NDIʼIVA na̱ yiví ni nda̱a̱ ndáaka ñuuna á religiónna, ndiʼivana kéʼé oración. Kivi keʼénaña tá ndákutáʼan ku̱a̱ʼána ta saátu tá íyo iinlá miína, ta ku̱a̱ʼá nu̱ú kéʼéna ña̱yóʼo tá kúú ti̱xin veʼe-ñu̱ʼu, sinagoga, mezquita, pagoda á santuario, ta ku̱a̱ʼá ña̱ʼa xíniñúʼuna tá kéʼéna ña̱yóʼo, tá kúú rosario, devocionario, icono, alfombra, tablilla xíʼin cilindro ña̱ oración.

Iin ña̱ oración kúú ña̱ náʼa̱ ña̱ síín íyo na̱ yiví nu̱ú ndiʼika ña̱ táku ña̱ íyo nu̱ú ñuʼú yóʼo. Ta nda̱a̱ táki̱ʼva kéʼé kití, saátu kéʼé miíyó chi xíniñúʼu kuxuyó, koʼoyó ti̱kui̱í xíʼin ña̱ ndakiʼinyó ta̱chíyó. Saátu kákuyó, xáʼnuyó ta xíʼi̱yó (Eclesiastés 3:19). Soo iinlá na̱ yiví kúú na̱ kéʼé oración. ¿Nda̱chun?

Saáchi ña̱yóʼo chíndeétáʼanña xíʼin na̱ yiví ña̱ ka̱ʼa̱nna xíʼin ndióxi̱ ña̱ ndásakáʼnuna, chi saá kúú ña̱ ndákanixi̱nína ña̱ kúyatinna nu̱ú ndióxi̱na. Ta ña̱ Biblia káʼa̱nña, ña̱ xa̱a̱ saá na̱kuva̱ʼavayó ña̱ keʼéyó oración (Eclesiastés 3:11). Ta̱ Jesús ni̱ka̱ʼa̱nra ña̱yóʼo: “Si̱íní íyo na̱ kúnda̱a̱-ini ña̱ xíniñúʼuna Ndióxi̱” (Mateo 5:3).

Xa̱ʼa̱ ña̱ xíniñúʼu na̱ yiví Ndióxi̱ kúú ña̱ xáʼa̱nna templo á xíniñúʼuna inkaka ña̱ʼa ña̱ va̱ʼa ka̱ʼa̱nna xíʼinra, ta saátu ku̱a̱ʼání hora kéʼéna oración. Soo sava na̱ yiví, ña̱ kéʼéna kúú ña̱ káʼa̱nna xíʼin inkana xa̱ʼa̱ ña̱ ndóʼona á káʼa̱nna xíʼinna ña̱ chindeétáʼanna xíʼinna. Soo, ¿á su̱ví ña̱ nda̱a̱ kúú ña̱ kǒo ndee̱ ndaʼa̱ na̱ yiví ña̱ va̱ʼa chindeétáʼanna xíʼin inkana? Miíyó na̱ yiví kǒoví ndee̱ ndaʼa̱yó ta ni va̱ása ku̱a̱ʼá tiempo tákuyó, ta ni kǒo kúnda̱a̱ va̱ʼa iniyó xa̱ʼa̱ ndiʼi ña̱ kúu nu̱ú ñuyǐví yóʼo. Ña̱kán, iinlá na̱ íyo ndiʼi tiempo, na̱ ndíchiní na̱ íyoní ndee̱ kúú na̱ kivi chindeétáʼan xíʼinyó. Soo, ¿ndáa xa̱ʼa̱ kúú ña̱ kéʼéyó oración?

Tá kúú, ¿á xa̱a̱ sava yichi̱ túviún ña̱ nda̱a̱ ni iinna kǒo kívi chindeétáʼanna xíʼún, á ña̱ taxina consejo ndaʼún á ña̱ ka̱ʼa̱nna xíʼún ndáaña xíniñúʼu keʼún? Tá yáʼún nu̱ú tu̱ndóʼo ña̱ yo̱ʼvi̱ní, tá ni̱xi̱ʼi̱ iin na̱ veʼún á tá ndáka̱xiún iin ña̱ keʼún á tá ni̱ki̱ʼviún iin ku̱a̱chi ña̱ ndeéní, ¿á túviún ña̱ va̱ása nísandíkona-iniún xa̱ʼa̱ ña̱ ni̱ka̱ʼa̱nna xíʼún, ña̱ ta̱xina iin consejo ndaʼún á ña̱ ni̱ka̱ʼa̱nna xíʼún ña̱ íxakáʼnu-inina xa̱ʼún?

Ña̱ Biblia ña̱ va̱ʼaní káʼa̱n xa̱ʼa̱ ña̱yóʼo káchiña, ña̱ oración kúú ña̱ kivi chindeétáʼan xíʼinyó xa̱ʼa̱ ña̱ ndóʼoyó. Nu̱ú ña̱yóʼo va̱xi ku̱a̱ʼání oración ña̱ ke̱ʼé na̱ ta̱a xíʼin ná ñaʼá, ña̱ ni̱ka̱ʼa̱nna xíʼin Ndióxi̱ ña̱ ná sandíkora-inina, ña̱ ná taxira consejo ndaʼa̱na ta ixakáʼnu-inira xa̱ʼa̱na, ta saátu nda̱kuiinra ña̱ xi̱kuni̱na kunda̱a̱-inina xa̱ʼa̱ (Salmo 23:3; 71:21; Daniel 9:4, 5, 19; Habacuc 1:3).

Ndiʼi ña̱ oración yóʼo xa̱a̱ síín síín ni̱xi̱yoña. Soo na̱ ke̱ʼé ña̱yóʼo xi̱kunda̱a̱-inina ndáana káʼa̱nna xíʼin, ta tiempo vitin ku̱a̱ʼání na̱ yiví ni va̱ása xíni̱kana ndáana káʼa̱nna xíʼin.

TIEMPO vitin, ku̱a̱ʼání na̱ yiví ndákanixi̱nína ña̱ va̱ása ndáyáʼviví ndáana káʼa̱nna xíʼin tá kéʼéna oración, chi ndákanixi̱nína ña̱ ndiʼiña xáa̱ña nu̱ú Ndióxi̱. Ta na̱ yiví na̱ ndákanikaxi̱ní saá kúú na̱ káʼa̱n ña̱ va̱ʼa ndiʼi religión. Soo, ¿á ña̱ nda̱a̱ kúú ña̱yóʼo?

Mií ña̱ nda̱a̱ ña̱ Biblia náʼa̱ña, ña̱ ku̱a̱ʼání oración ña̱ kéʼé na̱ yiví va̱ása káʼa̱nnaña xíʼin Ndióxi̱ ta̱ nda̱a̱. Tá tiempo xi̱naʼá tá ni̱ka̱ʼyi̱ ña̱ Biblia, ku̱a̱ʼání na̱ yiví xi̱keʼéna oración nu̱ú ndióxi̱ vatá. Soo ku̱a̱ʼá yichi̱, Ndióxi̱ ni̱ka̱ʼa̱nra xíʼin na̱ ñuura ña̱ ná va̱ása keʼéna táʼan ña̱yóʼo. Nu̱ú Salmo 115:4-6 káʼa̱nña, ña̱ “íyo so̱ʼona, soo va̱ása kívi kuniso̱ʼona”. Káxiní káʼa̱n ña̱yóʼo, ña̱ va̱ása xíniñúʼu ka̱ʼa̱nyó xíʼin iin ndióxi̱ na̱ va̱ása xíniso̱ʼo ña̱ káʼa̱nyó.

