¿Ndáa ki̱ʼva íyo na̱ testigo Jehová xíʼin na̱ kǒo ñúʼuka ti̱xin religiónna?

Miíndi̱ na̱ testigo Jehová chíkaa̱ndi̱ ndee̱ ña̱ kuʼvi̱-inindi̱ kunindi̱ ndiʼina, íxato̱ʼóndi̱ ndiʼina ta vií íyondi̱ xíʼin ndiʼina. Tá iin na̱ testigo Jehová kǒo chíkaa̱kana ndee̱ ña̱ keena predicación á ña̱ ku̱ʼu̱nna reunión, káʼa̱nndi̱ xíʼinna ña̱ kúʼvi̱-inindi̱ xínindi̱na ta saátu chíndeétáʼanndi̱ xíʼinna ña̱ kuyatin tukuna nu̱ú Jehová (Lucas 15:4-7).

Soo sava yichi̱, xa̱ʼa̱ ña̱ kéʼéna ña̱ kúndasí Ndióxi̱ xínira távánana ti̱xin ña̱ congregación (1 Corintios 5:13). Xa̱ʼa̱ ña̱ kúʼvi̱-inindi̱ xínindi̱ na̱ hermanondi̱ chíndeétáʼanndi̱ xíʼinna ña̱ ndandikó-inina ta kǒo keena ti̱xin congregación. Soo ni xa̱a̱ ta̱vánana ti̱xin congregación, kúʼvi̱kava-inindi̱ xínindi̱na ta íxato̱ʼóndi̱na nda̱a̱ táki̱ʼva káʼa̱n ña̱ Biblia (Marcos 12:31; 1 Pedro 2:17).

¿Nda̱chun távánana ti̱xin congregación?

Tu̱ʼun Ndióxi̱ káxiní káʼa̱nña xa̱ʼa̱ iin na̱ yiví na̱ ni̱ki̱ʼvi iin ku̱a̱chi ndeé nu̱ú Ndióxi̱, tá kǒo ndándikó-inina xíniñúʼu tavánana ti̱xin congregacióna (1 Corintios 5:11-13). Káxiní káʼa̱n Biblia xa̱ʼa̱ ndáa ku̱a̱chi kúú ña̱ kǒo xíniñúʼu keʼé iin na̱ cristiano, saáchi tá ná keʼénaña tavánana ti̱xin congregación. Ta sava ku̱a̱chi kini yóʼo kúú, tá iin ta̱a sándaʼvira ñá síʼira ta kísi̱ra xíʼin inka ñaʼá ta saátu tá iin ñaʼá sándaʼviñá yii̱ñá ta kísi̱ñá xíʼin inka ta̱a, tá xíʼina nda̱a̱ xíniina, tá xa̱ʼnína iin na̱ yiví, tá íxandi̱va̱ʼana xíʼin na̱ veʼena á tá íxakuíʼnána (1 Corintios 6:9, 10; Gálatas 5:19-21; 1 Timoteo 1:9, 10).

Soo su̱ví ndi̱ku̱n kama távána na̱ ke̱ʼé ku̱a̱chi kini ti̱xin congregación, saáchi siʼna ndátaka na̱ ancianob xíʼinna, ta chíndeétáʼanna xíʼinna ña̱ va̱ʼa kuni̱na nasamana ña̱ kéʼéna (Romanos 2:4). Ta kéʼéna ña̱yóʼo chi kúʼvi̱ní-inina xíninana (Gálatas 6:1). Ña̱yóʼo kivi chindeétáʼanña xíʼin na̱ ni̱ki̱ʼvi ku̱a̱chi ña̱ kiʼinna kuenta ña̱ va̱ása va̱ʼa íyo ña̱ ke̱ʼéna ta chindeétáʼanña xíʼinna ña̱ ndandikó-inina (2 Timoteo 2:24-26). Tá xa̱a̱ ku̱a̱ʼání yichi̱ ni̱ka̱ʼa̱n na̱ anciano xíʼinna, soo ndákundeéna kéʼéna ña̱ kini ta kǒo xíínna ndandikó-inina, xíniñúʼu tavánana ti̱xin congregación chi saá káʼa̱n Biblia. Tasaá, na̱ anciano sáya̱ʼana iin anuncio ti̱xin congregación ta káʼa̱nna ki̱vi̱ na̱ ni̱ki̱ʼvi ku̱a̱chi kini ña̱ va̱ása kúúkana testigo Jehová.

