¿Nda̱saa na̱ testigo Jehová xíni̱ún? Savana íyona yatin nu̱ú íyoún, ta savana káchíñuna nu̱ú káchíñún, ta savana inkáchi escuela xáʼa̱nna xíʼún ta savatuna nda̱a̱ sana nátúʼunna xíʼún xa̱ʼa tu̱ʼun Ndióxi̱. ¿Ndáa na̱ yiví kúú ndi̱ʼi̱ na̱ testigo Jehová? ¿Ndachun nátúʼundi̱ xíʼin na̱ yiví xa̱ʼa ña̱ sákuaʼandi̱?

Kúúndi̱ na̱ yiví táki̱ʼva miíún. Xa̱síín ñuu iin iinndi̱, íyo na̱ káʼa̱n inka tu̱ʼun ta íyo na̱ káʼa̱n tu̱ʼun sâví. Savandi̱ xi̱xa̱ʼandi̱ inka veʼe-ñu̱ʼu ta savandi̱ kǒo níkandíxandi̱ ña̱ íyo Ndióxi̱. Soo ku̱a̱ʼá tíempo xi̱niñúʼundi̱ ña̱ sa̱kuaʼandi̱ ña̱ káʼa̱n Biblia, saáví ni̱xa̱a̱ndi̱ ku̱undi̱ testigo Jehová (Hechos 17:11). Ka̱ndíxandi̱ ña̱ sa̱kuáʼandi̱ tasaá nda̱kani va̱ʼa xi̱níndi̱ ña̱ ndasakáʼnundi̱ Jehová.

Ku̱a̱ʼá ña̱ va̱ʼa ndákiʼindi̱ ña̱ káʼvindi̱ Biblia. Nda̱a̱ tá ndóʼo ndiʼi na̱ yiví chi sava íyo tu̱ndóʼo nu̱úna saátu miíndi̱ sava íyo tu̱ndóʼo nu̱úndi̱. Soo chíka̱a̱ndi̱ ndée kéʼéndi̱ ña̱ sákuaʼandi̱ nu̱ú Biblia tasaá va̱ʼaka ndóondi̱ vitin (Salmo 128:1, 2). Xa̱ʼa ña̱yóʼo kúú ña̱ káʼa̱nndi̱ xíʼin na̱ yiví.

Kéʼéndi̱ ña̱ káʼa̱n Biblia xíʼindi̱. Ta ña̱ sánáʼa̱ Biblia yóʼo, chíndeéña miíndi̱ ña̱ si̱íka íyo inindi̱ ndóondi̱ vitin. Ta sánáʼa̱ña miíndi̱ ña̱ va̱ʼa koondi̱ xíʼin na̱ veʼendi̱, ña̱ vií koondi̱ xíʼin na̱ yiví ta tǒʼo koo-inindi̱ xíʼinna. Ta sánáʼa̱tuña miíndi̱ ña̱ ná kachíñundi̱, ña̱ kǒo kéʼéndi̱ ña̱ kini ta xíʼin ña̱yóʼo chínúúndi̱ iin yichi̱ va̱ʼa nu̱ú na̱ yiví xíʼin ña̱ kéʼéndi̱. Ta kúnda̱a̱-inindi̱ chi Ndióxi̱ va̱ása kúndasíra na̱ yiví. Na̱kán, iníísaá ñuyǐví ndóo na̱ testigo Jehová na̱ káʼvi xíʼindi̱, ta kǒo kúndasí táʼandi̱. Nda̱a̱ ni iin veʼe-ñu̱ʼu kǒo íyo táki̱ʼva íyo ndi̱ʼi̱ na̱ testigo Jehová (Hechos 4:13; 10:34, 35).

• Ni kúúyó na̱ testigo Jehová á ni kǒo kúúyó, ¿ndáaña ndóʼo ndiʼiyó?

• Xa̱ʼa ña̱ káʼvi na̱ testigo Jehová Biblia, ¿ndáa ña̱ va̱ʼa sákuaʼana nu̱úña?

Ku̱a̱ʼání na̱ yiví káʼa̱nna na̱ testigo Jehová na̱ xa̱áva kúúna. Soo xa̱yáʼa u̱vi̱ mil u̱xa̱ ciento ku̱i̱ya̱, ndiʼi na̱ xi̱kachíñu nu̱ú Jehová xi̱nanína testigora (Isaías 43:10-12). Tá ya̱chi xi̱nanína na̱ Káʼvi Biblia soo ku̱i̱ya̱ 1931 nda̱kunanína testigo Jehová. ¿Ndachun naníndi̱ testigo Jehová?