Ña̱ va̱ʼa kunda̱a̱ka-iniyó xa̱ʼa̱ ña̱yóʼo, ná kotoyó ña̱ káʼa̱n Biblia xa̱ʼa̱ ta̱ profeta Elías tá ni̱ka̱ʼa̱nra xíʼin na̱ su̱tu̱ ña̱ Baal ña̱ ná keʼéna iin ña̱ʼa. Ta̱ Elías keʼéra oración nu̱ú Ndióxi̱ miíra ta na̱ su̱tu̱ kán keʼéna oración nu̱ú ña̱ Baal, ta na̱ ndakuiin ña̱ oración kán na̱ʼa̱na ña̱ kúúna Ndióxi̱ ta̱ nda̱a̱. Ta na̱ profeta ña̱ Baal, ka̱ndíxana keʼéna ña̱yóʼo tasaá ki̱xáʼana káʼa̱nna xíʼin ndióxi̱na. Ku̱a̱ʼání hora ndeéní ni̱ka̱ʼa̱nna xíʼin ndióxi̱na, soo ni kǒo na̱ níxiniso̱ʼo ña̱ ni̱ka̱ʼa̱nna (1 Reyes 18:29). Soo, ¿á saá ndo̱ʼo ta̱ Elías?

Va̱ása, saáchi tá sa̱kán sa̱ndíʼira ke̱ʼéra oración, Ndióxi̱ chi̱ndaʼára ñuʼu̱ chí ndiví ta xa̱ʼmiña ña̱ʼa ña̱ ni̱so̱ko̱ ta̱ profeta yóʼo nu̱úra. ¿Nda̱chun síín íyo ña̱ ndo̱ʼo ta̱ Elías? Oración ña̱ ke̱ʼé ta̱ Elías ña̱ va̱xi nu̱ú 1 Reyes 18:36, 37 chíndeétáʼanña xíʼinyó ña̱ kunda̱a̱-iniyó xa̱ʼa̱ ña̱yóʼo. Tá ke̱ʼéra oración yóʼo, va̱ása ku̱a̱ʼá tiempo níka̱ʼa̱nra ta ki̱ʼva 30 tu̱ʼun káʼyi̱ña ña̱ tu̱ʼun hebreo. Ta u̱ni̱ yichi̱ ka̱nara Ndióxi̱ra, ta xi̱niñúʼura ki̱vi̱ra, Jehová.

Soo ña̱ Baal ndióxi̱ na̱ ñuu Canaán ku̱a̱ʼáva ki̱ʼva xi̱ka̱ʼa̱nna xíʼinña, ta ki̱vi̱ña kúni̱ kachiña maestro. Soo Jehová, iinlá kuitíva kúú ki̱vi̱ra ta iinlá miíra naní saá nu̱ú iníísaá ñuyǐví. Ta miíra ni̱ka̱ʼa̱nra ña̱yóʼo: “Yi̱ʼi̱ kúú Jehová. Ña̱yóʼo kúú ki̱víi̱; kǒo taxii̱ ndasakáʼnundó inka ña̱ʼa á santo ña̱ íxava̱ʼa na̱ yiví” (Isaías 42:8).

Tá saá, ¿á kivi ndakanixi̱níyó ña̱ oración ña̱ ke̱ʼé ta̱ Elías xíʼin ña̱ ke̱ʼé na̱ profeta ña̱ Baal ni̱xa̱a̱ña nu̱ú iinlá kuití ndióxi̱? Va̱ása. Saáchi tá xi̱ndasakáʼnuna ña̱ Baal kininí xi̱keʼéna, chi xi̱xaʼnína na̱ yiví nu̱ú ña̱yóʼo ta saátu xi̱kisi̱ xíʼin táʼan na̱ yiví tá xi̱ndasakáʼnuna ña̱yóʼo. Soo ña̱ xi̱ndasakáʼnuna Jehová, viíníva ni̱xi̱yo ña̱yóʼo, saáchi va̱ása ní ixandúxana xíʼin na̱ ñuu ña̱ keʼéna ña̱ kini. Xa̱ʼa̱ ña̱kán, oración ña̱ xi̱ka̱ʼa̱nna xíʼin Jehová va̱ása kivi xa̱a̱ña nu̱ú ña̱ Baal. Saáchi ña̱yóʼo kooña nda̱a̱ táki̱ʼva íyo ña̱ chindaʼá iin na̱ yiví iin carta ndaʼa̱ iin na̱ migona na̱ íxato̱ʼónína, ta ña̱ carta yóʼo xa̱a̱ña ndaʼa̱ inka na̱ yiví na̱ kéʼé ña̱ va̱ása va̱ʼa.

Na̱ kéʼé oración nu̱ú Jehová káʼa̱nna xíʼin ta̱ i̱xava̱ʼa ndiʼi ña̱ʼa, ta̱ kúú yivá ndiʼi na̱ yiví.a Ta̱ profeta Isaías ni̱ka̱ʼa̱nra ña̱yóʼo tá ke̱ʼéra iin oración, ka̱chira: “Yóʼó Jehová kúú yivándi̱” (Isaías 63:16). Ta xíʼin ta̱kán kúú ña̱ ni̱ka̱ʼa̱n ta̱ Jesús tá ni̱ka̱ʼa̱nra ña̱yóʼo xíʼin na̱ xi̱ndiku̱n sa̱tára, ka̱chira: “Ku̱ʼi̱n nu̱ú yivái̱ ta̱ kúú yivá ndóʼó, ku̱ʼi̱n nu̱ú Ndióxi̱ miíi̱ ta̱ kúú Ndióxi̱ ndóʼó” (Juan 20:17). Ña̱kán tá Jehová kúú yivá ta̱ Jesús, ta saátu kúúra Ndióxi̱ ta̱ ni̱ka̱ʼa̱nra xíʼin tá ke̱ʼéra oración, ta̱yóʼo kúú ta̱ xi̱niñúʼu ka̱ʼa̱n na̱ discípulo ta̱ Jesús xíʼin tá ke̱ʼéna oración (Mateo 6:9).

Soo, ¿á káʼa̱n ña̱ Biblia ña̱ xíniñúʼu keʼéyó oración nu̱ú ta̱ Jesús, nu̱ú ñá María, nu̱ú na̱ santo á nu̱ú na̱ ángel? Va̱ása, iinlá Jehová xíniñúʼu ka̱ʼa̱nyó xíʼin tá kéʼéyó oración. Ná ka̱ʼa̱nyó xa̱ʼa̱ u̱vi̱ ña̱ʼa. Ña̱ nu̱ú, saáchi tá kéʼéyó oración iin ki̱ʼva ña̱ ndásakáʼnuyó Ndióxi̱ kúúña, ta nda̱a̱ táki̱ʼva káʼa̱n ña̱ Biblia, iinlá Jehová xíniñúʼu ndasakáʼnuyó (Éxodo 20:5). Ta ña̱ u̱vi̱, saáchi iinlá miíra kúú ta̱ xíniso̱ʼo ndiʼi oración ña̱ káʼa̱nyó xíʼinra (Salmo 65:2). Ni ta̱xivara ña̱ ná keʼé inkana chiñu ña̱ kivi keʼéra, soo iin ña̱ kǒo nítaxira ndaʼa̱ nda̱a̱ ni iinna kúú ña̱ kuniso̱ʼona oración ña̱ káʼa̱nyó xíʼinra.

