¿Ndáa ki̱ʼva chi̱ndeétáʼanna xíʼin na̱ hermano ku̱i̱ya̱ 2023?: “Xíninu̱úyó ndáa ki̱ʼva náʼa̱ Jehová ña̱ kúʼvi̱ní-inira xínira miíyó”

Tu̱ʼun Ndióxi̱ káʼa̱nña ña̱ tiempo so̱ndíʼi ña̱ ndóoyó vitin “kanitáʼan iin ñuu xíʼin inka ñuu” ta saátu koo inkaka tu̱ndóʼo (Mateo 24:3, 7). Ta tá ku̱i̱ya̱ 2023 ku̱u ña̱ káʼa̱n profecía yóʼo. Sava ñuu ka̱nitáʼan na̱ yiví ta ki̱ʼva 100 país ku̱u inkaka tu̱ndóʼo, soo na̱ testigo Jehová ni̱na̱ʼa̱na ña̱ kúʼvi̱-inina xínina inkana nda̱a̱ táki̱ʼva kéʼé Ndióxi̱. ¿Ndáa ki̱ʼva ke̱ʼéna ña̱yóʼo?

Tá ku̱i̱ya̱ 2023 ku̱a̱ʼání tu̱ndóʼo ku̱u sava ñuu nu̱ú ndóo na̱ hermano. Ta ña̱ va̱ʼa chindeétáʼan na̱ ñuu Jehová xíʼin na̱ ndo̱ʼo tu̱ndóʼo xi̱niñúʼuna yáʼaka 10 millón ña̱ dólara ta ña̱yóʼo ka̱naña ti̱xin donación ña̱ táxi ndiʼi na̱ hermano. Saátu ku̱a̱ʼání na̱ hermano, xi̱niñúʼuna xu̱ʼún miína ña̱ va̱ʼa chindeétáʼanna xíʼin na̱ ndo̱ʼo tu̱ndóʼo na̱ ndóo yatin xíʼinna. Koto ndáa ki̱ʼva xíniñúʼu na̱ ñuu Ndióxi̱ donación ña̱ táxiún ña̱ va̱ʼa chindeétáʼanna xíʼin na̱ ndo̱ʼo tu̱ndóʼo.

“Mií ña̱ nda̱a̱, kúʼvi̱va-ini na̱ ñuu Ndióxi̱ xínina miíyó”

Sava ñuu ña̱ íyo chí Nigeria ndákutúní ti̱kui̱í tá kúun sa̱vi̱. Soo tá yo̱o̱ octubre ña̱ ku̱i̱ya̱ 2022 ku̱a̱ʼáníka ti̱kui̱í nda̱kutú ñuu yóʼo nu̱ú inkaka ku̱i̱ya̱. Yáʼaka 676,000 hectarea ñuʼú ña̱ chíʼina ndi̱ʼi-xa̱ʼa̱ ta yáʼaka u̱vi̱ millón na̱ yiví, xi̱niñúʼu keena veʼena. Na̱ hermano na̱ káchíñu ti̱xin Betel ña̱ ñuu Nigeria chi̱ndaʼána sava na̱ hermano na̱ chi̱ndeétáʼan xíʼin na̱ ndo̱ʼo tu̱ndóʼo ta chikaa̱na ndee̱ xíʼinna.

Ña̱ ndo̱ʼo na̱ hermanoyó

• 7,505 na̱ publicador xi̱niñúʼu sandákoona veʼena.

• 860 veʼe ndi̱ʼi-xa̱ʼa̱.

• 90 salón nu̱ú xíyo reunión xíʼin iin salón nu̱ú xíyo asamblea, nda̱kutú ti̱kui̱í iniña.

Ndáa ki̱ʼva xi̱niñúʼuna donación

Yáʼaka 250,000 dólar xi̱niñúʼuna ña̱ va̱ʼa chindeétáʼanna xíʼin na̱ ndo̱ʼo tu̱ndóʼo, xíʼin xu̱ʼún yóʼo:

• Sa̱tána arroz, nduchu̱ xíʼin sopa ña̱ kuxu na̱ hermano.

• Sa̱tána ña̱ʼa ña̱ kuniñúʼu na̱ hermano, tá kúú colchón nu̱ú ku̱su̱nna.

• Nda̱saviína veʼe ña̱ ndi̱ʼi-xa̱ʼa̱ á i̱xava̱ʼana ña̱ xa̱á.

