Hechos (Tlen apóstoles kichijkej)

2 Kema mochiuayaya Iljuitl tlen Pentecostés, nochi sansejko itstoyaj. 2 Uan ipan iluikak sanima* kakistik se tlamantli kej kema chikauak tlaajaka, uan kalijtik kampa moseuijtoyaj chikauak kakistik. 3 Uan kiitakej monextiko piltlilelemektsitsij tlen moxexelojtiajki uan motlalito ipan sejse katli nopaya itstoyaj. 4 Nochi kiselijkej ichikaualis Dios* uan pejkej kamanaltij ipan miak tlajtoli kej ichikaualis Dios kichiuayaya ma kamanaltikaj.

5 Ipan nopa tonali, ipan Jerusalén itstoyaj judíos katli tlauel tlaneltokayayaj uan euayayaj ipan nochi altepemej tlen onka ipan ni Tlaltipaktli. 6 Yeka, kema kakistik nopa tlamantli, mosentilijkej miakej maseualmej katli amo kimatiyayaj tlake panotoya pampa kinkakiyayaj sejse itokilijka Jesús kamanaltiyaya kej inijuantij. 7 Nelnelia tlauel mosentlachilijtoyaj uan kiijtouayayaj: “Xikinitakaj nochi ni katli kamanaltitokej. Nochi euaj Galilea, ¿axke? 8 Uajka, ¿kenke sejse tlen tojuantij tijkakij kamanaltij totlajtol? 9 Nikaj itstokej katli euaj Partia, Media uan Elam, Mesopotamia, Judea uan Capadocia, Ponto uan tlen tlali Asia, 10 katli euaj Frigia uan Panfilia, Egipto uan pilaltepetsitsij tlen tlali Libia nechka Cirene, paxalouanij katli ualajkej tlen Roma, katli elij judíos uan katli mochijkej judíos, 11 katli euaj Creta uan Arabia, nochi tojuantij tikinkakij kamanaltij ipan sejse totlajtol nopa uejueyi tlamantli tlen Dios* kichiua”. 12 Nochi tlauel mosentlachilijtoyaj uan amo kimatiyayaj tlake panoyaya, uan moiljuiyayaj se ika seyok: “¿Tlake kiijtosneki nochi ni tlen pano?”. 13 Pero sekinok kinpinajtiyayaj uan kiijtouayayaj: “Kiitokej* miak vino tlen yankuik”.

14 Uajka Pedro moketski ininuaya nopa 11 apóstoles, uan chikauak kiniljuik nopa maseualmej: “Tlakamej katli ineuaj Judea uan nochi katli initstokej Jerusalén, kuali xijtlakakilikaj tlen nikijtos uan xijmatikaj ni. 15 Ni maseualmej amo iuintitokej kej inmoiljuiaj, pampa sanok eli nechka las nueve ika ijnalok.* 16 Tlen pano ya nopa tlen Dios kiiljuik teokamanalojketl* Joel: 17 ‘Dios kiijtoua: “Ipan itlamia tonali nijtitlanis se kentsi nochikaualis* ipan nochi maseualmej. Inmokoneuaj uan inmoichpokauaj tematiltisej tlen nikiniljuis,* inmotelpokauaj kinnextilisej tlanextilili uan katli ya uejueyij kiitasej tlamantli ipan temiktli, 18 uan nojkia ipan notlatekipanojkauaj, tlakamej uan siuamej, nijtitlanis se kentsi nochikaualis ipan nopa tonali, uan inijuantij tematiltisej tlen nikiniljuis. 19 Nijchiuas uejueyi tlamantli ipan iluikak uan milagros* ipan Tlaltipaktli: onkas estli, tlitl uan miak poktli. 20 Tonati yayauias uan metstli mokuepas estli kema ayamo asitos nopa ueyi tonali tlen iaxka Jehová,* nopa tonali kema kinextis iueyitilis. 21 Uan nochi katli kitsajtsilisej itoka Jehová,* momakixtisej”’.*

