Ku̱a̱ʼání na̱ yiví va̱ása xáʼankana veʼe-ñu̱ʼuna chi kǒo ña̱ nda̱a̱ sánáʼa̱na na̱yóʼo xa̱ʼa Ndióxi̱. Soo, ¿ndachun va̱ʼa ku̱ʼún nu̱ú ndátaka na̱ testigo Jehová? ¿Ndáaña kuniún ná ku̱ʼún kán?

Na̱ ku̱a̱ʼa̱n kán kúʼvi̱-inina xínitáʼanna. Na̱ xi̱ndiku̱n Jesús xi̱naʼá ni̱xi̱yo ku̱a̱ʼá nu̱ú xi̱ndakutáʼanna ña̱ xi̱ndasakáʼnuna Ndióxi̱, xi̱kaʼvina Tu̱ʼunra ta xi̱taxina ndée ndaʼa̱ táʼanna (Hebreos 10:24, 25). Tá xi̱ndakutáʼanna xíʼin na̱ xi̱kaʼvi xíʼinna xi̱kusi̱íkaví-inina chi ndiʼi na̱yóʼo ma̱ní ni̱xi̱yo táʼanna nda̱a̱ tá íyo ñanina á ku̱ʼvana saá xi̱xini táʼanna (2 Tesalonicenses 1:3; 3 Juan 14). Nda̱a̱ tá xi̱keʼé na̱ xi̱ndiku̱n Jesús xi̱naʼá saá kéʼé na̱ testigo Jehová na̱ ndóo vitin.

Ku̱a̱ʼá ña̱ va̱ʼa ndákiʼin na̱ kéʼé ña̱ káʼa̱n Biblia. Nda̱a̱ tá káchi Biblia xa̱ʼa na̱ xi̱ndoo xi̱naʼá ña̱ xi̱ndatakana ña̱ sa̱kuaʼana xa̱ʼa Ndióxi̱, saá vitin ni válíndi̱ ni chéendi̱ ndiʼindi̱ ndátakandi̱ xíniso̱ʼondi̱ xa̱ʼa Ndióxi̱ chi íyo ku̱a̱ʼá na̱ xíni̱ka na̱ sánáʼa̱ ndi̱ʼi̱, tasaá kunda̱a̱-inindi̱ keʼéndi̱ ña̱ káʼa̱n Tu̱ʼunra (Deuteronomio 31:12; Nehemías 8:8). Ndiʼi na̱ xáʼa̱n yóʼo kivi ndakuiinna tá ndákatu̱ʼunnana, kivi katana yaa nu̱ú Ndióxi̱, tá kéʼéna ña̱yóʼo náʼa̱na ña̱ ndinuʼu-inina kándíxana Ndióxi̱ (Hebreos 10:23).

Ña̱ sákuaʼandi̱ chíndeéña miíndi̱ ña̱ kandíxa va̱ʼandi̱ Ndióxi̱. Ta̱ apóstol Pablo ta̱ara iin tutu ku̱a̱ʼa̱n ndaʼa̱ na̱ xi̱ndataka ñuu Roma: “Saáchi kúni̱i̱ xai̱i̱ kotoi ndóʼó [...] ná ndakutáʼandó ta taxindó ndée ndaʼá táʼandó xíʼin ña̱ kándíxandó, ta taxindó ndée ndaʼi, ta yi̱ʼi̱ taxi ndée ndaʼa̱ndó” (Romanos 1:11, 12). Ña̱ ndákutáʼandi̱ veʼe nu̱ú sákuaʼandi̱ xa̱ʼa Ndióxi̱ ña̱yóʼo chíndeé miíndi̱ ña̱ kandíxa va̱ʼakandi̱ Ndióxi̱ tasaá keʼéndi̱ ña̱ kúni̱ra.

Káʼa̱nndi̱ xíʼún ná ku̱ʼún nu̱ú ndátakandi̱ ta kán va̱ʼa kuni ndiʼún ña̱ káʼa̱nndi̱ xa̱ʼa yóʼo, ta kǒo xu̱ʼún kiʼinndi̱ nu̱ún.

• ¿Ndáana xi̱keʼé táʼan ña̱ kéʼéndi̱ vitin ña̱ ndátakandi̱ sákuaʼandi̱ xa̱ʼa Ndióxi̱?

• Nu̱ú ndátakandi̱ sákuaʼandi̱ xa̱ʼa Ndióxi̱, ¿ndáaña va̱ʼa sákuaʼandi̱?

Ku̱a̱ʼání na̱ testigo Jehová va̱ása ndákoona ña̱ ku̱ʼu̱nna nu̱ú ndátakana ña̱ sákuaʼana xa̱ʼa Ndióxi̱ nda̱saaka káa, ni kóon sa̱vi̱, ni vi̱xin, ni káni̱ á ni ku̱a̱ʼa̱nna káchíñuna ta kúnaana á ni íyo tu̱ndóʼo nu̱úna. ¿Ndachun chíka̱a̱ndi̱ ndée ña̱ ku̱a̱ʼa̱nndi̱ ndátakandi̱ xíʼin na̱ káʼvi xíʼindi̱?

Chíndeéña ndi̱ʼi̱ ña̱ va̱ʼaka koondi̱. Ta̱ apóstol Pablo ni̱ka̱ʼa̱nra xa̱ʼa ña̱ xíniñúʼu ndatakayó, ta káchira: “Ná ndi̱ʼi-iniyó xa̱ʼa táʼanyó” (Hebreos 10:24). Ña̱yóʼo kúni̱ kachiña vivíi ná kunitáʼanyó ná ndi̱ʼi-iniyó xa̱ʼa inkana. Tá xáa̱yó xíniyó inka na̱ káʼvi tu̱ʼun Ndióxi̱ xíʼinyó ta nátúʼunna xíʼinyó ña̱ ni̱ya̱ʼana nu̱ú tu̱ndóʼo táʼan ña̱ yáʼayó, ta na̱yóʼo kivi chindeé miíyó ña̱ va̱ʼa ya̱ʼayó nu̱ú ña̱ ndóʼoyó.

