1926:cien ku̱i̱ya̱ chí sa̱tá

Tá ku̱i̱ya̱ 1926 Jehová xi̱niñúʼura ta̱ Jesús ta̱ níʼi yichi̱ ti̱xin congregación ña̱ va̱ʼa kunda̱a̱-ini na̱ cristiano ña̱ ndáyáʼviní natúʼunna xíʼin na̱ yiví xa̱ʼa̱ Ndióxi̱. Ña̱kán ta̱ “esclavo ta̱ nda̱kúní-ini ta̱ ndíchiní” ta̱vána tutu xa̱á, nasa̱mana sava ña̱ kéʼéyó ti̱xin reunión ta saátu ni̱ka̱ʼa̱nna ndáa chiñu kúúmií na̱ ndásakáʼnu Ndióxi̱ (Mat. 24:45). Ta̱ Cristo chi̱ndeétáʼanra xíʼin na̱ discípulora ña̱ va̱ʼa kuumiína iin veʼe nu̱ú tavána tutu ña̱ va̱ʼa natúʼunna xíʼin na̱ yiví xa̱ʼa̱ Ndióxi̱.

TUTU XA̱Á XÍʼIN ÑA̱ NA̱SAMA TI̱XIN REUNIÓN

Tá yo̱o̱ abril tutu ña̱ naní The Golden Age (vitin naníña ¡Despertad!) ni̱ka̱ʼa̱nña ña̱ kana iin tutu xa̱á ña̱ naní Deliverance (Liberación), ña̱yóʼo kúú ña̱ kuniñúʼuna nu̱úka ña̱ Estudios de las Escrituras. Ña̱ va̱ʼa tavána tutu yóʼo na̱ hermano na̱ Betel sa̱tána iin máquina tú kivi tavá 22 libro ti̱xin iin minuto. Na̱ Estudiantes de la Biblia ndiʼi tiempo xi̱taxina libro yóʼo ndaʼa̱ na̱ yiví.

Ku̱a̱ʼání ku̱i̱ya̱ xi̱xiniñúʼuna tutu ña̱ naní Estudios de las Escrituras ti̱xin reunión ña̱ va̱ʼa sakúaʼana. Soo tá yo̱o̱ mayo ki̱xáʼana káʼvina tutu ña̱ naní La Torre del Vigía (vitin naníña La Atalaya). ¿Ndáaña va̱ʼa nda̱kiʼinna xíʼin ña̱yóʼo?

Iin congregación ña̱ xi̱ndikaa̱ chí Illinois (Estados Unidos) ka̱ʼyina iin carta ku̱a̱ʼa̱n ndaʼa̱ ta̱ hermano Rutherford ta ña̱yóʼo káchiña: “Ndiʼi domingo káʼvindi̱ artículo ña̱ tává na̱ ñuu Ndióxi̱. Táxiníndi̱ tíxa̱ʼvi ndaʼa̱ na̱ ñuu Ndióxi̱ saáchi va̱ʼaní kúnda̱a̱-inindi̱ xíʼin tutu yóʼo”.

Xa̱ʼa̱ ña̱ va̱ʼaní xi̱kunda̱a̱-ini na̱ Estudiantes de la Biblia xíʼin tutu xa̱á ña̱ xi̱tavá na̱ ñuu Ndióxi̱, ki̱ʼinna kuenta ña̱ ndáyáʼviní natúʼunna xíʼin na̱ yiví xa̱ʼa̱ Ndióxi̱. Tá kúú artículo ña̱ naní “Carácter o pacto, ¿cuál?” xi̱kaʼa̱nña ña̱ xi̱ndi̱ʼi̱ka-ini na̱ cristiano xa̱ʼa̱ kúú ña̱ vií koo ña̱ keʼéna soo va̱ása níxindi̱ʼi̱-inina xa̱ʼa̱ ña̱ʼa ña̱ xi̱xiniñúʼu keʼé na̱ cristiano. Artículo yóʼo ni̱ka̱ʼa̱nña xíʼinna: “Na̱ kúʼvi̱-ini xíni Ndióxi̱ [...] xíniñúʼu keʼéna chiñu ña̱ xáʼndara”. Ta ña̱yóʼo ka̱chikaña: “Jehová káchira: ‘Ndóʼó kúú testigoi̱ ta yi̱ʼi̱ kúú Ndióxi̱ndó’. [...] Na̱ cristiano xíniñúʼu kusi̱í-inina xa̱ʼa̱ ña̱ kúúna Testigo Ndióxi̱ ta natúʼunna xa̱ʼa̱ra”.