Tá iin na̱ yiví kǒo xíínna nasamana ña̱ kéʼéna, xíniñúʼu tavánana ti̱xin congregación soo, ¿nda̱chun kéʼéna ña̱yóʼo? Saáchi saá ndáana ndiʼi na̱ congregación ña̱ va̱ʼa kǒo ki̱ʼvina ku̱a̱chi kini ña̱ kúndasí Ndióxi̱ xínira ta saátu ña̱ kǒo kutáʼanna xíʼin na̱ yiví na̱ ke̱ʼé ku̱a̱chi kini kán (1 Corintios 5:6; 15:33; 1 Pedro 1:16). Ta saátu kivi chindeétáʼanña xíʼin na̱ ni̱ki̱ʼvi ku̱a̱chi kini ña̱ ndandikó-inina ta chikaa̱na ndee̱ ña̱ kǒo keʼékana ña̱ kini (Hebreos 12:11).

¿Ndáa ki̱ʼva íyo na̱ testigo Jehová xíʼin na̱ ta̱vána ti̱xin congregación?

Biblia káʼa̱nña xíʼin na̱ cristiano ña̱ ná kǒo kitáʼanna xíʼin na̱ ta̱vána ti̱xin congregación ta ni kǒo xíniñúʼu kuxuna xíʼinna (1 Corintios 5:11). Ña̱kán va̱ása kítáʼankandi̱ xíʼin na̱ ta̱vána ti̱xin congregación. Ni ta̱vánana ti̱xin congregación soo íxato̱ʼóvandi̱na. Kiviva ku̱ʼu̱nna reunión, ta tá kúni sava na̱ hermano chindeénana kiviva keʼénaña.c Ta saátu, kivi ka̱ʼa̱n na̱ ni̱ki̱ʼvi ku̱a̱chi xíʼin na̱ anciano ña̱ va̱ʼa chindeétáʼanna xíʼinna.

¿Ndáaña kúu tá iin ta̱a ta̱vánara ti̱xin congregación, soo ñá síʼira xíʼin na̱ va̱lí se̱ʼera kúúkana testigo Jehová? ¿Á tá ta̱vána iin ñaʼá ti̱xin congregación, soo yii̱ñá xíʼin na̱ va̱lí se̱ʼeñá kúúkana testigo Jehová? Ni va̱ása inkáchi kítáʼankana ndásakáʼnuna Ndióxi̱, soo chíkaa̱vana ndee̱ ña̱ vií kutáʼanna ti̱xin veʼena. Xa̱ʼa̱ ña̱ inkáchi veʼe íyona xíniñúʼu chíkaa̱na ndee̱ ña̱ vií kutáʼanna xíʼin na̱ ti̱ndaʼa̱ xíʼinna ta saátu xíʼin na̱ va̱lí se̱ʼena.

Na̱ ta̱vána ti̱xin congregación kivi ka̱ʼa̱nna xíʼin na̱ anciano ña̱ ku̱ʼu̱nna kotonana. Ta na̱ anciano kuniñúʼuna tu̱ʼun Ndióxi̱ ña̱ va̱ʼa chindeétáʼanna xíʼinna ña̱ ndikó-inina, tasaá ndikó tukuna nu̱ú Ndióxi̱ (Zacarías 1:3). Tá ndákoona kéʼéna ña̱ kini ta xíʼin ki̱ʼva ña̱ íyona náʼa̱na ña̱ xíniso̱ʼona ña̱ káʼa̱n Ndióxi̱ ta kéʼénaña, kivi ndikó tukuna ti̱xin ña̱ congregación. Na̱ congregación ixakáʼnu-inina xa̱ʼa̱na ta sandíkona-inina, nda̱a̱ táki̱ʼva ke̱ʼé na̱ congregación na̱ ñuu Corinto xíʼin iin ta̱a tá nda̱ndikó-inira xa̱ʼa̱ ku̱a̱chi ña̱ ke̱ʼéra (2 Corintios 2:6-8).

