Iin ña̱ ni̱xi̱yo se̱ʼé kúni̱yó kunda̱a̱-iniyó xa̱ʼa

¿Á xa̱káʼa̱n ya̱ana xa̱ʼa so̱ʼún?...a Na̱yóʼo na̱ ni̱ka̱ʼa̱n se̱ʼé kúúna xíʼún. Ña̱ Biblia káʼa̱nña xa̱ʼa iin ña̱ ni̱xi̱yo se̱ʼé, ta káʼa̱nna ña̱ yi̱i̱ xíʼinña. ¿Ndachun kúúña ña̱ yi̱i̱? Saáchi Ndióxi̱ iin ta̱ yi̱i̱ kúúra ña̱kán kúúña ña̱ yi̱i̱, ta kúútuña ña̱ se̱ʼé chi tá ya̱chi ni iinna kǒo níkunda̱a̱-ini xa̱ʼaña ni na̱ ángel va̱ása níkunda̱a̱-ini xa̱ʼaña. Nda̱a̱ na̱yóʼo xi̱kuni̱na kunda̱a̱-inina xa̱ʼa ña̱yóʼo. ¿Á kúni̱ún kunda̱a̱-iniún ndáaña kúú ña̱ ni̱xi̱yo se̱ʼé xa̱ʼa?...

Xi̱naʼáví, Ndióxi̱ i̱xava̱ʼara u̱vi̱ na̱ yiví na̱ xi̱ndoo nu̱ú ñuʼú livi. ¿Á xíni̱ún nda̱saa xi̱nanína?... Ta̱a xi̱naní Adán ta ñá ñaʼá xi̱naní Eva. Na̱yóʼo ni̱xi̱yona nu̱ú ñuʼú Edén. Liviní ni̱xi̱yoña chi mií Ndióxi̱ ta̱xiña ndaʼa̱na. Ndióxi̱ xi̱kuni̱ra ña̱ miína xíʼin se̱ʼena ndasalivina iníísaá nu̱ú Ñuʼú ta nduuña táki̱ʼva ni̱xi̱yo ñuʼú ña̱ xi̱naní Edén. Xi̱kuni̱ra ndiʼina koo nu̱ú ñuʼú livi yóʼo ndiʼi tiempo. Soo kǒo níxi̱yona ndiʼi tiempo nu̱úña. ¿Ndachun kǒo níxi̱yona ndiʼi tiempo?

Saáchi ta̱ Adán xíʼin ñá Eva kǒo níkandíxana ña̱ ni̱ka̱ʼa̱n Ndióxi̱, xa̱ʼa ña̱yóʼo va̱ása ndóoyó nu̱ú iin ñuʼú livi vitin. Soo, Ndióxi̱ ni̱ka̱ʼa̱nra kixa̱a̱ iin ki̱vi̱ ña̱ iníísaá nu̱ú Ñuʼú yóʼo nduliviña. Ta ndiʼina si̱í koona ndiʼi tiempo. ¿Ndáaña keʼéra ña̱ va̱ʼa xi̱nu ña̱ ni̱ka̱ʼa̱nra? Ku̱a̱ʼání tiempo ni iin na̱ kǒo níkunda̱a̱-ini xa̱ʼaña. Ña̱ ni̱xi̱yo se̱ʼé xi̱kuuña.

Soo kuee kuee ni̱xa̱a̱na na̱kunda̱a̱-inina xa̱ʼaña. Tá ki̱xi ta̱ Jesús nu̱ú Ñuʼú sa̱náʼa̱ra na̱ yiví xa̱ʼa ña̱ ni̱xi̱yo se̱ʼé yóʼo. Ni̱ka̱ʼa̱nra xíʼinna xa̱ʼa ña̱ kaʼndachíñu Ndióxi̱. Sa̱náʼa̱rana ña̱ ná ka̱ʼa̱nna xíʼin Ndióxi̱ ña̱ ná kixa̱a̱ iin ki̱vi̱ ña̱ kaʼndachíñura, chi saá kúúña ndulivi iníísaá nu̱ú Ñuʼú yóʼo.

¿Á kǒo kútóún xa̱ún koún nu̱ú iin ñuʼú livi?... Ndakaʼún chi na̱ yiví na̱ xíniso̱ʼo ña̱ káʼa̱n Ndióxi̱ kúú na̱ kundoo nu̱úña. Ña̱ Biblia káʼa̱nña xa̱ʼa ku̱a̱ʼá na̱ xi̱niso̱ʼo ña̱ ni̱ka̱ʼa̱n Jehová. Nu̱ú tutu yóʼo sakuaʼayó xa̱ʼa savana ta ndáaña keʼéyó ña̱ va̱ʼa xa̱a̱yó kooyó táki̱ʼva ni̱xi̱yo na̱yóʼo. ¿Á kúni̱ún sakuaʼún xa̱ʼana?...