Ña̱ kivi keʼéyó ña̱ va̱ʼa na̱ʼa̱yó ña̱ táxiyó tíxa̱ʼvi

1. ¿Ndáaña sákuaʼayó xíʼin ña̱ ke̱ʼé ta̱ John? (Koto na̱ʼná).

TA̱ JOHNa ta̱ xi̱kuumií 95 ku̱i̱ya̱, xi̱kuumiíra iin kue̱ʼe̱ ta xi̱xiniñúʼura ña̱ kundaanara. Ndiʼi ki̱vi̱ tá xi̱xaʼa̱nna xi̱xitona miíra á tá xi̱chindeétáʼanna xíʼinra, ta̱yóʼo xi̱taxira tíxa̱ʼvi ndaʼa̱na ta xi̱kaʼyira ki̱vi̱na nu̱ú iin tutu. Tá ñuú xi̱kaʼa̱nra xíʼin ta̱ xi̱ndaa miíra ña̱ ná chindeétáʼanra xíʼinra ña̱ va̱ʼa kuxítíra yuʼú cama ña̱ va̱ʼa keʼéra oración. Xi̱taxira tíxa̱ʼvi ndaʼa̱ Jehová xa̱ʼa̱ iin tá iin na̱ xi̱xaʼa̱n xi̱xito miíra. Iin ta̱ xi̱ndaa miíra ni̱ka̱ʼa̱nra ña̱yóʼo: “Ni xi̱kuumiíra kue̱ʼe̱ ndiʼi ki̱vi̱ xi̱kusi̱í-inira ta kǒo níxi̱kaʼa̱n kúáchira”. Ña̱ ke̱ʼé ta̱ John sánáʼa̱ña miíyó tá táxiyó tíxa̱ʼvi ndaʼa̱ inkana chíndeétáʼanñá xíʼinyó ña̱ kusi̱í-iniyó ni yáʼayó nu̱ú tu̱ndóʼo.

2. ¿Ndáa ki̱ʼva íyo na̱ yiví tiempo ña̱ ndóoyó vitin?

² Tiempo ña̱ ndóoyó vitin na̱ yiví va̱ása táxikana tíxa̱ʼvi xa̱ʼa̱ ña̱ kéʼé inkana xa̱ʼa̱na, kǒo ndákanda̱-iniyó xíʼin ña̱yóʼo chi Biblia xa̱a̱ ni̱ka̱ʼa̱nña ndáa ki̱ʼva koo na̱ yiví tiempo nu̱ú ndíʼi vitin (2 Tim. 3:1, 2). Íyo sava na̱ yiví nándósóna taxina tíxa̱ʼvi ndaʼa̱ inkana, ta savana ndákanixi̱nína ña̱ kǒo xíniñúʼuví taxina tíxa̱ʼvi ndaʼa̱ inkana. Ni̱nuní kúnina saáchi ndákanixi̱nína ña̱ chiñu nu̱ú inkana kúú ña̱ keʼéna ña̱ va̱ʼa xa̱ʼa̱na.

3. ¿Ndáaña kotoyó nu̱ú artículo yóʼo?

³ Miíyó na̱ ndásakáʼnu Jehová kǒo xíniñúʼu keʼéyó táki̱ʼva kéʼé na̱ ñuyǐví yóʼo. Ta̱ apóstol Pablo ta̱xira consejo yóʼo: “Ndakundeéndó taxindó tíxa̱ʼvi” (Col. 3:15). Tá iinna kéʼéna ña̱ va̱ʼa xa̱ʼa̱yó xíniñúʼu taxiyó tíxa̱ʼvi ndaʼa̱na á keʼéyó iin ña̱ʼa xa̱ʼa̱na ña̱ va̱ʼa na̱ʼa̱yó ña̱ táxiyó tíxa̱ʼvi ndaʼa̱na xa̱ʼa̱ ña̱ ke̱ʼéna. Nu̱ú artículo yóʼo ka̱ʼa̱nyó nda̱chun ndáyáʼviní taxiyó tíxa̱ʼvi ndaʼa̱ inkana, ndáaña chindeétáʼan xíʼinyó keʼéyó ña̱yóʼo ta ndáa ki̱ʼva kivi na̱ʼa̱yóña.

