Vií ná koo ña̱ ka̱ʼa̱nyó tá káʼa̱nyó xa̱ʼa̱ ña̱ nda̱a̱

1. ¿Ndáaña xíniñúʼu keʼéyó ña̱ va̱ʼa kundika̱a̱yó ti̱xin ñuu Jehová?

TÁ XÁA̱YÓ xínitáʼanyó xíʼin iin na̱ hermano, ña̱ siʼna ndáka̱tu̱ʼunyóna kúú ña̱yóʼo: “¿Ndáa ki̱ʼva ku̱ndaa̱-iniún xa̱ʼa̱ ña̱ nda̱a̱?”. Sana kachina: “Tá loʼovíi̱ sa̱kúaʼi̱ xa̱ʼa̱ ña̱ nda̱a̱” á kachituna “sa̱kán sákuaʼi̱ xa̱ʼa̱ ña̱ nda̱a̱”. Káʼa̱nyó ña̱yóʼo chi ndáyáʼviní ña̱ sákuaʼayó nu̱ú Biblia ta kéʼéyó ña̱ káʼa̱nña. Ña̱ va̱ʼa kundika̱a̱yó ti̱xin ñuu Jehová xíniñúʼu na̱ʼa̱yó ña̱ kúʼvi̱-iniyó xíniyó ña̱ nda̱a̱, náʼa̱yó ña̱yóʼo tá káʼa̱nyó ña̱ nda̱a̱ ta saátu xíʼin ña̱ kéʼéyó (Sal. 15:1-3).a

2. a) ¿Ndáa ki̱ʼva xi̱xito na̱ yiví ta̱ Jesús? b) ¿Ndáaña xi̱ndoʼona xa̱ʼa̱ ña̱ xi̱sanáʼa̱ra xa̱ʼa̱ ña̱ nda̱a̱?

² Ta̱ Jesús ndiʼi tiempo xi̱kaʼa̱nra ña̱ nda̱a̱. Nda̱a̱ na̱ xi̱sa̱a̱-ini xi̱xini miíra xi̱kiʼinna kuenta ña̱ xi̱kaʼa̱nra ña̱ nda̱a̱, ni inkana va̱ása níxikutóona ña̱ xi̱kaʼa̱nra (Mat. 22:16). Ta̱ Jesús ni̱ka̱ʼa̱nra ña̱yóʼo: “Va̱xii̱ ña̱ ndataʼvíi̱ na̱ yiví. Iin ta̱ loʼo koora contra yivára, ta iin ñá loʼo kooñá contra siʼíñá, ta ñá íyo si̱so kooñá contra ñá si̱soñá” (Mat. 10:35). Va̱ása níxi̱kuni̱ví ta̱ Jesús ndataʼví-táʼan na̱ yiví xa̱ʼa̱ ña̱ xi̱sanáʼa̱ra á ña̱ xi̱sanáʼa̱ na̱ discípulora soo xi̱kunda̱a̱-inira ña̱ saá keʼé na̱ yiví xa̱ʼa̱ ña̱yóʼo (Mat. 23:37). Ni xi̱sanáʼa̱ra ña̱ nda̱a̱, xi̱kunda̱a̱-inira ña̱ ndataʼví na̱ yiví ta u̱vi̱ grupo nduuna. Na̱ kúni̱ xíni ña̱ nda̱a̱ xíʼin na̱ va̱ása kúni̱ xíni ña̱ nda̱a̱ (2 Tes. 2:9-11).

3. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

³ Nda̱a̱ táki̱ʼva ke̱ʼé ta̱ Jesús, saátu miíyó chíkaa̱yó ndee̱ ña̱ ka̱ʼa̱nyó ña̱ nda̱a̱ ña̱ va̱xi nu̱ú Biblia ndiʼi tiempo. Ni inkana va̱ása kútóona ña̱ káʼa̱nyó, ¿á kúni̱ kachi ña̱yóʼo ña̱ va̱ása ndáyáʼviví ki̱ʼva ña̱ káʼa̱nyó xíʼin na̱ yiví? Ndáyáʼviva ki̱ʼva ña̱ káʼa̱nyó xíʼinna. Nu̱ú artículo yóʼo kixáʼayó ka̱ʼa̱nyó ndáa míí kivi ndani̱ʼíyó ña̱ nda̱a̱ ta saátu ka̱ʼa̱nyó nda̱chun xíniñúʼu ka̱ʼa̱nyó ña̱ nda̱a̱, ndáa ki̱ʼva ka̱ʼa̱nyóña ta̱ ama ka̱ʼa̱nyóña. Ña̱yóʼo chindeétáʼanña xíʼinyó ña̱ vií koo ña̱ ka̱ʼa̱nyó xa̱ʼa̱ ña̱ nda̱a̱.

