Ná chindayáʼviyó ña̱ kéʼéyó ña̱ va̱ʼa xi̱nu milagro ña̱ kúú tiempo vitin

1, 2. a) ¿Ndáaña kúú sava milagro ña̱ káʼa̱n Biblia xa̱ʼa̱? b) ¿Ndáaña kúú iin milagro, ta ndáaña kivi keʼé miíyó? (1 Corintios 3:9).

NDAKANIXI̱NÍ tá níxiniún ña̱ xu̱ná Jehová tá mar Rojo ña̱ va̱ʼa ya̱ʼa na̱ ñuura ta ka̱kuna nu̱ú na̱ egipcio. Á tá sa̱ndáʼa ta̱ Jesús na̱ xi̱kuumií kue̱ʼe̱ ta saátu sa̱ndátakura na̱ xa̱a̱ ni̱xi̱ʼi̱. Sana ndakanda̱ní-iniún xíʼin ña̱yóʼo, ta ña̱yóʼo kúú sava milagro ña̱ káʼa̱n Biblia xa̱ʼa̱. Tá níxiniyó milagro yóʼo sana va̱ása kakaví-iniyó ña̱ mií Ndióxi̱ kúú ta̱ ke̱ʼé ndiʼi ña̱yóʼo (Mat. 15:31). Xa̱a̱ ku̱a̱ʼání ku̱i̱ya̱ ku̱u ña̱yóʼo. Ta tiempo vitin, ¿á kúúka milagro? Kúúvaña, ná kotoyó nda̱chun káʼa̱nyó ña̱yóʼo.

² ¿Ndáaña kúú iin milagro? Ña̱yóʼo kúú iin ña̱ʼa ña̱ kǒo kívi keʼé iin na̱ yiví ta ni va̱ása kúnda̱a̱ káxi-inina xíʼinña. Iinlá Jehová kivi keʼé ña̱yóʼo xíʼin ndee̱ ña̱ kúúmiíra. Nu̱ú artículo yóʼo ka̱ʼa̱nyó xa̱ʼa̱ u̱ni̱ milagro ña̱ xa̱a̱ kéʼé Jehová tiempo vitin ti̱xin ñuura. Milagro káʼa̱nyó xíʼin ña̱yóʼo chi iinlá Jehová kivi keʼéña. Tá ná ka̱ʼa̱nyó xa̱ʼa̱ iin tá iin ña̱yóʼo, kotoyó ndáaña kivi keʼéyó ña̱ va̱ʼa chindeétáʼanyó xíʼinra (kaʼvi 1 Corintios 3:9).

XA̱A̱ KU̱A̱ʼÁ KÚÚ NA̱ ÑUU NDIÓXI̱

3. ¿Nda̱chun káʼa̱nyó na̱ ñuu Jehová ni̱xa̱a̱na ndu̱una iin ñuu ña̱ ndakúní? (Isaías 60:22; koto na̱ʼná).

³ Xa̱a̱ ku̱a̱ʼání ku̱i̱ya̱ ta̱ profeta Isaías ni̱ka̱ʼa̱nra ña̱ ku̱a̱ʼání xa̱a̱ na̱ ñuu Ndióxi̱ nduuna tiempo vitin (kaʼvi Isaías 60:22). ¿Á xa̱a̱ xínu ña̱ ni̱ka̱ʼa̱nra? Tá ku̱i̱ya̱ 1914 ki̱ʼva 5,000 na̱ yiví xi̱ndasakáʼnu Jehová, soo vitin xa̱a̱ yáʼaka 9 millón kúúna. Ndakanixi̱ní xa̱ʼa̱ ña̱yóʼo, yáʼaka 130 país loʼova kúú na̱ yiví na̱ íyo ti̱xin ñuu yóʼo. Soo na̱ ndásakáʼnu Jehová tiempo vitin xa̱a̱ ku̱a̱ʼání kúúna. Ta ti̱xin 240 país xíʼin ñuu válí íyo na̱ ndásakáʼnu Ndióxi̱. Sana loʼova kúúyó nu̱ú inka religión, soo ña̱ ni̱ka̱ʼa̱n ta̱ profeta Isaías xa̱a̱ xínuvaña: ‘Na̱ va̱ása ndáyáʼvi, ni̱xa̱a̱na ndu̱una iin ñuu ña̱ ndakúní’.