¿NDA̱CHUN XÍNIÑÚʼU TAXIYÓ TÍXA̱ʼVI NDAʼA̱ INKANA?

4. ¿Nda̱chun xóʼvi̱yó tá va̱ása táxiyó tíxa̱ʼvi ndaʼa̱ inkana?

⁴ Tá va̱ása táxiyó tíxa̱ʼvi xóʼvi̱yó. Na̱ yiví na̱ va̱ása táxi tíxa̱ʼvi va̱ása kúsi̱í-inina. Proverbios 15:15 káchiña: “Kǒo nda̱a̱ ni iin ki̱vi̱ va̱ʼa nu̱ú na̱ xóʼvi̱”. Ndiʼi miíyó yáʼayó nu̱ú tu̱ndóʼo ta xa̱ʼa̱ ña̱kán ndákava-iniyó sava yichi̱. Va̱ása kívi kasiyó nu̱ú ndiʼi ña̱ va̱ása va̱ʼa ña̱ ndóʼoyó, soo kiviva kiʼinyó kuenta ndáa ki̱ʼva íyo ña̱ kéʼéyó á ña̱ ndákanixi̱níyó tá yáʼayó nu̱ú tu̱ndóʼo. Tá nina ña̱ va̱ása va̱ʼa ndákanixi̱níyó xa̱ʼa̱ ta kǒo kíʼinyó kuenta xíʼin ña̱ va̱ʼa ña̱ ndóʼoyó, va̱ása kusi̱íka-iniyó ta ndiʼi ki̱vi̱ ndakanixi̱níyó ña̱ kúúmiíyó tu̱ndóʼo.

5. ¿Ndáaña va̱ʼa ndákiʼinyó tá taxiyó tíxa̱ʼvi ndaʼa̱ inkana?

⁵ Tá taxiyó tíxa̱ʼvi ndaʼa̱ inkana ku̱a̱ʼá ña̱ va̱ʼa ndákiʼinyó. Tá kéʼéyó ña̱yóʼo sákusi̱íña-iniyó. Proverbios 15:15 káchiña: “Na̱ kúsi̱íní-ini, ndiʼi ki̱vi̱ si̱íní ndóona”. Na̱ yiví na̱ ndákanixi̱ní xa̱ʼa̱ ña̱ va̱ʼa ña̱ xa̱a̱ ndákiʼinna ta táxina tíxa̱ʼvi xa̱ʼa̱ ña̱yóʼo si̱íní íyona, ña̱yóʼo chíndeétáʼanña xíʼinna ña̱ kǒo ndakaniníxi̱nína xa̱ʼa̱ ña̱ va̱ása va̱ʼa.

6. ¿Nda̱chun káʼa̱nyó ña̱ táxiyó tíxa̱ʼvi chíndeétáʼanña xíʼinyó ña̱ kǒo kundi̱ʼiní-iniyó? (Filipenses 4:6, 7).

⁶ (Kaʼvi Filipenses 4:6, 7). Tá káʼa̱nyó xíʼin Jehová ta táxiyó tíxa̱ʼvi ndaʼa̱ra ña̱yóʼo chíndeétáʼanña xíʼinyó ña̱ kǒo kundi̱ʼiní-iniyó xa̱ʼa̱ tu̱ndóʼo ña̱ kúúmiíyó. Saáchi tá taxiyó tíxa̱ʼvi ndaʼa̱ra chíndeétáʼanña xíʼinyó ña̱ ndakanixi̱níyó xa̱ʼa̱ ña̱ xa̱a̱ ke̱ʼéra xa̱ʼa̱yó ta su̱ví xa̱ʼa̱ ña̱ kivi kundoʼoyó chí nu̱únínu. Ña̱ ndakanixi̱níyó ndáa ki̱ʼva xa̱a̱ ndáara miíyó vitin chindeétáʼanña xíʼinyó ña̱ kandíxayó ña̱ saátu keʼéra chí nu̱únínu ta va̱ása ndi̱ʼiní-iniyó (Mat. 6:25-34). Tá xíniso̱ʼo Jehová ña̱ káʼa̱nyó xíʼinra ta xítora ña̱ xákuyó, chíndeétáʼanra xíʼinyó ña̱ kǒo kundi̱ʼiní-iniyó.

