Tlen kiijkuilok Marcos

7 Uajka, nopa fariseos* uan se keskij escribas* katli ualajtoyaj tlen Jerusalén, mosentilijkej inechka Jesús. 2 Uan kiitakej se keskij itokilijkauaj tlakuayayaj masokiyojkej, kineki kiijtos, amo momajtekijtoyaj.* 3 (Nopa fariseos uan nochi nopa sekinok judíos amo tlakuaj tlaj amo momajtekiaj hasta ininajkolmolik,* pampa tlauel kitlepanitaj tlen tlamachtiyayaj* katli uejkajkia itstoyaj. 4 Uan kema tlakuepiliaj tiankis,* amo tlakuaj tlaj amo momajtekiaj. Nojkia tlauel kineltokaj miak tlamantli tlen uejkajkia momajtoyaj kichiuaj, kej kema kiakechiaj* copas, xarro uan tlamantli tlachijchiuali ika cobre). 5 Yeka nopa fariseos uan escribas kitlatsintokijkej: “¿Kenke motokilijkauaj amo kichiuaj tlen techmachtijkej katli uejkajkia itstoyaj uan tlakuaj maske masokiyojkej?”. 6 Ya kiniljuik: “Inkipiaj ome inmoxayak, yeka teokamanalojketl* Isaías kiijtok tlen inmojuantij: ‘Ni maseualmej san ika ininkamak* nechueyichiuaj, pero ininyolo amo eltok nonechka. 7 San tlapik nechueyichiuaj, pampa tlamachtiaj inintlanauatiljuaj maseualmej’. 8 Inmojuantij inkiuejkamajkauaj itlanauatiljuaj Dios* uan san inkitokiliaj tlen maseualmej momajtokej kichiuaj”.

9 Nojua kiniljuik: “¡Kuali inkimatij kenijkatsa inkiuejkamajkauasej itlanauatiljuaj Dios para nojua inkitokilijtosej tlen inmomajtokej inkichiuaj! 10 Pampa Moisés kiijtok: ‘Xijtlepanita motata uan monana’, uan ‘Katli kitlaijiljuis* itata o inana moneki kimiktisej’. 11 Pero inmojuantij inkiijtouaj: ‘Se akajya uelis kiiljuis itata o inana: “Nochi tlen nijpixtok tlen ika ueliskia nimitspaleuis, eli se regalo tlen nijmaktilijtok Dios” ’.* 12 Uan kiampa ayokmo inkikauaj ma kichiua yon se tlamantli tlen ika kipaleuis itata o inana. 13 Kiampa, kema inkitokiliaj tlen intlamachtiaj,* inkichiuaj itlanauatiljuaj Dios ayokmo ma kipia ipati. Uan nojkia inkichiuaj sekinok tlamantli kej ni”. 14 Uajka sampa kiniljuik nopa miakej maseualmej ma monechkauikaj uan kiijtok: “Xinechtlakakilikaj nochi inmojuantij, uan xijkuamachilikaj tlake kiijtosneki tlen niinmechiljuia. 15 Tlen se maseuali kikua amo kisokiuia, pero tlen kisa ikamako, ya nopa kisokiuia”. 16 *

17 Kema Jesús kinkajtejki nopa miakej maseualmej, kalajki ipan se kali uan itokilijkauaj pejkej kitlatsintokiaj tlen nopa neskayotl. 18 Ya kinnankilik: “¿Inmojuantij nojkia ayamo inkikuamachiliaj? ¿Amo inkiitaj tlen kalaki ipan ikamak se akajya amo ya nopa kisokiuia? 19 Pampa amo kalaki ipan iyolo, kalaki ipan iijti, uan teipa kikixtia tlen itlakayo”. Ika nopa, Jesús kiijtok nochi tlen tijkuaj amo eli sokiyo. 20 Uan nojkia kiijtok: “Tlen kisa ipan ikamak se akajya, ya nopa tlen kisokiuia. 21 Pampa ininyolijtik maseualmej kisa tlalnamikilistli tlen amo kuali: auilnemij,* tlachtekij, temiktiaj, 22 momekatiaj, tlauel kinekij kipiasej miak tlamantli, kichiuaj tlen amo kuali, tlakajkayauaj, amo pinauaj tlajtlakolchiuasej,* tekokoliaj,* tlaixpanoj ika tlen kiijtouaj, moueyimatij uan mouiuinekij. 23 Nochi ni tlamantli tlen amo kuali, kisa iyolijtik se maseuali uan kisokiuia”.

24 Teipa kistejki nopaya uan yajki ipan tlali Tiro uan Sidón. Kalajki ipan se kali pampa amo kinekiyaya ma kimatikaj tlaj nopaya itstoya, pero maseualmej kimatkej. 25 San onasito, se siuatl katli isiuapil kipixtoya se amo kuali ajakatl,* kimatki Jesús nopaya itstoya. Uajka, ualajki uan motlankuaketski iixpa. 26 Nopa siuatl kamanaltiyaya griego uan euayaya Fenicia, ipan tlali Siria. Miakpa kitlajtlanik ma kikixti nopa amo kuali ajakatl tlen kipixtoya isiuapil. 27 Pero Jesús kiiljuik: “Achtoui xikinkaua ma ixuikaj konemej, pampa amo kinamiki tikinkuilisej ininpantsi para tikinmakasej pilchichitsitsij”. 28 Nopa siuatl kinankilik: “Nopa nelia noTeko, pero pilchichitsitsij katli itstokej mesajtantitla* nojkia kikuaj panpayaxtli tlen konemej kitepeuaj”. 29 Uajka ya kiiljuik: “Xia ika kuali. Pampa tikijtok nopa tlajtoli, nopa amo kuali ajakatl ya kiski tlen mosiuapil”. 30 Uajka yajki ichaj, uan kipantito isiuapil motektoya ipan cama, uan nopa amo kuali ajakatl ya kistoya.

31 Uajka Jesús kistejki tlali Tiro uan asito mar tlen Galilea, yajki ika Sidón uan tlali Decápolis.* 32 Uan kiualikilijkej se katli amo tlakakiyaya uan nojkia amo ueliyaya kuali kamanalti, uan kitlajtlanijkej ma kitlali imax ipani. 33 Ya kiuikak iyoka, kampa amo aka itstoya. Kitlalik imakpil ipan inakas nopa tlakatl, teipa chajchak* uan kiitskilik inenepil. 34 Uajka ajkotlachixki, chikauak tlaijiyokuik uan kiiljuik “Éffatha”, kineki kiijtos “Ximotlapo”. 35 Nimantsi nakastlapojki, uelki kitekiuia inenepil uan pejki kuali kamanalti. 36 Uajka Jesús kinnauatik maseualmej amo aka ma kiiljuikaj. Pero kema más kinnauatiyaya, inijuantij más tepouiliyayaj. 37 Uan tlauel mosentlachiliyayaj uan kiijtouayayaj: “Nochi kuali kichiua. ¡Hasta kichiua ma tlakakikaj katli amo tlakakij uan ma kamanaltikaj katli nonotsitsij!”.*