4. ¿Nda̱chun ndákanda̱-iniyó ña̱ ku̱a̱ʼání ku̱a̱ʼa̱n ndúu na̱ ñuu Ndióxi̱?

⁴ Miíyó na̱ kúú testigo Jehová síínva íyo ña̱ kéʼéyó nu̱ú inka religión saáchi va̱ása sándakuchiyó na̱ lée válí ta ni va̱ása sánáʼa̱yó na̱ yiví ña̱ va̱ása xíniñúʼu keʼéna ndiʼi ña̱ káʼa̱n Ndióxi̱. Ña̱ kéʼéyó kúú ña̱ káʼviyó Biblia ta násamayó ña̱ kéʼéyó ña̱ va̱ʼa kundiku̱nyó ña̱ káʼa̱n ña̱yóʼo. Ta ña̱yóʼo kúni̱ kachiña ña̱ násamayó ña̱ ndákanixi̱níyó xíʼin ña̱ kéʼéyó (1 Cor. 6:9-11). Saá kúú ña̱ sáxínuyó ña̱ káʼa̱n Ndióxi̱ ña̱ va̱ʼa xa̱a̱yó natúʼunyó xa̱ʼa̱ Reinora ta chindeétáʼanyó xíʼin inkana ña̱ xa̱a̱na ndasakáʼnuna Jehová. Tá yáʼa tiempo ndátaxiyó miíyó ndaʼa̱ Jehová ta ndákuchiyó ta kíndo̱oyó keʼéyó ña̱ káʼa̱nra ni nda̱a̱ ndáaka ña̱ ná ndoʼoyó (Mat. 28:19, 20).

5. ¿Ndáaña ni̱ka̱ʼa̱n ta̱ Jesús kundoʼo na̱ ndíku̱n miíra?

⁵ Ña̱ ku̱a̱ʼáka ku̱a̱ʼa̱n ndúu na̱ ñuu Jehová iin milagro kúú ña̱yóʼo. Ta̱ Jesús ni̱ka̱ʼa̱nra ña̱ ixayo̱ʼvi̱ña xíʼinyó kooyó discípulora, ta̱yóʼo ka̱chira: “Tá iinna kúni̱na kundiku̱nna yi̱ʼi̱ ná sandákoona keʼéna ña̱ kúni̱ miína, ta ná kundisona yitu̱n tú sáxo̱ʼvi̱ miína ta ná ndakundeéna kundiku̱nna yi̱ʼi̱” (Mat. 16:24). Ña̱yóʼo kúni̱ kachiña, na̱ ndíku̱n miíra ya̱ʼana nu̱ú tu̱ndóʼo ta nda̱a̱ kivi kuvina xa̱ʼa̱ ña̱ ndíku̱nna miíra. Ta saátu ni̱ka̱ʼa̱n ta̱ Jesús ña̱ ku̱ʼu̱nna xíʼin na̱ ndíku̱n miíra nu̱ú na̱ chíñu (Mat. 10:17, 18). Ni̱ka̱ʼa̱nra ña̱ kasi na̱ níʼi yichi̱ ti̱xin veʼe-ñu̱ʼu nu̱úna (Juan 16:2). Ta saátu ni̱ka̱ʼa̱nra nda̱a̱ na̱ veʼena ixandi̱va̱ʼa xíʼinna (Mat. 10:34-36).

6. ¿Nda̱chun kǒo níkuchiñuna kasina nu̱ú na̱ cristiano na̱ ni̱xi̱yo tá siglo nu̱ú?

