TA̱ Moisés nda̱a̱ yuku̱ ña̱ naní Horeb ni̱xa̱a̱ra nándukúra ku̱ʼu̱ kaxáʼan ndikachi sa̱na̱ra. Ta yóʼo xi̱nira iin yitu̱n xíxi̱, soo su̱ví tú ndixa xíxi̱ kúúnú.

ʼNdachun káa yitu̱n yóʼo saá, va̱ʼaka ná ku̱ʼi̱n kuninúʼ, nda̱kanixi̱ní ta̱ Moisés. Tá na̱kuyatinra, ta míí nu̱ú níndichi yitu̱n loʼo yóʼo xi̱niso̱ʼora ni̱ka̱ʼa̱nna xíʼinra: ʼKǒo kívi kuyatiún. Tavá ndu̱xa̱ún, chi nu̱ú ñuʼú yi̱i̱ kúú nu̱ú níndichiúnʼ, káchina xíʼinra. Ndióxi̱ xi̱niñúʼura iin ángel ña̱ ni̱ka̱ʼa̱nra xíʼin ta̱ Moisés, ña̱kán sási ndaʼa̱ ta̱ Moisés nu̱úra.

Tasaá ki̱xaʼá Ndióxi̱ káʼa̱nra xíʼinra: ʼXínii̱ na̱ ñui̱ ndóʼonína íxaa na̱ ñuu Egipto. Kúni̱i̱ tavái̱na ña̱kán chíndaʼíi̱ yóʼó ña̱ ku̱ʼu̱n taváúnnaʼ. Chi Ndióxi̱ kúni̱ra ku̱ʼu̱n na̱ ñuura kundoona nu̱ú ñuʼú livi ña̱ naní Canaán.

Soo ta̱ Moisés káchira: ʼ¿Ndáa ta̱a kúi̱, ta kúni̱ún ku̱ʼi̱n ñuu kán? Kǒo kuchiñui̱ ku̱ʼi̱n. Soo tá ná nda̱ka̱tu̱ʼunna yi̱ʼi̱. “¿Ndáana chi̱ndaʼá yóʼó va̱xiún nu̱úndi̱?”, kachina. ¿Ndáaña kachii̱ xíʼinna?ʼ

ʼÑa̱yóʼo ka̱ʼún xíʼinna: “JEHOVÁ, Ndióxi̱ ta̱ Abrahán, Ndióxi̱ ta̱ Isaac, Ndióxi̱ ta̱ Jacob chi̱ndaʼá yi̱ʼi̱ va̱xi nu̱úndó. Ña̱yóʼo kúú ki̱víi̱ ndiʼi tiempo kǒo násamaña”ʼ, káchi Jehová xíʼinra.

Ta̱ Moisés nda̱kuiinra: ʼ¿Ndáaña keʼíi̱ tá ná kǒo kandíxana ña̱ chi̱ndaʼún yi̱ʼi̱?ʼ

ʼ¿Ndáa ña̱ʼa kúú ña̱ níʼún?ʼ, káchi Ndióxi̱ xíʼinra.

Ta̱ Moisés nda̱kuiinra: ʼYitu̱nva kúúnú níʼíi̱ʼ.

ʼSakánanú nu̱ú ñuʼúʼ, káchi Ndióxi̱ xíʼinra. Tá sa̱kánaranú nu̱ú ñuʼú, iin ko̱o̱va ndu̱unú. Tasaá ke̱ʼéka Jehová inka milagro nu̱úra. Chi ni̱ka̱ʼa̱nra xíʼinra: ʼChika̱a̱ ndaʼún ini ti̱ko̱to̱únʼ. Ta̱ Moisés chi̱ka̱a̱ra ndaʼa̱ra ini ti̱ko̱to̱ra, tá ta̱vára ndaʼa̱ra ndáa yaa yaa káaña. Nda̱a̱ tá káa ña̱ kúúmií kue̱ʼe̱ lepra saá káaña. Tasaá ta̱xi Jehová ndée ndaʼa̱ ta̱ Moisés ña̱ ke̱ʼéra inka milagro. Tándi̱ʼi ni̱ka̱ʼa̱nra xíʼinra: ʼÑa̱ milagro ña̱ keʼún chindeé yóʼó ña̱ kandíxa na̱ ñuu Israel yi̱ʼi̱ kúú ta̱ chi̱ndaʼá yóʼó ña̱ ku̱a̱ʼún nu̱únaʼ.

