Nopa ompa carta tlen kititlanilijkej Timoteo

3 Pero xijmajto ipan itlamia tonali, tlen mochijtos elis tlauel fiero uan ouij para kiijiyouisej. 2 Pampa maseualmej san inijuantij moiknelisej; tlauel kipatiitasej tomij, mouejkapantlalisej, moueyimatisej, tlaixpanosej ika tlen kiijtosej, amo kinneltokasej inintatauaj, amo tetlaskamatisej uan tetlauelkauasej, 3 amo nelia teiknelisej, amo kinekisej kisenkauasej se kuesoli ininuaya sekinok, teistlakauisej, amo monauatisej,* mosisinisej, amo kipatiitasej tlen kuali, 4 kinchiuilisej ininuampoyouaj* tlen amo kuali uan elisej tochontikej, tlauel motlepanitasej, más kiiknelisej tlen ika moyolpakiltisej uan amo Dios* 5 uan san tlachiuasej kitekipanouaj Dios ika nochi ininyolo pero ika tlen kichiuasej kinextisej amo nelia. Ximouejkatlali tlen inijuantij. 6 Ipan ni grupo itstokej tlakamej katli amo kipiaj kuali ininyolo, katli kalakij techaj uan kinyoltilanaj siuamej katli amo tetikej. Ni siuamej kipiaj miak tlajtlakoli uan san kikauaj ma kinyoltilana tlen kinektokej, 7 uan nochipa momachtijtokej pero amo kema ueltokej kuali kimatij nopa tlamachtili tlen melauak.

8 Sanse kej Janes uan Jambres kiijixnamijkej Moisés, inijuantij nojkia kiijixnamikij tlen melauak. Elij tlakamej katli nelnelia amo kuali inintlalnamikilis uan amo kinamiki Dios kuali ma kinita pampa amo kitokiliaj tlen tijneltokaj. 9 Pero amo nochipa kiampa kichijtosej, pampa nochi kiitasej tlen kichiuaj eli se uiuiyotl, sanse kej panok ika nopa omej tlakamej Janes uan Jambres. 10 Pero ta kuali tijtokilijtok tlen nitlamachtia, kej nimonejnemiltia, tlen nimosentlalijtok nijchiuas ipan nonemilis, kej nitlaneltoka, kej nijnextia nijpia noyolo, kej niteiknelia uan kej nikijiyouijtok nochi, 11 uan tijmati nopa tlatsakuiltili uan nopa tlaijiyouilistli tlen nechpanok, kej tlen nikixnamijki ipan Antioquía, Iconio uan Listra. Nikijiyouik nochi nopa tlatsakuiltili, uan toTeko nechmakixtik* ipan nochi tlen nechpanok. 12 Kena, nochi katli kinekisej kitekipanosej Dios ika nochi ininyolo kej itokilijkauaj Cristo Jesús, nojkia kintlatsakuiltisej. 13 Pero katli kichiuaj tlen tlauel amo kuali uan katli tlakajkayauaj nojua kichijtiasej tlen achi más amo kuali, tlakajkayauasej uan inijuantij nojkia kinkajkayauasej.

14 Pero ta nojua ximotlatskilijto ipan tlen timomachtik uan tlen mitspaleuijkej xijneltoka, pampa tijmati ajkia inijuantij mitsmachtijkej 15 uan desde kema titlakatki* tikixmati nopa tlatsejtseloltik tlajkuiloli, tlen uelis mitspaleuis xijpia nopa tlalnamikilistli tlen moneki para timomakixtis pampa titlaneltoka ipan Cristo Jesús. 16 Nochi Tlajkuiloli moijkuilok pampa Dios ika ichikaualis* kichijki ma moijkuilo uan techpaleuia para titlamachtisej, titetlakaualtisej, titetlalnamiktisej* uan para technextilis kenijkatsa kinamiki tijchiuasej tlen xitlauak,* 17 uan kiampa itekipanojka Dios kuali mokualchijchijtos uan kuali kimatis kenijkatsa kichiuas nochi tlamantli tlen kuali.