7. Tá náʼa̱yó ña̱ táxiyó tíxa̱ʼvi, ¿ndáa ki̱ʼva chíndeétáʼanña xíʼinyó ña̱ kuyatinkayó nu̱ú Jehová? (Santiago 1:17).

⁷ Ña̱ táxiyó tíxa̱ʼvi ndaʼa̱ inkana chíndeétáʼanña xíʼinyó ña̱ kuyatinkayó nu̱ú Jehová. Ndiʼi ña̱ va̱ʼa ña̱ kúúmiíyó, miíra táxiña ndaʼa̱yó (kaʼvi Santiago 1:17). Ku̱a̱ʼání ña̱ va̱ʼa táxira ndaʼa̱yó, tá kúú ta̱xira se̱ʼera ña̱ ni̱xi̱ʼi̱ra xa̱ʼa̱yó ta saátu ña̱ kutakuyó ndiʼi tiempo. Soo, ¿á xa̱ʼa̱ ña̱ va̱ʼa ña̱ kéʼéyó kúú ña̱ táxira ña̱yóʼo ndaʼa̱yó? Va̱ásaví. Chi táxira ña̱yóʼo ndaʼa̱yó xa̱ʼa̱ ña̱ kúʼvi̱-inira xínira miíyó ta kúndáʼvi-inira xínira miíyó (Rom. 3:24; Efes. 2:8). Tá táxiyó tíxa̱ʼvi ndaʼa̱ Ndióxi̱ yatinka kooyó xíʼinra saá.

¿NDÁAÑA CHINDEÉTÁʼAN XÍʼINYÓ ÑA̱ TAXIYÓ TÍXA̱ʼVI?

8. Ña̱ ndakanixi̱níyó xa̱ʼa̱ ki̱ʼva ña̱ xa̱a̱ chíndeétáʼan Jehová xíʼinyó, ¿ndáa ki̱ʼva chíndeétáʼan ña̱yóʼo xíʼinyó? (2 Corintios 4:7).

⁸ Ná ndakanixi̱níyó xa̱ʼa̱ ña̱ xa̱a̱ kéʼé Jehová xa̱ʼa̱yó. Ndakanixi̱ní xa̱ʼa̱ tu̱ndóʼo ña̱ xa̱a̱ yáʼún nu̱ú, sana ni̱xi̱ʼi̱ iin na̱ veʼún, sana sa̱sina nu̱ún xa̱ʼa̱ ña̱ ki̱xáʼún ndásakáʼnún Jehová á xi̱kuumiíún iin kue̱ʼe̱ ndeé. ¿Ndáa ki̱ʼva ni̱ya̱ʼún nu̱ú ña̱yóʼo? Tá ndákaʼún xa̱ʼa̱ ña̱yóʼo, sana ndákaʼún ña̱ su̱ví xíʼin ndee̱ miíún níkeʼúnña, chi Jehová chi̱ndeétáʼan xíʼún ña̱ va̱ʼa ni̱ya̱ʼún nu̱úña (kaʼvi 2 Corintios 4:7; koto nota ña̱ estudio ña̱ naní “el poder que va más allá de lo normal”). Tá ndákaʼún ndáa ki̱ʼva chi̱ndeétáʼanra xíʼún, sana kuni̱kaún taxiún tíxa̱ʼvi ndaʼa̱ra (Sal. 103:2).