Tándi̱ʼi ndi̱kó ta̱ Moisés veʼera ta ni̱ka̱ʼa̱nra xíʼin ta̱ Jetró: ʼNdúkúi̱ ña̱ ma̱ní nu̱ún kúni̱i̱ ku̱ʼi̱n kotoniʼnii̱ na̱ táʼi̱n na̱ ndóo ñuu Egipto á va̱ʼa ndóonaʼ. Ta̱ Jetró ta̱xivara ku̱a̱ʼa̱n ta̱ Moisés ñuu Egipto.

TÁ NDI̱KÓ ta̱ Moisés ñuu Egipto, na̱túʼunra xíʼin ñanira ta̱ Aarón xa̱ʼa milagro ña̱ ke̱ʼé Jehová xíʼinra. Soo tá ni̱na̱ʼa̱ ta̱ Moisés xíʼin ta̱ Aarón ña̱ milagro yóʼo nu̱ú na̱ ñuu Israel, ndiʼina ka̱ndíxa Jehová.

Tasaá ke̱e ta̱ Moisés xíʼin ta̱ Aarón ku̱a̱ʼa̱nna nu̱ú ta̱ Faraón. Tá ni̱xa̱a̱na nu̱úra, káchina xíʼinra: ʼJehová, Ndióxi̱ na̱ ñuu Israel káchira: “Taxi ná ku̱ʼu̱n na̱ ñui̱ ndasakáʼnuna yi̱ʼi̱ chí yuku̱ yi̱chí”.ʼ Soo ta̱ Faraón káchira: ʼYi̱ʼi̱ kǒo kándíxai̱ Jehová ta kǒo taxii̱ na̱ ñuu Israel ku̱ʼu̱nnaʼ.

Ta̱ Faraón ni̱sa̱a̱kavíra chi na̱ ñuu Israel ndúkúna tiempo nu̱úra ña̱ ku̱ʼu̱nna ndasakáʼnuna Jehová. Xa̱ʼa ña̱yóʼo ku̱a̱ʼákaví chiñu ta̱xi ta̱ Faraón ndaʼa̱na. Na̱ ñuu Israel chi̱ka̱a̱ ku̱a̱china ta Moisés xa̱ʼa ña̱ ndóʼonína vitin, ta̱ Moisés ni̱kusuchíní-inira xa̱ʼa ña̱yóʼo. Soo Jehová ni̱ka̱ʼa̱nra xíʼinra ña̱ ná kǒo kundi̱ʼi̱-inira, ta káchira xíʼinra: ʼTaxiva ta̱ Faraón ku̱ʼu̱n na̱ ñui̱ ndasakáʼnuna yi̱ʼi̱ʼ.

Ta̱ Moisés xíʼin ta̱ Aarón ni̱xa̱ʼa̱n tukuna nu̱ú ta̱ Faraón. Soo vitin ke̱ʼéna iin milagro nu̱ú ta̱yóʼo. Ta̱ Aarón sa̱kánara yitu̱nra nu̱ú ñuʼú ta túyóʼo ndu̱unú iin ko̱o̱ káʼnu. Soo na̱ su̱tu̱ ta̱ Faraón na̱ kéʼé magia sa̱kánatu na̱yóʼova yitu̱nna nu̱ú ñuʼú ta saátu túyóʼo ndu̱unú ko̱o̱. Soo koto nu̱ú na̱ʼná yóʼo, ko̱o̱ sa̱na̱ ta̱ Aarón kókorí ko̱o̱ sa̱na̱ na̱ su̱tu̱. Soo ni saáví ta̱ Faraón kǒo níxiinra taxira ku̱ʼu̱n na̱ ñuu Israel.

Soo vitin ki̱xa̱a̱ tiempo ña̱ kunda̱a̱-ini ta̱ Faraón ndáa ta̱ kúú Jehová. ¿Á xíni̱ún ndáaña ke̱ʼé Jehová? Chi̱ndaʼára 10 tu̱ndóʼo ki̱xi nu̱ú na̱ ñuu Egipto.

Soo tá ku̱a̱ʼá tu̱ndóʼo ki̱xi nu̱úna, saá ka̱na ta̱ Faraón ta̱ Moisés, ta káchira xíʼinra: ʼSakútaʼa tu̱ndóʼo nu̱úndi̱ tasaá taxii̱ ku̱ʼu̱n na̱ ñuu Israelʼ. Soo tá sa̱kútaʼara tu̱ndóʼo nu̱úna, ta̱ Faraón kǒo nítaxira ku̱ʼu̱n na̱ ñuu Israel. Tá ni̱ya̱ʼa tu̱ndóʼo ña̱ u̱xu̱ nu̱úna saáví ta̱xira ku̱a̱ʼa̱nna.

