“I̱xakáʼnu-inira xa̱ʼa̱ ku̱a̱chi ña̱ ni̱ki̱ʼvina xi̱naʼá”

Xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱ ku̱a̱chiyó kúú ña̱ va̱ʼa íxakáʼnu-ini Jehová xa̱ʼa̱yó (Efes. 1:7). Nisaá, Biblia káchiña: “Ndióxi̱ kúeení ni̱xi̱yo inira ta i̱xakáʼnu-inira xa̱ʼa̱ ku̱a̱chi ña̱ ni̱ki̱ʼvina xi̱naʼá” (Rom. 3:25). Ña̱yóʼo kúni̱ kachiña ña̱ tá kúma̱níka kuvi̱ ta̱ Jesús saáví ki̱xáʼa Jehová íxakáʼnu-inira xa̱ʼa̱ ku̱a̱chi na̱ yiví. Nina ña̱ nda̱kú kéʼé Jehová ña̱kán, ¿nda̱chun va̱ʼa i̱xakáʼnu-inira xa̱ʼa̱ na̱ yiví tá kúma̱níka kuvi ta̱ Jesús?

Nu̱ú Jehová nda̱a̱ táki̱ʼva íyo ña̱ xa̱a̱ cha̱ʼvira xa̱ʼa̱ ku̱a̱chi na̱ yiví saá ni̱xi̱yoña tá ni̱ka̱ʼa̱nra profecía ña̱ koo iin na̱ chaʼvi xa̱ʼa̱ ku̱a̱chi na̱ yiví na̱ kándíxa miíra (Gén. 3:15; 22:18). Xi̱kundaava-ini Jehová ña̱ kandíxa ta̱ Jesús kixira nu̱ú ñuʼú yóʼo ta kuvira xa̱ʼa̱ ku̱a̱chi na̱ yiví (Gál. 4:4; Heb. 10:​7-10). Tá ni̱xi̱yo ta̱ Jesús nu̱ú ñuʼú yóʼo Jehová ta̱xira ña̱ ixakáʼnu-ini ta̱ Jesús xa̱ʼa̱ ku̱a̱chi na̱ yiví na̱ xi̱kandíxa ña̱ xi̱sanáʼa̱ra. Ni kúma̱níva kuvi ta̱ Jesús, soo na̱ yiví xa̱a̱ xi̱ndakiʼinvana ña̱ va̱ʼa xa̱ʼa̱ ña̱ keʼéra chí nu̱únínu (Mat. 9:​2-6).