Chíndeéña ndi̱ʼi̱ ña̱ va̱ʼa kutáʼandi̱ xíʼinna. Nu̱ú ndátakandi̱ kán íyo ku̱a̱ʼá na̱ ndixa kúú mígondi̱. Sava yichi̱ ndátakandi̱ xíxindi̱ á sísíkindi̱. ¿Nda̱saa chíndeé ña̱yóʼo ndi̱ʼi̱? Chíndeéña ndi̱ʼi̱ ña̱ va̱ʼaka kutáʼandi̱ xíʼin táʼandi̱. Tá íyo tu̱ndóʼo nu̱ú na̱ káʼvi xíʼindi ndi̱ku̱un kama ku̱a̱ʼa̱nndi̱ chíndeéndi̱na chi va̱ʼa ndítáʼandi̱ xíʼin táʼandi̱ (Proverbios 17:17). Tá ndákutáʼandi̱ xíʼin ndiʼi na̱ káʼvi xíʼindi̱ saá náʼa̱ndi̱ ña̱ ndíʼi-inindi̱ xa̱ʼa táʼandi̱ (1 Corintios 12:25, 26).

Káʼa̱nndi̱ xíʼún ná nandukún na̱ kéʼé ña̱ kúni̱ Ndióxi̱ ña̱ ná koona mígoún. Ta na̱yóʼo kivi ndani̱ʼúnna nu̱ú xáʼa̱n na̱ testigo Jehová. Ta va̱ása taxiún kasi ni iin ña̱ʼa nu̱ún ña̱ ku̱ʼún xíʼinndi̱ nu̱ú ndátakandi̱ sákuaʼandi̱ xa̱ʼa Ndióxi̱.

• ¿Ndachun ndátakandi̱ veʼe nu̱ú sákuaʼandi̱ xa̱ʼa Ndióxi̱?

• ¿Ama kúni̱ún ku̱ʼún xíʼindi̱ veʼe nu̱ú ndátakandi̱?

Na̱ xi̱ndiku̱n Jesús ña̱ tíempo xi̱naʼá, xi̱ndatakana ña̱ xi̱xitana yaa nu̱ú Ndióxi̱, xi̱kaʼanna xíʼinra ta xi̱kaʼvina Tu̱ʼunra (1 Corintios 14:26). Tá ná ku̱ʼún xíʼinndi̱ nu̱ú ndátakandi̱ ña̱yóʼo kúútu ña̱ kuniún kánva.

Ndiʼi ña̱ sánáʼa̱ndi̱ va̱xiña nu̱ú Biblia. Ña̱ sábado á domingo iníísaá ñuyǐví ndátaka na̱ testigo Jehová ña̱ xíniso̱ʼona sava hora iin ña̱ káʼa̱nndosóna xa̱ʼa Biblia, kán káʼa̱nna xíʼiʼnyó nda̱saa chíndeé Biblia miíyó ta káʼa̱nna xa̱ʼa ña̱ tíempo ndóoyó vitin. Ta káʼa̱nna xíʼin ndiʼi na̱ xáʼa̱n kán ná tavána Bibliana ta ná kundiku̱nna kaʼvinaña. Tándi̱ʼi, iin hora Káʼvina La Atalaya, ta káʼa̱nna xíʼin ndiʼi na̱ xáʼa̱n kán tá kúni̱na va̱ʼa ndakuiinna ña̱ va̱xi nu̱ú La Atalaya tá ndákatu̱ʼunnana. Yóʼo sákuaʼayó kundiku̱nyó konsejo ña̱ táxi Tu̱ʼun Ndióxi̱ ndaʼa̱yó. Yáʼaka iin ciento u̱xu̱ mil congregación ña̱ iníísaá ñuyǐví káʼvina tutu yóʼo.

Chíndeéña miíndi̱ ña̱ va̱ʼaka sanáʼa̱ndi̱ na̱ yiví xa̱ʼa Ndióxi̱. Ndátakandi̱ iin xi̱kua ña̱ maʼñú semana ña̱ sákuaʼandi̱ xa̱ʼa u̱ni̱ ña̱ʼa ti̱xin ña̱ naní Ña̱ Ké’é na̱ Ndásaká’nu Ndióxi̱, ña̱ va̱xi nu̱ú tutu ña̱ naní Ña̱ Ké’é na̱ Ndásaká’nu Ndióxi̱ Tutu nu̱ú Va̱xi ña̱ Keʼéyó Reunión. Parte nu̱ú ña̱ reunión yóʼo naníña “Ña̱ káʼa̱n Biblia xa̱ʼa”, ta chíndeé táʼanña xíʼinyó ña̱ kunda̱a̱iniyó xa̱ʼa ña káʼa̱n Biblia xíʼin comentario ña̱ táxina. Ta saátu va̱xi inka parte ña̱ naní “Ná sanáʼa̱ viíyó”, yáʼa demostración ña̱ sánáʼa̱ miíyó ndáa ki̱va natúʼunyó xíʼin na̱ yiví xa̱ʼa Biblia, tándi̱ʼi iin ta̱ táxi konsejo ndaʼa̱na káʼa̱nra xíʼinna míí xíniñúʼu sakuaʼa loʼokana (1 Timoteo 4:13). Ta nu̱ú ndíʼi va̱xi inka ña̱ naní “Ña̱ kéʼéyó na̱ Testigo”, yóʼo káʼa̱nna xíʼinyó ndáaña kúni̱ Ndióxi̱ keʼéyó. Yóʼo kéʼéna pregunta xíʼinyó ña̱ va̱ʼa sákuaʼakayó xa̱ʼa Biblia.