9, 10. ¿Ndáaña va̱ʼa kúú ña̱ táxi Jehová ndaʼún ndiʼi ki̱vi̱? (Koto na̱ʼná).

⁹ Ná ndakanixi̱níyó xa̱ʼa̱ ña̱ va̱ʼa ña̱ xa̱a̱ ndákiʼinyó. Biblia táxiña consejo yóʼo ndaʼa̱yó: “Taxindó tíxa̱ʼvi xa̱ʼa̱ ndiʼi ña̱ʼa” (1 Tes. 5:18). Ndiʼi ki̱vi̱ ndakanixi̱ní xa̱ʼa̱ ña̱ va̱ʼa ña̱ xa̱a̱ ndákiʼún, ta kivi keʼún ña̱yóʼo tá xi̱ta̱a̱n á xa̱a̱ ñuú á nda̱a̱ ndáaka hora kivi keʼún ña̱yóʼo (Sal. 92:1, 2). Kivi keʼún nda̱a̱ táki̱ʼva ke̱ʼé ta̱ John, ta̱ ni̱ka̱ʼa̱nyó xa̱ʼa̱ ña̱ párrafo nu̱ú, ta kaʼyiún ndiʼi ña̱ va̱ʼa ña̱ xa̱a̱ ndákiʼún. Ná kotoyó ndáaña kivi kaʼyiún.

¹⁰ Siʼna ndakanixi̱ní xa̱ʼa̱ ndiʼi ña̱ táxi Jehová ndaʼún ndiʼi ki̱vi̱ (Sal. 40:5). Kivi taxiún tíxa̱ʼvi ndaʼa̱ra xa̱ʼa̱ ña̱ xa̱a̱ kéʼéra xa̱ʼún ña̱ va̱ʼa kuyatiún nu̱úra, tá kúú ña̱ xíniso̱ʼora oración ña̱ káʼún xíʼinra, ña̱ káʼviún texto ña̱ va̱ʼaní sándi̱ko-iniún, ña̱ káʼviún artículo á video ña̱ xa̱a̱ va̱ʼaní chíndeétáʼan xíʼún ta sana nda̱a̱ túviún míí ña̱yóʼo kúú ña̱ xíniñúʼún (Sal. 65:2; Mat. 24:45; Rom. 15:4). Saátu kivi ndakanixi̱níún xa̱ʼa̱ ña̱ʼa ña̱ sákusi̱í-iniún, tá kúú, tá xítoún tá kíʼvi ñu̱ʼu á ña̱ ka̱ndii, comida ña̱ ya̱si̱n xíxiún á ña̱ va̱ʼa ña̱ kéʼé inkana xíʼún. Kǒo nandósoún chi Ndióxi̱ kúú ta̱ táxi ña̱ tákuyó (Hech. 17:25). ¿Á ndákaʼún xa̱ʼa̱ iin ña̱ va̱ʼa ña̱ ndo̱ʼún vitin ña̱ kivi kaʼyiún? (Efes. 5:20).

11, 12. ¿Ndáaña va̱ʼa ndákiʼinyó xa̱ʼa̱ ña̱ ndíkaa̱yó ñuu Jehová?