Xa̱ʼa̱ ña̱kán, ña̱ va̱ʼa kuniso̱ʼo Jehová oración ña̱ káʼa̱nyó xíʼinra xíniñúʼu ka̱ʼa̱nyó xíʼin iinlá miíra. Ña̱ Biblia káchiña: “Ta ndiʼi na̱ xíniñúʼu ki̱vi̱ Jehová ña̱ káʼa̱nna xíʼinra ña̱ ná chindeétáʼanra xíʼinna, ka̱kuna” (Hechos 2:21). ¿Á kúni̱ kachi ña̱yóʼo ña̱ xíniso̱ʼora ndiʼi oración, ni káʼa̱nñayó xíʼin iinlá miíra? ¿Á íyo inkava ña̱ xíniñúʼu keʼéyó?

KU̱A̱ʼÁNÍ na̱ veʼe-ñu̱ʼu xa̱a̱ síín síín kéʼéna oración, soo ña̱ Biblia va̱ása káʼa̱nña á xíniñúʼu kooyó á kundichiyó tá kéʼéyó oración á ndáa tu̱ʼun ka̱ʼa̱nyó tá kéʼéyóña. Soo íyo iin ña̱ ndáyáʼvika káʼa̱nña xa̱ʼa̱.

Ña̱ Biblia káʼa̱nña xa̱ʼa̱ na̱ nda̱kúní ni̱xi̱yo ini ka̱chíñu nu̱ú Ndióxi̱, ña̱ ke̱ʼéna oración xa̱a̱ síín síín lugar ta xa̱a̱ síín ki̱ʼva ke̱ʼénaña. Sava yichi̱, xa̱ʼa̱ ña̱ ndo̱ʼona ni̱ka̱ʼa̱n ya̱ána tá ke̱ʼéna oración ta savatu yichi̱ ndeé ni̱ka̱ʼa̱nna tá ke̱ʼénaña. Savana xi̱tona chí ndiví tá ke̱ʼéna oración, ta inkana xi̱tona chí nu̱ú ñuʼú. Nda̱a̱ ni iin yichi̱ va̱ása níxiniñúʼuna iin santo, iin rosario á iin devocionario tá ke̱ʼéna oración. Saáchi ña̱ ke̱ʼéna kúú ña̱ ni̱ka̱ʼa̱nna xa̱ʼa̱ ña̱ ndóʼona. ¿Nda̱chun va̱ʼa ku̱tóo Ndióxi̱ oración ña̱ ke̱ʼéna?

Saáchi iinlá xíʼin mií Jehová ni̱ka̱ʼa̱nna, ta ña̱yóʼo kúú iin ña̱ ndáyáʼviní nda̱a̱ táki̱ʼva xa̱a̱ ku̱nda̱a̱-iniyó. Soo nu̱ú 1 Juan 5:14 káʼa̱nña xa̱ʼa̱ inka ña̱ ndáyáʼviní, káchiña: “Kándíxaníyó ña̱yóʼo: nda̱a̱ ndáaka ña̱ʼa ná ndukúyó nu̱ú Ndióxi̱, tá kítáʼanña xíʼin ña̱ kúni̱ra, xíniso̱ʼovara ña̱ káʼa̱nyó xíʼinra”. Saá íyoña, oración ña̱ kéʼéyó xíniñúʼu kitáʼanña xíʼin ña̱ kúni̱ Ndióxi̱. ¿Ndáaña kúni̱ kachi ña̱yóʼo?

Ña̱ siʼna xíniñúʼu keʼéyó kúú ña̱ kunda̱a̱-iniyó ndáaña kúú ña̱ kúni̱ Ndióxi̱ ná keʼéyó. Ña̱kán ndáyáʼviní kaʼviyó tu̱ʼunra. Soo Jehová va̱ása ndátura ña̱ ná kuxini̱yó xa̱ʼa̱ ndiʼi ña̱ káʼa̱n ña̱ Biblia ña̱ va̱ʼa ka̱ʼa̱nyó xíʼinra. Soo kúni̱vara ña̱ ná chika̱a̱yó ndee̱ ña̱ kunda̱a̱-iniyó xa̱ʼa̱ ña̱ kúni̱ra ta ná keʼéyó ña̱yóʼo (Mateo 7:21-23). Ndiʼi ña̱ sákuaʼayó nu̱ú Biblia xíniñúʼu na̱ʼa̱yóña tá kéʼéyó oración.

Tá sákuaʼayó xa̱ʼa̱ Jehová ta saátu xa̱ʼa̱ ña̱ kúni̱ra ná keʼéyó, ndúndakúka ña̱ kándíxayóra. Ña̱yóʼo kúú inka ña̱ ndáyáʼviní keʼéyó ña̱ va̱ʼa kuniso̱ʼo Ndióxi̱ ña̱ káʼa̱nyó xíʼinra, chi ta̱ Jesús ni̱ka̱ʼa̱nra ña̱yóʼo: “Ta ndiʼi ña̱ ndúkúndó nu̱ú Ndióxi̱, tá kándíxandó ña̱ taxiraña ndaʼa̱ndó ndakiʼinvandóña” (Mateo 21:22). Ña̱ kandíxayó kúni̱ kachiña ña̱ kuu iin ña̱ʼa ña̱ ta̱ʼán kuniyó, soo su̱ví ña̱yóʼo kúni̱ kachiña ña̱ xíniñúʼu kandíxayó ndiʼi ña̱ káʼa̱nna xíʼinyó, chi ña̱ ni̱ka̱ʼa̱n ta̱ Jesús xa̱ʼa̱, íyo ku̱a̱ʼá ña̱ náʼa̱ nu̱úyó ña̱ ndixa kuuña (Hebreos 11:1). Va̱ása kívi kuniyó Jehová, soo nu̱ú Biblia íyo ku̱a̱ʼání ña̱ náʼa̱ ña̱ ndixa íyora ta kivi kandíxayóra. Ta ndákuiinra ndiʼi ña̱ káʼa̱n na̱ kándíxa miíra. Ta va̱ása sáa̱ra tá káʼa̱nyó xíʼinra ña̱ ná chindeétáʼanra xíʼinyó ña̱ kandíxakayóra; chi ndiʼi tiempo kúni̱ra chindeétáʼanra xíʼinyó (Lucas 17:5; Santiago 1:17).