¿Ndáaña ke̱ʼé na̱ hermano ña̱ va̱ʼa vií kuniñúʼuna donación? Ña̱ ke̱ʼéna kúú ña̱ viíní xi̱tona iin tá iin veʼe yóʼo ña̱ va̱ʼa kunda̱a̱-inina á ndasaviínaña á va̱ʼaka ixava̱ʼana iin ña̱ xa̱áva. Tá xi̱xiniñúʼu keʼéna iin veʼe xa̱á, xi̱keʼénaña táki̱ʼva íyo veʼe ñuu nu̱ú ndóona ta loʼova xu̱ʼún xi̱xiniñúʼuna ña̱ va̱ʼa kuva̱ʼaña.

Na̱ hermano na̱ ni̱ya̱ʼa nu̱ú tu̱ndóʼo, táxinína tíxa̱ʼvi xa̱ʼa̱ ña̱ chi̱ndeétáʼanna xíʼinna. Iin ñá hermana káchiñá: “Tá nda̱kutú ti̱kui̱í ñuu nu̱ú ndóondi̱, kǒo níxi̱kunda̱a̱-inindi̱ ndáaña keʼéndi̱ saáchi ndi̱ʼi-xa̱ʼa̱ ñuʼúndi̱ ta ndi̱ʼi-xa̱ʼa̱ veʼendi̱. Soo va̱ʼaníva ku̱nindi̱ chi mií ki̱vi̱ saá ni̱xa̱a̱ na̱ hermano ña̱ va̱ʼa chindeétáʼanna xíʼinndi̱ ta ta̱xina veʼe ni̱xi̱yondi̱ ta saátu va̱ʼaní ku̱nindi̱ tá chi̱ndaʼá na̱ Betel ña̱ kuxundi̱. Xíʼin ña̱ ke̱ʼé na̱ hermano ki̱ʼinndi̱ kuenta ña̱ ndixaní kúú ña̱ káʼa̱n Juan 13:34, 35. Nda̱kanda̱ní-inindi̱ xíʼin ña̱ ke̱ʼéna. Mií ña̱ nda̱a̱, kúʼvi̱va-ini na̱ ñuu Ndióxi̱ xínina miíyó. Miíi̱ xíʼin na̱ veʼi̱, xíʼin ndiʼi níma̱ndi̱ káʼa̱nndi̱ ña̱yóʼo xíʼinndó: Tíxa̱ʼviníndó ña̱ ki̱xindó chi̱ndeétáʼanndó xíʼinndi̱ mií tiempo ña̱ xi̱niñúʼundi̱ña”.

Xítova inka na̱ yiví ña̱ kéʼéyó ña̱ va̱ʼa chindeétáʼanyó xíʼin na̱ hermano na̱ yáʼa nu̱ú tu̱ndóʼo. Iin ta̱a ta̱ xáʼndachíñu chí ñuu Sabagreia (Bayelsa) ni̱ka̱ʼa̱nra ña̱yóʼo: “Íyo ku̱a̱ʼání veʼe-ñu̱ʼu xíʼin tiʼvi na̱ yiví na̱ káʼa̱n ña̱ chíndeétáʼanna xíʼin inkana soo iinlá na̱ testigo Jehová kúú na̱ chíkaa̱ní ndee̱ ña̱ chindeétáʼanna xíʼin na̱ yáʼa nu̱ú tu̱ndóʼo. Va̱ʼaníva íyo ña̱ kéʼé na̱yóʼo iníísaá ñuyǐví”.

“Xíninu̱úyó ndáa ki̱ʼva náʼa̱ Jehová ña̱ kúʼvi̱ní-inira xínira miíyó”

Tá yo̱o̱ febrero ña̱ ku̱i̱ya̱ 2023, yáʼaka 400 yichi̱ ni̱xi̱xi̱ ñuu ña̱ íyo chí Chile. Ni̱xi̱xi̱ yáʼaka 430,000 hectarea ñuʼú xíʼin inkaka táʼví ñuu kán. Ki̱ʼva 8,000 na̱ yiví xi̱niñúʼu keena veʼena. Tá ni̱ya̱ʼa tu̱ndóʼo yóʼo, na̱ Betel chi̱ndaʼána na̱ chindeétáʼan xíʼin na̱ hermano.

Ña̱ ndo̱ʼo na̱ hermanoyó

• 222 na̱ hermano xi̱niñúʼu keena veʼena.

• 20 veʼe ndi̱ʼi-xa̱ʼa̱.

Ndáa ki̱ʼva xi̱niñúʼuna donación

Yáʼaka 200,000 dólar kúú ña̱ xi̱niñúʼuna ña̱ va̱ʼa chindeétáʼanna xíʼin na̱ ni̱ya̱ʼa nu̱ú tu̱ndóʼo, xíʼin xu̱ʼún yóʼo:

• Sa̱tána na̱ kuxu na̱ hermano xíʼin ti̱kui̱í koʼona.

• Sa̱tána ña̱ kuniñúʼu na̱ hermano, tá kúú ña̱ ndaya̱kúnna veʼena xíʼin ta̱tán.