Tá ná ku̱ʼún xíʼinndi̱ nu̱ú ndátakandi̱, kán kúni̱ún ku̱a̱ʼání ña̱ va̱ʼa sákuaʼandi̱ xa̱ʼa Biblia (Isaías 54:13).

• ¿Ndáaña kuniún ná ku̱ʼún nu̱ú ndátaka na̱ testigo Jehová?

• U̱ʼu̱n saá ña̱ ni̱ka̱ʼa̱ndi̱ xa̱ʼa yóʼo, ¿ndáaña siʼna kutóún ku̱ʼún kuniso̱ʼún?

¿Á xa̱xi̱niún nu̱ú tutu yóʼo na̱ testigo Jehová viíkaví ndíxina tá ku̱a̱ʼa̱nna veʼe nu̱ú ndásakáʼnuna Ndióxi̱? ¿Ndachun ndásaviíndi̱ miíndi̱ ta viíní ndíxindi̱ tá ku̱a̱ʼa̱nndi̱ veʼe nu̱ú ndásakáʼnundi̱ Ndióxi̱?

Xa̱ʼa ña̱ íxatǒʼondi̱ Ndióxi̱. Nda̱saaka káayó va̱ʼa ndiʼivayó nu̱ú Ndióxi̱ (1 Samuel 16:7). Soo, tá ndátakandi̱ ña̱ ndásakáʼnundi̱ Ndióxi̱ xíʼin ndinuʼu-inindi̱ íxatǒʼondi̱ra, ta íxatǒʼondi̱ na̱ ñanindi̱ xíʼin na̱ ku̱ʼvandi̱ ña̱kán viíní ndíxindi̱. Tá ná ku̱ʼu̱nyó nu̱ú iin ta̱ presidente, ¿á su̱ví viíkaví kundixiyó ku̱ʼu̱nyó nu̱úra xa̱ʼa ña̱ kúúra iin ta̱ kúúmií chíñu? Saá íyondi̱ tá ku̱a̱ʼa̱ndi̱ ndásakáʼnundi̱ Ndióxi̱ xa̱ʼa ña̱ íxatǒʼondi̱ra ña̱ kúúra iin ta̱ káʼnu ña̱ iníísaá ñuyǐví, ta íxatǒʼondi̱ veʼe nu̱ú ndátakandi̱ ña̱kán viíní ndíxindi̱ (Génesis 18:25).

Náʼa̱ndi̱ ña̱ ndíku̱ndi̱ ña̱ káʼa̱n Biblia. Ña̱ Biblia káʼa̱n xíʼin na̱ ndíku̱n Jesús ña̱ ná kiʼinna kuenta xíʼin ti̱ko̱to̱ ndíxina chi saá náʼa̱na ña̱ ndixa íxatǒʼona Ndióxi̱ (1 Timoteo 2:9, 10). Ña̱ kiʼinyó kuenta xíʼin ti̱ko̱to̱ ndíxiyó kúni̱ kachiña ña̱ kǒo kundixiyó ña̱ va̱ása va̱ʼa náʼa̱, táʼan xi̱yo la̱vo̱, xi̱yo ni̱ʼi, xatu kóʼó ndiva̱ʼa á ti̱ko̱to̱ yaku̱a̱. Tu̱ʼun Ndióxi̱ kǒo sásiña nu̱úyó xíʼin ti̱ko̱to̱ kundixiyó chi kiviva ndaka̱xinyóña, ndáaka ña̱ kúni̱yó kundixivayó nani vií ná kuna̱ʼa̱vaña. Tá vií ná kundixiyó inka na̱ yiví kunina ña̱yóʼo, ta ka̱ʼa̱n va̱ʼana xa̱ʼa Yiváyó Jehová, sava yichi̱ kǒo xíniñúʼu natúʼuvínyó xíʼinna xa̱ʼa Ndióxi̱ chi xíʼin ña̱ ndíxi kuitívayó ndakunina miíyó (Tito 2:10; 1 Pedro 2:12). Ta saátu tá vií ndíxiyó tá ku̱a̱ʼa̱nyó veʼe nu̱ú ndásakáʼnuyó Jehová, inka na̱ yiví kunina ña̱yóʼo ta nda̱a̱ vií ka̱ʼa̱nna xa̱ʼa ndiʼiyó na̱ káʼvi tu̱ʼun Jehová.

Tá kǒo ti̱ko̱to̱ún táʼan ña̱ ndíxi na̱ xáʼa̱n kán ni saáví va̱ʼava ku̱ʼún xíʼinndi̱. Kǒo xíniñúʼu kundixiyó ti̱ko̱to̱ xa̱áví á ña̱ yaʼviví ña̱ va̱ʼa koo limpioyó nani ná kǒo yaku̱a̱vaña.

• ¿Ndachun ndáyáʼviní ña̱ kundixi viíyó tá ku̱a̱ʼa̱nyó nu̱ú ndásakáʼnuyó Ndióxi̱?

• ¿Ndáa texto ña̱ Biblia chíndeé miíyó ña̱ va̱ʼa ndakaxinyó ti̱ko̱to̱ ndáaña kundixiyó?

Tá káʼvi iin na̱ testigo Jehová xíʼún, sana xa̱káʼvi kueún xa̱ʼa ña̱ sakuaʼandó. Ta saátu tá ku̱a̱ʼa̱nyó veʼe nu̱ú ndásakáʼnuyó Ndióxi̱ siʼna sakuaʼa kueeyó saá ku̱ʼu̱nyó chi saá kúú ña̱ va̱ʼaka kunda̱a̱-iniyó xa̱ʼa ña̱ ka̱ʼa̱nna. Ta kutu̱ʼvakaún tá ná kaʼvi ni̱ʼún ta kǒo sándákoún keʼún ña̱yóʼo.