Saátu ka̱na iin artículo ña̱ naní “Sacrificio y servicio” ta ña̱yóʼo ni̱ka̱ʼa̱nña na̱ ndixa kúú cristiano xíniñúʼu na̱ʼa̱na ña̱ kúʼvi̱-inina xínina Jehová ta nda̱kú koo inina kachíñuna nu̱úra. Ña̱yóʼo va̱ʼaní chi̱kaa̱ña ndee̱ xíʼin na̱ Estudiantes de la Biblia ña̱ natúʼunna xa̱ʼa̱ Reino Ndióxi̱ xíʼin ña̱ si̱í-ini iníísaá nu̱ú ñuʼú (Is. 43:10, 12; Mat. 24:14).

Artículo yóʼo va̱ʼaní chi̱ndeétáʼanña xíʼin na̱ Estudiantes de la Biblia. Tá ni̱ya̱ʼa loʼo semana, nu̱ú artículo ña̱ ka̱na 15 tí julio ña̱ ku̱i̱ya̱ 1926 ña̱ tu̱ʼun inglés ki̱xi iin carta ña̱ ni̱ka̱ʼa̱n: “Artículo ña̱ naní ‘Carácter o pacto, ¿cuál?’ xíʼin ‘Sacrificio y servicio’ va̱ʼaní chi̱kaa̱ña ndee̱ xíʼinyó. Vitin va̱ása xíniñúʼu kaʼvi kuitíyó revista yóʼo chi xíniñúʼu ndakanixi̱níyó xa̱ʼa̱ña”. Carta yóʼo ka̱chikaña: “Ndiʼina kúni̱na taxina comentario ti̱xin reunión ta va̱ʼaní chíndeétáʼanña xíʼin na̱ congregación”.

ASAMBLEA NI̱KA̱ʼA̱NNA ÑA̱ NDÁYÁʼVINÍ NATÚʼUNYÓ XÍʼIN NA̱ YIVÍ

Tá xa̱a̱ ku̱nu̱mí ndiʼi yo̱o̱ mayo ku̱a̱ʼání na̱ Estudiantes de la Biblia ni̱xa̱ʼa̱nna iin asamblea chí Londres (Inglaterra). Xa̱ʼa̱ ña̱ ke̱ʼé na̱ yiví marcha chí ñuu Gran Bretaña, ndiʼi máquina tú xi̱tavá tutu tú ni̱xi̱yo ñuu kán va̱ása níxi̱kachíñukanú. Xa̱ʼa̱ ña̱kán na̱ hermano na̱ xi̱ñuʼu Betel ña̱ Brooklyn xi̱niñúʼu kachíñukana ku̱a̱ʼáka hora ña̱ va̱ʼa tavána 117,000 copia folleto ña̱ naní El estandarte para los pueblos ña̱ va̱ʼa kanaña ti̱xin asamblea ña̱ kuumiína.