Saáchi káʼa̱nña xa̱ʼa ndáa Ndióxi̱ kúú ta̱ ndásakáʼnundi̱. Ki̱vi̱ Ndióxi̱ kúú Jehová ta yáʼa u̱xa̱ mil yichi̱ va̱xi ki̱vi̱ra nu̱ú Biblia, chi saá yichi̱ ni̱ka̱ʼyi̱ña nu̱ú tutu ña̱ ka̱ʼyína xi̱naʼá. Ta nu̱ú sava Biblia kǒo ki̱vi̱ Ndióxi̱ va̱xi nu̱úña chi na̱samavanaña, va̱xi kuití Ndióxi̱ á Tátava nu̱úña. Soo Ndióxi̱ ni̱ka̱ʼa̱nra xíʼin ta̱ Moisés: Jehová kúú ki̱víi ta “ña̱yóʼo kúú ki̱víi ndiʼi tíempo” va̱ása nasamaña (Éxodo 3:15). Tasaá kúúña nda̱kooninara nu̱ú inka ndióxi̱. Ta kúsi̱í-inindi̱ ña̱ naníndi̱ testigo Jehová.

Saáchi káʼa̱nña xa̱ʼa ña̱ kéʼéndi̱. Ta̱ Abel kúú ta̱ ki̱xaʼá xa̱ʼa ña̱ ndinuʼu-inira ka̱ndíxara Jehová tasaá xi̱ndiku̱n ku̱a̱ʼákana. Ta sava na̱yóʼo xi̱kuu ta̱ Noé, ta̱ Abrahán, ñá Sara, ta̱ Moisés xíʼin ta̱ David, su̱ví na̱yóʼo níxi̱kuu ndiʼina, ni̱xi̱yo ku̱a̱ʼáka na̱ xi̱kuu testigora (Hebreos 11:4–12:1). Tá íxaa iin na̱ testigo ku̱a̱ʼa̱nna nu̱ú na̱ chíñu káʼa̱nna xa̱ʼa iin na̱ yiví na̱ kǒo ku̱a̱chi, saá íxaa ndi̱ʼi̱ ku̱a̱ʼa̱nndi nátúʼunndi̱ ña̱ nda̱a̱ xa̱ʼa Jehová xíʼin na̱ yiví.

Saáchi ndíku̱ndi̱ yichi̱ Jesús. Ña̱ Biblia káʼa̱n xa̱ʼa ta̱ Jesús ña̱ naníra testigo míí ta nda̱a̱, ta ndinuʼu-inira káchíñura nu̱ú Ndióxi̱ (Revelación [Apocalipsis] 3:14). Tá ki̱xi Jesús sa̱náʼa̱ra na̱ yiví xa̱ʼa ki̱vi̱ Yivára, tasaá na̱túʼunra ña̱ nda̱a̱ xa̱ʼa Yivára xíʼin na̱yóʼo (Juan 17:26; 18:37). Ta xa̱ʼa ña̱yóʼo na̱ ndíku̱n Jesús nanína testigo Jehová ta nátúʼunna xa̱ʼa Jehová xíʼin na̱ yiví. Ta ndi̱ʼi̱ na̱ Testigo chíka̱a̱níndi̱ ndée ña̱ kéʼéndi̱ ña̱yóʼo.

• Tá ya̱chi xi̱nanínndi̱ na̱ Káʼvi Biblia, ¿ndachun na̱samandi̱ ki̱víindi̱ ña̱ naníndi̱ testigo Jehová?

• ¿Ndáa ta̱ xi̱kuu ta̱ nu̱ú testigo Jehová nu̱ú Ñuʼú yóʼo?

• ¿Ndáa ta̱ kúú testigo Jehová ta̱ káʼnuka nu̱ú ndiʼina?

Ña̱ Biblia ni̱ka̱ʼa̱nña tá ná kuvi Jesús, ti̱xin míí na̱ xi̱ndiku̱n ñaʼá kán kana na̱ kǒo sánáʼa̱ ña̱ nda̱a̱ ta nasamana ña̱ va̱xi nu̱ú Tu̱ʼun Ndióxi̱ (Hechos 20:29, 30). Ta saá ku̱u: nda̱sakána ña̱ sa̱náʼa̱ ta̱ Jesús xíʼin ña̱ sánáʼa̱ na̱ kǒo ndásakáʼnu Ndióxi̱. Ta saá ka̱na ku̱a̱ʼá veʼe-ñu̱ʼu na̱ káʼa̱n ndíku̱n Jesús (2 Timoteo 4:3, 4). Tá ndiʼi ña̱yóʼo ku̱u, ¿ndachun va̱ʼa xíni̱yó ña̱ sákuaʼayó xa̱ʼa Ndióxi̱ kúúña ña̱ nda̱a̱?

