Iin ta̱ loʼo xítora ku̱a̱ʼa̱n kiʼvi na̱ yiví ti̱xin salón

ÑA̱ NDÁKA̱TU̱ʼUN NA̱ VA̱LÍ KÚA̱AN

¿Nda̱chun iin ña̱ va̱ʼaníka kúú ña̱ ndakutáʼanyó ti̱xin salón?

Na̱ testigo Jehová u̱vi̱ yichi̱ ndákutáʼanna ti̱xin salón ña̱ Reino ti̱xin iin semana. ¿Ndáaña kéʼéna kán? ¿Ndáa ki̱ʼva chindeétáʼan ña̱ reunión kán xíʼún tá ná ku̱ʼún?

¿Ndáaña kéʼéna ti̱xin salón ña̱ Reino?

Ti̱xin salón kúú nu̱ú sánáʼa̱na miíyó ndáa ki̱ʼva keʼéyó ña̱ káʼa̱n ña̱ Biblia. Ta ña̱ reunión yóʼo chindeétáʼanña xíʼún:

Ña̱ sakuaʼún ña̱ nda̱a̱ xa̱ʼa̱ Ndióxi̱.
Ña̱ kunda̱a̱-iniún xa̱ʼa̱ ña̱ kúú tiempo vitin.
Ña̱ va̱ʼaka na̱ yiví koún.
Ña̱ ndani̱ʼún na̱ ndixa koo migoún.

¿Á xa̱a̱ xíni̱ún xa̱ʼa̱ ña̱yóʼo? Nu̱ú ndátaka na̱ testigo Jehová naníña salón ña̱ Reino, saáchi ña̱ káʼa̱nníkana xa̱ʼa̱ kán kúú Reino Ndióxi̱ (Mateo 6:9, 10; 24:14; Lucas 4:43).

¿Nda̱chun va̱ʼaní tá ná ku̱ʼún?

Ña̱ káʼa̱nna kán chindeétáʼanña xíʼún. Texto ña̱ va̱xi nu̱ú Biblia ña̱ káʼa̱nna xa̱ʼa̱ ti̱xin reunión ña̱ kúúmií na̱ testigo Jehová kivi chindeétáʼanña (Proverbios 4:5). Ña̱yóʼo kúni̱ kachiña, ña̱ kivi chindeétáʼan ña̱ Biblia xíʼún ña̱ vií koo ña̱ ndaka̱xiún keʼún. Ta saátu káʼa̱nña xa̱ʼa̱ pregunta ña̱ ndáyáʼviní, tá kúú ña̱yóʼo:

Ña̱yóʼo kúú título sava discurso ña̱ káʼa̱nna xa̱ʼa̱ ti̱xin reunión ña̱ xíyo ki̱vi̱ sábado á domingo:

¿Á kivi chindeétáʼan ña̱ Biblia xíʼinyó?
¿Ndáana kivi chindeétáʼan xíʼinyó tá yáʼayó nu̱ú tu̱ndóʼo?
¿Ndáaña kéʼé Reino Ndióxi̱ xa̱ʼa̱yó?

“Iin ta̱ káʼvi xíʼi̱n escuela ni̱xa̱ʼa̱nra xíʼinndi̱ reunión. Inkáchi ni̱xi̱yora xíʼin na̱ veʼi̱ ta ta̱xindi̱ libro ña̱ kúúmiíndi̱ ndaʼa̱ra. Tándi̱ʼi ni̱ka̱ʼa̱nra xíʼi̱n ña̱ ku̱tóoníra comentario ña̱ ta̱xi na̱ hermano tá ni̱nda̱ka̱tu̱ʼunna na̱yóʼo. Ta saátu ni̱ka̱ʼa̱nra xíʼi̱n, ña̱ veʼe-ñu̱ʼu nu̱ú xáʼa̱nra kǒo tutu kúúmiína ña̱ kaʼvina nda̱a̱ táki̱ʼva kéʼé miíyó” (ñá Brenda).

¿Á xa̱a̱ xíni̱ún xa̱ʼa̱ ña̱yóʼo? Kǒo xu̱ʼún kíʼinna ndaʼa̱ na̱ yiví tá xáʼa̱nna reunión, chi ndiʼivana kivi ku̱ʼu̱n.

Na̱ yiví na̱ kuniún kán chika̱a̱na ndee̱ xíʼún. Ña̱ Biblia káʼa̱nña, ña̱ ndákutáʼan na̱ cristiano ña̱ va̱ʼa chika̱a̱na ndee̱ xíʼin táʼanna (Hebreos 10:24, 25). Ña̱ kutáʼanyó xíʼin na̱ yiví na̱ ndíʼi̱ka-ini xa̱ʼa̱ Ndióxi̱ ta saátu xa̱ʼa̱ inkana chíka̱a̱níña ndee̱ xíʼinyó, ni ndóoyó nu̱ú iin ñuyǐví nu̱ú íyo na̱ yiví na̱ ndíʼi̱níka-ini xa̱ʼa̱ miína.