NDÁA MÍÍ KIVI NDANI̱ʼÍYÓ ÑA̱ NDA̱A̱

4. ¿Nda̱chun káʼa̱nyó Jehová kúúra Ndióxi̱ ta̱ káʼa̱n ña̱ nda̱a̱?

⁴ Nina ña̱ nda̱a̱ káʼa̱n Jehová. Tá kúú káʼa̱nra ña̱ nda̱a̱ xa̱ʼa̱ ña̱ va̱ʼa xíʼin xa̱ʼa̱ ña̱ va̱ása va̱ʼa (Sal. 19:9; 119:142, 151). Ña̱ káʼa̱nra koo chí nu̱únínu ndiʼi tiempo xínu ña̱yóʼo (Is. 55:10, 11). Ta ndiʼi ña̱ káʼa̱nra keʼéra sáxi̱nuvaraña (Núm. 23:19). Ta va̱ása káʼa̱nra ña̱ vatá (Heb. 6:18). Xa̱ʼa̱ ña̱kán, Biblia káʼa̱nña xa̱ʼa̱ra ña̱ kúúra “Ndióxi̱ ta̱ káʼa̱n ña̱ nda̱a̱” (Sal. 31:5).

5. ¿Nda̱chun va̱ása yo̱ʼvi̱ nandukúyó “Ndióxi̱ ta̱ káʼa̱n ña̱ nda̱a̱”? (Hechos 17:27).

⁵ Sava na̱ yiví káʼa̱nna ña̱ yo̱ʼvi̱va xa̱a̱yó kunda̱a̱-iniyó xa̱ʼa̱ Jehová “Ndióxi̱ ta̱ káʼa̱n ña̱ nda̱a̱”. Soo su̱ví saá íyoña, saáchi xíʼin ña̱ʼa ña̱ xítoyó kúnda̱a̱-iniyó ña̱ ndixava íyora ta saátu íyo ña̱ va̱ʼa ña̱ kúúmiíra (Rom. 1:20). Tá xi̱ndikaa̱ ta̱ Pablo chí ñuu Atenas ni̱ka̱ʼa̱nra xíʼin iin grupo na̱ yiví na̱ káʼa̱n tu̱ʼun griego na̱ xi̱ndasakáʼnu ku̱a̱ʼání ndióxi̱, ni̱ka̱ʼa̱nra xíʼinna Ndióxi̱ kúni̱ra ña̱ ná nandukúnara ta “va̱ása xíká íyora nu̱ú iin iinyó” (kaʼvi Hechos 17:27). Jehová kánara na̱ yiví na̱ vitá-ini na̱ nándukú ña̱ nda̱a̱ (Juan 6:44).

6. ¿Ndáaña kúú sava ña̱ nda̱a̱ ña̱ sánáʼa̱ Biblia, ta nda̱chun kúsi̱í-iniún ña̱ sákuaʼún xa̱ʼa̱ña?