⁶ Nda̱a̱ táki̱ʼva ni̱ka̱ʼa̱n ta̱ Jesús, na̱ cristiano na̱ ni̱xi̱yo tá siglo nu̱ú i̱xandi̱va̱ʼana xíʼinna. Tá ndi̱kó ta̱ Jesús chí ndiví, na̱ xi̱niʼi yichi̱ ti̱xin veʼe-ñu̱ʼu na̱ judío xi̱kuni̱na kasina nu̱ú na̱ discípulora. Ti̱inna na̱yóʼo ku̱a̱ʼa̱n xíʼinna nu̱ú na̱ Sanedrín, ta saátu nu̱ú na̱ chíñu náʼnu nu̱ú na̱ judío. Xi̱kuni̱na kaʼnína na̱yóʼo, soo iin ta̱ fariseo ta̱ xi̱naní Gamaliel ni̱ka̱ʼa̱nra ña̱yóʼo xíʼinna: “Káʼi̱n xíʼinndó ña̱ kǒo keʼéndó nda̱a̱ ni iin ña̱ʼa xíʼin na̱ ta̱a yóʼo ta sañándóna. Chi tá chiñu na̱ yiví kúú ña̱ kéʼé na̱yóʼo, ndiʼi-xa̱ʼa̱ miívaña. Soo tá chiñu Ndióxi̱ kúúña, ndóʼó kǒo kuchiñundó sandíʼi-xa̱ʼa̱ndóña. Ta nda̱a̱ sana kanitáʼanndó xíʼin mií Ndióxi̱” (Hech. 5:33, 34, 38, 39). Nda̱a̱ táki̱ʼva ni̱ka̱ʼa̱n ta̱ Gamaliel, tá sa̱ñána na̱ apóstol, na̱ xi̱niʼi yichi̱ ti̱xin veʼe-ñu̱ʼu xi̱ ixandi̱va̱ʼakavana xíʼinna. Soo va̱ása níkuchiñuna sandíʼi-xa̱ʼa̱na na̱yóʼo, chi na̱ ndu̱ku̱a̱ʼákava xi̱kuuna (Hech. 6:7). Mií Jehová xi̱chindeétáʼanra xíʼin na̱ ñuura ña̱ va̱ʼa kundeé-inina ta saátu ku̱a̱ʼáka xa̱a̱na nduuna ni xi̱sasina nu̱úna (Hech. 1:8).

7. ¿Ndáa ki̱ʼva ndíku̱n na̱ discípulo ta̱ Jesús na̱ íyo tiempo vitin yichi̱ na̱ cristiano na̱ ni̱xi̱yo tá siglo nu̱ú? (Koto recuadro ña̱ naní “Ku̱a̱ʼáka ku̱a̱ʼa̱n ndúuna ni íxandi̱va̱ʼana xíʼinna”).

⁷ Tiempo vitin ku̱a̱ʼáka na̱ yiví sákuaʼa xa̱ʼa̱ Jehová ni sási na̱ veʼena nu̱úna, na̱ káchíñu xíʼinna á inkaka na̱ yiví. ¿Nda̱chun táxina ña̱ ná ixandi̱va̱ʼa inkana xíʼinna? (Mat. 16:24). Saáchi kúʼvi̱-inina xínina Jehová ta kándíxana ña̱ kundaara miína. Mií Ndióxi̱ táxira ndee̱ ndaʼa̱na ña̱ va̱ʼa ndakú koo inina (2 Cor. 4:7-9). Tá íxandi̱va̱ʼa na̱ veʼena xíʼinna, ndóʼona nda̱a̱ táki̱ʼva ndo̱ʼo ta̱ salmista tá ka̱chira: “Ni ná sandákoo na̱ yivái̱ yi̱ʼi̱, kundaava Jehová yi̱ʼi̱” (Sal. 27:10). Ña̱yóʼo iin milagro kúúña, chi ku̱a̱ʼání na̱ yiví chíkaa̱-inina ña̱ kundiku̱nna ta̱ Jesús ni xóʼvi̱na.

8. ¿Ndáa ki̱ʼva chíndeétáʼanyó xíʼin na̱ ñuu Ndióxi̱ ña̱ ku̱a̱ʼáka nduuna?

