Nota

h 1 Samuel 25:23-28: “Tá xi̱ni ñá Abigaíl ta̱ David, kama nu̱uñá sa̱tá tí burro ta xi̱kuxítíñá nu̱úra. ²⁴ Tasaá ku̱yatinñá xa̱ʼa̱ra ta ni̱ka̱ʼa̱nñá xíʼinra: ‘Táta miíi̱, yi̱ʼi̱ chika̱ún ku̱a̱chi. Taxi ná ka̱ʼi̱n xíʼún. Kuniso̱ʼo ña̱ káʼa̱n ñá káchíñu nu̱ún. ²⁵ Táta miíi̱, ixaún ña̱ ma̱ní va̱ása kandíxaún ña̱ ni̱ka̱ʼa̱n ta̱ Nabal. Saáchi iin ta̱a ta̱ kǒo ndáyáʼvi kúúra, xa̱ʼa̱ ña̱yóʼo kúú ña̱ naníra Nabal, chi ta̱ kíʼvi kúúra. Soo yi̱ʼi̱ ñá káchíñu nu̱ún, va̱ása níxinii̱ na̱ ta̱a na̱ chi̱ndaʼún ni̱xa̱a̱. ²⁶ Ta vitin táta miíi̱, nda̱a̱ táki̱ʼva kándíxaún ña̱ táku Jehová ta tákutu miíún saá kandíxaún ña̱ mií Jehová kúú ta̱ sási nu̱ún ña̱ va̱ása ndatiún ku̱a̱chi yóʼo, tasaá ki̱ʼviún ku̱a̱chi xa̱ʼa̱ na̱ kuvi. Ta na̱ sáa̱-ini xíni yóʼó xíʼin na̱ kúni̱ keʼé ña̱ va̱ása va̱ʼa xíʼún, ná xa̱a̱na koona nda̱a̱ táki̱ʼva íyo ta̱ Nabal. ²⁷ Soo vitin táta miíi̱, yi̱ʼi̱ ñá káchíñu nu̱ún níʼii̱ ña̱ʼa ki̱xa̱i̱, ta taxi ná ndakiʼin na̱ ta̱a na̱ kítáʼan xíʼún ña̱ níʼii̱ yóʼo. ²⁸ Ixaún ña̱ ma̱ní ixakáʼnu-iniún xa̱ʼa̱ ñá káchíñu nu̱ún, tá íyo iin ña̱ va̱ása va̱ʼa ke̱ʼíi̱. Kúnda̱a̱-inii̱ ña̱ chindeétáʼan Jehová xíʼún ña̱ ku̱a̱ʼání tiempo kutaku na̱ veʼún. Saáchi yóʼó ka̱nitáʼún xa̱ʼa̱ Jehová, ta ndiʼi tiempo ña̱ xa̱a̱ tákún kǒo ña̱ va̱ása va̱ʼa kéʼúnʼ”.