¿Á xíni̱ún ndáaña kúú 10 saá tu̱ndóʼo ki̱xi nu̱úna? Ná ya̱ʼayó inka página ta kotoyó ndáaña xi̱kuu ña̱yóʼo.

KOTO nu̱ú iin iin na̱ʼná ña̱ va̱xi yóʼo. Ta iin iinña káʼa̱nña xíʼinyó xa̱ʼa tu̱ndóʼo ña̱ chi̱ndaʼá Jehová ki̱xi nu̱ú na̱ ñuu Egipto. Koto nu̱ú na̱ʼná ña̱ nu̱ú, yóʼo chíka̱a̱ ta̱ Aarón iin tú vara loʼo ini yu̱ta naní Nilo. Ta yu̱ta yóʼo ndu̱urá ni̱i̱, ta tí ti̱a̱ká ni̱xi̱ʼi̱varí, ta ki̱xaʼá kininí xáʼa̱n yu̱ta yóʼo.

Tándi̱ʼi ta̱vá Jehová tí saʼva̱ ini yu̱ta Nilo, ta iníí ni̱ki̱ʼvirí. Ni̱ki̱ʼvirí ini horno nu̱ú íxava̱ʼana si̱táva̱ʼa, nu̱ú kávana yuxa̱n, nda̱a̱ nu̱ú xi̱to nu̱ú kísi̱na nda̱arí. Tá ni̱xi̱ʼi̱rí, na̱ ñuu Egipto nda̱kayanarí, koʼndo tá koʼndo chi̱ndoonarí, ta kinikaví xi̱xa̱ʼa̱n iníísaá ñuuna xíʼin xiko̱rí.

Tasaá ka̱ni ta̱ Aarón nu̱ú ñuʼú xíʼin tú vara ta nda̱kuita yáka ta ña̱yóʼo ndu̱uña tí ti̱xe̱ʼe válí tí kue̱ʼe̱. Ña̱yóʼo kúú tu̱ndóʼo ña̱ u̱ni̱ ña̱ ki̱xi nu̱úna.

Ta savaka tu̱ndóʼo ña̱ ki̱xi, iinlá nu̱ú na̱ ñuu Egipto ki̱xiña. Ta na̱ ñuu Israel kǒoña níkixika nu̱úna. Tu̱ndóʼo ña̱ ku̱mí xi̱kuu tí ndikama náʼnu ta ni̱ki̱ʼvirí veʼe na̱ ñuu Egipto. Ta tu̱ndóʼo ña̱ u̱ʼu̱n xa̱ʼníña kití sa̱na̱na. Ku̱a̱ʼání sa̱na̱ na̱ ñuu Egipto ni̱xi̱ʼi̱. Ni̱xi̱ʼi̱ si̱ndi̱ki̱, ndikachi xíʼin ti̱xúʼu.

Tándi̱ʼi ta̱ Aarón xíʼin ta̱ Moisés xa̱tana ya̱á chí ndiví, ta ña̱yóʼo i̱xaaña kue̱ʼe̱ xíʼin na̱ ñuu Egipto chi ka̱na ndi̱ʼi táʼyi miína xíʼin kití sa̱na̱na. Ña̱yóʼo kúú tu̱ndóʼo ña̱ i̱ñu̱ ña̱ ki̱xi nu̱úna.

Ta̱ Moisés nda̱niʼira ndaʼa̱ra chí ndiví, ta Jehová chi̱ndaʼára taxa ta sa̱kóonra ñíʼin. Tasaá ndi̱va̱ʼaní ku̱unña ñuu Egipto.

Ña̱ tu̱ndóʼo ña̱ u̱na̱, ku̱a̱ʼání tí ti̱ka ki̱xi nu̱úna nda̱a̱ ni iin yichi̱ kǒo tíyóʼo níkixi nu̱úna chi iinlá saáva ki̱xirí, ta ku̱a̱ʼání xi̱kuurí. Ta tí ti̱ka yóʼo xa̱xí ndiʼirí ña̱ ni̱ndo̱o i̱xaa ñíʼin.