⁸ Chíndeétáʼanyó xíʼin Jehová ta saátu xíʼin ta̱ Jesús ña̱ va̱ʼa xi̱nu milagro yóʼo tá nátúʼunyó xíʼin na̱ yiví. Va̱ʼaní kúniyó xa̱ʼa̱ ña̱ chíndeétáʼanna xíʼinyó. Ta̱ Jesús ni̱ka̱ʼa̱nra ña̱yóʼo: Koi̱ “xíʼinndó ndiʼi ki̱vi̱ nda̱a̱ ná ndiʼi-xa̱ʼa̱ ñuyǐví” (Mat. 28:20). Ta saátu chíndeétáʼan na̱ ángel xíʼinyó (Apoc. 14:6, 7).

NA̱ ÑUU NDIÓXI̱ INKÁCHI KÍTÁʼANNA

9, 10. ¿Ndáa ki̱ʼva xa̱a̱ xínu ña̱ káʼa̱n Miqueas 2:12?

⁹ Ta̱ profeta Miqueas ni̱ka̱ʼa̱nra xa̱ʼa̱ inka milagro ña̱ xa̱a̱ kúú tiempo vitin, ña̱ inkáchi kutáʼan na̱ ñuu Ndióxi̱. Mií Jehová chi̱kaa̱-inira ña̱ ni̱ka̱ʼa̱nra ña̱ inkáchi ndakutáʼan na̱ ndásakáʼnu miíra (kaʼvi Miqueas 2:12). ¿Ndáa ki̱ʼva xa̱a̱ xínu profecía yóʼo tiempo vitin? Na̱ ñuu Ndióxi̱ na̱ íyo tiempo vitin inkáchi kítáʼanna ni xa̱a̱ síín ki̱ʼva íyona á xa̱a̱ síín ñuu ke̱ena. Ta̱ David ni̱ka̱ʼa̱nra ña̱yóʼo: “Iin ña̱ va̱ʼa kúú ña̱ inkáchi ná kutáʼan na̱ ñuu Ndióxi̱, kúsi̱íkaví iniyó xa̱ʼa̱ ña̱yóʼo” (Sal. 133:1).

¹⁰ Na̱ ñuu Ndióxi̱, ni nda̱a̱ ndáaka nu̱ú ndóona, inkáchi ña̱ sákuaʼana ti̱xin reunión xíʼin asamblea. Ni xa̱a̱ síín síín ñuu íyo na̱ Testigo, inkáchi káchíñuna, tá kúú nu̱ú ixava̱ʼana salón á Betel. Iin familia kúú ndiʼiyó. Na̱ ñuyǐví yóʼo va̱ása vií kítáʼanna, saáchi savana kúíkana inkana kǒo xu̱ʼúnna, inkana xa̱a̱ síín ndákanixi̱nína xa̱ʼa̱ ña̱ política ta ña̱yóʼo ndátaʼví miína. Soo miíyó na̱ ndásakáʼnu Jehová va̱ása kéʼéyó saá, saáchi kivi ku̱ʼu̱nyó nda̱a̱ ndáaka ñuu ta na̱ hermanoyó va̱ʼaní ndakiʼinna miíyó, ta íyo tu̱ʼvana ña̱ chindeétáʼanna xíʼinyó ña̱ ndasakáʼnuyó Ndióxi̱ ta saátu ña̱ taxina ña̱ xíniñúʼuyó. Ni xa̱a̱ síín síín ñuu ndóo na̱ ndásakáʼnu Jehová chíkaa̱na ndee̱ ña̱ ndakanixi̱nína nda̱a̱ táki̱ʼva ndákanixi̱níra ta saátu keʼéna nda̱a̱ táki̱ʼva kéʼéra.

11. Ña̱ inkáchi kítáʼanyó, ¿nda̱chun iin milagro kúúña?