Na̱ hermano ndi̱ku̱n ki̱xáʼana xíniñúʼuna folleto yóʼo. Programa ña̱ asamblea ña̱ koo ki̱vi̱ sábado 29 tí mayo ka̱chiña: “Ndiʼi na̱ Estudiantes de la Biblia kivi ka̱ʼa̱nna xíʼin na̱ yiví xa̱ʼa̱ ta̱ Rey xíʼin xa̱ʼa̱ Reinora. Kivi ya̱chi̱ xa̱a̱ndó chí Alexandra Palace ta xa̱a̱ndó Departamento ña̱ Servicio, kán ka̱ʼa̱nna xíʼinndó ndáaña xíniñúʼu keʼéndó”.

Yáʼaka 100,000 tutu xa̱xána. Nu̱ú tutu ña̱ naní La Torre del Vigía ña̱ ka̱na yo̱o̱ septiembre xíʼin octubre tá ku̱i̱ya̱ 1926, ni̱ka̱ʼa̱nña ña̱yóʼo: “Na̱ hermano kúsi̱íní-inina ña̱ ke̱ʼéna chiñu ña̱ xa̱ʼnda Jehová nu̱ú ni̱ka̱ʼa̱nra: ‘Ndóʼó kúú testigoi̱ ta yi̱ʼi̱ kúú Ndióxi̱ndó’”.

Ki̱vi̱ u̱vi̱ ña̱ ni̱xi̱yo asamblea chí Royal Albert Hall ta̱ hermano Rutherford ta̱xira discurso ña̱ naní “Na̱ chíñu nda̱chun va̱ása vií xáʼndachíñuna… Ña̱ kivi ndasavií ña̱yóʼo”. Ti̱xin asamblea kán ni̱xa̱ʼa̱n 13,000 na̱ yiví ta ndi̱ku̱n chu̱tú kán, xa̱ʼa̱ ña̱ va̱ása nínanika lugar kán ku̱a̱ʼánína xi̱niso̱ʼona programa chí calle.

Ta̱ hermano Rutherford ni̱ka̱ʼa̱nra na̱ chíñu va̱ása kúchiñuna kaʼndachíñuna saáchi va̱ása níkandíxana Jehová xíʼin Reinora. Saátu ni̱ka̱ʼa̱nra na̱ Sociedad de Naciones xa̱a̱ ku̱nu̱mí ndiʼi-xa̱ʼa̱na.

TÁ NA̱TÚʼUNNA XÍʼIN NA̱ YIVÍ CHÍ INDIA

Tá ki̱xaa̱ ta̱ hermano Rutherford chí Londres ña̱ va̱ʼa ku̱ʼu̱nra asamblea, kán nda̱kutáʼanra xíʼin ta̱ Edwin Skinner ta̱ xi̱kuu colportor (vitin káʼa̱nna xíʼinna precursor) ta̱yóʼo chí Sheffield (Inglaterra) xi̱natúʼunra xíʼin na̱ yiví. Tá ni̱ya̱ʼa loʼo tiempo ña̱ ni̱xi̱yo asamblea, ta̱ Rutherford ni̱ka̱ʼa̱nra xíʼin ta̱ Edwin ña̱ ná ku̱ʼu̱nra chí Londres kotorara.

Ta̱ Edwin ka̱chira: “Nda̱kanixi̱níi̱ ña̱ ka̱ʼa̱nra xíʼi̱n ña̱ ku̱ʼi̱n natúʼi̱n xíʼin na̱ yiví chí inka ñuu. Tá inka ki̱vi̱ ni̱xa̱ʼi̱n chí Londres chi̱kaa̱-inii̱, tá ná ka̱ʼa̱nna xíʼi̱n ña̱ ku̱ʼi̱n natúʼi̱n xíʼin na̱ yiví chí inka ñuu, ku̱ʼu̱nvai̱”. Ta̱ hermano Rutherford ni̱nda̱ka̱tu̱ʼunrara ta ni̱ka̱ʼa̱nra xíʼinra: “¿Á kúni̱ún ku̱ʼún chí India?”. Ta̱ Edwin ni̱ka̱ʼa̱nra: “¿Ama kúni̱ún ku̱ʼi̱n?”.