¹¹ Ndakanixi̱ní xa̱ʼa̱ ndiʼi ña̱ va̱ʼa ña̱ xa̱a̱ ndákiʼún xa̱ʼa̱ ña̱ ndíka̱ún ñuu Jehová (Sal. 133:1; Prov. 18:24). Sana ndákaʼún iin ta̱ hermano á iin ñá hermana viíní ke̱ʼéna xíʼún ta ni̱ka̱ʼa̱nna tu̱ʼun va̱ʼa xíʼún ña̱ chi̱kaa̱ ndee̱ xíʼún (Prov. 12:25; 16:24). Nda̱a̱ ndáaka ña̱ kéʼéyó xa̱ʼa̱ inkana ndáyáʼviníña. Tá kúú, tá ni̱xi̱ʼi̱ se̱ʼe iin ñá hermana, i̱xayo̱ʼvi̱níña xíʼinñá ña̱ katañá ti̱xin reunión. Ñáyóʼo káchiñá: “Iin ñá hermana xi̱niñá ña̱ ki̱xáʼíi̱ xákui̱, ku̱yatinñá nu̱úi̱ ta nu̱miñá yi̱ʼi̱ ta inkáchi xi̱tañá yaa xíʼi̱n ti̱xin reunión. Kúsi̱íní-inii̱ ña̱ kúúmiíi̱ ná hermana xíʼin na̱ hermano yóʼo ti̱xin ñuu Ndióxi̱”. Tá kéʼéyó ña̱ va̱ʼa xa̱ʼa̱ inkana va̱ʼaní chíndeétáʼanña xíʼinna.

¹² Tá ndákanixi̱níyó xa̱ʼa̱ ña̱ va̱ʼa ña̱ xa̱a̱ ta̱xi Jehová ndaʼa̱yó ta saátu ña̱ táxikara ndaʼa̱yó nda̱a̱ vitin, táxiníkayó tíxa̱ʼvi ndaʼa̱ra xa̱ʼa̱ ña̱ kéʼéra xa̱ʼa̱yó. Soo nda̱a̱ táki̱ʼva xa̱a̱ kúnda̱a̱-iniyó, va̱ása xíniñúʼu ka̱ʼa̱n kuitíyó ña̱ táxiyó tíxa̱ʼvi chi xíniñúʼu ndukúyó ki̱ʼva ña̱ na̱ʼa̱yóña. Ña̱yóʼo kúú ña̱ ka̱ʼa̱nyó xa̱ʼa̱ vitin.

¿NDÁA KI̱ʼVA NÁʼA̱YÓ ÑA̱ TÁXIYÓ TÍXA̱ʼVI?

13. ¿Ndáa ki̱ʼva na̱ʼa̱yó ña̱ táxiyó tíxa̱ʼvi?

¹³ ¿Ndáa ki̱ʼva na̱ʼa̱yó ña̱ táxiyó tíxa̱ʼvi? Ná ndakanixi̱níyó xa̱ʼa̱ tu̱ʼun ña̱ ni̱ka̱ʼa̱n ta̱ apóstol Pablo ña̱ ni̱ka̱ʼa̱nyó nu̱ú artículo yóʼo. Tándi̱ʼi ta̱xira consejo ka̱chira: “Nda̱a̱ ndáaka ña̱ kéʼéndó á káʼa̱nndó, keʼéndóña xa̱ʼa̱ ki̱vi̱ tátayó Jesús, ta xa̱ʼa̱ ki̱vi̱ ta̱yóʼo taxindó tíxa̱ʼvi ndaʼa̱ yiváyó Ndióxi̱” (Col. 3:15, 17). Kivi na̱ʼa̱yó ña̱ táxiyó tíxa̱ʼvi xíʼin ña̱ káʼa̱nyó ta saátu xíʼin ña̱ kéʼéyó. Ta̱ Pablo ni̱ka̱ʼa̱nra ña̱ taxiyó tíxa̱ʼvi ndaʼa̱ Jehová. Soo Ndióxi̱ kúsi̱í-inira ña̱ ná taxiyó tíxa̱ʼvi ndaʼa̱ inka na̱ yiví. Ná kotoyó ndáa ki̱ʼva na̱ʼa̱yó ña̱ táxiyó tíxa̱ʼvi xíʼin ña̱ káʼa̱nyó ta saátu xíʼin ña̱ kéʼéyó.

14. ¿Ndáa inka ki̱ʼva kivi na̱ʼa̱yó ña̱ táxiyó tíxa̱ʼvi ndaʼa̱na xa̱ʼa̱ ña̱ kéʼéna xa̱ʼa̱yó? (Koto na̱ʼná).