“Sava yichi̱ kúsuchíní-inii̱ ta kúnaáníi, soo na̱ xáʼa̱n ti̱xin salón chíndeétáʼanna xíʼi̱n ña̱ va̱ʼa kunii̱. Ta, tá ndíʼi reunión ta ndíxa̱i̱ veʼi̱ kúsi̱íní-inii̱ ta íyo tu̱ʼvai̱ ña̱ keʼíi̱ chiñu inka ki̱vi̱” (ñá Elisa).

¿Á xa̱a̱ xíni̱ún xa̱ʼa̱ ña̱yóʼo? Iníísaá ñuyǐví yáʼaka 120,000 congregación na̱ testigo Jehová íyo, ta saátu yáʼaka 60,000 lugar nu̱ú ndátakana íyo. Xa̱ʼa̱ ña̱ ku̱a̱ʼáka na̱ yiví xáʼa̱n reunión, iin tá iin ku̱i̱ya̱ yáʼaka 1,500 salón íxava̱ʼana.a

Ña̱ ndákanixi̱ní inkaka na̱ va̱lí kúa̱an

“Tá ni̱xi̱yo loʼi̱ iin ñá xi̱kaʼvi xíʼi̱n escuela ni̱xa̱ʼa̱nñá reunión xíʼi̱n, ta nda̱kanda̱ní-iniñá tá xi̱niñá na̱ yiví na̱ xa̱a̱ síín síín ku̱i̱ya̱ ña̱ inkáchi sákuaʼana ti̱xin reunión. Ta xa̱a̱ íyo loʼo tiempo ni̱xa̱ʼa̱ntu ta̱ káchíñui̱ nu̱ú reunión, ta nda̱kanda̱ní-inira tá xi̱nira ña̱ ku̱a̱ʼání yichi̱ xíniñúʼundi̱ Biblia. Tá xi̱nii̱ ña̱ ni̱kusi̱íní-inira xíʼin ña̱ sa̱kuaʼara chi̱ndeétáʼanña xíʼi̱n ña̱ kundayáʼvika reunión nu̱úi̱” (ñá Jessica).

“Ki̱ʼi̱n kuenta ña̱ chíndeétáʼan ña̱ reunión xíʼi̱n ña̱ nandósó-inii̱ xa̱ʼa̱ tu̱ndóʼo ña̱ kúúmiíi̱. Kán sákuaʼayó ndáa xa̱ʼa̱ kúú ña̱ tákuyó, ña̱ va̱ʼaka na̱ yiví kooyó xíʼin ku̱a̱ʼáka ña̱ʼa. Tá ndíʼi reunión kúsi̱íníka-inii̱ ta táxiníña ndee̱ ndaʼíi̱” (ta̱ Timothy).

“Iin ta̱ táta ta̱ ni̱ka̱ʼi̱n xíʼin ña̱ ku̱ʼu̱nra reunión xíʼi̱n ni̱ka̱ʼa̱nra: ‘Ni̱xa̱ʼi̱n reunión ña̱ va̱ʼa kotoi̱ á íyo iin ña̱ va̱ása va̱ʼa kándíxana. Soo ki̱ʼi̱n kuenta ña̱ kándíxa miívai̱ kúú ña̱ va̱ása va̱ʼa íyo’. Ta saátu nda̱kanda̱ní-inira xa̱ʼa̱ ña̱ va̱ʼaní íyo ini na̱ testigo Jehová. Ta̱yóʼo ni̱ka̱ʼa̱nra: ‘Ni sa̱kán xi̱nitáʼi̱n xíʼinna, soo va̱ʼaníva ke̱ʼéna xíʼi̱n nda̱a̱ táki̱ʼva kéʼéna xíʼin iin na̱ xa̱a̱ ku̱a̱ʼání ku̱i̱ya̱ xíni̱na” (ta̱ Jacob).

“Sava yichi̱ ndákanixi̱níi̱: ‘Vitin kama kitai̱ ku̱ʼi̱n tá ná ndiʼi reunión’. Soo tá íyo ña̱ reunión nándósóva-inii̱ xa̱ʼa̱ ña̱yóʼo. Soo tá ndíʼi kíxáʼíi̱ nátúʼi̱n xíʼin inkana, ta ni va̱ása ndákaʼánkai̱ xa̱ʼa̱ ña̱ nda̱kanixi̱níi̱ tá ya̱chi̱. Tá va̱ása xáʼi̱n reunión, va̱ása kuumiíi̱ na̱ migoi̱ na̱ kúúmiíi̱ vitin” (ñá Madison).

a Tá kúni̱ún kunda̱a̱ka-iniún ndáa míí xíyo reunión ki̱ʼvi nu̱ú página yóʼo “Reunión na̱ testigo Jehová” ta katavi ndaʼa̱ nu̱ú káʼa̱nña “Nandukú ndáaña ku̱ʼu̱n”.