Lia mu Ciuana, 9 ya Abril
Tata, nji zumbangeye nove ivene na vumpahu vuze nja kele navuo.—Yoa. 17:5.
Yehova ua zumbangeyele Yesu mu njila ka lavelele. Omo Yehova ua sanguile Yesu, “ua mu hakele ku vukama vua ku hiana cikuma” muilu. Kaha ua mu hanene naua muono ka ue ku nonga ua mu cimbembesi, cikuavo naua ikeye ua livangele ku tambula muono ua cifua eci! (Filp. 2:9; 1 Tim. 6:16) Mua vusunga Yehova ua lunguisile Yesu mu njila ya ku komouesa omo lia ku ononoka ceni! Vika vi hasa ku tu kuasa ku tonda lutsimo ku meso a Yehova kati a vakua mavu? Ku tantekeya nguetu Yehova ke ku suva vakua ku mu pangela na mutima uose kaha ue ku va lunguisa, vintsimbu via vingi mu vinjila ka va lavelelele. Mua vusunga netu na tu tulikila vivezikiso ka tua lavelelele ku lutue! Mu ntsimbu ino, omo tu hita mu visoti na vitanga mu mavu ano a ku pihia, tua pande ku vuluka ngecize ano mavu a li na ku hita. Kaha lutsimo luao luose naluo lu ka hita. (1 Yoa. 2:17) Tatetu ua cilemo, Yehova, ka ka suvu vipanga vietu na cilemo ci tuli na ku muesa ku lizina lieni muomu ka puile “mukua vuhenge.” Mua vusunga a ka tu muesa ngecize tue ku mu ya ku mutima mu njila ka tua singaniekele! (VaHe. 6:10) w18.07 8 ¶17-18
Ku Tanda Mbimbiliya mu Ntsimbu ya Mulalelo: (Via Lingikile ku Mutana: 15 ya Nisane) Mateo 27:62-66 (Via Lingikile mu Nima ya ku Lahuka ca Litangua: 16 ya Nisane) Mako 16:1
Lia mu Citanu, 10 ya Abril
Nji va vundila . . . linga vakevo vose va pue umo; ngue omo ove, Tata, u li muli ange, nange muli ove.—Yoa. 17:20, 21.
Yesu ua lisosomuene na ku likata ca vandongesi veni ha ntsimbu ya via-ku-lia via ku manusuila via lile navo. Mua vundilile navo ua handekele ngueni ua tondele vandongesi veni va pue umo ni va likuate kumo ngeci mua likatele ikeye na Ise. Muomu nga vandongesi va Yesu va likuatele kumo, eci ce ku puile vukaleho vua ku muesa ngecize cili vene Yehova ua tumine Yesu ha mavu. Muomu vantu nga va nongonuene vandongesi va vusunga va Yesu ku cilemo ci va limuesele umo na mukuavo, kaha eci cilemo ce ku vuezele ku ku likata cavo. (Yoa. 13:34, 35) Vika via lingisile Yesu ku handeka cikuma via ku likuata kumo? Muomu ua muene ngecize vapostolo vene ka va likuatele kumo mu vutuntu. Ca ku muenako, vapostolo va licokotele ku tuala ha iya “va ka tumbula ua kama ha kati kavo.” (Luka 22:24-27; Mako 9:33, 34) Ntsimbu ikuavo, Tiango na Yoano va vundilile Yesu a ka va hake ha vihela via seho ya kama mu Vuangana vua muilu, ku mukulo-kulo ueni mpundu.—Mako 10:35-40. w18.06 9 ¶1-2
Ku Tanda Mbimbiliya mu Ntsimbu ya Mulalelo: (Via Lingikile ku Mutana: 16 ya Nisane) Mako 16:2-8
Sapalalo, 11 ya Abril
Yala a ka seza ise na naye na ku kakatela mpuevo yeni: kaha va ka pua ntsitu imo lika.—Njen. 2:24.
Yehova ua tonda vaze va liambata va limuese cilemo ka ce ku hua. (Mat. 19:3-6) Vupangala vua pua vumo vua milonga ya kama vua hasa ku linga muntu. Ngeci mukemuo, Lisiko lia vu 7 lia ku Masiko Likumi lia vindikile vupangala. (Ndeu. 5:18) Vupangala vua pua vupi vua kama “kuli Njambi” kaha vue ku muesa vukenia vua kama ku mukua ndzivo. (Njen. 39:7-9) Kaha muntu nga va na mu ende vungungu ku mukua ndzivo yeni ku vavala ku mutima ce ku tundisaho ce ku ambata miaka ya yingi. Cikuavo naua Yehova ua haka seho ku vana. Yehova ua sikile visemi ngueni ka va pandele lika ku tondela viuma vi va tondeka vana via ku muvila vunoni na viuma via mu lutsilielo. Visemi va pandele ku pangesa nkala vukovelelo mu ku kuasa vana vavo ku tantekeya Masiko a Yehova na ku mu lema. (Ndeu. 6:6-9; 7:13) Visemi ka va pandele ku mona vana vavo ngue viteli via ngoco na ku va yandesa, houe, vunoni va pandele ku va mona ngue vuana vua ku tunda kuli Yehova na ku va lela vuino.—Visa. 127:3. w19.02 21 ¶5, 7