʼa̱na ña̱ táxina tíxa̱ʼvi ndaʼa̱ Jehová (2Co 9:12b).

• Ndásakáʼnuyó Jehová (2Co 9:13). Tá chindeétáʼanyó xíʼin na̱ hermano na̱ yáʼa nu̱ú tu̱ndóʼo, nda̱a̱ na̱ va̱ása káʼa̱n va̱ʼa xa̱ʼa̱ miíyó na̱ testigo Jehová kíʼinna kuenta xíʼin ña̱ kéʼéyó.