Ñuyǐví xa̱á nu̱ú kooyó

Na̱ yiví na̱ xa̱a̱ síín síín ñuu ke̱e inkáchi xíxina nu̱ú ñuyǐví xa̱á

Jehová sandíʼi-xa̱ʼa̱ra ndiʼi ña̱ va̱ása va̱ʼa ña̱ ke̱ʼé ta̱ Ndi̱va̱ʼa. Jehová nda̱kaxinra ta̱ Jesús ña̱ koora rey nu̱ú iníísaá ñuʼú yóʼo. Tá ná kixáʼa ta̱ Jesús kaʼndachíñura liviní nduu iníísaáña (Daniel 7:13, 14; Lucas 23:43).

Ña̱ va̱xi yóʼo kúú ña̱ káʼa̱n Jehová keʼéra.

KOONÍ ÑA̱ KUXUYÓ: “Ku̱a̱ʼání ña̱ʼa koo nu̱ú ñuʼú yóʼo; Ndióxi̱ miíyó taxira bendición ndaʼa̱yó”. “Nu̱ú ñuʼú ku̱a̱ʼání ña̱ʼa koo kuxuna, chí yuku̱ ku̱a̱ʼáka ña̱ koo” (Salmo 67:6; 72:16).
KǑOKA KUACHI KOO: “Naʼandó ta kotondó ña̱ liviní ña̱ʼa kéʼé Jehová nu̱ú ñuʼú yóʼo. Ndióxi̱ sándiʼi-xa̱ʼa̱ra ndiʼi ku̱a̱chi nu̱ú xáʼní-táʼanna iníísaá ñuyǐví” (Salmo 46:8, 9).
KǑOKA NA̱ YIVÍ NA̱ KÉʼÉ ÑA̱ VA̱ÁSA VA̱ʼA KOO: “Saáchi na̱ yiví na̱ kéʼé ña̱ kini ndiʼi-xa̱ʼa̱na [...] Si̱lóʼo tiempo kúma̱ní, ta na̱ yiví na̱ kéʼé ña̱ va̱ása va̱ʼa ndiʼi-xa̱ʼa̱na, ta ni ná kotoún nu̱ú xi̱ndoona kǒokana kuniún” (Salmo 37:9, 10).
KǑOKA KUE̱ʼE̱ KOO NI KǑOKA NA̱ XO̱ʼVI̱ NI KǑOKA NA̱ KUVI: “Tá ná kixaa̱ ki̱vi̱ kán, na̱ kǒo túvi nu̱ú va̱ʼa ndakotona, na̱ kǒo xíniso̱ʼo va̱ʼa kuniso̱ʼona. Tá ná kixaa̱ ki̱vi̱ kán, na̱ kǒo kívi kaka va̱ʼa kakana ta nda̱a̱ va̱ʼa kanditana táki̱ʼva kéʼé tí yusu, na̱ kǒo kívi ka̱ʼa̱n va̱ʼa ka̱ʼa̱nna” (Isaías 35:5, 6).

“Ndióxi̱ kúú ta̱ koo xíʼin na̱yóʼo. Ta ndaya̱kúnra ti̱kui̱í nu̱úna, ta va̱ása kuvikana, ni va̱ása kusuchíka-inina, ni va̱ása kuakukana, ni va̱ása xo̱ʼvi̱kana. Ndióxi̱ sandíʼi-xa̱ʼa̱ra ndiʼi ña̱ʼa ña̱ sa̱xóʼvi̱ miíyó” (Apocalipsis 21:3, 4).

Síínva íyo Jehová nu̱ú ta̱ Ndi̱va̱ʼa xíʼin na̱ ta̱chí ndi̱va̱ʼa, chi Jehová nda̱a̱ ni iin yichi̱ va̱ása káʼa̱nra ña̱ vatá, ndiʼi ña̱ káʼa̱nra keʼéra saxínuvaraña (Lucas 1:36, 37). Jehová kúʼvi̱ní-inira xínira yóʼó ta kúni̱ra ña̱ ná koún nu̱ú iin ñuʼú livi chí nu̱únínu. Ña̱kán, ka̱ʼa̱n xíʼin na̱ testigo Jehová ña̱ ná chindeétáʼanna xíʼún ña̱ va̱ʼa sákuaʼakaún xa̱ʼa̱ ña̱ liviní káʼa̱n Ndióxi̱ keʼéra. Tá ná chika̱a̱ún ndee̱ ña̱ keʼún ña̱ sákuaʼún nu̱ú Biblia, va̱ása kandíxakaún ña̱ sánáʼa̱ na̱ veʼe ñuʼú vatá, va̱ása kandíxakaún ndiʼi ña̱ vatá ña̱ sánáʼa̱ ta̱ Ndi̱va̱ʼa ta ku̱a̱ʼáníka ña̱ʼa kuxini̱ún xa̱ʼa̱ Ndióxi̱, ta chí nu̱únínu va̱ása kuumiíkaún ku̱a̱chi ta ni va̱ása kuviún. Nda̱a̱ táki̱ʼva ka̱chi ta̱ Jesús: “Kunda̱a̱-inindó xa̱ʼa̱ ña̱ nda̱a̱ ta ña̱yóʼo sañá ndóʼó” (Juan 8:32).