Yóʼo va̱xi inka ña̱ xíniñúʼu keʼéyó, ña̱ va̱ʼa kuniso̱ʼo Ndióxi̱ ña̱ káʼa̱nyó xíʼinra. Ta̱ Jesús ni̱ka̱ʼa̱nra ña̱yóʼo: “Nda̱a̱ ni iinna kǒo kivi xa̱a̱ nu̱ú yivái̱ tá su̱ví xa̱ʼa̱ yi̱ʼi̱ kúúña”. Ta iinlá xa̱ʼa̱ ki̱vi̱ ta̱ Jesús kúú ña̱ kivi kuyatinyó nu̱ú yiváyó Jehová. Xa̱ʼa̱ ña̱kán kúú ña̱ sa̱náʼa̱ ta̱ Jesús na̱ discípulora ña̱ ná kuniñúʼuna ki̱vi̱ra tá kéʼéna oración (Juan 14:13; 15:16). Xa̱ʼa̱ ña̱kán, tá xíniñúʼuyó ki̱vi̱ ta̱ Jesús tá kéʼéyó oración, va̱ása kúni̱ kachiña ña̱ káʼa̱nyó xíʼin miíra. Chi tíxa̱ʼvi ta̱yóʼo kúú ña̱ kivi ka̱ʼa̱nyó xíʼin yiváyó ta̱ íyo chí ndiví, iin Ndióxi̱ ta̱ yi̱i̱.

Iin yichi̱, iin ta̱ discípulo ta̱ Jesús ni̱ka̱ʼa̱nra ña̱yóʼo xíʼinra: “Táta, sanáʼa̱ ndi̱ʼi̱ ña̱ ka̱ʼa̱nndi̱ xíʼin Ndióxi̱” (Lucas 11:1). ¿Ndáaña xi̱kuni̱ kachira? Ña̱ nda̱a̱ kúúña, na̱yóʼo xa̱a̱ xi̱kunda̱a̱va-inina ndáa ki̱ʼva keʼéna oración, soo xi̱kuni̱na kunda̱a̱-inina ndáa ña̱ʼa kúú ña̱ kivi ndukúna tá kéʼéna oración.

NU̱Ú ndiʼika oración ña̱ kéʼé na̱ yiví, iin ña̱ ku̱a̱ʼáníka yichi̱ káʼa̱nna kúú oración ña̱ sa̱náʼa̱ ta̱ Jesús: ña̱ padrenuestro. Ta saátu loʼovana kúnda̱a̱-ini ndáaña kúni̱ kachi ña̱yóʼo. Ku̱a̱ʼání na̱ yiví káʼa̱nna ña̱yóʼo ki̱vi̱ tá ki̱vi̱, ta savana ku̱a̱ʼání yichi̱ káʼa̱nnaña iin ki̱vi̱ ta ni kǒo ndákanixi̱nína ndáaña kúni̱ kachiña, soo ta̱ Jesús va̱ása níkuni̱ra ña̱ ná keʼéna saá. ¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo?

Saáchi tá kúma̱níka sanáʼa̱ra ña̱ oración yóʼo, ni̱ka̱ʼa̱nra ña̱yóʼo: “Tá ná ka̱ʼún xíʼin Ndióxi̱, kǒo ndikóún ka̱ʼún tu̱ʼun ña̱ xa̱a̱ ni̱ka̱ʼún” (Mateo 6:7). Ña̱kán, ta̱ Jesús va̱ása nísanáʼa̱ra iin oración ña̱ xíniñúʼu sakuaʼa xíʼin xi̱nína, ta tá ndiʼi tuku ta tuku ka̱ʼa̱nnaña. Saáchi ña̱ xi̱kuni̱ ta̱ Jesús sanáʼa̱ra kúú ndáaña kúú mií ña̱ ndáyáʼvivaka xíniñúʼu ka̱ʼa̱nna xa̱ʼa̱ tá kéʼéna oración. Xa̱ʼa̱ ña̱kán, ná ka̱ʼa̱nyó xa̱ʼa̱ oración ña̱ va̱xi nu̱ú Mateo 6:9-13.

“Yivándi̱ ta̱ íyo chí ndiví, ná nduyi̱i̱ ki̱vi̱ún”.

Ta̱ Jesús sa̱ndákaʼánra na̱ discípulora, ña̱ iinlá xíʼin yivára Jehová xíniñúʼu ka̱ʼa̱nna tá kéʼéna oración. Soo, ¿nda̱chun ni̱ka̱ʼa̱nra tándi̱ʼi ña̱ xíniñúʼu nduyi̱i̱ ki̱vi̱ yivára?

Saáchi nda̱a̱ tá ki̱xáʼa íyo na̱ yiví nu̱ú ñuʼú yóʼo, saáví ki̱xáʼana káʼa̱nna ña̱ vatá xa̱ʼa̱ ki̱vi̱ Ndióxi̱. Soo ta̱ Ndi̱va̱ʼa káʼa̱nra ña̱ iin ta̱ vatá kúú Jehová, ta iinlá xa̱ʼa̱ miíra ndíʼi̱-inira, ta ni kǒo derecho kúúmiíra ña̱ kaʼndachíñura nu̱ú na̱ i̱xava̱ʼara (Génesis 3:1-6). Ta na̱ kítáʼan xíʼin ta̱ Ndi̱va̱ʼa sánáʼa̱na ña̱ kǒo kúndáʼvi-ini Ndióxi̱ xínira na̱ yiví, ña̱ ndi̱va̱ʼaní-inira ta nda̱a̱ táxira tu̱ndóʼo ndaʼa̱na, ta saátu káʼa̱nna ña̱ su̱ví miíra kúú ta̱ ní ixava̱ʼa ndiʼi ña̱ʼa. Ta savana nda̱a̱ sa̱kútaʼana ki̱vi̱ Ndióxi̱ nu̱ú Biblia ta saátu káʼa̱nna ña̱ va̱ása va̱ʼa kuniñúʼuyó ki̱vi̱ra.

Soo ña̱ Biblia káʼa̱nña, ña̱ sandiʼi-xa̱ʼa̱ Ndióxi̱ ndiʼi ña̱yóʼo (Ezequiel 39:7). Tá ná keʼéra ña̱yóʼo ndasaviíra tu̱ndóʼo ña̱ kúúmií na̱ yiví. ¿Ndáa ki̱ʼva keʼéra ña̱yóʼo? Ña̱yóʼo kúú ña̱ ni̱ka̱ʼa̱nka ta̱ Jesús.

“Ná kixaa̱ ki̱vi̱ ña̱ kaʼndachíñún”.

Tiempo vitin, na̱ sánáʼa̱ ti̱xin veʼe-ñuʼú va̱ása kúnda̱a̱ káxi-inina ndáaña kúú Reino Ndióxi̱. Kǒo táʼan ña̱yóʼo níkuu tá tiempo ña̱ ni̱xi̱yo ta̱ Jesús. Na̱ Judío na̱ ni̱xi̱yo tá tiempo xi̱naʼá xi̱kunda̱a̱va-inina xa̱ʼa̱ profecía ña̱ xi̱ka̱ʼa̱n xa̱ʼa̱ ta̱ Mesías ta̱ nda̱kaxin Ndióxi̱ ña̱ saka̱kura na̱ yiví, ta kaʼndachíñura nu̱ú na̱ yiví ta nasamara ña̱ íyo nu̱ú ñuʼú yóʼo (Isaías 9:6, 7; Daniel 2:44). Tá ná kaʼndachíñu ta̱ Jesús saá kúú ña̱ nduyi̱i̱ ki̱vi̱ Jehová, tasaá na̱ʼa̱ra ña̱ iin ta̱ vatá kúú ta̱ Ndi̱va̱ʼa ta sandíʼi-xa̱ʼa̱ra ña̱ va̱ása va̱ʼa kéʼéra. Ta saátu sandíʼi-xa̱ʼa̱ra guerra, kue̱ʼe̱, so̱kó, xíʼin ña̱ xíʼi̱yó (Salmo 46:9; 72:12-16; Isaías 25:8; 33:24). Ña̱kán, tá káʼa̱nyó xíʼin Ndióxi̱ ña̱ ná kixaa̱ Reinora, káʼa̱nyó xíʼinra ña̱ ná saxínura ndiʼi ña̱ ni̱ka̱ʼa̱nra keʼéra.

