Tá ná kixaʼá yo̱o̱ septiembre, nu̱ú Tutu nu̱ú va̱xi ña̱ keʼéyó reunión ki̱xi iin presentación xa̱á ña̱ naní “Ná sanáʼa̱yó ña̱ nda̱a̱”. Ña̱ kúni̱yó kúúña ná kunda̱a̱ va̱ʼa inina ña̱ nda̱a̱, xa̱ʼa ña̱yóʼo ná keʼéyó iin pregunta tasaá kaʼviyó iin texto nu̱úna.

Tá xítoyó ndixa kúni̱kana sakuaʼana, kivi sandákooyó nda̱a̱ ndáaka tutu ndaʼa̱na á va̱ʼatu na̱ʼa̱yó iin video ña̱ va̱xi nu̱ú jw.org nu̱úna. Ta kama ná ndikóyó nu̱úna ña̱ va̱ʼa natúʼunkayó xíʼinna. Ña̱ presentación xa̱á xíʼin ña̱ discurso ña̱ taxina ti̱xin ña̱ congregación kanaña nu̱ú resumen ña̱ capítulo ña̱ libro What Can the Bible Teach Us?, ti̱xin ña̱ libro Enseña tu̱ʼun ña̱ va̱ása yo̱ʼvi̱ ta̱vánaña. Nani ndátuyó kana ña̱ libro yóʼo ña̱ tu̱ʼun sáʼán, ná kuniñúʼuyó ña̱ libro ¿Qué enseña realmente la Biblia?, chi ña̱yóʼo chindeéña miíyó ña̱ keʼéyó revisita xíʼin ña̱ kaʼviyó xíʼin na̱ yiví.

Iinlá kúú yichi̱ ña̱ kivi kuniʼi miíyó ña̱ va̱ʼa kutakuyó (Mt 7:13, 14). Na̱ yiví na̱ nátúʼunyó xíʼin xa̱a̱ síín ñuu iin iinna xa̱a̱ síín ña̱ kándíxa iin iinna, ña̱kán kúúña xíniñúʼu natúʼunyó xíʼinna xa̱ʼa ña̱ kútóona (1Ti 2:4). Tá sakuaʼakayó xa̱ʼa xa̱a̱ síín síín tema ña̱ káʼa̱n tu̱ʼun Ndióxi̱ xa̱ʼa ña̱ nda̱saa natúʼunyó xíʼin na̱ yiví, saá kúúña va̱ʼaníka sanáʼa̱yóna ta kusi̱íka-iniyó (2Ti 2:15).

Ndiʼi na̱ yiví xíniñúʼuna iin na̱ sándi̱ko-inina (Ec 4:1). Yo̱o̱ septiembre chika̱a̱yó ndée ña̱ xaxáyó La Atalaya ña̱ número 5 ña̱ káʼa̱n xa̱ʼa ña̱yóʼo. Ná chika̱a̱níyó ndée ña̱ ku̱a̱ʼá va̱ʼaña xaxáyó. Ña̱ kúni̱yó kúúña sándi̱koyó ini na̱ yiví, ña̱kán va̱ása sandákooyó revista veʼe nu̱ú kǒo na̱ yiví ndóo chi xíniñúʼu kuniyó miína saáví taxiyóña ndaʼa̱na.

NDÁA KI̱ʼVA TAXIYÓ ÑA̱ REVISTA

“Ndiʼiyó xíniñúʼuyó sándi̱kona-iniyó tá yáʼayó nu̱ú tu̱ndóʼo, soo ¿ndáana kúúna va̱ʼa sándi̱ko-iniyó? [Kaʼvi 2 Corintios 1:3, 4]. Ña̱ revista La Atalaya yóʼo káʼa̱nña ndáa ki̱ʼva sándi̱ko Ndióxi̱ iniyó”.

Tá iin na̱ yiví kúni̱na sákuaʼana xa̱ʼa Ndióxi̱ ta ki̱ʼinna iin revista:

NA̱ʼA̱ ÑA̱ VIDEO ¿NDACHUN KAʼVIYÓ BIBLIA?

Tándi̱ʼi ka̱ʼa̱n xíʼinna ña̱ kúni̱ún sanáʼúnna.

KINDO̱O XÍʼINNA ÑA̱ NDIKÓÚN NU̱ÚNA

Ndakoo iin pregunta ña̱ ndakuiún tá ná ndikóún inka yichi̱, tá kúú ña̱: ¿Nda̱chun táxi Ndióxi̱ íyoní tu̱ndóʼo?