Viíní ná kuniñúʼuyó espejo ña̱ kúúmiíyó

Ta̱ discípulo Santiago ni̱ka̱ʼa̱nra ña̱ nda̱a̱ táki̱ʼva íyo iin espejo saá íyo ña̱ Biblia, saáchi chíndeétáʼanña xíʼinyó ña̱ kotoyó ndáa ki̱ʼva íyoyó (Sant. 1:​22-25). Tá saá, ¿ndáa ki̱ʼva kivi viíní kuniñúʼuyó ña̱ Biblia ña̱ íyo nda̱a̱ táki̱ʼva íyo iin espejo?

Viíní ná kaʼviyó tu̱ʼun Ndióxi̱. Tá kama kuití ná kotoyó miíyó nu̱ú iin espejo, sana va̱ása kiʼinvíyó kuenta ña̱ xíniñúʼu nasamayó sava ña̱ʼa ña̱ va̱ʼa viíka kuna̱ʼa̱yó, ki̱ʼva saá kivi kundoʼoyó tá kama kuití káʼviyó Biblia, va̱ása kiʼinvíyó kuenta ña̱ xíniñúʼu nasamayó sava ña̱ kéʼéyó. Ña̱kán xíniñúʼu viíní kaʼviyó ña̱yóʼo ta ndakanixi̱níyó xa̱ʼa̱ña ña̱ va̱ʼa chindeétáʼanña xíʼinyó.

Ná kiʼinkayó kuenta xíʼin ña̱ kéʼé miíyó nu̱úka ña̱ kéʼé inkana. Sava yichi̱ tá xítoyó miíyó nu̱ú iin espejo saátu kivi kotoyó inkana ta kixáʼayó ndakanixi̱níyó ña̱ va̱ása va̱ʼa náʼa̱na. Ki̱ʼva saá kivi kundoʼoyó tá káʼviyó ña̱ Biblia, kivi kixáʼa ndakanixi̱níyó ña̱ xíniñúʼu nasama inkana ki̱ʼva ña̱ kéʼéna, soo tá kéʼéyó ña̱yóʼo va̱ása kiʼinyó kuenta ndáaña kéʼé miíyó kúú ña̱ xíniñúʼún nasamayó.

Viíní ná ndakanixi̱níyó. Tá xítoyó miíyó nu̱ú iin espejo, ta ña̱ kíʼinkayó kuenta xíʼin kúú ña̱ va̱ása va̱ʼa náʼa̱yó kivi ndakava-iniyó. Ña̱ va̱ʼa kǒo kundoʼoyó saá tá káʼviyó ña̱ Biblia xíniñúʼu viíní ndakanixi̱níyó. Ta kǒo xíniñúʼu ndakanixi̱níyó ña̱ ni loʼo va̱ása va̱ʼa íyo ña̱ kéʼéyó, chi Jehová va̱ása ndákanivíxi̱níra saá xa̱ʼa̱yó chi kúnda̱a̱va-inira ña̱ kúúyó na̱ yiví ku̱a̱chi (Sant. 3:17).