• Nda̱saviína veʼe ña̱ ndi̱ʼi-xa̱ʼa̱.

Iin na̱ familia nda̱kavaní-inina tá ku̱ndaa̱-inina ña̱ ndi̱ʼi-xa̱ʼa̱ veʼena xíʼin chiñuna. Ndi̱ʼi-xa̱ʼa̱ ndiʼi ña̱ xi̱kuumiína. Tá ni̱ya̱ʼa loʼo ki̱vi̱ ña̱ ku̱u tu̱ndóʼo yóʼo, xi̱kusuchíní-inina tá xi̱xinina ñuʼú nu̱ú xi̱ndichi veʼena. Soo tá xi̱nina ndáa ki̱ʼva ki̱xáʼa na̱ hermano íxava̱ʼana veʼena, va̱ʼaní ku̱nina. Na̱ hermano na̱ ni̱xa̱ʼa̱n i̱xava̱ʼa veʼena ni̱na̱ʼa̱na ña̱ kúʼvi̱ní-inina xíninana ta ña̱yóʼo kúú ña̱ chi̱ndeétáʼan xíʼinna ña̱ kundeé-inina ya̱ʼana nu̱ú tu̱ndóʼo yóʼo. Nda̱a̱ níma̱na ni̱xa̱a̱ ña̱ ke̱ʼé na̱ hermano yóʼo xa̱ʼa̱na. Xa̱ʼa̱ ña̱kán nda̱kutáʼanna xíʼinna ta ki̱xáʼana íxava̱ʼana veʼe inka ta̱ hermano.

Ku̱a̱ʼání na̱ hermano, nda̱kanda̱ní-inina xa̱ʼa̱ ña̱ chi̱ndeétáʼanna xíʼinna tá ni̱ya̱ʼana nu̱ú tu̱ndóʼo. Iin ta̱ hermano ka̱chira: “Mií Jehová kúú ta̱ táxi na̱ hermano na̱ chíndeétáʼan xíʼinyó. Tá ni̱ya̱ʼa iin kuití ki̱vi̱ ña̱ ku̱u tu̱ndóʼo ñuundi̱, xa̱a̱ ni̱xi̱yo tu̱ʼva na̱ hermano ña̱ taxina ña̱ xíniñúʼundi̱. Ña̱ nda̱a̱ kúúña kúsi̱íní-iniyó tá káʼviyó xa̱ʼa̱ na̱ hermano na̱ chíndeétáʼan xíʼin na̱ ndóo inka ñuu soo tá ndóʼo miíyó ña̱yóʼo, síínva kúniyó saáchi chíndáyáʼviyó ndiʼi ña̱ kéʼé na̱ ñuu Jehová xa̱ʼa̱yó. Saátu táxiníyó tíxa̱ʼvi xa̱ʼa̱ ña̱ va̱ʼaní-ini na̱ hermano xíʼinyó saáchi ndíku̱nna yichi̱ Jehová, ndíʼi̱-inina xa̱ʼa̱yó ta táxina ña̱ xíniñúʼuyó tasaá kǒo sandákooyó ndasakáʼnuyó Jehová ni kǒo ndakava-iniyó ta saátu ña̱ va̱ʼa kuumiíyó ña̱ xíniñúʼuyó. Xíninu̱úyó ndáa ki̱ʼva náʼa̱ Jehová ña̱ kúʼvi̱ní-inira xínira miíyó”.

Xa̱ʼa̱ ña̱ xa̱a̱ ku̱nu̱mí ndiʼi-xa̱ʼa̱ ñuyǐví yóʼo, koo ku̱a̱ʼáka tu̱ndóʼo (Lucas 21:10, 11). Soo ta̱ Jesús ta̱ xáʼndachíñu nu̱úyó koora xíʼinyó ndiʼi ki̱vi̱ nda̱a̱ ná ndiʼi-xa̱ʼa̱ ñuyǐví ta na̱ʼa̱ra ña̱yóʼo tá ná kuniñúʼura na̱ congregación ña̱ chindeétáʼanna xíʼinyó (Mateo 28:20). Tá táxiyó donación ña̱ va̱ʼa chindeétáʼanyó xíʼin na̱ ñuu Ndióxi̱, tá kúú tá táxiyóña nu̱ú donate.jw.org á ti̱xin salón á tá táxiyó tiempoyó xíʼin ndee̱yó ña̱ va̱ʼa chindeétáʼanyó xíʼin inkana saá náʼa̱yó ña̱ chíndeétáʼanyó xíʼin ta̱ Jesús ta saátu Reinora. Tíxa̱ʼviníndó ñaniyó xíʼin ku̱ʼvayó xa̱ʼa̱ ña̱ va̱ʼaní-inindó.