⁶ Iin ki̱ʼva ña̱ ndani̱ʼíyó Jehová kúú ña̱ kaʼviyó Biblia. Saáchi na̱ ka̱ʼyiña mií espíritu santo Ndióxi̱ chi̱ndeétáʼan xíʼinna ña̱ va̱ʼa ka̱ʼyinaña (2 Ped. 1:20, 21). Ndiʼi ña̱ va̱xi nu̱úña ña̱ nda̱a̱ kúúña ta xíniñúʼu kandíxayóña. Tá kúú kivi kandíxayó ndiʼi ña̱ káʼa̱n ndáa ki̱ʼva i̱xava̱ʼara ñuyǐví ta saátu ña̱ táku ña̱ íyo nu̱úña (Gén. 1:1, 26). Saátu kivi kandíxayó ña̱ nda̱a̱ kúú ña̱ káʼa̱nña xa̱ʼa̱ ña̱ kíʼviyó ku̱a̱chi, nda̱chun xo̱ʼvi̱yó ta xíʼi̱yó (Rom. 5:12; 6:23). Saátu kivi kandíxayó ña̱ káʼa̱n Biblia ña̱ mií Jehová kuniñúʼura se̱ʼera ña̱ sandáʼara ndiʼi ña̱ va̱ása va̱ʼa ña̱ kéʼé ta̱ Ndi̱va̱ʼa, “yivá na̱ káʼa̱n ña̱ vatá” (Juan 8:44; Rom. 16:20). Kivi kandíxayó ña̱ sándiʼi-xa̱ʼa̱va ta̱ Jesús ndiʼi na̱ kéʼé ña̱ va̱ása va̱ʼa, sandátakura na̱ ni̱xi̱ʼi̱ ta ndasalivira nu̱ú ñúʼu yóʼo ta chindeétáʼanra xíʼinyó ña̱ kǒoka ku̱a̱chi kuumiíyó (Juan 11:25, 26; 1 Juan 3:8). Jehová sánáʼa̱ra miíyó ña̱ nda̱a̱ ta saátu kúni̱ra ña̱ ná sanáʼa̱yóña inkana (Mat. 28:19, 20).

NDA̱CHUN XÍNIÑÚʼU KA̱ʼA̱NYÓ XA̱ʼA̱ ÑA̱ NDA̱A̱

7, 8. ¿Ndáa xa̱ʼa̱ kúú ña̱ káʼa̱nyó ña̱ nda̱a̱? Ka̱ʼa̱n xa̱ʼa̱ iin ejemplo (Marcos 3:11, 12; koto na̱ʼná).

⁷ Nda̱a̱ táki̱ʼva ku̱ndaa̱-iniyó xíniñúʼu ka̱ʼa̱nyó ña̱ nda̱a̱ tá kúni̱yó kooyó na̱ ñuu Jehová. Ña̱ va̱ʼa sakusi̱íyó-ini Ndióxi̱ su̱ví nda̱saa ña̱ nda̱a̱ xíniñúʼu ka̱ʼa̱nyó, saáchi nu̱ú ta̱yóʼo ndáyáʼviní ndáa xa̱ʼa̱ kúú ña̱ káʼa̱nyóña. Ná ndakanixi̱níyó ndáaña ku̱u tá ni̱xi̱ka ta̱ Jesús na̱túʼunra xíʼin na̱ yiví (kaʼvi Marcos 3:11, 12). Tá na̱túʼunra yatin chí yuʼú mar ña̱ Galilea ni̱xa̱a̱ ku̱a̱ʼání na̱ yiví nu̱ú xi̱ndika̱a̱ra kán. Ta tañu na̱ yiví kán xi̱ñuʼu sava na̱ xi̱kuumií ta̱chí ndi̱va̱ʼa, xi̱kuxítína nu̱úra ta ka̱na kóʼóna ta ka̱china: “Yóʼó kúú se̱ʼe Ndióxi̱”. ¿Nda̱chun ni̱ka̱ʼa̱n na̱ ta̱chí ndi̱va̱ʼa ña̱ nda̱a̱ xa̱ʼa̱ ta̱ Jesús? Sana xi̱kuni̱na ña̱ ná kandíxa na̱ yiví na̱ xi̱ñuʼu kán miína soo tá ná yáʼa tiempo kuxíkavana nu̱ú Jehová. Ni ni̱ka̱ʼa̱nna ña̱ nda̱a̱ ke̱ʼénaña xa̱ʼa̱ ña̱ ni̱nu xi̱kunina soo va̱ása nísandáʼvina ta̱ Jesús. Ta̱yóʼo kǒo níkutóora ña̱ ke̱ʼéna ta ni̱ka̱ʼa̱nra xíʼinna ña̱ ná kǒo ka̱ʼa̱nna xa̱ʼa̱ra.

⁸ ¿Ndáaña sákuaʼayó xíʼin relato yóʼo? Nu̱ú Jehová ndáyáʼviní ndáa xa̱ʼa̱ kúú ña̱ káʼa̱nyó ña̱ nda̱a̱. Ndáyáʼviní sanáʼa̱yó ña̱ nda̱a̱ xa̱ʼa̱ ña̱ kúʼvi̱-iniyó xíniyóra. Tá káʼa̱nna tu̱ʼun va̱ʼa xíʼinyó xa̱ʼa̱ chiñu ña̱ kéʼéyó nu̱úra, iin miíra ná ndukáʼnu xíʼin ña̱yóʼo (Mat. 5:16; chitáʼanña xíʼin Hechos 14:12-15).