Ki̱xaa iin ki̱vi̱ ta̱vá Jehová ña̱ nda̱a̱ nu̱úna. Ndióxi̱ ni̱ka̱ʼa̱nra tá tíempo nu̱ú ndíʼi, ku̱a̱ʼá na̱ yiví xa̱a̱na kunda̱a̱-inina ña̱ nda̱a̱ xa̱ʼara (Daniel 12:4). Ta ku̱i̱ya̱ 1870, loʼo kúú na̱ yiví na̱ ki̱xaʼá káʼvi Tu̱ʼun Ndióxi̱ ta na̱kunda̱a̱-inina, ku̱a̱ʼá ña̱ sánáʼa̱ na̱ veʼe-ñu̱ʼu kǒoña va̱xi nu̱ú Biblia. Tasaá ki̱xaʼána na̱ndukú va̱ʼana ña̱ káʼa̱n Tu̱ʼun Ndióxi̱, ta míí Jehová chi̱ndeérana ña̱ va̱ʼa ná kunda̱a̱-inina xa̱ʼa Tu̱ʼunra.

Na̱ ndinuʼu-ini xi̱kuni̱ kunda̱a̱-ini xa̱ʼa Biblia na̱ndukú va̱ʼana xa̱ʼaña. Na̱yóʼo nda̱a̱ tá íxaayó vitin saá xi̱keʼénaña, chi siʼna xi̱nandukúna xa̱ʼa iin ña̱ʼa tá xa̱ku̱nda̱a̱ va̱ʼa inina xíʼinña saá xi̱nandukúna inkaña. Tá xi̱ndaniʼina iin texto ña̱ íxaa yo̱ʼvi xíʼinna xi̱nandukúna inka texto ña̱ va̱ʼa kunda̱a̱-inina xíʼinña, tá xa̱ku̱nda̱a̱-inina xíʼin ndiʼi ña̱yóʼo saá xi̱kaʼyínaña nu̱ú tutu. Loʼo loʼo saá, míí Biblia yóʼo nda̱kuná yichi̱ nu̱úna, tasaá ni̱xa̱a̱na na̱kunda̱a̱-inina xa̱ʼa ña̱ nda̱a̱, chi na̱kunda̱a̱-inina, ndáaña kúú ki̱vi̱ Ndióxi̱, ta ndáana kaʼndachíñu nu̱ú Ñuʼú yóʼo, ta ndáaña ndóʼoyó tá xíʼi̱yó, ta á ndataku na̱ ni̱xi̱ʼi̱, ta nda̱saa kúni̱ Ndióxi̱ koo nu̱ú Ñuʼú yóʼo. Tá na̱kunda̱a̱-inina xa̱ʼa ndiʼi ña̱yóʼo ni̱xa̱a̱na sa̱ndákoona ndiʼi ña̱ xi̱keʼéna xi̱naʼá (Juan 8:31, 32).

Ña̱ ku̱i̱ya̱ 1879 na̱kunda̱a̱-inina ña̱ ki̱xaa tíempo ña̱ natúʼunna xa̱ʼa ña̱ nda̱a̱ iníísaá ñuyǐví. Míí ku̱i̱ya̱ saá ta̱vána tutu ña̱ távána nda̱a̱ tíempo vitin: La Atalaya. Anunciando el Reino de Jehová. Ta vitin xa̱ku̱a̱ʼa̱n u̱vi̱ ciento u̱vi̱ xiko ñuu ña̱ íyo ñuyǐví yóʼo nu̱ú ku̱a̱ʼa̱nna nátúʼunna xa̱ʼa tu̱ʼun Ndióxi̱, ta xa̱ku̱a̱ʼa̱n u̱xa̱ ciento u̱vi̱ xiko u̱xu̱ nu̱ú tu̱ʼun ña̱ káʼyínaña. Ta vitin iníísaá ñuyǐví káʼa̱nna xa̱ʼa tu̱ʼun Ndióxi̱.

• ¿Ndáaña ku̱u tá ni̱xi̱ʼi̱ Jesús?

• ¿Ndáaña ke̱ʼéna ña̱ va̱ʼa nda̱ni̱ʼina ña̱ nda̱a̱ ña̱ va̱xi nu̱ú Tu̱ʼun Ndióxi̱?