¹¹ Ña̱ vií kítáʼanyó iin milagro kúúña saáchi ndóoyó ñuyǐví nu̱ú ndátaʼví táʼan na̱ yiví. Nu̱ú noticia nina ña̱ kánitáʼanna káʼa̱nña xa̱ʼa̱ á xa̱ʼa̱ guerra káʼa̱nña. Biblia ni̱ka̱ʼa̱nña ndáa ki̱ʼva keʼé na̱ yiví tiempo vitin: “Na̱ yiví [...] va̱ása nda̱kú koo inina, va̱ása kindo̱o-inina xíʼin ni iin ña̱ʼa, ka̱ʼa̱nna tu̱ʼun síkí, va̱ása ka̱ʼnu̱-inina, ndi̱va̱ʼaní koo inina, va̱ása kuʼvi̱-inina kunina ña̱ va̱ʼa, xi̱kótáʼanna, so̱ʼoní koona, ni̱nuní kunina” (2 Tim. 3:2-4). “Iníísaá ñuyǐví ndíka̱a̱ña ndaʼa̱ ta̱ Ndi̱va̱ʼa” xíʼin ndaʼa̱ na̱ ta̱chí ndi̱va̱ʼa, soo miíyó chíkaa̱yó ndee̱ ña̱ inkáchi ndásakáʼnuyó Jehová ta inkáchi kítáʼan ndiʼiyó (1 Juan 5:19; Apoc. 12:9). Ña̱yóʼo iin milagro kúúña.

12. ¿Ndáaña xíniñúʼu keʼéyó ña̱ va̱ʼa inkáchi kitáʼanyó ti̱xin ñuu Jehová?

¹² ¿Ndáaña xíniñúʼu keʼéyó ña̱ va̱ʼa inkáchi kitáʼanyó ti̱xin ñuu Jehová? Ña̱ kuniso̱ʼoyó ta keʼéyó ña̱ sanáʼa̱ Jehová miíyó. Nu̱ú tu̱ʼunra káʼa̱nña ña̱ xíniñúʼu kúee koo iniyó, ixakáʼnu-iniyó xa̱ʼa̱ táʼanyó, va̱ása ka̱ʼa̱n kúáchiyó ta va̱ʼa koo iniyó xíʼin inkana (Efes. 4:2, 31, 32). Tá íxakáʼnu-iniyó xa̱ʼa̱ ña̱ va̱ása va̱ʼa ke̱ʼé na̱ hermano xíʼinyó ta saátu chíkaa̱yó ndee̱ ña̱ kǒo ka̱ʼa̱nyó tu̱ʼun síkí xa̱ʼa̱na, saá kúú ña̱ chíndeétáʼanyó xíʼin Jehová ña̱ vií kutáʼan ndiʼiyó.

NA̱ ÑUU NDIÓXI̱ KÚʼVI̱-ININA XÍNITÁʼANNA

13. Na̱ cristiano na̱ ni̱xi̱yo tá siglo nu̱ú, ¿ndáa ki̱ʼva ni̱na̱ʼa̱na ña̱ xi̱kuʼvi̱-inina xi̱xinitáʼanna? (Juan 13:35).

¹³ Ta̱ Jesús ni̱ka̱ʼa̱nra na̱ yiví ndakunina na̱ ndíku̱n miíra xa̱ʼa̱ ña̱ kúʼvi̱-inina xínitáʼanna (kaʼvi Juan 13:35). Na̱ cristiano na̱ ni̱xi̱yo tá siglo nu̱ú ni̱na̱ʼa̱na ña̱yóʼo, tá kúú xi̱taxina ña̱ʼa ña̱ xi̱kuumiína ndaʼa̱ na̱ xi̱ ixama̱níña nu̱ú (Hech. 2:44, 45). Xi̱chindeétáʼanna xíʼin na̱ xi̱ ixandi̱va̱ʼana xíʼin (Hech. 12:5). Xi̱ndaana na̱ ni̱xi̱ʼi̱ yivá xíʼin ná ni̱xi̱ʼi̱ yi̱i̱ (Sant. 1:27). Nda̱a̱ na̱ cristiano na̱ va̱ása ku̱a̱ʼá xu̱ʼún níxi̱kuumií xi̱chindeétáʼanna xíʼin inka na̱ hermano (2 Cor. 8:1-4). Iin ta̱a ta̱ xi̱kaʼyi tá ya̱chi̱ ta̱ ni̱xi̱yo tá siglo nu̱ú ta̱ xi̱naní Tertuliano, ni̱ka̱ʼa̱nra ña̱ xi̱kaʼa̱n na̱ yiví xa̱ʼa̱ na̱ cristiano na̱ ni̱xi̱yo tiempo saá ta ka̱chira: “Kotondó, na̱yóʼo kúʼvi̱ní-inina xínitáʼanna, ta nda̱a̱ íyo tu̱ʼvana ña̱ kuvina xa̱ʼa̱ táʼanna”.a