Ndakanixi̱níún míí kaʼviún ta ndáa ki̱vi̱ kaʼviún. ¿Ndáa hora kúúña kǒoka chiñu nu̱ún tasaá kúú ña̱ va̱ʼa kaʼviún? ¿Á tá xi̱ta̱a̱n tá kúma̱níka kixaʼún kachíñún? ¿Á tá ñuú tá xi̱naki̱si ndiʼi na̱ va̱lí se̱ʼún? Tá kǒo tíempoún ña̱ kaʼviún, miíún kúú na̱ xíni nda̱saa tíempo kivi kaʼviún soo ná kǒo sándakoún ña̱ kaʼviún. Nandukú nu̱ú kaʼviún nu̱ú kǒo ni iinña sandíʼi-iniún soo tá túun tele, á radio á telefeno xíniñúʼu ndaʼvaúnña. Tá siʼnaka ná ka̱ʼún xíʼin Jehová saá kixaʼún kaʼviún, ña̱yóʼo chindeé yóʼó ña̱ kǒo kúndi̱ʼi̱ka-iniún xa̱ʼa inka ña̱ʼa tasaá kúúña va̱ʼa ndakanixi̱níún xa̱ʼa ña̱ kaʼviún nu̱ú Tu̱ʼun Ndióxi̱ (Filipenses 4:6, 7).

Kaʼyí tu̱ʼun ña̱ va̱xi nu̱ú tutuún ña̱ kúni̱ún ka̱ʼún. Siʼna kotoún ndáa ña̱ʼa káʼa̱n ña̱ káʼviún yóʼo xa̱ʼa, ta nda̱saa ndákiʼin táʼan iin iin párrafo xíʼinña, ta nda̱saa ndákiʼin táʼan iin iin na̱ʼná ña̱ va̱xi nu̱úña xíʼinña, ta kototún nda̱saa ndákiʼin táʼan ña̱ ndákatu̱ʼunna nda̱a̱ nu̱ú ndíʼi xíʼin ña̱ kaʼviún. Tándi̱ʼi kaʼviún iin iin párrafo ña̱ va̱ʼa kunda̱a̱-iniún míí va̱xi ña̱ va̱ʼa ka̱ʼún tá ná nda̱katu̱ʼunna yóʼó xíʼin iin iin ña̱ va̱xi ka̱ʼa̱ párrafo. Nandukú nu̱ú Bibliaún texto ña̱ kǒo va̱xi ña̱ káʼa̱n nu̱ú párrafo ña̱ káʼviún ña̱kán va̱ʼa kuniún nda̱saa ndákiʼin táʼanña xíʼin ña̱ káʼviún (Hechos 17:11). Ña̱ va̱ʼa ndakuiún ña̱ va̱xi ka̱ʼa̱ párrafo kaʼyíña nu̱ú tutuún ña̱kán va̱ʼa ndakaʼún xa̱ʼaña tá ná xa̱a̱ún nu̱ú ndátakayó. Tasaá, va̱ʼa ndaniʼún ndaʼa̱ún tá kúni̱ún ndakuiún ña̱ nda̱katu̱ʼunna kán ta kivi ka̱ʼún ña̱ xa̱ndíka̱a̱ xi̱níún ta loʼova ña̱ ka̱ʼún.

Tá ná kaʼviún xa̱ʼa ña̱ káʼa̱nna u̱na̱ tá u̱na̱ ki̱vi̱ nu̱ú ndátakayó ña̱ sákuaʼayó xa̱ʼa Ndióxi̱ saá kúúña va̱ʼa sakuaʼakaún xa̱ʼa ña̱ sánáʼa̱ tu̱ʼun Ndióxi̱ (Mateo 13:51, 52).

• ¿Ndáaña keʼún ña̱ va̱ʼa sakuaʼún xa̱ʼa ña̱ kaʼviyó nu̱ú ndátakayó ña̱ sákuaʼayó xa̱ʼa Ndióxi̱?

• ¿Ndáaña va̱ʼa keʼún ña̱ va̱ʼa ndakuiún tá ndátakayó ña̱ sákuaʼayó xa̱ʼa Ndióxi̱?

Tíempo xi̱naʼáví xi̱kuni Jehová ña̱ ndatakana xíʼin na̱ veʼena ña̱ sakuaʼana xa̱ʼara tasaá va̱ʼaka kutáʼanna xíʼinra ta va̱ʼa kundoona xíʼin na̱ veʼena (Deuteronomio 6:6, 7). Xa̱ʼa ña̱yóʼo ndi̱ʼi̱ na̱ testigo Jehová távándi̱ tíempondi̱ ña̱ ndásakáʼnundi̱ Ndióxi̱ xíʼin na̱ veʼendi̱ u̱na̱ tá u̱na̱ ki̱vi̱, ta káʼa̱nndi̱ xa̱ʼa ña̱ va̱ʼa chindeé iin iinndi̱ xíʼin na̱ veʼendi̱ ta kúsi̱íní-inindi̱ ña̱ ndátakandi̱. Nda̱a̱ na̱ mituʼun va̱ʼa tavána tíempona ña̱ va̱ʼa kaʼvina Biblia tasaá va̱ʼa sakuaʼakana xa̱ʼa ña̱ kúni̱na kunda̱a̱-inina.