¿Ndáa ki̱ʼva kúni iin na̱ xa̱a̱ ndi̱kó tuku ti̱xin congregación?

Koto ña̱ káʼa̱n sava na̱ testigo na̱ xa̱a̱ ndi̱kó tuku ti̱xin congregación.

“Tá ni̱ka̱ʼi̱n xíʼin na̱ anciano ña̱ xi̱kuni̱ ndikói̱ ti̱xin congregación nda̱kanixi̱níi̱ ña̱ ndaka̱tu̱ʼunna yi̱ʼi̱ xa̱ʼa̱ ndiʼi ña̱ ke̱ʼíi̱ ndiʼi tiempo ña̱ nda̱koi̱ kúi̱ testigo. Soo kǒo nínda̱ka̱tu̱ʼunvína yi̱ʼi̱ xa̱ʼa̱ ña̱yóʼo, chi ña̱ ni̱ka̱ʼa̱nna xíʼi̱n kúú ña̱yóʼo: ‘Ña̱ ndáyáʼvika ndakanixi̱níún xa̱ʼa̱ vitin kúú ña̱ keʼún nu̱ú Jehová’. Va̱ʼaní ku̱nii̱ xíʼin ña̱ ni̱ka̱ʼa̱nna yóʼo” (Ñá María, Estados Unidos).

“Xi̱kuni̱ní na̱ congregación ña̱ ndikó tukui̱ koi̱ testigo Jehová, ta tá ndi̱kói̱ ni̱kusi̱íní-inina. Ta ki̱ʼi̱n kuenta ña̱ kúʼvi̱ní-inina xínina yi̱ʼi̱. Xíʼin ña̱ ke̱ʼé na̱ hermano ni̱na̱ʼa̱na nu̱úi̱ ña̱ xa̱a̱ i̱xakáʼnu-inina xa̱ʼíi̱ ta saátu ña̱ i̱xakáʼnu-ini Jehová xa̱ʼíi̱, ta ña̱yóʼo chi̱ndeétáʼanña xíʼi̱n ña̱ ndakanixi̱níi̱ xa̱ʼa̱ ña̱ keʼíi̱ chí nu̱únínu. Na̱ anciano ndiʼi tiempo ni̱na̱ʼa̱na nu̱úi̱ ña̱ xi̱kuni̱na chindeétáʼanna xíʼi̱n ña̱ vií tuku kutáʼi̱n xíʼin Jehová, sa̱ndíkona-inii̱ ta ni̱ka̱ʼa̱nna xíʼi̱n ña̱ kúʼvi̱va-ini Jehová xínira yi̱ʼi̱ ta ndáyáʼviníi̱ nu̱úra” (Ta̱ Malcom, Sierra Leona).

“Kúsi̱íní-inii̱ xa̱ʼa̱ ña̱ kúʼvi̱ní-ini Jehová xínira na̱ ndásakáʼnu miíra, saáchi kíʼinra kuenta ña̱ ná kǒo kuyaku̱a̱ ñuura. Sava na̱ yiví túvina ña̱ tá távána iinna ti̱xin congregación va̱ása kúʼvi̱-inina xíninana soo su̱ví saá íyoña, chi xa̱ʼa̱ ña̱ kéʼéna ña̱yóʼo náʼa̱na ña̱ kúʼvi̱-inina xínina na̱ ni̱ki̱ʼvi ku̱a̱chi. Táxiníi̱ tíxa̱ʼvi ndaʼa̱ Jehová xa̱ʼa̱ ña̱ kúʼvi̱ní-inira xínira yi̱ʼi̱ ta saátu xa̱ʼa̱ ña̱ íxakáʼnu-inira xa̱ʼíi̱” (Ñá Sandi, Estados Unidos).