Nopa achtoui carta tlen kintitlanilijkej Cristo itokilijkauaj tlen Tesalónica

1 Na niPablo, ininuaya Silvano* uan Timoteo, tiinmechtlajkuiljuiliaj katli initstokej ipan tlanechikoli tlen eltok ipan altepetl Tesalónica, katli initstokej sansejko iuaya toTata Dios* uan toTeko Jesucristo:

Dios ma kinexti ueyi iyolo ika inmojuantij* uan ma inmechmaka tlaseuilistli.

2 Nochipa tijtlaskamatiliaj Dios kema timomaijtouaj* uan tiinmechilnamikij, 3 pampa iixpa toDios uan toTata, ajachika* tikilnamikij nopa tekitl tlen inkichijkej pampa intlaneltokaj uan inteikneliaj, uan tikilnamikij kenijkatsa inkiijiyouijkej nochi tlaouijkayotl pampa inmotemachiaj ipan toTeko Jesucristo. 4 Noikniuaj katli Dios inmechiknelia, tojuantij tijmatij para yaya inmechtlapejpenik, 5 pampa nopa kuali tlamachtili tlen titematiltiaj amo san inkimatkej ika tlen tiinmechiljuijkej, nojkia inkimatkej pampa techpaleuik ichikaualis Dios.* Tojuantij temachtli tijmatiyayaj tiinmechmatiltijkej tlen melauak, uan tlen tiinmechiljuijkej tlauel inmechpaleuijtok. Uan inmojuantij inkimatij kenijkatsa timonejnemiltijkej para tiinmechpaleuisej. 6 Nojkia, inkichijkej sanse kej tojuantij uan kej toTeko, pampa maske tlauel intlaijiyouiyayaj, inkiselijkej nopa tlamachtili ika nopa pakilistli tlen temaka ichikaualis Dios. 7 Kiampa tlen inkichijkej, kinpaleuik nochi nopa tlaneltokanij katli itstokej ipan tlali Macedonia uan tlali Acaya.

8 Uan ika tlen inkichijkej, amo san itlajtol Jehová* momoyajtok ipan Macedonia uan Acaya, nojkia ejeliuis* kimatij kenijkatsa intlaneltokaj ipan Dios, yeka amo moneki ma tiinmechiljuikaj sekinok tlamantli. 9 Pampa inijuantij nojua kamanaltij tlen nopa achtoui uelta kema timoitakej ne Tesalónica uan kenijkatsa inkitlauelkajkej inmodioses uan pejkej inkiueyichiuaj* Dios, para inkitekipanosej se Dios katli yoltok uan melauak, 10 uan para inkichixtosej ma uala tlen iluikak iKone, katli ya kiyolkuik; yaya Jesús katli techmakixtia tlen ikualankayo Dios tlen nechka monextis.