Yo̱o̱ septiembre koo campaña ña̱ kixáʼayó kaʼviyó xíʼin na̱ yiví

Ti̱xin yo̱o̱ septiembre chika̱a̱níyó ndee̱ ña̱ kixáʼayó kaʼviyó xíʼin na̱ yiví ta kuniñúʼuyó folleto ña̱ naní Kivi koo si̱íún vitin ta saátu chí nu̱únínu. Ta na̱ kúni̱ koo precursor yo̱o̱ yóʼo kivi ndataxina 30 hora. ¿Ndáa ki̱ʼva koo campaña yóʼo?

• Ña̱ ka̱ʼún yichi̱ nu̱ú. Kuniñúʼu ña̱ va̱xi sa̱tá folleto yóʼo ña̱ va̱ʼa kutóoka na̱ yiví kunda̱a̱-inina xa̱ʼa̱ ña̱ káʼa̱nña, ta ka̱ʼa̱n xíʼinna ndáa ki̱ʼva xíniñúʼuyó tutu yóʼo tá káʼviyó xíʼin na̱ yiví. Ta saátu ku̱ʼún nu̱ú na̱ revisitaún xíʼin na̱ va̱ʼaní xi̱niso̱ʼo tá na̱túʼún xíʼinna. Ni va̱ása níxiinna kaʼviún xíʼinna tá ya̱chi̱, soo sana kutóovana folleto yóʼo xíʼin ki̱ʼva ña̱ sánáʼa̱yó na̱ yiví vitin. Va̱ása xíniñúʼu sandákooyó folleto yóʼo veʼe nu̱ú kǒo na̱ yiví ndóo ta saátu va̱ása chindaʼáyóña ndaʼa̱ na̱ yiví na̱ va̱ása kútóo sákuaʼa xa̱ʼa̱ Ndióxi̱. Na̱ Comité ña̱ Servicio na̱ íyo ti̱xin congregación, kivi nda̱kaxinna inkaka ki̱vi̱ á inkaka hora ña̱ kivi kee na̱ hermano natúʼunna xa̱ʼa̱ Ndióxi̱ yo̱o̱ yóʼo.

• Inkaka yichi̱. Tá xíniñúʼu na̱ congregación nu̱ú ndíka̱ún tú carro válí ña̱ va̱ʼa natúʼunna xa̱ʼa̱ Ndióxi̱, kivitu chisóndó ña̱ folleto Kivi koo si̱íún vitin ta saátu chí nu̱únínu. Tá ku̱tóo iin na̱ yiví ña̱ folleto yóʼo, ka̱ʼa̱n xíʼinna ña̱ kivitu ku̱ʼu̱n iinna sanáʼa̱nana xa̱ʼa̱ Ndióxi̱ ta va̱ása kiʼinna xu̱ʼún ndaʼa̱na. Kivi ka̱ʼún xíʼinna ndáa ki̱ʼva káʼviyó xíʼin na̱ yiví á kivitu kindo̱ún xíʼinna ña̱ ka̱ʼún xa̱ʼa̱ ña̱yóʼo xíʼinna inka yichi̱. Ta̱ superintendente ña̱ servicio, kivi ka̱ʼa̱nra xíʼin sava na̱ publicador na̱ xíni̱ní natúʼun xa̱ʼa̱ Ndióxi̱ ña̱ ná ku̱ʼu̱nna nu̱ú íxi̱kó na̱ yiví ta nda̱ka̱tu̱ʼunna na̱yóʼo á kúni̱na ná ku̱ʼu̱n iinna sanáʼa̱nana xa̱ʼa̱ Ndióxi̱. Ta saátu tá nátúʼún xa̱ʼa̱ Ndióxi̱ nda̱a̱ ndáaka nu̱ú xíkaún, á tá nátúʼún xíʼin na̱ káchíñu xíʼún, ka̱ʼa̱n xíʼinna á kúni̱na sanáʼúnna xa̱ʼa̱ Ndióxi̱.

Ta̱ Jesús ni̱ka̱ʼa̱nra ña̱ ná sanáʼa̱yó na̱ yiví ña̱ kundiku̱nnara (Mt 28:19, 20). Ta kúni̱yó ña̱ ná chindeétáʼan campaña yóʼo xíʼinyó ña̱ saxínuyó ña̱ ni̱ka̱ʼa̱n ta̱ Jesús.