Tá ni̱ya̱ʼa loʼo semana ña̱ yo̱o̱ julio, ta̱ Edwin xíʼin ta̱ George Wright nda̱kiʼinna ku̱a̱ʼa̱nna chí India. Ta̱ Edwin xi̱kiʼinra kuenta xíʼin Betel ña̱ ni̱xi̱yo ñuu kán ta saátu xíʼin chiñu ña̱ xi̱keʼéna chí Afganistán, Birmania (Myanmar), Ceilán (Sri Lanka), India xíʼin Persia (Irán). Ta̱yóʼo, 64 ku̱i̱ya̱ xi̱ndikaa̱ra chí India nda̱a̱ tá ni̱xi̱ʼi̱ra tá ku̱i̱ya̱ 1990.

NA̱ SUPERINTENDENTE VIAJANTE VA̱ʼANÍ YICHI̱ CHÍNÚUNA TI̱XIN PREDICACIÓN

Tá ku̱i̱ya̱ 1894, na̱ ñuu Ndióxi̱ ki̱xáʼana chíndaʼána na̱ viajante, na̱ xi̱kaʼa̱nna xíʼin peregrinos, ña̱ va̱ʼa ku̱ʼu̱nna kotona na̱ Estudiantes de la Biblia ta chikaa̱na ndee̱ xíʼinna. Tá julio ku̱i̱ya̱ 1926 na̱samana chiñu ña̱ xi̱keʼé na̱ hermano yóʼo. Nu̱úka ña̱ ku̱ʼu̱nna kotonana iin ki̱vi̱, u̱vi̱ ki̱vi̱ xi̱xaʼa̱nna ta 100 hora xi̱ndataxina yo̱o̱ tá yo̱o̱ ña̱ xi̱natúʼunna xíʼin na̱ yiví.

Revista yóʼo, ña̱ ka̱na tu̱ʼun inglés ka̱na iin carta ña̱ ka̱ʼyi ta̱ peregrino ta̱ xi̱naní George Draper. Nu̱ú ña̱yóʼo ni̱ka̱ʼa̱n ta̱ hermano kán ña̱ va̱xi nu̱ú Isaías 56:10 ta ka̱chira: “Iin ti̱na ndáʼyi̱rí tasaá kúnda̱a̱-ini xi̱toʼo tíyóʼo ndáaña kúú, soo tá iin na̱ hermano kísi̱na […], kǒo kívi nda̱ʼyi̱na nda̱a̱ táki̱ʼva kéʼé tíyóʼo. Ña̱ xíniñúʼu keʼé na̱ peregrinos, ta saátu xíʼin inkakana […], xíniñúʼu kaʼvina tutu ña̱ naní La Torre del Vigía […]. Ta ña̱yóʼo kúú ña̱ chíkaa̱-inii̱ keʼíi̱ ndiʼi tiempo”. Ta̱ hermano yóʼo ni̱xi̱ʼi̱ra tá ku̱i̱ya̱ 1938.

ASAMBLEA ÑA̱ NI̱XI̱YO CHÍ NUEVA YORK

Asamblea ña̱ so̱ndíʼi ña̱ ni̱xi̱yo chí Nueva York, ni̱xi̱yoña 14 nda̱a̱ 18 tí octubre ña̱ ku̱i̱ya̱ 1926. Na̱ tává periódico ki̱ndoona ña̱ kaʼyina ki̱vi̱ discurso ña̱ taxi ta̱ hermano Rutherford, ta discurso yóʼo xi̱naníña “Xa̱a̱ kuyatin kixaa̱ ku̱a̱chi nu̱ú ñuʼú yóʼo”. Soo tá kúma̱ní si̱lóʼo ki̱vi̱ koo ña̱ asamblea kán, na̱ xi̱tavá periódico va̱ása níxiinkana kaʼyina ki̱vi̱ ña̱yóʼo.