Ña̱ va̱ʼa kuyatinkandi̱ nu̱ú Jehová. “Kuyatindó nu̱ú Ndióxi̱, ta kuyatinra nu̱úndó.” (Santiago 4:8.) Tá ná kaʼviyó tu̱ʼunra ña̱ Biblia saá kúúña xa̱a̱yó kunda̱a̱ va̱ʼaka-iniyó xa̱ʼara. Iin ña̱ chindeé yóʼó ña̱ va̱ʼa ndasakáʼnún Ndióxi̱ xíʼin na̱ veʼún kúúña, kaʼviún capítulo ña̱ Biblia ña̱ káʼvina u̱na̱ tá u̱na̱ ki̱vi̱ ña̱ va̱xi nu̱ú tutu Ña̱ Kéʼé na̱ Ndásakáʼnu Ndióxi̱. Ta iin iindó kivi kaʼvindó iin capítulo á iin táʼvi ña̱ capítulo, tándi̱ʼi kivi natúʼunndó xa̱ʼa ña̱ sa̱kuaʼandó nu̱úña.

Ña̱ va̱ʼa kútáʼankandi̱ xíʼin na̱ veʼendi̱. Na̱ íyo se̱ʼe xíʼin na̱ kǒo se̱ʼe va̱ʼaka ndákutáʼanna xíʼin táʼanna tá káʼvina Biblia. Tá ki̱vi̱ káʼvina Biblia ná kusi̱í-inina xíʼin táʼanna ña̱kán va̱ʼa u̱na̱ ta u̱na̱ ki̱vi̱ kundatuna ña̱yóʼo. Na̱ íyo se̱ʼe ná kotona nda̱saa ku̱i̱ya̱ ndíka̱a̱ se̱ʼena tasaá va̱ʼa ndaka̱xinna ña̱ va̱xi nu̱ú La Atalaya xíʼin ¡Despertad! ña̱ kaʼvina xíʼinna. Va̱ʼa kiʼvituna nu̱ú páginandi̱, jw.org/jw-mxg. Va̱ʼatu ki̱ʼvina nu̱ú ña̱ JW Broadcasting (tv.jw.org) ta natúʼunna xa̱ʼaña xíʼin na̱ veʼena. Ta kivi natúʼunna xíʼinna xa̱ʼa tu̱ndóʼo ña̱ yáʼana ti̱xin escuela ta ndáa ña̱ va̱ʼa keʼéna tasaá ya̱ʼana nu̱ú tu̱ndóʼo yóʼo. Kivitu sakuaʼana katana yaa xíʼin se̱ʼena ña̱ xítana tá ku̱a̱ʼa̱nna veʼe nu̱ú ndásakáʼnuna Ndióxi̱, tándi̱ʼi ka̱ʼvina, nda̱a̱ kivi koʼona ti̱kui̱í vi̱xi̱ á kuxuna á kaxína iin ña̱ʼa loʼo.

Tíempo ña̱ xíniñúʼuyó u̱na̱ tá u̱na̱ ki̱vi̱ ña̱ ndásakáʼnuyó Ndióxi̱ xíʼin na̱ veʼeyó ña̱yóʼo chíndeéña miíyó ña̱ kusi̱í va̱ʼaka iniyó sakuaʼayó xa̱ʼa Biblia, ta ku̱a̱ʼáka ña̱ va̱ʼa taxi Ndióxi̱ ndaʼa̱yó tá ná keʼéyóña (Salmo 1:1-3).

• ¿Ndachun távándi̱ tíempo ña̱ ndásakáʼnundi̱ Ndióxi̱ xíʼin na̱ veʼendi̱?

• ¿Ndáaña keʼé na̱ íyo se̱ʼe ña̱ va̱ʼa kusi̱íka-inina ña̱kán kundatuna ña̱yóʼo u̱na̱ ta u̱na̱ ki̱vi̱?

Koto kusi̱íkaví-ini na̱ va̱xi nu̱ú na̱ʼná yóʼo. Chi ni̱xa̱ʼa̱nna nu̱ú ndátaka ku̱a̱ʼándi̱ ña̱ ndásakáʼnundi̱ Ndióxi̱. Na̱ xi̱ndoo tá ya̱chi na̱ xi̱ndasakáʼnu Ndióxi̱, xa̱ʼndara chiñu nu̱úna ña̱ ná ndakutáʼanna u̱ni̱ yichi̱ ña̱ nu̱ú ku̱i̱ya̱ ña̱ ndasakáʼnunara, tasaá ndi̱ʼi̱ kúsi̱íní-inindi̱ ña̱ ndátakandi̱ ña̱ ndásakáʼnundi̱ Ndióxi̱ (Deuteronomio 16:16). Ku̱i̱ya̱ tá ku̱i̱ya̱ u̱ni̱ yichi̱ ndátakandi̱ ndásakáʼnundi̱ Ndióxi̱, u̱vi̱ asamblea ña̱ xíyo iin ki̱vi̱ ta inkaka ña̱ u̱ni̱ ki̱vi̱. ¿Ndáaña va̱ʼa ndákiʼindi̱ xa̱ʼa ña̱ ndátakandi̱ yóʼo?

Chíndeéña miíndi̱ ña̱ ná kutáʼan va̱ʼakandi̱ xíʼin na̱ káʼvi xíʼinndi̱. Na̱ ñuu Israel xi̱kusi̱íkaví-inina ña̱ xi̱ndatakana asamblea ña̱ xi̱ndasakáʼnuna Jehová, ta saátu ndi̱ʼi̱ kúsi̱íkaví-inindi̱ tá ndátaka ku̱a̱ʼándi̱ ña̱ ndásakáʼnundi̱ra (Salmo 26:12, nota ña̱ Biblia; 111:1). Chi tá ndátaka ku̱a̱ʼándi̱ nda̱a̱ xáa̱ndi̱ xínindi̱ na̱ ñanindi̱ á na̱ ku̱ʼvandi̱ na̱ inka ñuu. Tá káʼñu ndákutáʼanndi̱ ña̱ kuxundi̱ ta ña̱yóʼo chíndeéña ndi̱ʼi̱ ña̱ va̱ʼaka xáa̱ndi̱ xínitáʼandi̱ (Hechos 2:42). Nu̱ú ndátakandi̱ yóʼo kivi kuniún ndiʼindi̱ ma̱ní táʼandi̱ (1 Pedro 2:17).