9. ¿Ndáaña kǒo xíniñúʼu keʼéyó ta nda̱chun?

⁹ Ná ka̱ʼa̱nyó xa̱ʼa̱ inka ejemplo nu̱ú sana kuni̱yó ka̱ʼa̱n va̱ʼa inkana xa̱ʼa̱yó. Ná kachiyó ña̱ iin ta̱ anciano ni̱ka̱ʼa̱nra xíʼinyó iin ña̱ʼa ña̱ kǒo xíniñúʼu ka̱ʼa̱nyó xíʼin inkana, soo tándi̱ʼi káʼa̱nyó xa̱ʼa̱ ña̱yóʼo xíʼin inkana ta na̱yóʼo kíʼinna kuenta ña̱ nda̱a̱va kúú ña̱ ni̱ka̱ʼa̱nyó xíʼinna, sana ndakanda̱níva-inina ta ndakanixi̱nína ña̱ ku̱a̱ʼáníva ña̱ʼa xíni̱yó xa̱ʼa̱. Sana ndakanda̱va-ini inkana xíʼin ña̱ kéʼéyó soo Jehová va̱ása (Prov. 11:13). ¿Nda̱chun? Saáchi ni ña̱ nda̱a̱va kúú ña̱ káʼa̱nyó va̱ása xíniñúʼuví ka̱ʼa̱nyó xa̱ʼa̱ ña̱yóʼo xíʼin inkana, ta ki̱ʼva ña̱ ka̱ʼa̱nyóña su̱ví ña̱ va̱ʼa kooña.

NDÁA KI̱ʼVA KA̱ʼA̱NYÓ ÑA̱ NDA̱A̱

10. Tá káʼa̱n Colosenses 4:6 na̱ cristiano viíní xíniñúʼu koo tu̱ʼun ña̱ ka̱ʼa̱nna, ¿ndáaña kúni̱ kachiña?

¹⁰ (Kaʼvi Colosenses 4:6). Ta̱ apóstol Pablo sa̱ndákaʼánra na̱ cristiano na̱ ñuu Colosas ña̱ viíní xíniñúʼu koo tu̱ʼun ña̱ ka̱ʼa̱nna. Tu̱ʼun griego ña̱ ni̱ka̱ʼyi̱ “viíní ná kooña” kúni̱ kachiña tu̱ʼun ña̱ káʼa̱nyó va̱ása xíniñúʼu chindeétáʼan kuitíña xíʼin inkana chi saátu xíniñúʼu vií kooña.

11, 12. ¿Nda̱chun viíní xíniñúʼu ka̱ʼa̱nyó tá káʼa̱nyó xa̱ʼa̱ ña̱ nda̱a̱? Ka̱ʼa̱n xa̱ʼa̱ iin ejemplo (koto na̱ʼná).

¹¹ Ndáyáʼviní kundiku̱nyó consejo ña̱ ta̱xi ta̱ Pablo ña̱ vií koo tu̱ʼun ña̱ ka̱ʼa̱nyó tá sánáʼa̱yó na̱ yiví xa̱ʼa̱ ña̱ nda̱a̱. Hebreos 4:12 káʼa̱nña xíʼinyó ña̱ nda̱a̱ ña̱ va̱xi nu̱ú Biblia íyoña nda̱a̱ táki̱ʼva íyo espada ña̱ xi̱ín yuʼú ña̱ kíʼvi “nda̱a̱ ma̱á ini na̱ yiví”. Ña̱yóʼo kúni̱ kachiña ña̱ kivi na̱ʼa̱ña ndáaña ndóʼo iin na̱ yiví ta ndáaña kúni̱na keʼéna. Soo tá va̱ása vií xíniñúʼuyó Biblia kivi sandákavayó-ini na̱ yiví á nda̱a̱ sa̱a̱na. Ná kotoyó iin ejemplo.