Soo na̱ hermano va̱ása nítaxina kasi ña̱yóʼo nu̱úna. Tá viernes 15 tí octubre, ta̱ Robert Martin ni̱ka̱ʼa̱nra xa̱ʼa̱ iin tratado ña̱ ka̱na, ta̱yóʼo ni̱ka̱ʼa̱nra xa̱ʼa̱ ña̱ ke̱ʼé na̱ tává periódico ta saátu ni̱ka̱ʼa̱nra xa̱ʼa̱ discurso ña̱ taxi ta̱ hermano Rutherford. Ta̱ Robert káchira: “Na̱ hermano ki̱xáʼana káchíñuna káʼñu xíʼin ñuú ña̱ va̱ʼa tavána 1,250,000 tutu, ta káʼa̱nndi̱ xíʼin ndiʼi na̱ ki̱xaa̱ asamblea yóʼo ña̱ ná ku̱ʼu̱nna xaxána tutu yóʼo”. Tándi̱ʼi asamblea kán, na̱ hermano ki̱xáʼana xáxana tratado. Tá ni̱ya̱ʼa loʼo hora, ta̱xina 300,000 tratado.

Sábado xíʼin domingo, xa̱xána ki̱ʼva iin millón tratado. Ta saátu xa̱xána ki̱ʼva 3,783 libro ña̱ naní Deliverance xíʼin 35,140 folleto.

Tá ki̱vi̱ domingo 17 tí octubre ka̱a u̱ni̱ xi̱kuaá, ki̱ʼva 12,000 na̱ yiví xi̱niso̱ʼo discurso ña̱ ta̱xi ta̱ hermano Rutherford. Tándi̱ʼi discurso yóʼo, ku̱a̱ʼáníka na̱ yiví xi̱kuni̱ kunda̱a̱-ini xa̱ʼa̱ ña̱yóʼo. Yáʼaka 9,000 libro xa̱xána. Ti̱xin asamblea kán kúú nu̱ú xa̱xána ku̱a̱ʼáníka libro.

I̱XAVA̱ʼANA EDIFICIO XA̱Á CHÍ NU̱Ú NDÍKAA̱ CALLE ADAMS

Xa̱ʼa̱ ña̱ ku̱a̱ʼáníka tutu ki̱xáʼana távána, na̱ hermano na̱ ni̱xi̱yo chí Brooklyn ki̱ʼinna kuenta ña̱ xi̱xiniñúʼu ixava̱ʼana inka veʼe káʼnu ña̱ va̱ʼa tavána tutu. Ku̱a̱ʼání ku̱i̱ya̱ ixarentána iin veʼe ña̱ xi̱ndikaa̱ chí calle Concord, ña̱ número 18, soo loʼo ni̱xi̱yo veʼe kán. Xa̱ʼa̱ ña̱kán sa̱tána ñu̱ʼu ña̱ ndíkaa̱ chí calle Adams. Ki̱xáʼana íxava̱ʼana veʼe ña̱ xi̱kuumií u̱xa̱ piso, ña̱yóʼo káʼnuka xi̱kuuña nu̱úka ña̱ xi̱kuumiína.

Tá ku̱i̱ya̱ 1927 ki̱xáʼana káchíñuna ini veʼe ña̱ ku̱vaʼa chí calle Adams número 117 tasaá kúú ña̱ ki̱xáʼana távána ku̱a̱ʼáka tutu. Ta mií ku̱i̱ya̱ saá ku̱a̱ʼáníka na̱ yiví ki̱xáʼa kúnda̱a̱-ini xa̱ʼa̱ ña̱ nda̱a̱ ta saátu na̱ ñuu Ndióxi̱ ki̱xáʼana násamana ku̱a̱ʼáníka ña̱ʼa, ña̱yóʼo chi̱ndeétáʼanña xíʼin na̱ ñuu Ndióxi̱ ña̱ xa̱a̱na kunanína testigo Jehová.