Ta ña̱ tu̱ndóʼo i̱i̱n, na̱kunaa u̱ni̱ ki̱vi̱ iin na̱kunaaya̱vi iníísaá ñuu Egipto, soo nu̱ú xi̱ndoo na̱ ñuu Israel kǒo níkunaa.

Tándi̱ʼi, Ndióxi̱ ni̱ka̱ʼa̱nra xíʼin na̱ ñuura ná kaʼyína yéʼéna xíʼin ni̱i̱ tí ti̱xúʼu á tí ndikachi. Tasaá tá ni̱ya̱ʼa ta̱ ángel ñuu Egipto. Tá xi̱nira kǒo ni̱i̱ níka̱ʼyi̱ yéʼéna xa̱ʼníra se̱ʼena ta̱ nu̱ú, xíʼin kití sa̱na̱na tí ka̱ku nu̱ú. Soo tá xi̱nira ni̱i̱ yéʼéna kǒo níxaʼníra se̱ʼena ni kití sa̱na̱na. Ña̱yóʼo kúú tu̱ndóʼo ña̱ u̱xu̱ ki̱xi nu̱úna.

Tá ni̱ya̱ʼa tu̱ndóʼo ña̱ u̱xu̱, saáví ta̱xi ta̱ Faraón ku̱a̱ʼa̱n na̱ ñuu Israel, ta na̱yóʼo xa̱íyo tu̱ʼvana ku̱ʼu̱nna ta ñu̱ú saá ke̱ena ñuu Egipto.

KOTO ña̱ kúú yóʼo. Ta̱ yóʼo kúú ta̱ Moisés ta ndániʼira ndaʼa̱ra xíʼin tú vara nu̱ú mar Rojo. Ta na̱ ñuu Israel kúú na̱ ñúʼu xíʼinra chí inka xiyo yu̱ʼu̱ mar. Soo ta̱ Faraón xíʼin na̱ káchíñu nu̱úra kándaana xíʼin ti̱kui̱í. Yóʼo kunda̱a̱-iniyó ndachun ndo̱ʼona ña̱yóʼo.

Táki̱ʼva sa̱kuaʼayó xa̱ʼa tu̱ndóʼo ña̱ u̱xu̱, tá ni̱ya̱ʼa tu̱ndóʼo yóʼo nu̱úna saáví ni̱ka̱ʼa̱n ta̱ Faraón xíʼin na̱ ñuu Israel ña̱ ná keena ñuu Egipto. Ta na̱ ke̱e ñuu yóʼo ki̱ʼva 600,000 ta̱a xi̱kuuna. Ta su̱ví na̱yóʼo kuití níxikuu ndiʼina, chi ke̱e ná si̱ʼí xíʼin na̱ va̱lí ta saátu inkaka na̱ yiví na̱ ka̱ndíxa Jehová, ta ke̱ena ku̱a̱ʼa̱nna xíʼin na̱ ñuu Israel. Ta ndiʼi na̱yóʼo ku̱a̱ʼa̱n kití sa̱na̱na xíʼinna tá ke̱ena ñuu Egipto ku̱a̱ʼa̱n ndikachi, ti̱xúʼu á inkaka kití sa̱na̱na xíʼinna.

Tá kúma̱níka kee na̱ ñuu Israel, ndu̱kúna ña̱ʼa ña̱ oro, ña̱ plata xíʼin ti̱ko̱to̱ nu̱ú na̱ ñuu Egipto. Ta na̱yóʼo ta̱xi ndiʼinaña ndaʼa̱na xa̱ʼa ña̱ ni̱yi̱ʼvína tá ni̱ya̱ʼa tu̱ndóʼo ña̱ u̱xu̱ nu̱úna.

Ta ni̱ya̱ʼa loʼo ki̱vi̱ saá ni̱xa̱a̱ na̱ ñuu Israel yatin nu̱ú ndíka̱a̱ mar Rojo. Ta kán nda̱kindéena. Ta̱ Faraón xíʼin na̱ káchíñu nu̱úra na̱ndikó-inina xa̱ʼa ña̱ ta̱xina ku̱a̱ʼa̱n na̱ ñuu Israel. Ta káchina: ʼ¿Ndachun ta̱xiyó ku̱a̱ʼa̱n na̱ káchíñu nu̱úyó?ʼ

Tasaá ta̱ Faraón tuku na̱ndikó-inira xa̱ʼa ña̱ ta̱xira ku̱a̱ʼa̱nna. Ta kama ta̱vára 600 carro tú xíka nu̱ú ku̱a̱chi xíʼin na̱ káchíñu nu̱úra, ta ke̱ena ku̱a̱ʼa̱nna sa̱tá na̱ ñuu Israel, tasaá ku̱a̱ʼa̱n ndiʼika carro tú ñuu Egipto xíʼinna.