¹² Ná ndakanixi̱níyó ña̱ ti̱xin predicación nda̱ni̱ʼíyó iin ta̱a ta̱ kútóoní káʼa̱n xíʼin ndióxi̱ra ta kútóora keʼéra vikó ña̱ Navidad xíʼin ña̱ Pascua. Sana kuni̱yó kuniñúʼuyó Biblia ta na̱ʼa̱yó nu̱úra ña̱ va̱ása ndáyáʼviví ña̱ ka̱ʼa̱nyó xíʼin ña̱ʼa ña̱ kǒo táku, ta vikó ña̱ Navidad xíʼin ña̱ pascua ka̱naña ti̱xin veʼe-ñu̱ʼu vatá (Is. 44:14-20; 2 Cor. 6:14-17). Tá saá ná keʼéyó, ña̱ nda̱a̱va kúú ña̱ ka̱ʼa̱nyó soo va̱ása vií kuniñúʼuyó Biblia saá.

13. ¿Ndáa ki̱ʼva xíniñúʼu vií koo ña̱ ka̱ʼa̱nyó?

¹³ Ta̱ Pablo ni̱ka̱ʼa̱nra tu̱ʼun ña̱ káʼa̱nyó vií ná kooña. Ña̱yóʼo kǒo kúni̱ kachiña ña̱ va̱ása xíniñúʼu káxi ka̱ʼa̱nyó xa̱ʼa̱ ña̱ nda̱a̱ á ña̱ chise̱ʼé tu̱ʼunyó xa̱ʼa̱ña, chi ña̱ kúni̱yó kúú ña̱ ndukúyó ki̱ʼva ña̱ natúʼunyó xa̱ʼa̱ ña̱ nda̱a̱ ta kuni̱ka na̱ yiví kuniso̱ʼonaña (Job 12:11). Soo sana ixayo̱ʼvi̱vaña xíʼinyó. Nda̱a̱ táki̱ʼva ndóʼo na̱ yiví su̱ví ndiʼivína inkáchi kútóo iin comida, saátu su̱ví ndiʼiví na̱ yiví kútóo ki̱ʼva ña̱ káʼa̱nyó. Tá kúú sava ñuu na̱ yiví kútóona ña̱ ndi̱ku̱n káxi ná koo ña̱ ka̱ʼa̱nna xíʼinna xa̱ʼa̱ sava ña̱ʼa ta nda̱a̱ xíʼin na̱ chée kivi ka̱ʼa̱nna saá. Ta inka ñuu su̱ví ña̱ to̱ʼó kúú ña̱yóʼo tá saá ná keʼéna. Ta̱ Pablo ni̱ka̱ʼa̱nra ña̱yóʼo: “Kunda̱a̱-inindó ndáa ki̱ʼva ndakuiinndó yuʼú iin iinna”. Ña̱kán ná kiʼinníyó kuenta xíʼin tu̱ʼun ña̱ káʼa̱nyó, su̱ví xíʼin ki̱ʼva ña̱ kútóo miíyó á ki̱ʼva ña̱ kéʼé na̱ ñuuyó kooña chi xíniñúʼu kiʼinyó kuenta ña̱ ná kooña nda̱a̱ táki̱ʼva kúni̱ mií na̱ yiví na̱ káʼa̱nyó xíʼin.

AMA KA̱ʼA̱NYÓ ÑA̱ NDA̱A̱

14. Tá ni̱xi̱yo ta̱ Jesús nu̱ú ñuʼú yóʼo, ¿á sa̱náʼa̱ra na̱ discípulora xa̱ʼa̱ ndiʼi ña̱ xi̱xini̱ra?

¹⁴ Ta̱ Jesús ndiʼi tiempo viíní xi̱ka̱ʼa̱nra xíʼin na̱ discípulora ta saátu viíní xi̱sanáʼa̱rana (Mar. 6:34). Ni ku̱a̱ʼání ña̱ xi̱xiniñúʼu sakúaʼana xa̱ʼa̱, ta̱ Jesús va̱ása ndi̱ku̱n nísanáʼa̱rana xa̱ʼa̱ ndiʼi ña̱ xi̱xini̱ra. Va̱ʼa ni̱xi̱yo inira xíʼinna ta xi̱kiʼinra kuenta xíʼin ña̱ xi̱ndoʼona. Ta saátu xi̱kunda̱a̱-inira ña̱ su̱ví tiempo ña̱ kunda̱a̱-inina xa̱ʼa̱ sava ña̱ nda̱a̱ ña̱ va̱xi nu̱ú Biblia kúúña, ta nda̱a̱ ni̱ka̱ʼa̱nra xíʼinna ña̱ kǒo kunda̱a̱-inina xíʼin ndiʼiña (Juan 16:12). ¿Ndáaña sákuaʼayó xíʼin ña̱yóʼo?

