Nopa carta tlen kintitlanilijkej Cristo itokilijkauaj tlen Galacia

5 Cristo techmakixtik para ayokmo tielisej tlatekipanouanij. Uajka xiitstokaj intemachmej uan amo xijkauakaj sampa ma inmechchiuakaj intlatekipanouanij.

2 Xikitakaj, na Pablo niinmechiljuia, tlaj inmochiuilisej circuncisión,* uajka amo inmechpaleuis tlen Cristo kichijki. 3 Sampa nikiniljuia nochi katli mochiuiliaj circuncisión para moneki kichiuasej nochi tlen kiijtoua iTlanauatil Moisés. 4 Inmojuantij, katli inkichiuaj kampeka inelisej inxitlauakej pampa inkineltokaj nopa tlanauatili, inmouejkatlalijtokej tlen Cristo. Ayokmo inkikajtokej ma kinexti ueyi iyolo ika inmojuantij.* 5 Pero tojuantij, ika ichikaualis Dios,* tijchiaj ika nochi toyolo ma tielikaj tixitlauakej pampa titlaneltokaj. 6 Pampa kema tiitstokej iuaya Cristo Jesús, amo techpaleuia tlaj timochiuiliaj circuncisión o tlaj amo timochiuiliaj. Tlen kena techpaleuia eli kema titlaneltokaj, uan nopa tijnextiaj kema titeikneliaj.

7 Inmojuantij kuali inyauiyayaj ipan nopa ojtli tlen melauak.* ¿Ajkia inmechtsakuilik para ayokmo xijneltokakaj tlen melauak? 8 Nopa tlalnamikilistli amo uala tlen Dios* katli inmechnotsa. 9 Se kentsi levadura* kisoneua nochi harina. 10 Nimotemachia ipan inmojuantij katli initstokej iuaya toTeko, para amo inmoiljuisej seyok tlamantli. Pero katli kichiua xijpiakaj kuesoli, amo kenijki ajkia eli, temachtli kitlatsakuiltisej kej kinamiki. 11 Pero na noikniuaj, tlaj nojua nikijtojtinemiskia moneki timochiuilisej circuncisión,* uajka amo aka nechtlaijiyouiltiskia. Tlaj nijchiuaskia nopa, uajka amo aka kiyolkokoskia pampa nitlamachtia Jesús kimiktijkej ipan se kuauitl.* 12 Kuali eliskia ma mokaparokaj* nopa tlakamej katli kinekij inmechkuapolosej.

13 Noikniuaj, inmojuantij inmechnotskej para ayokmo inelisej intlatekipanouanij. Pero amo ximoiljuikaj pampa nama inmajkajtokej uelis inkichiuasej tlen inmotlakayo kinekis, más kuali ximotekipanokaj se ika seyok pampa inmoikneliaj. 14 Pampa nochi iTlanauatil Moisés moaxitia ika* ni tlanauatili: “Xikinikneli sekinok kej ta timoiknelia”. 15 Maske inkimatij nopa, tlaj nojua inmotlankechiaj uan inmokuajkuaj* se ika seyok, ximomokuitlauikaj para amo inmotsontlamiltisej.

16 Yeka, niinmechiljuia ni: nojua ximonejnemiltikaj kej ichikaualis Dios* inmechyakana, uan kiampa amo inkichiuasej yon se tlamantli tlen inmotlakayo kinektok. 17 Pampa tlen totlakayo kinektok, kiijixnamiki ichikaualis Dios, uan ichikaualis Dios kiixnamiki tlen totlakayo kinektok. Ichikaualis Dios uan tlen totlakayo kinektok amo mouikaj, yeka inmojuantij amo inkichiuaj tlen inkinekij inkichiuasej. 18 Uan nojkia, tlaj ichikaualis Dios inmechyakana, uajka ayokmo inmoyakanaj ika nopa tlanauatili.

19 Nima nesi tlen kichiuaj katli kitokiliaj tlen inintlakayo kineki, pampa auilnemij,* kichiuaj tlen tlauel sokiyo, amo pinauaj tlajtlakolchiuasej,* 20 kinueyichiuaj dioses uan tlaixkopinkayomej, tetlajchiuiaj,* amo kuali mouikaj ika sekinok, tlateuiaj, tekualankaitaj, mosisiniaj, mokualaniaj, moxelouaj, kitokiliaj inintlamachtil maseualmej,* 21 tekokoliaj,* moiuintiaj, kichiuaj iljuitl kampa san tlemach tlachiuaj uan sekinok tlamantli kej nopa. Sampa niinmechiljuia kej ya niinmechiljuijtoya, katli kichiuaj ni tlamantli amo kiselisej iTlanauatijkayo Dios.

22 Pero katli kinyakana ichikaualis Dios teikneliaj, yolpakij, kipiaj tlaseuilistli, kipiaj ininyolo, techiuiliaj tlen kuali, kipiaj kuali ininyolo, tlaneltokaj, 23 yolyamanikej,* uelij monauatiaj.* Amo onka yon se tlanauatili tlen uelis kintsakuilis para amo ma kichiuakaj nopa tlamantli. 24 Nojkia, katli elij iaxkauaj Cristo kejuak kilavosmintokej ipan kuauitl tlen kiyoltilana inintlakayo uan tlen kinektokej kichiuasej.

25 Tlaj timonejnemiltiaj kej ichikaualis Dios techyakana, uajka nojkia ma timonejnemiltikaj xitlauak uan ma tijkauakaj ichikaualis Dios nojua ma techyakanto. 26 Amo ma timoueyimatikaj, amo ma timotlanikaj se ika seyok uan amo ma timokokolikaj.