Chíndeéña miíndi̱ ña̱ sákuaʼa va̱ʼakandi̱ xa̱ʼa Ndióxi̱. Na̱ ñuu Israel tá xi̱ndatakana ña̱ ndasakáʼnuna Ndióxi̱ ña̱yóʼo xi̱chindeé miína chi xi̱kunda̱a̱ va̱ʼaka inina xíʼin tu̱ʼun Ndióxi̱ (Nehemías 8:8, 12). Saátu miíndi̱ ndiʼi ña̱ sákuaʼandi̱ nu̱ú ndátakandi̱ ndáyáʼviña nu̱úndi̱. Chi tá iin iin ña̱ sákuaʼandi̱ nu̱ú Biblia va̱xiña. Ta kán yáʼa na̱ ñanindi̱ káʼa̱nndosóna á savana náʼa̱na sava ña̱ʼa nu̱úndi̱ ta ña̱yóʼo chíndeéña miíndi̱ ña̱ sakuaʼandi̱ keʼéndi̱ ña̱ kúni̱ Ndióxi̱. Ta sava ñanindi̱ á ku̱ʼvandi̱ ku̱a̱ʼání tu̱ndóʼo yáʼana nu̱u̱, tá xíniso̱ʼondi̱ ña̱ nátúʼunna ña̱ kúchiñuna yáʼana nu̱ú tu̱ndóʼo va̱ʼaní chíndeéña miíndi̱. Tá ndátakandi̱ ña̱ ndásakáʼnundi̱ Ndióxi̱ ña̱ asamblea ña̱ u̱ni̱ ki̱vi̱, saá kúú ña̱ xítondeʼéndi̱ nu̱ú kána na̱ yiví na̱ ndátavá ña̱ va̱xi ti̱xin tu̱ʼun Ndióxi̱ sava ndíxina ti̱ko̱to̱ ña̱ xi̱ndixina xi̱naʼá ta ku̱a̱ʼání ña̱ sákuaʼandi̱ xa̱ʼa ña̱yóʼo. U̱ni̱ saá yichi̱ ña̱ ndátakandi̱ nu̱ú ku̱i̱ya̱ ña̱ ndásakáʼnundi̱ Ndióxi̱, yóʼo ndákuchi na̱ ndinuʼu-ini kúni̱ kachíñuka nu̱ú Jehová.

• ¿Ndachun kúsi̱íní-inindi̱ ña̱ ndátakandi̱ u̱ni̱ saá yichi̱ nu̱ú ku̱i̱ya̱ ña̱ ndásakáʼnundi̱ Ndióxi̱?

• ¿Ndáaña va̱ʼa ndakiʼún tá ná ku̱ʼún xíʼindi̱ yóʼo?

Tá xa̱ni̱nu̱mí kuvi Jesús ni̱ka̱ʼa̱nra tu̱ʼun yóʼo: “Tu̱ʼun va̱ʼa ña̱ káʼa̱n xa̱ʼa ta̱ Kaʼndachíñu, ku̱ʼu̱nña nu̱ú ndiʼi na̱ ñuu ña̱ va̱ʼa kunda̱a̱-ini ndiʼi na̱ yiví, ta saá kixa̱a̱ ña̱ ndiʼi-xa̱ʼa [na̱] ñuyǐví” (Mateo 24:14). ¿Ndáaña xíniñúʼu keʼéyó ña̱ va̱ʼa ná xa̱a̱ tu̱ʼun Ndióxi̱ nu̱ú ndiʼi na̱ yiví ña̱ iníísaá ñuyǐví? Kundiku̱nyó yichi̱ ña̱ sa̱ndákoo Jesús nu̱úyó tá ni̱xi̱yora nu̱ú Ñuʼú yóʼo (Lucas 8:1).

Ku̱a̱ʼa̱nndi̱ nátúʼunndi̱ xíʼin na̱ yiví veʼe tá veʼena. Jesús sa̱náʼa̱ra na̱ xi̱ndiku̱n sa̱tára ña̱ ná ku̱ʼu̱nna natúʼunna xa̱ʼa tu̱ʼun Ndióxi̱ ña̱ veʼe tá veʼe na̱ yiví (Mateo 10:11-13; Hechos 5:42; 20:20). Ta ni̱ka̱ʼa̱n káxira xíʼin na̱ xi̱ndiku̱n sa̱tára ndáa míí kúú nu̱ú ku̱ʼu̱nna natúʼunna xíʼin na̱ yiví xa̱ʼa Ndióxi̱ (Mateo 10:5, 6; 2 Corintios 10:13). Saátu vitin kǒo xíka ti̱ka̱na̱ndi̱ náʼa̱ túni̱va nu̱ú xíkandi̱. Ta iin iin congregación xa̱a̱ íyo nu̱ú ku̱a̱ʼa̱nna nátúʼunna xa̱ʼa tu̱ʼun Ndióxi̱. Tasaá kúú ña̱ va̱ʼa sáxi̱nundi̱ chiñu ña̱ sa̱ndákoo Jesús nu̱úndi̱ ña̱ ku̱ʼu̱ndi̱ natúʼunndi̱ xa̱ʼa tu̱ʼun Ndióxi̱ iníísaá ñuyǐví (Hechos 10:42).