15. ¿Á ndi̱ku̱n xíniñúʼu ka̱ʼa̱nyó xa̱ʼa̱ ndiʼi ña̱ xíni̱yó xa̱ʼa̱ Biblia xíʼin na̱ sánáʼa̱yó? (Proverbios 25:11; koto na̱ʼná).

¹⁵ Ña̱ ke̱ʼé ta̱ Jesús náʼa̱ña nu̱úyó ña̱ va̱ása ndi̱ku̱n ka̱ʼa̱nvíyó xa̱ʼa̱ ndiʼi ña̱ nda̱a̱ ña̱ xíni̱yó xa̱ʼa̱. Ña̱ keʼéyó kúú ña̱ kundiku̱nyó táʼan ña̱ ke̱ʼé ta̱ Jesús ta ná kiʼinyó kuenta xíʼin ña̱ ndóʼo na̱ yiví kán. Ná ka̱ʼa̱n tukuyó xa̱ʼa̱ ta̱a ta̱ kútóo vikó ña̱ Navidad xíʼin ña̱ Pascua. Kúnda̱a̱-iniyó ña̱ vikó yóʼo ka̱naña ti̱xin veʼe-ñu̱ʼu vatá ta kǒo kútóo Jehová ña̱yóʼo. Ná ndakanixi̱níyó ña̱ ki̱xáʼa káʼviyó xíʼin ta̱ ta̱a yóʼo tá kúma̱ní iin á u̱vi̱ semana ña̱ koo Navidad. ¿Á vií koo ña̱ ka̱ʼa̱nyó tá ná na̱ʼa̱yó ña̱ va̱xi nu̱ú Biblia nu̱úra ña̱ káʼa̱n ña̱ va̱ása va̱ʼa vikó yóʼo ta ndi̱ku̱n ná sandákoora ña̱ keʼéraña? Va̱ásaví. Sava na̱ sákuaʼa xa̱ʼa̱ Biblia ndi̱ku̱n sándakoona ña̱ va̱ása va̱ʼa kéʼéna, inkana xíniñúʼu ya̱ʼa ku̱a̱ʼá tiempo ña̱ va̱ʼa sandákoona ña̱ va̱ása va̱ʼa kéʼéna xíʼin ña̱ ndákanixi̱nína. Ña̱ va̱ʼa chindeétáʼanyó xíʼin na̱ sa̱kán ki̱xáʼa káʼvi Biblia, kǒo xíniñúʼu sanáʼa̱ kuitíyóna xa̱ʼa̱ ña̱ nda̱a̱ chi saátu xíniñúʼu kiʼinyó kuenta ama kúú ña̱ ka̱ʼa̱nyó xíʼinna (kaʼvi Proverbios 25:11).b

16. ¿Ndáa ki̱ʼva kivi chindeétáʼanyó xíʼin na̱ sa̱kán sákuaʼa xa̱ʼa̱ Biblia ña̱ kǒo sandákoona ña̱ nda̱a̱?

¹⁶ Ña̱ sánáʼa̱yó inkana ña̱ nda̱a̱ xa̱ʼa̱ Jehová kúú ña̱ sákusi̱í-iniyó. Ña̱ va̱ʼa chindeétáʼanyó xíʼin na̱ sánáʼa̱yó ña̱ kǒo sandákoona ña̱ nda̱a̱, ndáyáʼviní chinúuyó iin yichi̱ va̱ʼa nu̱úna ta na̱ʼa̱yó ña̱ kándíxayó ña̱ káʼa̱n Biblia xíʼin ki̱ʼva ña̱ kéʼéyó (3 Juan 3, 4). Ta nda̱a̱ táki̱ʼva xa̱a̱ sa̱kuaʼayó xíniñúʼu vií koo ña̱ ka̱ʼa̱nyó tá xa̱a̱ káʼa̱nyó xa̱ʼa̱ ña̱ nda̱a̱. Ta saátu iinlá Jehová ná ndasakáʼnuyó tá káʼa̱n va̱ʼana xíʼinyó xa̱ʼa̱ chiñu ña̱ kéʼéyó nu̱úra, tasaá na̱ʼa̱yó ña̱ ndásakáʼnuyó Jehová, Ndióxi̱ ta̱ káʼa̱n ña̱ nda̱a̱.