¹⁴ Xíʼin ña̱ káʼa̱nyó. ¿Á kivi chika̱ún ndee̱ ña̱ taxiún tíxa̱ʼvi ndaʼa̱ na̱ kéʼé ña̱ va̱ʼa xa̱ʼún ni loʼo kúú ña̱ kéʼéna, tá kúú, xúnana yéʼé nu̱ún á káʼa̱nna tu̱ʼun ña̱ chíkaa̱ ndee̱ xíʼún? Sava yichi̱ kivi kaʼyiún nu̱ú iin tutu ña̱ táxiún tíxa̱ʼvi ndaʼa̱na á ña̱ chindaʼún mensaje ndaʼa̱na. Kivi keʼún ña̱yóʼo tá ni̱xa̱ʼa̱n na̱ anciano veʼún xi̱tona miíún ta saátu na̱ veʼún ta chi̱kaa̱na ndee̱ xíʼinndó (1 Tes. 5:12, 13). Saátu kivi taxiún tíxa̱ʼvi ndaʼa̱ ná síʼi na̱ anciano xa̱ʼa̱ ña̱ ku̱a̱ʼáka tiempo xíniñúʼu yi̱i̱ná ña̱ kéʼéna chíñu ti̱xin congregación ta loʼoka tiempo íyo yi̱i̱ná xíʼinná.

15. ¿Ndáa ki̱ʼva taxiyó tíxa̱ʼvi ndaʼa̱ Jehová xíʼin ña̱ káʼa̱nyó?

¹⁵ Ta̱ xíniñúʼu taxikayó tíxa̱ʼvi ndaʼa̱ kúú Jehová. ¿Ndáa ki̱ʼva na̱ʼa̱yó ña̱yóʼo xíʼin ña̱ kéʼéyó? Tá kúú tá kéʼéyó oración. Ná ndakaʼányó chi xa̱a̱ síín síín ña̱ káʼa̱nyó xa̱ʼa̱ tá kéʼéyó oración (Efes. 6:18). Ku̱a̱ʼání yichi̱ káʼa̱nyó xíʼinra ná taxira ndee̱ ndaʼa̱yó ña̱ va̱ʼa kundeé-iniyó ya̱ʼayó nu̱ú prueba, ta saátu ndúkúyó ña̱ ndíchi nu̱úra ña̱ va̱ʼa vií koo ña̱ ndaka̱xinyó keʼéyó. Saátu káʼa̱n ndáʼviyó xíʼinra ná koo káʼnu-inira xa̱ʼa̱yó. Tá ndákanixi̱níyó xa̱ʼa̱ ndiʼi ña̱ ke̱ʼéra xa̱ʼa̱yó saá kúú ña̱ kuni̱kayó taxiyó tíxa̱ʼvi ndaʼa̱ra (Sal. 95:2). Ndáyáʼviní nda̱ka̱tu̱ʼunyó ña̱yóʼo miíyó: “Tá káʼi̱n xíʼin Jehová, ¿á táxii̱ tíxa̱ʼvi ndaʼa̱ra á ndúkú kuitíi̱ ña̱ ná taxira ña̱ xíniñúʼi̱?”

16. ¿Nda̱chun ndáyáʼviní taxiyó tíxa̱ʼvi ndaʼa̱ inkana xíʼin ña̱ kéʼéyó?

¹⁶ Xíʼin ña̱ kéʼéyó. Tá iinna ke̱ʼéna iin ña̱ va̱ʼa xa̱ʼún, ndakanixi̱ní ndáa ki̱ʼva taxiún tíxa̱ʼvi ndaʼa̱na. Tá táxiún tíxa̱ʼvi ndaʼa̱na xíʼin ña̱ káʼún ta saátu xíʼin ña̱ kéʼún saá kúú ña̱ kusi̱íka-iniún (Hech. 20:35). Saá náʼún ña̱ kúni̱ún xíniúnna ta ndáyáʼvina nu̱ún ta viíka xa̱ún kutáʼún xíʼinna.