Nda̱a̱ ndáaka nu̱ú ndóo na̱ yiví ku̱a̱ʼa̱nndi̱ nátúʼunndi̱ xíʼinna. Jesús chi̱nu̱úra yichi̱ nu̱úyó xa̱ʼa ña̱ na̱túʼunra xíʼin na̱ yiví yu̱ʼu̱ mar, yu̱ʼu̱ pozo ti̱kui̱í, nu̱ú ya̱ʼvi chi ndiʼina na̱túʼunra xíʼin (Marcos 4:1; Juan 4:5-15). Saátu miíndi̱ vitin nátúʼundi̱ xíʼin na̱ yiví ndáaka míí nu̱ú ku̱a̱ʼa̱nndi̱: á kalle kúúña á nu̱ú ya̱ʼvi kúúña ta sava nátúʼundi̱ xíʼinna xíʼin teléfono. Tá kíʼinndi̱ kuenta ña̱ kivi natúʼundi̱ xíʼin na̱ káchíñu xíʼinndi̱, na̱ káʼvi xíʼinndi̱ veʼe escuela, na̱ táʼanndi̱, na̱ íyo yatin xíʼinndi̱ ta nátúʼunndi̱ xíʼinna. Xa̱ʼa ña̱yóʼo kúúña yáʼa millón na̱ yiví xa̱ku̱a̱ʼa̱n kúnda̱a̱-ini xa̱ʼa Ndióxi̱ (Salmo 96:2).

Ndakanixi̱ní xa̱ʼa na̱ kúni̱ún natúʼún xíʼin xa̱ʼa tu̱ʼun Ndióxi̱ xíʼin xa̱ʼa ña̱ va̱ʼa ni̱ʼina chí nu̱únínu, natúʼún xíʼinna xa̱ʼa ña̱yóʼo.

• ¿Ndáa tu̱ʼun va̱ʼa kúúña xíniñúʼu natúʼunyó xa̱ʼa?

• ¿Ndáaña kéʼé ndi̱ʼi̱ na̱ testigo Jehová tasaá ndíku̱ndi̱ yichi̱ ña̱ sa̱ndákoo Jesús nu̱úndi̱?

Tu̱ʼun precursor kúni̱ kachiña iin na̱ xúúná yichi̱ xa̱á nu̱ú inka na̱ va̱xi chí sa̱tána. Kivi ka̱ʼa̱nyó xa̱ʼa Jesús ña̱ xi̱kuura iin precursor, saáchi ki̱xira nu̱ú Ñuʼú yóʼo na̱túʼunra xa̱ʼa Yivára tasaá xu̱unara yichi̱ nu̱úyó ña̱ va̱ʼa ka̱kuyó (Mateo 20:28). Tíempo vitin ndíku̱ndi̱ yichi̱ra, ña̱kán ku̱a̱ʼání tíempo xíniñúʼundi̱ ña̱ xíkandi̱ nátúʼunndi̱ xíʼin na̱ yiví xa̱ʼa Ndióxi̱ (Mateo 28:19, 20). Sava na̱ ñanindi̱ á ku̱ʼvandi̱ xáa̱na ndúúna precursor.

Na̱ precursor kúú na̱ kéé ni̱ʼi̱ nátúʼun xa̱ʼa Ndióxi̱. Ndiʼi na̱ kúú testigo Jehová xíkana nátúʼunna xa̱ʼa Ndióxi̱ xíʼin na̱ yiví. Soo savana chíka̱a̱na ndée ña̱ xáa̱na kúúna precursor regular ta u̱ni̱ xiko u̱xu̱ hora káchíñuna nu̱ú Ndióxi̱ ña̱ iin yo̱o. Ta xa̱ʼa ña̱yóʼo loʼo tíempo káchíñuna ña̱ va̱ʼa kuxuna. Ta savana kúúna precursor especial ta na̱yóʼo ku̱a̱ʼa̱nna sava nda̱a̱ inka ñuu nu̱ú xíniñúʼu sanáʼa̱kana na̱ yiví xa̱ʼa Ndióxi̱, ta na̱yóʼo iin ciento o̱ko̱ u̱xu̱ hora káchíñuna nu̱ú Ndióxi̱ á sava nda̱a̱ ku̱a̱ʼáka hora káchíñuna ña̱ iin yo̱o. Na̱ kúú precursor yóʼo loʼova ndíʼi̱-inina xa̱ʼa chiñu miína, chiñu Ndióxi̱va ndíʼi̱ka-inina xa̱ʼa, chi xíni̱na Jehová kúú ta kíʼin kuenta xíʼinna (Mateo 6:31-33; 1 Timoteo 6:6-8). Na̱ kǒo kúú precursor regular á especial kiviva kuuna precursor auxiliar ta na̱yóʼo sava káchíñuna o̱ko̱ u̱xu̱ á u̱vi̱ xiko u̱xu̱ hora nu̱ú Ndióxi̱ ña̱ iin yo̱o.

Xa̱ʼa ña̱ kúni̱na Ndióxi̱ xíʼin na̱ yiví ña̱kán kúúna precursor. Jesús tá ki̱xira nu̱ú Ñuʼú yóʼo xi̱ndíʼi̱–inira xa̱ʼa na̱ yiví. Tasaá miíndi̱ ndíʼi̱-inindi̱ xa̱ʼa na̱ yiví chi kǒo xíni̱na xa̱ʼa Ndióxi̱ (Marcos 6:34). Soo kúnda̱a̱-inindi̱ tá ná natúʼunndi̱ xíʼinna xa̱ʼa Ndióxi̱ ña̱yóʼo chíndeé miína ña̱ va̱ʼa koona tíempo vitin ta saátu chí nu̱únínu. Ta xa̱ʼa ña̱ ndíʼi̱-ini na̱ precursor xa̱ʼa na̱ yiví ña̱kán xíniñúʼuna tíempona xíʼin ndéena ña̱ va̱ʼa chíndeéna na̱ yiví ña̱ ná kunda̱a̱-inina xa̱ʼa Ndióxi̱ (Mateo 22:39; 1 Tesalonicenses 2:8). Ta ña̱yóʼo chíndeéka na̱ precursor yóʼo ña̱ va̱ʼa kuyatinkana nu̱ú Ndióxi̱, ta si̱íka ndóona (Hechos 20:35).

