Nopa carta tlen kintitlanilijkej Cristo itokilijkauaj tlen Roma

9 Nikijtoua tlen melauak pampa nijtekipanoua Cristo; amo niistlakati uan notlalnamikilis tlen moyakana ika ichikaualis Dios* kinextia 2 para tlauel nimokuesoua uan mojmostla nimoyolkokoua. 3 Pampa nijnekiskia na ma nechtlatsakuiltikaj, tlaj nopa ueliskia kinpaleuis noikniuaj judíos katli amo kineltokaj Cristo. 4 Inijuantij elij nopa israeleuanij katli Dios* kinselik kej ikoneuaj, kinuejkapantlalik, kichijki se tlajtolsenkauali ininuaya uan kinmakak nopa Tlanauatili. Ya kinkajki inijuantij ma kitekipanokaj uan kintenkauilik kinteochiuaskia. 5 Inijuantij elij ininteipaixuiuaj totatauaj katli uejkajkia itstoyaj, uan Cristo nojkia elki ininteipaixui. Dios katli nochi kinauatia, ma kiuejkapantlalikaj para nochipa. Amén.*

6 Pero, nopa amo kiijtosneki itlajtol Dios amo moaxitijtok. Pampa amo nochi iteipaixuiuaj Israel, nelnelia elij israeleuanij. 7 Nojkia, maske elij iteipaixuiuaj Abrahán amo nochi nelnelia elij ikoneuaj, pampa pano kej ijkuilijtok: “Mokoneuaj ualasej ika Isaac”. 8 Ni kineki kiijtos para ikoneuaj Abrahán amo nelnelia elij ikoneuaj Dios. Más kuali, katli tlakatkej pampa Dios kiampa kitenkajtoya, inijuantij nelnelia elij ikoneuaj Abrahán. 9 Pampa ya ni tlen Dios kitenkajki: “Ne seyok xiuitl kej ni tonali, niualas uan Sara kipias se ipilkone”. 10 Uan amo san ipan nopa tonali panok, nojkia kema Rebeca kinpixki kuatemej* tlen totata Isaac katli uejkajkia itstoya. 11 Pampa kema Dios mosentlalijtok kitlapejpenis se akajya, amo kitlapejpenia ika tlen nopa maseuali kichiua, Dios kitlapejpenia pampa ya kiampa kineki. Yeka, kema nopa kuatemej ayamo tlakatiyayaj uan ayamo kichiuayayaj tlen kuali o tlen amo kuali, 12 kiiljuik Rebeca: “Katli achtoui tlakatis kitekipanos katli teipa tlakatis”. 13 Sanse kej ijkuilijtok: “Nikiknelik Jacob, pero nijkualankaitak Esaú”.

14 Uajka, ¿tlake tikijtosej? ¿Kichiua Dios tlen amo xitlauak? ¡Amo! 15 Pampa kiiljuia Moisés: “Nijtlasojtlas katli na nijneki nijtlasojtlas, uan nikiknelis* katli na nijneki nikiknelis”. 16 Uajka Dios amo kitlapejpenia se akajya pampa nopa maseuali ya nopa kinektok o pampa tlauel kichiua kampeka, Dios kitlapejpenia pampa tetlasojtla. 17 Pampa ipan iTlajkuilol, Dios kiiljuik faraón: “Nimitskajtok xiitsto para nijchiuas ni tlamantli: para nijnextis nochikaualis ipan ta, uan para ma tematiltikaj notoka ipan nochi Tlaltipaktli”. 18 Uajka Dios kitlasojtla katli kineki kitlasojtlas, pero katli ya kineki, kikaua ma mochiua tochontik.*

19 Pero uelis ta tinechiljuis: “¿Kenke Dios nojua kintlajtlakoltia maseualmej? ¿Uelis se akajya kitsakuilis tlen kitlapejpenijtok kichiuas?”. 20 Pero ta, san tlen ueltsi tlakatl, ¿tlake tlanauatili tijpia para tijnajnankilis Dios? ¿Uelis nopa komitl kiiljuis nopa chachapalchijketl “¿Kenke kiampa tinechchijchijki?”? 21 ¿Amo inkimatij para nopa chachapalchijketl kipia tlanauatili para kichijchiuas se komitl tlen motekiuia kema iljuichiuaj uan ika nopa sokitl nojkia kichijchiuas seyok komitl tlen san kej ueli kitekiuisej? 22 Dios nojkia kiampa kichiua. Ya kinejki kinextis ikualankayo uan iueyichikaualis ika maseualmej katli kichiuaj tlen amo kuali. Pero ya kipia iyolo uan kinijiyouia katli kikualankamakatokej uan elij kej komitl tlen kinamiki kintsontlamiltis. 23 Ya kichijki nopa para kinnextilis iueyitilis katli kintlasojtla, katli elij kej komitl tlen ipa moiljuijtoya kinuejkapantlalis, 24 kiijtosneki tojuantij katli technotski, uan amo san judíos, nojkia katli amo elij judíos. 25 Pano kej ya kiijtoua ipan libro tlen Oseas: “Nikijtos para nama elij noaltepe katli amo itstokej ipan noaltepe, uan nikijtos nikiknelia nopa siuatl katli amo nikikneliyaya. 26 Uan kampa kiniljuik ‘inmojuantij amo inelij noaxkauaj’, nopaya kiijtosej para elij ikoneuaj Dios katli nochipa itstok”.

27 Nojkia, Isaías chikauak kiijtok tlen Israel: “Maske israeleuanij elisej miakej kej nopa xali tlen onka ipan mar, san se keskij momanauisej. 28 Pampa Jehová* kintlajtolsenkauas katli itstokej ipan Tlaltipaktli uan nopa nimantsi kitlamichiuas”. 29 Uan kej Isaías nojkia kiijtok: “Tlaj Jehová* katli kinyakana iángeles ipan iluikak amo kikajtoskia ma itstokaj se keskij tokoneuaj, uajka techpanotoskia kej kinpanok altepemej Sodoma uan Gomorra”.

30 Uajka, ¿tlake tikijtosej? Inijuantij katli amo elij judíos tlaneltokatokej, uan yeka nama Dios kinita xitlauakej maske inijuantij amo kitemoliyayaj ma kinita xitlauakej. 31 Uan maske israeleuanij kichiuayayaj kampeka kineltokasej se tlanauatili tlen ika kinitaskiaj xitlauakej, amo uelkej kineltokaj. 32 ¿Kenke amo? Pampa inijuantij moiljuiyayaj eliskiaj xitlauakej ika tlen kichiuaskiaj uan amo pampa tlaneltokaskiaj. Motepotlamijkej ika nopa “tetl tlen kichiua ma motepotlamikaj”; 33 sanse kej ijkuilijtok: “¡Xikitakaj! Ipan Sion nijtlalia se tetl tlen kichiua maseualmej ma motepotlamikaj uan se ueyi tetl tlen kinojtsakua, pero katli tlaneltokas ipan ya, amo mopinaualtis”.*