17, 18. ¿Ndáa ki̱ʼva na̱ʼa̱yó ña̱ táxiyó tíxa̱ʼvi ndaʼa̱ Jehová xíʼin ña̱ kéʼéyó? (Romanos 12:1).

¹⁷ ¿Ndáaña kivi keʼéyó ña̱ va̱ʼa na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ndiʼi ña̱ xa̱a̱ ke̱ʼéra xa̱ʼa̱yó? Ña̱ ndataxiyó miíyó ta saátu ña̱ tákuyó ndaʼa̱ Ndióxi̱ nda̱a̱ táki̱ʼva káchi Romanos 12:1 (kaʼviña). Ña̱yóʼo kúni̱ kachiña ña̱ taxiyó ndiʼi ña̱ kúúmiíyó, tá kúú ña̱ tákuyó ña̱ va̱ʼa sakúsi̱íyó-ini Jehová ta ña̱yóʼo kivi kooña ndiʼi ña̱ ndákanixi̱níyó xíʼin ndee̱yó. ¿Ndáaña kúú sava ña̱ kúsi̱í-ini Jehová xíʼin?

¹⁸ Tá ku̱ndaa̱-iniyó xa̱ʼa̱ ndiʼi ña̱ xa̱a̱ ke̱ʼé Jehová xa̱ʼa̱yó, ku̱si̱íní-iniyó, nda̱taxiyó miíyó ndaʼa̱ra ta nda̱kuchiyó. Saátu íyo ña̱ kéʼéyó tiempo vitin chi xíniñúʼuyó tiempoyó, ndee̱yó xíʼin xu̱ʼúnyó. Káʼviyó Biblia ndiʼi ki̱vi̱ ta ndákanixi̱níyó xa̱ʼa̱ña, nátúʼunyó xíʼin na̱ yiví xa̱ʼa̱ tu̱ʼun va̱ʼa, xáʼa̱nyó reunión ta táxiyó comentario ta saátu táxiyó donación (Sal. 1:2, 3; 2 Cor. 8:4; Heb. 10:24, 25; 13:15). Tá ndásakáʼnuyó Jehová xíʼin ndiʼi níma̱yó saá náʼa̱yó ña̱ táxiyó tíxa̱ʼvi ndaʼa̱ra (Col. 3:23, 24).

19. ¿Nda̱chun kúni̱níkayó taxiyó tíxa̱ʼvi ndaʼa̱ Jehová?

¹⁹ Íyoyó ñuyǐví nu̱ú kǒo táxi na̱ yiví tíxa̱ʼvi ndaʼa̱ inkana, soo miíyó íyo ku̱a̱ʼáva ña̱ʼa ña̱ kivi taxiyó tíxa̱ʼvi xa̱ʼa̱. Tá saá kéʼéyó si̱íka kooyó, kǒo ña̱ sándi̱ʼi̱-iniyó ta yatinka kooyó xíʼin Jehová. Tá ndákanixi̱níyó xa̱ʼa̱ ndiʼi ña̱ ta̱xira ndaʼa̱yó ta saátu ña̱ táxira ndaʼa̱yó vitin, kúni̱kayó taxiyó tíxa̱ʼvi ndaʼa̱ra. Ná chikaa̱yó ndee̱ ña̱ taxiyó tíxa̱ʼvi xa̱ʼa̱ ña̱ kéʼéna xa̱ʼa̱yó xíʼin ña̱ káʼa̱nyó ta saátu xíʼin ña̱ kéʼéyó soo ná taxikayó tíxa̱ʼvi ndaʼa̱ Jehová. Tá saá kéʼéyó, saátu Jehová na̱ʼa̱ra ña̱ táxira tíxa̱ʼvi ndaʼa̱yó ta taxira ku̱a̱ʼání ña̱ va̱ʼa ndaʼa̱yó vitin ta saátu chí nu̱únínu (Sal. 106:1; Heb. 11:6).