“Ná koo ña̱ kúni̱ miíún, táki̱ʼva íyo chí ndiví, saá ná koo nu̱ú ñuʼú yóʼo”.

Ña̱ tu̱ʼun yóʼo náʼa̱ña nu̱úyó ña̱ xi̱nu ña̱ kúni̱ Ndióxi̱ koo nu̱ú ñuʼú yóʼo, nda̱a̱ táki̱ʼva xa̱a̱ ni̱xi̱nuña chí ndiví nu̱ú íyo Ndióxi̱, tá ka̱nitáʼan se̱ʼera xíʼin ta̱ Ndi̱va̱ʼa ta saátu xíʼin na̱ kítáʼan xíʼinra, ta chi̱ndaʼárana va̱xina nu̱ú ñuʼú yóʼo (Revelación [Apocalipsis] 12:9-12). Ña̱ ni̱ka̱ʼa̱nra yóʼo xíʼin u̱vi̱ ña̱ xa̱a̱ ni̱ka̱ʼa̱nyó xa̱ʼa̱, sándakaʼánña miíyó ña̱ ndáyáʼviní ña̱ ka̱ʼa̱nyó xa̱ʼa̱ ña̱ ná xi̱nu ña̱ kúni̱ Ndióxi̱ ta su̱ví ña̱ kúni̱ miíyó. Saáchi iin ña̱ ndáyáʼviníka kúú ña̱ ná xi̱nu ña̱ kúni̱ Ndióxi̱, chi ña̱yóʼo kúú ña̱ chindeétáʼan xíʼin ndiʼi na̱ i̱xava̱ʼara. Nda̱a̱ mií ta̱ Jesús ni̱ka̱ʼa̱n ña̱yóʼo ni kǒo ku̱a̱chi níxikuumiíra, ka̱chira: “Soo ná kǒo koo ña̱ kúni̱ yi̱ʼi̱ va̱ʼaka ná koo ña̱ kúni̱ miíún” (Lucas 22:42).

“Taxi ña̱ kuxundi̱ ki̱vi̱ vitin”.

Saátu ni̱ka̱ʼa̱n ta̱ Jesús ña̱ kivi ka̱ʼa̱nyó xíʼin Ndióxi̱ xa̱ʼa̱ sava ña̱ xíniñúʼu miíyó. Nda̱a̱ táki̱ʼva ku̱nda̱a̱-iniyó, iin ña̱ va̱ʼava kúú ña̱ ná ka̱ʼa̱nyó xíʼin Ndióxi̱ ña̱ ná chindeétáʼanra xíʼinyó xa̱ʼa̱ ña̱ xíniñúʼuyó ki̱vi̱ tá ki̱vi̱. Saáchi tá kéʼéyó ña̱yóʼo ndákuniyó ña̱ mií Jehová “kúú ta̱ táxi ña̱ táku na̱ yiví, táxira ta̱chí ndákiʼinna xíʼin ndiʼika ña̱ʼa” (Hechos 17:25). Ña̱ Biblia chítáʼanña Ndióxi̱ xíʼin iin ta̱a ta̱ íyo se̱ʼe ta̱ va̱ʼaní-ini, saáchi táxira ndiʼi ña̱ xíniñúʼu se̱ʼera. Ni ku̱a̱ʼání yichi̱ ndúkúyó iin ña̱ʼa nu̱úra, va̱ása taxira ña̱yóʼo ndaʼa̱yó tá kivi saxóʼvi̱ña miíyó.

“Koo káʼnu-iniún xa̱ʼa̱ ku̱a̱chindi̱”.

¿Ndáa ku̱a̱chi kúú ña̱ kúúmiíyó nu̱ú Jehová? Ta, ¿nda̱chun xíniñúʼuyó ña̱ ná ixakáʼnu-inira xa̱ʼa̱yó? Tiempo vitin, ku̱a̱ʼání na̱ yiví va̱ása kíʼinkana kuenta ña̱ kíʼvina ku̱a̱chi ndeé nu̱ú Ndióxi̱, soo nda̱a̱ táki̱ʼva káʼa̱n ña̱ Biblia, xa̱ʼa̱ ña̱ kúúyó na̱ yiví ku̱a̱chi kúú ña̱ íyoní tu̱ndóʼo nu̱úyó ta saátu ña̱ xíʼi̱yó. Soo nda̱a̱ tá kákuvíyó kúúyó na̱ yiví ku̱a̱chi, ña̱kán kéʼéyó ña̱ va̱ása va̱ʼa ta sáxo̱ʼvi̱yó Ndióxi̱. Xa̱ʼa̱ ña̱kán, tá kúni̱yó kooyó ndiʼi tiempo ndáyáʼviní ña̱ ná ixakáʼnu-ini Ndióxi̱ xa̱ʼa̱ ku̱a̱chiyó (Romanos 3:23; 5:12; 6:23). Ta saátu sándakaʼán ña̱ Biblia miíyó ña̱ va̱ʼaní-ini Jehová ta íyo tu̱ʼvara ña̱ ixakáʼnu-inira xa̱ʼa̱yó (Salmo 86:5).

“Sakǎku ndi̱ʼi̱ ndaʼa̱ ta̱ Ndi̱va̱ʼa”.

Miíyó na̱ yiví xíniñúʼuníyó ña̱ ná kundaa Ndióxi̱ miíyó. Sana ku̱a̱ʼání na̱ yiví va̱ása kándíxana ña̱ íyo ta̱ “Ndi̱va̱ʼa”, soo ta̱ Jesús ni̱ka̱ʼa̱nra ña̱ ndixava íyo ta̱yóʼo, ta saátu ni̱ka̱ʼa̱nra ña̱ kúúra “ta̱ xáʼndachíñu ñuyǐví yóʼo” (Juan 12:31; 16:11). Ta̱ Ndi̱va̱ʼa su̱ví kuití kúni̱ra kaʼndachíñura nu̱ú ñuyǐví yóʼo saátu kúni̱ra ña̱ ná kǒo kutáʼan viíyó xíʼin yiváyó Jehová (1 Pedro 5: 8). Ta va̱ása xíniñúʼu yi̱ʼvíyó kuniyó ta̱ Ndi̱va̱ʼa, saáchi Ndióxi̱ íyoníka ndee̱ra ta kúni̱ra kundaara na̱ kúʼvi̱-ini xíni miíra.