Na̱ testigo Jehová ku̱a̱ʼá ku̱i̱ya̱ xi̱ta̱vána inka Biblia soo su̱ví ña̱ Traducción del Nuevo Mundo níxíkuu ña̱yóʼo, ña̱ xi̱ta̱vána yóʼo kúú ña̱ xi̱xaxana ta xi̱xiniñúʼunaña ña̱ sa̱náʼa̱na na̱ yiví. Ta ni̱ya̱ʼa tíempo saá xi̱nina ña̱ xíniñúʼu tavána iin Biblia ña̱ va̱ʼa kunda̱a̱-ini na̱ yiví xa̱ʼa ña̱ nda̱a̱ ña̱ káʼa̱n tu̱ʼun Ndióxi̱, chi ña̱yóʼo kúú ña̱ kúni̱ Ndióxi̱ ná kunda̱a̱-ini ndiʼi na̱ yiví (1 Timoteo 2:3, 4). Ta xa̱ʼa ña̱yóʼo ña̱ ku̱i̱ya̱ 1950 ki̱xaʼána ta̱vánaña tu̱ʼun inglés iin táʼví iin táʼví ña̱ Biblia ña̱ Traducción del Nuevo Mundo ta xi̱niñúʼuna tu̱ʼun ña̱ va̱ása yo̱ʼvi ña̱ va̱ʼa kunda̱a̱-ini ndiʼi na̱ yiví xíʼinña, ña̱ Biblia yóʼo xa̱yáʼa iin ciento o̱ko̱ u̱xu̱ nu̱ú tu̱ʼun kánaña ta kǒo násamana tu̱ʼun ña̱ va̱xi nu̱úña.

Xíniñúʼuyó iin Biblia ña̱ va̱ʼa kunda̱a̱-iniyó xíʼin. Ku̱a̱ʼá Biblia kúúmiíña sava tu̱ʼun ña̱ kǒo xíniñúʼukayó vitin, ña̱kán íxaa yo̱ʼviña xíʼinyó ña̱ va̱ʼa kunda̱a̱-iniyó xíʼinña chi yáʼa tíempo ta tu̱ʼun káʼa̱nyó sámavaña. Sa̱kán loʼo ku̱i̱ya̱ ku̱a̱ʼa̱n ña̱ nda̱ni̱ʼina tutu ña̱ ta̱ana xi̱naʼá va̱ʼa, ta ña̱yóʼo chi̱ndeé na̱ ka̱ʼyí Biblia ña̱ va̱ʼa na̱kunda̱a̱-inina xíʼin tu̱ʼun hebreo, arameo xíʼin griego ni̱ka̱ʼyi̱ Biblia xi̱naʼá.

Xíniñúʼuyó iin Biblia ña̱ ka̱ʼa̱n tá káʼa̱n ña̱ ta̱ana xi̱naʼá. Na̱ káʼyí Biblia inka tu̱ʼun kǒo xíniñúʼu nasamana ña̱ káʼa̱nña, xíniñúʼu ka̱ʼa̱nña ta káʼa̱n tutu ña̱ ka̱ʼyína tíempo xi̱naʼá saá xíniñúʼu kooña. Soo sava na̱ ka̱ʼyí inka Biblia kǒo ki̱vi̱ Ndióxi̱ Jehová níkáʼyína nu̱úña.

Xíniñúʼuyó iin Biblia nu̱ú va̱xi ki̱vi̱ Jehová (2 Samuel 23:2). Nu̱ú Biblia ña̱ Traducción del Nuevo Mundo ka̱ʼyí tukuna ki̱vi̱ Jehová, nda̱a̱ táki̱ʼva ka̱ʼyínaña xi̱naʼá, ña̱kán ki̱ʼva u̱xa̱ mil yichi̱ va̱xi ki̱vi̱ra nu̱ú Biblia yóʼo, ni̱nu yóʼo va̱xi iin táʼví loʼo tutu ña̱ náʼa̱ nu̱úyó nu̱ú va̱xi ki̱vi̱ra (Salmo 83:18). Ña̱ va̱ʼa ka̱ʼyína ña̱ Biblia ña̱ Traducción del Nuevo Mundo siʼna na̱ndukú va̱ʼana xa̱ʼaña nu̱ú inka tutu ña̱ ka̱ʼyína tíempo xi̱naʼá. Ta vitin tá káʼviyóña kúsi̱íkaví-iniyó chi va̱ʼa kúnda̱a̱-iniyó xíʼinña. Tá kúúmíún iin Biblia ña̱ Traducción del Nuevo Mundo soo tá kǒo ña̱yóʼo nu̱ún ta kúúmíún inka Biblia káʼa̱nndi̱ xíʼún ná kaʼviúnña ndiʼi ki̱vi̱ (Josué 1:8; Salmo 1:2, 3).

• ¿Ndachun ki̱xaʼána xíniñúʼuna Biblia ña̱ Traducción del Nuevo Mundo?

• ¿Ndáaña xíniñúʼu keʼé ndiʼi na̱ kúni̱ kunda̱a̱-ini xa̱ʼa Ndióxi̱?