Tá xi̱ni na̱ ñuu Israel va̱xi ta̱ Faraón xíʼin na̱ káchíñu nu̱úra, ni̱yi̱ʼvínína. Chi va̱ása xínina míí kununa ku̱ʼu̱nna. Saáchi iin xiyo ndíka̱a̱ mar Rojo ta inka xiyo va̱xi na̱ kuenta ta̱ Faraón. Soo Jehová chi̱ka̱a̱ra vi̱kó nu̱ú ku̱a̱ʼa̱n na̱ ñuu Israel ña̱kán va̱ʼa kǒo níxini ta̱ Faraón na̱yóʼo.

Ta vitin ni̱ka̱ʼa̱n Jehová xíʼin ta̱ Moisés ña̱ ná ndaniʼira ndaʼa̱ra xíʼin tú vara nu̱ú mar Rojo. Tá nda̱niʼi ta̱ Moisés ndaʼa̱ra, saá ki̱xi ta̱chí ndeé i̱xaa Jehová. Ta ti̱kui̱í yóʼo ni̱taʼvírá, iin táʼvirá ni̱ndo̱o chóʼo ta inka táʼvirá ni̱ndo̱o chíkáa.

Tasaá kúú ña̱ ni̱nu̱na, ta na̱ ñuu Israel ki̱xaʼána ku̱a̱ʼa̱n-yaʼana ma̱ʼñúrá. Sana ku̱a̱ʼáva hora xi̱niñúʼuna ña̱ ni̱ya̱ʼana chi yáʼa millón xi̱kuuna, tá ni̱ya̱ʼa ndiʼi kití sa̱na̱na xíʼinna chí inka xiyo. Saáví xi̱ni tuku na̱ ñuu Egipto na̱ ñuu Israel ta ni̱ki̱ʼvina ini mar ku̱a̱ʼa̱nna sa̱tána.

Soo tá ni̱ki̱ʼvi na̱yóʼo ini mar ku̱a̱ʼa̱nna sa̱tá na̱ ñuu Israel, Jehová sakóoyora llanta xa̱ʼa carrona. Ta na̱yóʼo ni̱yi̱ʼvínína ta ni̱ka̱ʼa̱nna: ʼNá ku̱ʼu̱nyó, chi Jehová kúú ta̱ ndákiʼin tu̱ʼun na̱ ñuu Israelʼ. Soo kǒo níkivika keena ini mar.

Tasaá Jehová ni̱ka̱ʼa̱nra xíʼin ta̱ Moisés ña̱ ná ndaniʼira ndaʼa̱ra xíʼin tú vara nu̱ú mar Rojo, táki̱ʼva xítoún nu̱ú na̱ʼná yóʼo. Tasaá nda̱a mar sa̱tá na̱ ñuu Egipto xíʼin carrona ta ni̱xi̱ʼi̱ ndiʼina.

Ni̱kusi̱íkaví-ini na̱ ñuu Ndióxi̱ xa̱ʼa ña̱ ni̱ka̱kuna. Ña̱kán kúú ña̱ xi̱tana iin yaa nu̱ú Jehová xa̱ʼa ña̱ ta̱xina tixaʼvi ndaʼa̱ra, ta káchina: ʼJehová na̱kuchiñura sa̱kákura na̱ ñuura. Chi sa̱ndíʼi-xa̱ʼa ndiʼira na̱ ñuu Egipto xíʼin kuáyi̱ sa̱na̱na ini marʼ. Ñá Míriam ku̱ʼva ta̱ Moisés ta̱váñá ka̱a ña̱ sákaʼañá ña̱ naní pandereta, tasaá ndiʼi ná si̱ʼí ta̱váná ka̱aná ña̱ sákaʼaná. Ta xi̱taná yaa ta ti̱xaʼaná nu̱ú Jehová, ta káchiná: ʼJehová na̱kuchiñura sa̱kákura na̱ ñuura chi sa̱ndíʼi-xa̱ʼa ndiʼira na̱ ñuu Egipto xíʼin kuáyi̱ sa̱na̱na ini marʼ.