Ta saátu kivi ka̱ʼa̱nyó xíʼin Ndióxi̱ xa̱ʼa̱ inkaka ña̱ʼa, ta 1 Juan 5:14 káʼa̱nkaña xa̱ʼa̱ ña̱yóʼo, káchiña: “Nda̱a̱ ndáaka ña̱ʼa ná ndukúyó nu̱ú Ndióxi̱, tá kítáʼanña xíʼin ña̱ kúni̱ra, xíniso̱ʼovara ña̱ káʼa̱nyó xíʼinra”. Ta saátu kivi natúʼunyó xíʼin Ndióxi̱ xa̱ʼa̱ ndiʼi ña̱ sándi̱ʼi̱-iniyó saáchi kúnda̱a̱va-inira xíʼin ña̱ ndóʼoyó (1 Pedro 5:7).

Ta, ¿ndáaña kivi ka̱ʼa̱nyó xa̱ʼa̱, ama xíniñúʼu ka̱ʼa̱nyó xíʼinra ta ndáa míí ka̱ʼa̱nyó xíʼinra? ¿Á íyo ña̱ káʼa̱n tu̱ʼun Ndióxi̱ xa̱ʼa̱ ña̱yóʼo? Nu̱ú inka artículo kunda̱a̱-iniyó xa̱ʼa̱ ña̱yóʼo.

KU̱A̱ʼÁNÍ religión ña̱ íyo iníísaá ñuyǐví, íyo iin lugar xíʼin iin hora ña̱ kéʼéna oración. Soo, ¿á káʼa̱n ña̱ Biblia ña̱ keʼéyó ña̱yóʼo?

Ña̱ Biblia káʼa̱nña ama kúú ña̱ va̱ʼa keʼéyó oración. Saá ke̱ʼé ta̱ Jesús, ta̱xira tíxa̱ʼvi ndaʼa̱ Ndióxi̱ tá kúma̱níka ki̱xáʼara kuxura (Lucas 22:17). Saátu na̱ discípulora xi̱keʼéna oración tá xi̱ndakutáʼanna ña̱ ndasakáʼnuna Ndióxi̱. Soo su̱ví iin costumbre ña̱ xa̱á kúú ña̱yóʼo, saáchi ña̱yóʼo xi̱keʼénaña ti̱xin sinagoga na̱ judío xíʼin ti̱xin templo ña̱ ni̱xi̱yo ñuu Jerusalén, ta Ndióxi̱ ni̱ka̱ʼa̱nra ña̱yóʼo: “Veʼi̱, veʼe nu̱ú ka̱ʼa̱n ndiʼi na̱ ñuu xíʼin Ndióxi̱ kunaníña” (Marcos 11:17).

Saáchi Ndióxi̱ kúni̱ra ña̱ ndiʼi na̱ ndásakáʼnu miíra ná ndakutáʼanna ta keʼéna oración nu̱úra, ta ná kitáʼanña xíʼin ña̱ káʼa̱n ña̱ Biblia. Ta iinlá ña̱ oración yóʼo kúú ña̱ kivi chindeétáʼan xíʼinyó ña̱ kuyatinyó nu̱úra (Hebreos 13:18, 19). Xa̱ʼa̱ ña̱kán, na̱ testigo Jehová kéʼéna oración tá xíyo reuniónna. Tá kúni̱ún kuniso̱ʼún oración ña̱ kéʼéna, kivi ku̱ʼún iin salón ña̱ íyo yatin nu̱ú íyoún nu̱ú ndákutáʼan na̱ testigo Jehová.

Soo ña̱ Biblia kǒo káʼa̱nña ndáa hora kúú ña̱ xíniñúʼu keʼéyó oración á ndáa lugar keʼéyóña. Saáchi káʼa̱nña, ña̱ ku̱a̱ʼání na̱ xi̱ndasakáʼnu Ndióxi̱ tá ya̱chi̱ xi̱keʼéna oración nda̱a̱ ndáaka hora á nda̱a̱ ndáaka lugar. Ta̱ Jesús ni̱ka̱ʼa̱nra ña̱yóʼo: “Tá ná ka̱ʼún xíʼin Ndióxi̱, ki̱ʼvi cuartoún, tándi̱ʼi nda̱siún yéʼún, ka̱ʼa̱n xíʼin yiváún ta̱ xíto ña̱ʼa ña̱ íyo se̱ʼé. Tasaá yiváún ta̱ xíto ña̱ʼa ña̱ íyo se̱ʼé chaʼviraña ndaʼún” (Mateo 6:6).

¿Á su̱ví iin ña̱ va̱ʼaní kúúña, ña̱ kivi ka̱ʼa̱nyó xíʼin ta̱ i̱xava̱ʼa ndiʼi ña̱ʼa ta saátu ña̱ kuniso̱ʼora ña̱ káʼa̱nyó, ama kúni̱ miíyó á nda̱a̱ ndáaka nu̱ú ndóoyó? Ña̱yóʼo náʼa̱ña nu̱úyó nda̱chun kúú ña̱ xi̱tavá ta̱ Jesús tiempo ña̱ va̱ʼa koo mitúʼunra ña̱ ka̱ʼa̱nra xíʼin Ndióxi̱. Iin yichi̱, tá kúma̱níka ña̱ ndakaxinra keʼéra iin ña̱ ndáyáʼviní, iníí ñuú ke̱ʼéra oración (Lucas 6:12, 13).

Saátu ni̱xi̱yo inka na̱ ta̱a xíʼin ná ñaʼá na̱ ni̱ka̱ʼa̱n xíʼin Ndióxi̱ tá kúma̱níka ndaka̱xinna ña̱ keʼéna iin ña̱ ndáyáʼviní á tá ni̱ya̱ʼana nu̱ú tu̱ndóʼo. Savana ni̱ka̱ʼa̱n ya̱ána xíʼin Ndióxi̱, inkana ndeé ni̱ka̱ʼa̱nna, inkatuna iin tiʼvi loʼo nda̱kutáʼanna ta inkana ni̱xi̱yo mitúʼunna. Soo ña̱ ndáyáʼvika kúú ña̱ ni̱ka̱ʼa̱nna xíʼinra, mií Jehová káʼa̱n ña̱ ná ka̱ʼa̱n ni̱ʼiyó xíʼinra (1 Tesalonicenses 5:17). ¿Á su̱ví iin ña̱ va̱ʼaní kúú ña̱yóʼo? Ndióxi̱ íyo tu̱ʼvara ña̱ kuniso̱ʼora ña̱ káʼa̱n na̱ ndásakáʼnu miíra.

Ku̱a̱ʼání na̱ yiví káʼa̱nna, á ndixa chíndeétáʼan ña̱ oración xíʼinyó. Sana saátu ndákanixi̱ní miívaún.

KU̱A̱ʼÁNÍ na̱ yiví xíka-inina á chíndeétáʼan ña̱ oración xíʼinyó. Soo síínva íyo ña̱ káʼa̱n ña̱ Biblia xa̱ʼa̱ ña̱yóʼo (Lucas 22:40; Santiago 5:13). Ña̱ oración va̱ása chíndeétáʼan kuitíña xíʼinyó ña̱ vií kutáʼanyó xíʼin Ndióxi̱, chi saátu chíndeétáʼanña xíʼinyó ña̱ si̱í kooyó ta vií kooyó. ¿Nda̱chun va̱ʼa íyoña saá?

