Ña̱ ni̱ka̱ʼa̱nra nu̱ú iin yuku̱

Tá nda̱ka̱xinra 12 na̱ koo apóstolra, ta̱ Jesús nu̱ura nu̱ú yuku̱ ta̱ ku̱a̱ʼa̱nra nu̱ú ndátaka ku̱a̱ʼání na̱ yiví. Na̱ ke̱e chí ñuu Galilea, Judea, Tiro, Sidón, Siria xíʼin chí inka táʼvi yu̱ta Jordán. Ki̱xa̱a̱na xíʼin na̱ kúúmií kue̱ʼe̱ á na̱ kúúmií ta̱chí ndi̱va̱ʼa, ta̱ Jesús sa̱ndáʼarana. Tasaá xi̱koora nu̱ú yuku̱ ta ki̱xaʼára káʼa̱nra xíʼinna. Ni̱ka̱ʼa̱nra ndáaña xíniñúʼu keʼéyó tá kúni̱yó kooyó migo Ndióxi̱. Xíniñúʼu kunda̱a̱-iniyó ña̱ xíniñúʼuyó ña̱ kuniʼi Ndióxi̱ yichi̱ nu̱úyó, ta sakuaʼayó kuʼvi̱-iniyó kuniyóra. Va̱ása kívi kuʼvi̱-iniyó kuniyó Ndióxi̱ tá va̱ása kúʼvi̱-iniyó xíniyó inkana. Xíniñúʼu va̱ʼa koo iniyó xíʼin ndiʼina, nda̱a̱ na̱ sáa̱-ini xíni miíyó.

Ta̱ Jesús ni̱ka̱ʼa̱nra: “Su̱ví nda̱saa na̱ migondó kuʼvi̱-inindó kunindó, xíniñúʼu kuʼvi̱-inindó kunindó na̱ sáa̱-ini xíni ndóʼó ta koo káʼnu-inindó xa̱ʼana. Tá iinna sáa̱-ini xíni yóʼó, ka̱ʼa̱n xíʼinna ña̱ koo káʼnu-inina xa̱ʼún. Vií keʼún xíʼinna nda̱a̱ tá kúni̱ún keʼéna xíʼún”.

Ta̱ Jesús va̱ʼaní consejo ta̱xira xa̱ʼa ña̱ʼa ña̱ kúúmiíyó. Ni̱ka̱ʼa̱nra: “Ndáyáʼvika ña̱ kooyó migo Jehová nu̱ú ña̱ koo ku̱a̱ʼá xu̱ʼúnyó. Chi iin ta̱ kui̱ʼná kivi kiʼinra xu̱ʼún, soo va̱ása kivi ixakuíʼnana ña̱ kuún migo Ndióxi̱. Xa̱ʼa ña̱yóʼo va̱ása kundi̱ʼi̱-iniún xa̱ʼa ña̱ kuxún, ña̱ koʼún xíʼin ti̱ko̱to̱ ña̱ kundixiún. Koto tí saa válí. Ndiʼi tiempo ndáa Ndióxi̱ tíyóʼo ta táxira ña̱ xíxirí. Ni ná ndi̱ʼi-iniún, va̱ása kutakún ku̱a̱ʼá tiempo. Ndakaʼún: Jehová xíni̱vara ndáa ña̱ʼa xíniñúʼún”.

Ni iin na̱ yiví ta̱ʼán kuniso̱ʼona iin na̱ ka̱ʼa̱n nda̱a̱ táki̱ʼva ni̱ka̱ʼa̱n ta̱ Jesús. Na̱ su̱tu̱ vatá va̱ása nísanáʼa̱na táki̱ʼva sa̱náʼa̱ ta̱ Jesús. ¿Nda̱chun va̱ʼaní sa̱náʼa̱ ta̱ Jesús? Saáchi ndiʼi ña̱ sa̱náʼa̱ra Ndióxi̱ ni̱ka̱ʼa̱nña xíʼinra.