14. ¿Ndáa ki̱ʼva náʼa̱yó ña̱ kúʼvi̱-iniyó xínitáʼanyó tiempo vitin? (Koto na̱ʼná).

¹⁴ Nda̱a̱ táki̱ʼva xi̱keʼé na̱ cristiano na̱ ni̱xi̱yo tá siglo nu̱ú, saátu kéʼé miíyó chi kúʼvi̱-iniyó xínitáʼanyó. Ta saátu náʼa̱yó ña̱ kúni̱yó xíniyó na̱ yiví na̱ kǒo kúú Testigo tá xáʼa̱nyó nátúʼunyó xíʼinna xa̱ʼa̱ Ndióxi̱. Táxiyó donación ta kǒo na̱ íxandúxa xíʼinyó keʼéyó ña̱yóʼo ta va̱ása táxiyó diezmo. Ña̱ kúʼvi̱-iniyó xíniyó na̱ hermano chíndeétáʼanña xíʼinyó ña̱ taxiyó ña̱ xíniñúʼuna.b Táxiyó ña̱ʼa ña̱ xíniñúʼuna, chíndeétáʼanyó xíʼinna ña̱ ndasakáʼnukana Ndióxi̱ ta saátu ña̱ kusi̱í-inina. Tasaá náʼa̱yó ña̱ ndíku̱nyó consejo ña̱ ta̱xi ta̱ apóstol Pablo: “Sandíkondó-ini na̱ nda̱kava-ini, ta chindeétáʼanndó xíʼin na̱ vitá kúni, ta kúee koo inindó xíʼin ndiʼina” (1 Tes. 5:14). Jehová ka̱nara miíyó ña̱ kundika̱a̱yó ti̱xin ñuura nu̱ú náʼa̱yó ña̱ ndixa kúʼvi̱-iniyó xínitáʼanyó ta saátu náʼa̱yó ña̱yóʼo xíʼin na̱ kǒo ndásakáʼnu miíra.

15. Ña̱ kúʼvi̱-iniyó xínitáʼanyó, ¿nda̱chun kúúña iin milagro?

¹⁵ Ña̱ kúʼvi̱-iniyó xínitáʼanyó iin milagro kúú ña̱yóʼo saáchi ndóoyó ñuyǐví nu̱ú sáa̱-ini na̱ yiví xínitáʼanna. Ta̱ apóstol Pablo ka̱ʼyira ndáa ki̱ʼva koo na̱ yiví tiempo vitin: “Na̱ yiví kuʼvi̱-inina kunina miína, kutóonína kuumiína xu̱ʼún, […] kutóoníkana keʼéna ña̱ kúni̱ miína nu̱úka ña̱ kuʼvi̱-inina kunina Ndióxi̱”. Ta saátu ni̱ka̱ʼa̱nra “va̱ása kuʼvi̱-inina kunina na̱ veʼena” (2 Tim. 3:2-4). Ta̱ Jesús ni̱ka̱ʼa̱nra na̱ yiví xi̱kótáʼanna ta sa̱a̱-inina kunitáʼanna. Ta ka̱chira: “Ku̱a̱ʼání na̱ yiví kǒo kuʼvi̱ka-inina kunitáʼanna” (Mat. 24:10, 12). ¿Á su̱ví ña̱ nda̱a̱ xa̱a̱ xínu ndiʼi ña̱ ni̱ka̱ʼa̱nra? Jehová chíndeétáʼanra xíʼin na̱ ndásakáʼnu miíra ña̱ ku̱ʼvi̱-inina kunitáʼanna. Iin milagro kúú ña̱yóʼo.