Ná ka̱ʼa̱nyó xa̱ʼa̱ iin ejemplo: tá táxina iin regalo ndaʼa̱ iin na̱ va̱lí, ¿ndáaña kúú ña̱ káʼa̱n na̱ yivána xíʼinna ña̱ ná keʼéna? Sánáʼa̱nana ña̱ ná taxina tíxa̱ʼvi ndaʼa̱ na̱ ta̱xi regalo ndaʼa̱na. Saáchi tá táxiyó tíxa̱ʼvi, va̱ʼaníka kúniyó saá, ta saátu xíniñúʼu keʼéyó tá káʼa̱nyó xíʼin Ndióxi̱. Ta vitin ná kotoyó sava ejemplo ña̱ oración.

Oración ña̱ kéʼéyó tá táxiyó tíxa̱ʼvi. Tá táxiyó tíxa̱ʼvi ndaʼa̱ Ndióxi̱ xa̱ʼa̱ ndiʼi ña̱ va̱ʼa ña̱ ndóʼoyó, kíʼinyó kuenta xa̱ʼa̱ ndiʼi bendición ña̱ táxira ndaʼa̱yó. Ta xíʼin ña̱yóʼo sákuaʼayó ña̱ taxiyó tíxa̱ʼvi, si̱íka kooyó ta vií ndakanixi̱níyó (Filipenses 4:6).

Ejemplo: Ta̱ Jesús ke̱ʼéra iin oración ña̱ ta̱xira tíxa̱ʼvi ndaʼa̱ yivára xa̱ʼa̱ ña̱ xi̱niso̱ʼora ña̱ ni̱ka̱ʼa̱nra xíʼinra (Juan 11:41).

Oración ña̱ kéʼéyó tá ndúkúyó ña̱ káʼnu-ini. Tá káʼa̱nyó xíʼin Ndióxi̱ ña̱ ná ixakáʼnu-inira xa̱ʼa̱yó, chíndeétáʼanña xíʼinyó ña̱ va̱ʼaka kuniyó. Ta saátu chíndeétáʼanña xíʼin ña̱ xínitúni̱yó ña̱ va̱ʼa kunda̱a̱-iniyó á ndee̱ ku̱a̱chi ni̱ki̱ʼviyó ta saátu chíndeéña miíyó ña̱ ndikó-iniyó xa̱ʼa̱ ña̱ ke̱ʼéyó.

Ejemplo: Oración ña̱ ke̱ʼé ta̱ David tá nda̱ndikó-inira (Salmo 51).

Oración ña̱ kéʼéyó tá ndúkúyó ña̱ ná chindeétáʼan Ndióxi̱ xíʼinyó ta saátu ña̱ taxira ña̱ ndíchi ndaʼa̱yó. Ña̱yóʼo chíndeétáʼanña xíʼinyó ña̱ vitá koo iniyó ta saátu sándakaʼánña miíyó ña̱ va̱ása kúchiñuyó keʼéyó ndiʼi ña̱ʼa, ta chíndeétáʼanña xíʼinyó ña̱ kandíxakayó yiváyó ta̱ íyo chí ndiví, ta va̱ása kundaa-iniyó miíyó (Proverbios 3:5, 6).

Ejemplo: Oración ña̱ ke̱ʼé ta̱ Salomón tá ni̱ka̱ʼa̱nra xíʼin Ndióxi̱ ña̱ ná chindeétáʼanra xíʼinra, ta taxira ña̱ ndíchi ndaʼa̱ra ña̱ va̱ʼa kaʼndachíñura nu̱ú na̱ ñuu Israel (1 Reyes 3:5-12).

Oración ña̱ kéʼéyó tá ndíʼi̱-iniyó. Tá íyo iin ña̱ sándi̱ʼi̱-iniyó va̱ʼaníka kúniyó tá káʼa̱nyó xíʼin Ndióxi̱ xa̱ʼa̱ ndiʼi ña̱ ndóʼoyó, ta saátu sákuaʼayó ña̱ kundaa-iniyó Jehová (Salmo 62:8).

Ejemplo: Oración ña̱ ke̱ʼé ta̱ Rey Asá tá xi̱kuni̱na kanitáʼanna xíʼinra (2 Crónicas 14:11).

Oración ña̱ kéʼéyó ña̱ ná chindeétáʼan Ndióxi̱ xíʼin inkana. Saá náʼa̱yó ña̱ kǒo ndíʼi̱-iniyó xa̱ʼa̱ iinlá miíyó, ta saátu sákuaʼayó ña̱ kundáʼvi-iniyó kuniyó inkana ta kunda̱a̱-iniyó xíʼin ña̱ ndóʼona.

Ejemplo: Oración ña̱ ke̱ʼé ta̱ Jesús xa̱ʼa̱ na̱ discípulora (Juan 17:9-17).

Oración ña̱ kéʼéyó tá ndásakáʼnuyó Ndióxi̱. Tá ndásakáʼnuyó Ndióxi̱ xa̱ʼa̱ ña̱ va̱ʼa ña̱ kúúmiíra xíʼin xa̱ʼa̱ ndiʼi ña̱ʼa ña̱ i̱xava̱ʼara, ndúndakúka ña̱ kúʼvi̱-iniyó xíniyóra xíʼin ña̱ íxato̱ʼóyóra. Ña̱ oración yóʼo sakúyatinkaña miíyó nu̱ú yiváyó ta̱ íyo chí ndiví.

Ejemplo: Ta̱ David ke̱ʼéra iin oración ña̱ nda̱sakáʼnura Ndióxi̱ xa̱ʼa̱ ndiʼi ña̱ i̱xava̱ʼara (Salmo 8).

Soo su̱ví ña̱yóʼo kúú ndiʼi ña̱ oración, chi tíxa̱ʼvi ña̱ oración yóʼo Ndióxi̱ sándi̱kora-iniyó, ta nda̱a̱ ni iin na̱ yiví va̱ása kúnda̱a̱-ini ndáa ki̱ʼva íyo ña̱yóʼo (Filipenses 4:7). Ta va̱ʼaní chíndeétáʼanña xíʼinyó ña̱ vií ndóoyó nu̱ú ñuyǐví yóʼo tiempo vitin (Proverbios 14:30). Soo, ¿ndáa ki̱ʼva sándi̱kora-iniyó? ¿Á tíxa̱ʼvi ña̱ chíka̱a̱níyó ndee̱ kúúña á xíniñúʼu keʼéyó inka ña̱ʼa ña̱ ndáyáʼvika?

ÑA̱ PREGUNTA yóʼo kúú ña̱ kúni̱ ku̱a̱ʼáníka na̱ yiví kunda̱a̱-inina xa̱ʼa̱. Xa̱a̱ na̱kunda̱a̱va-iniyó ña̱ xíniso̱ʼo Ndióxi̱ sava oración, soo su̱ví ndiʼiña xíniso̱ʼora. Tá saá, ¿á kuniso̱ʼora oración ña̱ kéʼé miíyó? Ña̱ kéʼéyó kúú ña̱ chindeétáʼan xíʼinyó ña̱ kunda̱a̱-iniyó xa̱ʼa̱ ña̱yóʼo.