• ¿Ndáaña kúni̱ kachi tu̱ʼun precursor?

• ¿Ndachun kíxaʼá savana ndúúna precursor?

Na̱ testigo Jehová míí ña̱ ndiʼi va̱ʼaka inina xa̱ʼa kúúña sakuaʼa va̱ʼana xa̱ʼa Ndióxi̱. Íyo nina escuela nu̱ú káʼvi na̱ xíka níʼi nátúʼun xa̱ʼa Ndióxi̱ veʼe tá veʼe tá kúni̱na sakuaʼakana ña̱ va̱ʼa keʼéna chiñu Ndióxi̱ (2 Timoteo 4:5).

Escuela nu̱ú Sákuaʼa na̱ Precursor. Tá xa̱ni̱xi̱nu iin ku̱i̱ya̱ ña̱ kúúna precursor káʼyi̱ ki̱vi̱na ña̱ ku̱ʼu̱nna kaʼvina i̱ñu̱ ki̱vi̱ Veʼe nu̱ú Ndákutáʼanyó ña̱ sákuaʼayó xa̱ʼa Ndióxi̱. Íyo escuela yóʼo xa̱ʼa ña̱ va̱ʼa chindeéña na̱ precursor ña̱ kuyatinkana nu̱ú Ndióxi ta va̱ʼaka natúʼunna xa̱ʼara, xíʼin ña̱ va̱ása ndakoona ña̱ kúúna precursor.

Escuela nu̱ú Sákuaʼa na̱ Nátúʼun xa̱ʼa ña̱ Kaʼndachíñu Ndióxi̱. U̱vi̱ yo̱o xíyo ña̱yóʼo, ta chíndeéña na̱ xa̱kúú precursor na̱ kúni̱ ku̱ʼu̱n inka ñuu sanáʼa̱na na̱ yiví. Ku̱a̱ʼá na̱ testigo Jehová kéʼé ña̱yóʼo tasáa ndíku̱nna yichi̱ ta̱ Jesús chi ta̱yóʼo na̱túʼunníra xa̱ʼa Ndióxi̱ tá ni̱xi̱yora nu̱ú Ñuʼú, ta ka̱ʼa̱nna tu̱ʼun ña̱ ni̱ka̱ʼa̱nra: “Yóʼo íyo yi̱ʼi̱, yi̱ʼi̱ chindaʼún ku̱ʼu̱n” (Isaías 6:8; Juan 7:29). Ku̱a̱ʼa̱nna ñuu ña̱ kíndoo xíka nu̱ú íyona. Ta xíniñúʼu sakuaʼana koona tá íyo na̱ yiví kán, sakuaʼana kuxuna ña̱ xíxina kán á ni yiʼní á vi̱xin saá kundoona. Sana nda̱a̱ sakuaʼana inka tu̱ʼun ña̱ va̱ʼa natúʼunna xíʼinna xa̱ʼa Ndióxi̱. Escuela yóʼo chíndeéña ta̱a kuáa̱n, ná ñaʼá kuáa̱n, na̱ ti̱ndaʼa̱, ta ndíka̱a̱na 23 ku̱i̱ya̱ nda̱a̱ 65 ku̱i̱ya̱ ña̱ sakuaʼana kundiʼika-inina xa̱ʼa chiñu Ndióxi̱ nu̱ú ku̱ʼu̱nna kán. Ta chíndeétuñana ña̱ va̱ʼaka ná kuniñúʼu na̱ ñuu Ndióxi na̱yóʼo nda̱a̱ ndáaka mií nu̱ú xíniñúʼunana.

Escuela ña̱ Galaad ña̱ Watchtower nu̱ú Sákuaʼana xa̱ʼa Biblia. Tá ki̱xaʼá ña̱ escuela ña̱ ku̱i̱ya̱ 1943 nda̱a̱ vitin xa̱yáʼa u̱na̱ mil na̱ misionero kána ti̱xin ña̱yóʼo. Ta chíndaʼánana ku̱a̱ʼa̱n xíkana sanáʼa̱na na̱ yiví nda̱a̱ nu̱ú ndíʼi ñuyǐví (Hechos 13:47). Tá ni̱xa̱a̱na ñuu Perú, ni iin congregación kǒo níxi̱yo, ta vitin xa̱yáʼa 1000 congregación íyo. Tá ni̱xa̱a̱ na̱ misionero ña̱ ñuu Japón ni su̱ví u̱xu̱ví Testigo níxíyo ñuu kán, ta vitin xa̱yáʼa u̱vi̱ ciento mil na̱ íyo. Escuela yóʼo u̱ʼu̱n yo̱o xíyoña ta nina tu̱ʼun Ndióxi̱ káʼvina. Na̱ kúú precursor especial, na̱ misionero, na̱ káchiñu Betel, na̱ xi̱ku̱aʼa na̱ xíka xítoniʼni congregación, na̱yóʼo kúúna káʼa̱nna xíʼin ña̱ va̱ʼa ku̱ʼu̱nna escuela yóʼo, ta chíndeéñana ña̱ va̱ʼaka kachíñuna xíʼin na̱ ñuu Ndióxi̱.

• ¿Ndáa xa̱ʼa kúúña íyo Escuela nu̱ú Sákuaʼa na̱ Precursor?

• ¿Ndáana va̱ʼa ku̱ʼu̱n Escuela nu̱ú Sákuaʼa na̱ Nátúʼun xa̱ʼa ña̱ Kaʼndachíñu Ndióxi̱?