22 ”Tlakamej katli ineuaj Israel, xijkakikaj ni: Dios xitlauak kinextik ininixpa maseualmej para kititlantoya Jesús katli euayaya Nazaret, pampa kipaleuik ma kichiua uejueyi tlamantli uan milagros kema itstoya inmouaya, kej inmojuantij inkimatij. 23 Dios ipa kimatiyaya Jesús kiitskiskiaj,* pampa ya kiampa kiixtlalijtoya. Inmojuantij inkikuapilojkej Jesús ipan se kuauitl kema inkinmaktilijkej ininmako katli kiixpanoj Tlanauatili uan inkimiktijkej. 24 Pero Dios kiyolkuik kema kimakixtik tlen mikilistli,* pampa mikilistli amo kipixki chikaualistli para kipixtos Jesús. 25 Pampa David kiijtok tlen Cristo: ‘Nochipa nijpixtok Jehová* noixpa, pampa ya itstok ika nomanejmak para amo tleno ma nechkueso. 26 Yeka tlauel niyolpajki uan nikamanaltik ika miak pakilistli. Uan na nochipa nimotemachijtos ipan ta, 27 pampa amo tinechkauas ipan Mijkaostotl,* uan amo tijkauas ma nempoliui* notlakayo pampa amo nimitstlauelkaua. 28 Tinechnextilijtok nopa ojtli tlen teuika kampa nemilistli. Tijchiuas tlauel ma niyolpaki moixpa’.

29 ”Noikniuaj, xinechkauakaj xitlauak ma niinmechkamanaljui tlen totata David katli uejkajkia itstoya, katli mijki uan kitlalpachojkej, uan ipan ni tonali nopa mijkaostotl kampa kitlalijkej nojua eltok. 30 Pampa ya eliyaya teokamanalojketl uan kimatiyaya Dios kitenkauilijtoya kichiuaskia se tlen ikoneuaj ma moseui ipan iueyi silla, 31 kiitak Cristo moyolkuiskia uan kamanaltik tlen nopa tlamantli, uan kiijtok para amo kitlauelkajkej ipan Mijkaostotl* yon nempolijki* itlakayo. 32 Dios kiyolkuik ni Jesús, uan nochi tojuantij tikitakej. 33 Yeka, pampa yaya tlejkotok iluikak uan itstok ika imanejmak Dios, uan pampa toTata kimakak ichikaualis* tlen kitenkauilijtoya, nama Jesús kititlanki tlen inkiitaj uan tlen inkikakij. 34 Pampa maske David amo tlejkok iluikak, ya kiijtoua: ‘Jehová* kiiljuik noTeko: “Ximoseui nomanejmak 35 hasta kema nikintlalis mokualankaitakauaj kej pilbancojtsi kampa tijtlalis moikxi”’. 36 Yeka, nochi israeleuanij kuali ma kimatikaj para ni Jesús, katli inmojuantij inkimiktijkej ipan se kuauitl, Dios kichijki ma eli toTeko uan nojkia Cristo”.

37 Kema kikajkej nopa, tlauel moyolkokojkej uan kintlatsintokijkej Pedro uan nopa sekinok apóstoles: “Toikniuaj, ¿tlake moneki tijchiuasej?”. 38 Pedro kiniljuik: “Ximoyolkuepakaj, uan sejse tlen inmojuantij ma moatsonpoliuilti ipan itoka Jesucristo para inmechtlapojpoljuisej inmotlajtlakoljuaj, uan inkiselisej ichikaualis Dios kej se regalo. 39 Pampa Dios kitenkajki inmechmakaskia ichikaualis* inmojuantij uan inmokoneuaj, uan nojkia nochi katli itstokej uejka, nochi katli Jehová* toDios kinnotsas”. 40 Uan ya kiniljuik sekinok tlamantli para senkistok kinixtomilis nopa kuali tlamachtili, uan kintlajtolmakak: “Ximouejkatlalikaj tlen ni maseualmej katli kichiuaj tlen amo kuali uan kiampa amo inmechtsontlamiltisej”. 41 Uajka moatsonpoliuiltijkej katli kiselijkej ika pakilistli tlen kiniljuijtoya. Ipan nopa tonali, se 3 mil maseualmej mochijkej Jesús itokilijkauaj. 42 Uan mosentlalijkej kiyekosej tlen apóstoles tlamachtiyayaj, itstosej sansejko, tlakuasej sansejko uan momaijtosej.*

43 Nojkia, nochi maseualmej pejkej kimakasij Dios, uan apóstoles pejkej kichiuaj miak milagros uan uejueyi tlamantli. 44 Nochi katli peuayayaj tlaneltokaj itstoyaj sansejko uan momajmakayayaj nochi tlen kipiayayaj, 45 kinamakayayaj inintlal uan tlen kipixtoyaj, uan nopa tomij tlen kisentiliyayaj kinmakayayaj katli kinpolouayaya. 46 Mojmostla yauiyayaj ipan teokali uan nopaya itstoyaj sansejko. Tlakuayayaj ininchaj sekinok uan momajmakayayaj tlakualistli ika miak pakilistli uan ika nochi ininyolo, 47 kiueyichiuayayaj Dios uan kichiuayayaj nochi maseualmej kuali ma kinitakaj. Uan nojkia, Jehová* mojmostla kichiuayaya ma momiakilikaj tlaneltokanij katli momakixtiskiaj.