Ta̱ Jesús ni̱ka̱ʼa̱nra ña̱ va̱ása va̱ʼa íyo ña̱ xi̱keʼé na̱ su̱tu̱ na̱ xi̱niʼi yichi̱ nu̱ú na̱ veʼe-ñu̱ʼu tá xi̱keʼéna oración, saáchi ña̱ xi̱ndi̱ʼi̱ka-inina xa̱ʼa̱ kúú ña̱ ná kiʼin na̱ yiví kuenta ña̱ va̱ʼaní ndásakáʼnuna Ndióxi̱. Ta ni̱ka̱ʼa̱nra ña̱ xa̱a̱ nda̱kiʼinvana ña̱ kúni̱na. Su̱ví ña̱ níxikuni̱ na̱ su̱tu̱ yóʼo kúú ña̱ ná kuniso̱ʼo Ndióxi̱ ña̱ xi̱ka̱ʼa̱nna, saáchi ña̱ xi̱kuni̱na kúú ña̱ ná kuni na̱ yiví ña̱ kéʼéna, ta iinlá ña̱yóʼo kúú ña̱ nda̱kiʼinvana (Mateo 6:5). Ta saátu íyo ña̱ kéʼé na̱ yiví tiempo vitin, saáchi va̱ása kéʼéna oración ña̱ va̱ʼa ná kuniso̱ʼo Ndióxi̱ ña̱ káʼa̱nna. Ta xa̱ʼa̱ ña̱ kǒo ndíku̱nna ña̱ káʼa̱n ña̱ Biblia, nda̱a̱ táki̱ʼva xa̱a̱ na̱kunda̱a̱-iniyó nu̱ú artículo ña̱ ni̱ya̱ʼa, va̱ása ndákuiinra ña̱ káʼa̱nna xíʼinra.

Ta, ¿ndáa ki̱ʼva íyo ña̱ kéʼé iin tá iin miíyó? Ña̱ va̱ʼa ná ndakuiin Jehová ña̱ káʼa̱nyó xíʼinra, va̱ása xíniñúʼuví kitáʼanyó xíʼin iin ñuu, á kooyó na̱ nda̱ʼví á na̱ ku̱i̱ká ña̱ va̱ʼa ka̱ʼa̱nyó xíʼinra. Ña̱ Biblia káchiña: “Va̱ása ndáka̱xin Ndióxi̱ na̱ yiví”. Chi “nda̱a̱ ndáaka ñuuna ndákiʼinvarana tá ndixa íxato̱ʼónara ta kéʼéna ña̱ va̱ʼa nu̱úra” (Hechos 10:34, 35). Na̱ yiví na̱ íxato̱ʼó Ndióxi̱, va̱ása kúni̱na keʼéna iin ña̱ʼa ña̱ kivi sakúsuchí-inira. Ta na̱ kéʼé ña̱ nda̱kú chíka̱a̱na ndee̱ ña̱ keʼéna ña̱ kúni̱ Ndióxi̱ ta su̱ví ña̱ kúni̱ miína á ña̱ kúni̱ inka na̱ yiví. Xa̱ʼa̱ ña̱kán, tá kúni̱yó ña̱ ná kuniso̱ʼo Jehová ña̱ káʼa̱nyó xíʼinra xíniñúʼu keʼéyó ña̱ káʼa̱n tu̱ʼunra.a

Ku̱a̱ʼání na̱ yiví ndátuná ña̱ ná keʼé Ndióxi̱ iin milagro ña̱ va̱ʼa ndakuiinra oración ña̱ kéʼéna. Tá tiempo xi̱naʼá, loʼova yichi̱ xi̱keʼéra milagro tá xi̱ndakuiinra ña̱ xi̱ka̱ʼa̱nna xíʼinra. Ña̱ Biblia káʼa̱nña, ña̱ ku̱a̱ʼání tiempo xi̱yaʼa tá xi̱keʼéra iin milagro ta saáví xi̱keʼéra inkaña. Ta saátu káʼa̱n ña̱ Biblia ña̱ tándi̱ʼi ni̱xi̱ʼi̱ na̱ apóstol va̱ása níkeʼékara milagro (1 Corintios 13:8-10). Soo ña̱yóʼo kǒo kúni̱ kachiña, ña̱ va̱ása ndákuiin Ndióxi̱ oración ña̱ kéʼéyó. Ná kotoyó sava ejemplo ña̱ náʼa̱ ndáa ki̱ʼva ndákuiin Jehová oración ña̱ kéʼéyó tiempo vitin.

Táxira ña̱ ndíchi ndaʼa̱yó. Ndióxi̱ kúú ta̱ kúúmií ndiʼi ña̱ ndíchi, ta táxira ña̱yóʼo ndaʼa̱ na̱ káʼa̱n xíʼinra ña̱ ná chindeétáʼanra xíʼinna, tá chíka̱a̱na ndee̱ ña̱ kuniso̱ʼona ña̱ káʼa̱nra (Santiago 1:5).

Táxira espíritu santo ndaʼa̱yó. Kǒo nda̱a̱ ni iin ña̱ʼa kítáʼan xíʼin espíritu santo, saáchi ña̱yóʼo kúú ndee̱ Ndióxi̱ ña̱ xíniñúʼura ña̱ keʼéra nda̱a̱ ndáaka ña̱ʼa. Ta ña̱yóʼo chíndeétáʼanña xíʼinyó ña̱ ya̱ʼayó nu̱ú tu̱ndóʼo, ña̱ va̱ása kundi̱ʼi̱ní-iniyó ta vií kooyó, ta saátu ña̱ va̱ʼa koo iniyó (Gálatas 5:22, 23). Ta saátu ni̱ka̱ʼa̱n ta̱ Jesús, ña̱ taxi Ndióxi̱ espíritu santo ndaʼa̱yó tá xíniñúʼuyóña (Lucas 11:13).

Táxira ña̱ kunda̱a̱-ini na̱ yiví xa̱ʼa̱ ña̱ nda̱a̱. Nda̱a̱ táki̱ʼva káʼa̱n Hechos 17:26, 27, ku̱a̱ʼání na̱ yiví na̱ íyo iníísaá ñuyǐví kúni̱na kunda̱a̱-inina xa̱ʼa̱ Ndióxi̱, kúni̱na kunda̱a̱-inina xa̱ʼa̱ ki̱vi̱ra, xíʼin xa̱ʼa̱ ña̱ kúni̱ra keʼéra nu̱ú ñuʼú yóʼo, ta saátu xa̱ʼa̱ ña̱ kúni̱ra taxira ndaʼa̱ na̱ yiví, ta kúni̱tuna kunda̱a̱-inina ndáa ki̱ʼva kuyatinna nu̱úra (Santiago 4:8). Na̱ testigo Jehová ndáni̱ʼína ku̱a̱ʼání na̱ yiví na̱ kúni̱ kunda̱a̱-ini xa̱ʼa̱ ña̱yóʼo, ta xíniñúʼuna ña̱ Biblia ña̱ va̱ʼa ndakuiinna pregunta ña̱ kúúmiína.

¿Á xa̱ʼa̱ ña̱kán kúú ña̱ ki̱ʼin miíún ña̱ revista yóʼo? ¿Á kúni̱ún kunda̱a̱-iniún xa̱ʼa̱ Ndióxi̱? Tá saá íyoña, sana ña̱yóʼo kúú iin ki̱ʼva ña̱ nda̱kuiin Ndióxi̱ oración ña̱ ni̱ka̱ʼún xíʼinra.