16. ¿Ndáa ki̱ʼva náʼa̱yó ña̱ kúʼvi̱-iniyó xínitáʼanyó?

¹⁶ Tá táxiyó tíxa̱ʼvi ndaʼa̱ iinna xa̱ʼa̱ ña̱ kéʼéna, náʼa̱yó ña̱ kúʼvi̱-iniyó xíniyóna ta saátu chíkaa̱yó ndee̱ ña̱ vií kutáʼanyó (Mar. 9:50). Tá kúúmiíyó costumbre ña̱ vií káʼa̱nyó ta saátu vií íyo ña̱ kéʼéyó, náʼa̱yó ña̱ ndíku̱nyó ta̱ Cristo. Ta saátu chíndeétáʼanyó xíʼin milagro ña̱ kéʼé Jehová tiempo vitin ña̱ vií kítáʼanyó ti̱xin ñuura.

NÁ CHINDAYÁʼVIYÓ CHIÑU ÑA̱ KÚÚMIÍYÓ

17. ¿Ndáaña náʼa̱ nu̱úyó Jehová kúú ta̱ kéʼé milagro yóʼo tiempo vitin?

¹⁷ Nda̱a̱ táki̱ʼva xa̱a̱ ku̱ndaa̱-iniyó Jehová kúú ta̱ táxi ña̱ xáʼnu na̱ ñuura, vií kítáʼanna, kúʼvi̱-inina xínitáʼanna ta ña̱yóʼo iin milagro kúúña. Ni ku̱a̱ʼání ñuu sásina nu̱úyó ña̱ ndasakáʼnuyó Ndióxi̱, ku̱a̱ʼáka na̱ yiví xa̱a̱ ndásakáʼnu miíra. Ndóoyó ñuyǐví nu̱ú táʼví-táʼan na̱ yiví, soo miíyó va̱ʼaníka kítáʼanyó. Ni ndóoyó ñuyǐví nu̱ú va̱ása náʼa̱ na̱ yiví ña̱ kúʼvi̱-inina xíni táʼanna, soo miíyó na̱ ndásakáʼnu Ndióxi̱ náʼa̱yó ña̱ kúʼvi̱-iniyó xínitáʼanyó ta xa̱ʼa̱ ña̱yóʼo na̱ yiví ndákunina miíyó ña̱ kúúyó discípulo ta̱ Cristo (Juan 13:34). Va̱ása xíto kuitíyó ña̱ kúú milagro yóʼo, saáchi inkáchi káchíñuyó xíʼin Ndióxi̱ (1 Cor. 3:9).

18. ¿Ndáaña ndákanixi̱níyó xa̱ʼa̱ milagro ña̱ kéʼé Jehová?

¹⁸ Ni ndóoyó ñuyǐví nu̱ú íyoní tu̱ndóʼo, miíyó na̱ ndásakáʼnu Ndióxi̱ na̱ íyo iníísaá nu̱ú ñuʼú yóʼo ku̱a̱ʼa̱nka kúúyó, inkáchi kítáʼanyó ta kúʼvi̱-iniyó xínitáʼanyó. Ña̱ xítoyó kúú milagro yóʼo tiempo vitin chíndeétáʼanña xíʼinyó ña̱ kándíxayó ña̱ saxínuva Jehová ndiʼi ña̱ ni̱ka̱ʼa̱nra (2 Ped. 3:13). Ná chindayáʼviyó ndiʼi chiñu ña̱ kúúmiíyó ña̱ chíndeétáʼanyó xíʼin Jehová ña̱ va̱ʼa xi̱nu milagro ña̱ kéʼéra tiempo vitin.